Jehova U Bata Kuli mu Silelezwe

ARMAGEDONI ha i ka tumbuka, Mulimu ya Maata Ote u ka bona teñi kuli batu kaufela ba ba sepahala ku yena ba “piliswa.” (Joe. 2:32) Kono niti kikuli, Jehova u batanga ku sileleza batu kwa likozi. Bakeñisa kuli “liwelu-welu la bupilo li ku [yena],” u nga batu kaufela ku ba ba butokwa, ili ba ba swanelwa ku silelezwa.—Samu 36:9.

Batanga ba Mulimu ba ba sepahala ba kwakale ne ba nga bupilo sina mwa bu ngela Jehova. Ka ku ya ka Genese 33:18, Jakobo ni lubasi lwa hae ne ba fitile “ka kozo” kwa mafelelezo a musipili wa bona o sabisa. Jakobo na sepile kuli Jehova u ka ba sileleza, kono hape na ezize se siñwi kuli a sileleze batu kaufela be ne ba zamaya ni yena. (Gen. 32:7, 8; 33:14, 15) Ka ku latelela likuka za Bibele, mwa kona ku isileleza hande ni ku sileleza ba bañwi. Ha lu boneñi mo ku latelela likuka za Bibele ku kona ku tuseza batu ba ba eza musebezi wa ku yaha Mandu A Mubuso ni misebezi ye miñwi ya buyahi ni ba ba tusa batu ba ba wezwi ki likozi.

Ze U Bulela Mulao wa Mushe ka za Silelezo

Mulao wa Mushe ne u tokwa kuli batu ba Mulimu ba latelele litaelo za silelezo. Ka mutala, Muisilaele ya na yaha ndu na tokwa ku yaha lukwakwanyana fa situwa se si patami. Bakeñisa kuli nako ye ñata batu ne ba tolanga fa lituwa ze patami za mandu a bona, makwakwa ao na ba tusa kuli ba si ke ba wela fafasi. (1 Sam. 9:26; Mat. 24:17) Haiba ku ba ni kozi bakeñisa kuli muñaa ndu na si ka latelela taelo yeo, muñaa ndu yo naa na ni mulatu ku Jehova.—Deut. 22:8.

Mulao hape ne u bonisa ze ne tokwa ku ezwa haiba limunanu li holofaza batu. Haiba poho i pumba mutu ni ku mu bulaya, muñaa yona na swanela ku i bulaya ilikuli batu ba bañwi ba silelezwe. Bakeñisa kuli muñaa yona na sa koni ku ca nama ya yona kamba ku i lekisa ku ba bañwi, ku bulaya poho yeo ne li sinyehelo ye tuna. Kono ku cwañi haiba poho ne i holofalize mutu, mi muñaa yona na si ka i kwalela mwa mulaka? Poho yeo ha ne i ka bulaya mutu yo muñwi hasamulaho, ne i ka bulaiwa hamoho ni muñaa yona. Mulao wo ne u tusa be ne ba sa tokomeli limunanu za bona ku tuhela mukwa wa bona.—Ex. 21:28, 29.

Mulao hape ne u susueza batu ku itusisa hande lisebeliso. Maisilaele ba bañata ne ba lemanga likota ka lilepe. Haiba silepe si kuleha mwa mufinyana mi si bulaya mutu ya na li bukaufi, mulemi yo na lukela ku balehela kwa munzi wa masabelo. Na swanela ku yo pila mwa munzi wo ku fitela muprisita yo muhulu a shwa, mi fo, ne ku ka talusa kuli mutu ya bulaile yo muñwi ka  ku sa lela na ka siya lubasi lwa hae ni lapa la hae ka lilimo-limo. Tuto ye ne si itutile sicaba kwa tukiso yeo kikuli bupilo ki bwa butokwa ku Jehova. Mutu ya na nga bupilo sina mwa bu ngela Mulimu na babalelanga lisebeliso za hae ni ku itusisa zona hande.—Num. 35:25; Deut. 19:4-6.

Ka yona milao yeo, Jehova na bonisize fo ku sweu kuli na bata batu ba hae ku mamela litaelo za silelezo ha ne ba li mwa mandu a bona kamba ku sili. Be ne ba bulaile kamba ku holofaza batu ba bañwi, nihaiba ka ku sa lela, ne ba na ni mulatu ku yena. Jehova ha si ka cinca ka mwa ngela taba ya silelezo. (Mala. 3:6) U sa tokwa kuli batu ba si ke ba ikolofaza kamba ku holofaza ba  bañwi. Sihulu u bata kuli lu si ke lwa holofala ha lu yaha ni ku lukisa miyaho ye lu itusisa mwa bulapeli bwa hae bwa niti.

Mu Isileleze ha mu Yaha

Lu nga kuli ki litohonolo ku yaha ni ku lukisa Mandu A Mubuso, Mandu A Mukopano, ni miyaho ya mutai. Hape ki litohonolo ku eza musebezi wa ku tusa batu ba ba wezwi ki likozi. Lu tokwa ku ba ni zibo nako kaufela kuli lu eze musebezi wa luna, nihaiba misebezi ye bunolo; hakusicwalo lwa kona ku ikolofaza kamba ku holofaza ba bañwi. (Muek. 10:9) Kaniti, haiba lu ba ni mukwa wa ku beleka ka tokomelo, lu ka pima likolofalo.

Bibele i li: “Kanya ya micaha ki maata a bona, mi bunde bwa ba bahulu ki toho ye ize pululu.” (Liprov. 20:29) Misebezi ye taata i tokwa maata a micaha. Kono babeleki ba litoho ze li pululu, ili ba ba li licaziba mwa litaba za buyahi, ba itusisanga mazoho a bona ni lisebeliso ku feleleza hande musebezi o ezizwe. Mi mane batu be se ba li basupali cwale ne ba itusisanga maata a bona ku eza misebezi ye taata ha ne ba li micaha. Haiba mu baitateli ba banca, mu talimele mo ba belekela babeleki ba ba yeziseli, mi mu latelele litaelo za bona. Haiba mwa lata ku ituta, mizwale ba ba cuukile mwa buyahi ba ka mi luta lika ze ñata. Lika zeo li kopanyeleza mwa ku itusiseza lika ze kona ku tisa kozi ni mwa ku nanulela lika  ze bukiti. Ha mu ituta ku bona, mu ka peta ze ñata mwa musebezi wa mina mi mu ka beleka ka tokomelo ni ka tabo.

Ba ba belekela ko ku yahiwa ba swanela ku tokomela ka nako kaufela. Lika li cincanga kapili. Fo ne ku si na musima ku kona ku ba ni musima cwale. Babeleki ba bañwi ba kona ku shimbulula lele, libala, kamba sikala sa mupende. Haiba mu sa tokomeli, mwa kona ku ikolofaza ka bunolo. Litaelo za silelezo hañata li bonisanga kuli babeleki ba tokwa ku itusisa lika ze ba sileleza ha ba sebeza. Mangilasi a ku sebelisa, helumenti, ni liheta za ku sebelisa li kona ku mi sileleza kwa likozi ze ñata ha mu sebeleza ko ku yahiwa. Kono mu kona feela ku silelezwa haiba mu babalela hande lika zeo ni ku itusisanga zona.

Nihaike kuli libelekiso ze ñwi li bonahala ku ba ze bunolo, lu tokwa ku ituta ni ku itwaelisa ku li sebelisa kuli lu itusise zona ka tokomelo ni ka bukwala. Haiba ha mu zibi mwa ku itusiseza sibelekiso se mu tokwa, mu bulelele muzwale ya zamaisa musebezi. U ka lukisa kuli mu lutiwe. Ku lemuha ze mu sa koni ku eza ki nto ye nde. Mane ki kwa butokwa ku ba ni mubonelo wo kuli mu si ke mwa ikolofaza ni ku holofaza ba bañwi ha mu nze mu yaha.—Liprov. 11:2.

Ha ku yahiwa, batu ba bañata ba holofalanga kabakala ku wa. Mu si ka pahama kale fa lele kamba fa kalani, mu bone teñi kuli lika zeo li iketile hande. Haiba mu belekela fa kalani kamba fa situwa, litaelo li kona ku bonisa kuli mu tokwa ku itama makanda a silelezo ni kuli kalani kamba situwa seo si be ni matiyelo fo mu kona ku swala. Haiba mu na ni lipuzo ze ama mwa ku belekela fahalimu a lika, mu buze muzwale ya okamela musebezi. *

Palo ya ba ba sebeleza Jehova ha i nze i ekezeha mwa lifasi kaufela, Mandu A Mubuso ni miyaho ye miñwi ya ku itusisa mwa bulapeli bwa niti i tokwa hahulu ku yahiwa. Ba ba okamela musebezi kwa libaka ko ku yahiwa Mandu A Mubuso ni miyaho ye miñwi ba filwe buikalabelo bwa ku sileleza lingu za Jehova ze butokwa ze zamaiswa ki bona. (Isa. 32:1, 2) Haiba mu filwe buikalabelo bwa ku zamaisa mizwale ni likaizeli ba mina ha ku yahiwa muyaho o muñwi, mu si ke mwa libala butokwa bwa silelezo. Mu bone teñi kuli sibaka si kenile mi ha ku na lika ze inzi nyambwanaleka. Ba ba tokwa ku hupuliswa mu ba taluseze mwa ku belekela ka tokomelo, mi mu eze cwalo ka musa kono ili ka ku ba koñomeka. Mu si ke mwa lumeleza banana kamba babeleki ba ba sa zibi hande musebezi ku kena mwa libaka mo ku na ni hahulu lika ze kona ku ba tahiseza likozi. Mu bonele cimo likozi ze ba kona ku talimana ni zona babeleki, mi mu ba tuse ku itukiseza ku beleka hande kuli ba si ke ba holofala. Mu hupule kuli mulelo wa luna ki ku feza musebezi ku si na likolofalo.

Mu Sebeze ka Lilato

Ku yaha Mandu A Mubuso ni miyaho ye miñwi ye itusiswa mwa bulapeli bwa niti ku kopanyeleza ku eza misebezi ye lubeta. Kabakaleo, ba ba eza misebezi ye cwalo ba swanela ku tokomela hahulu. Ka ku latelela likuka za Bibele, ku mamela litaelo za mwa ku belekela, ni ku ba ni kutwisiso, mu ka pima likozi mi mu ka sileleza ni be mu beleka ni bona kwa likozi.

Ki nto mañi ye tisa kuli lu tokomele hahulu ha lu eza misebezi ya ku yaha ilikuli ku si ke kwa ba ni likozi? Ki lilato. Kaniti, ku lata Jehova ku lu susueza ku nga bupilo ku ba bwa butokwa sina mwa bu ngela yena. Mi ku lata batu ku tisa kuli lu si ke lwa eza lika ka busafa ili ze kona ku ba holofaza. (Mat. 22:37-39) Kacwalo, ha lu ezeñi ka mo lu konela kaufela kuli lu silelezange batu be lu yaha ni bona kwa likozi.

[Litaluso za kwatasi]

[Mbokisi/Siswaniso se si fa likepe 30]

Mwa ku Itusiseza Lele ka Tokomelo

Mwa silimo sa cwanoñu fa, babeleki ba ba fitelela 160,000 mwa United States ne ba holofalile kabakala ku wa fa lele. Mi babeleki ba ba bato eza 150 ne ba shwile bakeñisa ku wa fa lele. Ku si na taba kuli mu pila kai kamba mu belekela kai, likuka ze latelela za kona ku mi tusa kuli mu si ke mwa wa ha mu itusisa lele.

◇ Mu si ke mwa itusisa lele ye si ka tiya kamba ye sinyehile, mi mu si ke mwa i lukisa. Mu i sinyeleze.

◇ Lele ni lele i na ni tikanyo ya bukiti bo i kona ku nanula. Mu tokomele kuli bukiti bwa mina ni bwa libelekiso ni lika ze mu shimbile ha bu fiteleli tikanyo ya bukiti bo i kona ku nanula lele ye mu itusisa.

◇ Mu tome lele ya mina fa sibaka se si patami hande ili se si tiile. Mu si ke mwa i toma fa sibaka fo i si ke ya ina hande, inge cwalo fa kalani kamba fahalimu a likala ni limbokisi.

◇ Nako kaufela ha mu pahama fa lele kamba ku tuluka mu si ke mwa i fulalela.

◇ Mu si ke mwa yema kamba ku ina fa mahatelo a mabeli a kwa mafelelezo a lele.

◇ Haiba mu itusisa lele kuli mu pahame kamba ku tuluka fa situwa kamba fa sibaka se siñwi se mu belekela, lele ya mina i swanela ku fitelela situwa kamba sibaka seo ka butelele bo bu eza mita i liñwi kamba ku fitelela. Kuli lele ya mina i si ke ya suta mwamulaho, mu tamele mahutu a yona kwa nto ye ñwi kamba mu beye libala fapilaa ona ni ku li kokotela. Haiba ha mu koni ku tiisa lele ya mina cwalo, mu kupe mutu yo muñwi ku mi swalela yona ha mu nze mu beleka. Mu tamele lele kwa nto ye ñwi fo i yendami kuli i si ke ya sutela kwa matuko.

◇ Mu si ke mwa beya libala fa mahatelo a lilele ze peli kuli mu belekele fa libala leo.

◇ Haiba mu swala kamba ku hata fa libaka ze kwahule ni lele ye mu pahami, mu kona ku tahisa kuli lele i si ke ya tomela hande. Mu si ke mwa eza cwalo kakuli mwa kona ku wa. Mu shenyisange lele kuli i be bukaufi ni fo mu belekela.

◇ Haiba mu belekela fa lele ye tomilwe fapilaa sikwalo se si kwalilwe, mu beye sisupo fa sikwalo mi mu si kiye. Haiba ha ku konahali ku kiya sikwalo seo, mu kupe mutu ya ka lemusanga batu ba ba bata ku fita.

◇ Ku pahame feela mutu a li muñwi fa lele, konji haiba lele yeo i lukisizwe kuli ya kona ku itusiswa ki babeleki ba babeli ka nako ye swana. *

[Litaluso za kwatasi]

[Siswaniso se si fa likepe 29]

Mulao wa Mushe ne u bonisa kuli mandu a lituwa ze patami na swanela ku ba ni makwakwanyana a potolohile lituwa