Jehova U Itusisanga Cwañi Moya O Kenile ku Peta Mulelo wa Hae?

‘Linzwi la ka, le li zwa mwa mulomo wa ka li ka eza ze ni li lumezi.’—ISA. 55:11.

1. Ki kabakalañi milelo ya batu fokuñwi ha i palanga?

MU NGE kuli muuna ni musali ba lakaza hahulu ku yaha ndu ye nde ni ku ba ni lubasi lo lu tabile. Kuli ba pete mulelo wo, ba tokwa ku singanyeka mwa ku u petela ni ku ikataza ku u peta. Ka ku eza cwalo ba sepa kuli ba ka peta mulelo wa bona. Kono lika ze ba sa koni ku tibela, ze cwale ka likozi za ka taho, ku zwisiwa musebezi, makulanu kamba lifu, li kona ku ba palelwisa ku peta mulelo wa bona.

2, 3. (a) Mulelo wa Jehova u kopanyelezañi, mi na ngile muhato mañi Adama ni Eva ha ne ba ezize sibi? (b) Ki kabakalañi ha lu swanela ku lemuha nzila yeo Jehova a peta ka yona mulelo wa hae?

² Milelo ya Jehova ha i yo cwalo. Ha koni ku palelwa ku peta za lelile. Ha tokwi ku singanyeka kuli a bone nji u na ni butali ni maata a kuli a pete mulelo wa hae. (Maef. 3:11) Mulelo wo u kopanyeleza ku fetula lifasi le ku ba paradaisi ni kuli batu ba ba petehile ba pile mwateñi ku ya ku ile ka kozo ni ka tabo, ku likana ni mwa na lelezi Jehova kwa makalelo. (Gen. 1:28) Adama ni Eva ha ne ba ezize sibi, Jehova na ngile muhato mi na ezize ze ne tokwahala kuli mulelo wa hae ite u petahale. (Mu bale Genese 3:15.) Jehova na lelile kuli musali wa hae wa swanisezo a pepe “peu,” kamba Mwana, ili yo hasamulaho na ka sinya sila, yena Satani, ni ku felisa bumaswe kaufela bwa tahisize.—Maheb. 2:14; 1 Joa. 3:8.

³ Ha ku na nto ni ye kana ye mwa lihalimu  kamba fa lifasi ye kona ku palelwisa mulelo wa Mulimu ku talelezwa. (Isa. 46:9-11) Lu bulelelañi cwalo? Kakuli Jehova u itusisa moya wa hae o kenile. Moya o sa konwi ku hanyezwa wo u ka tahisa kuli mulelo wa Mulimu u ‘ezwe’ ku pale ku mane. (Isa. 55:10, 11) Lu swanela ku zwelapili ku lemuha nzila yeo Mulimu a peta mulelo wa hae ka yona ni ku pila ka ku lumelelana ni yona. Sepo ya luna ya bupilo bwa kwapili i itingile fa ku talelezwa kwa mulelo wo. Hape tumelo ya luna ya tiiswa ha lu bona mo Jehova a itusiseza moya o kenile. Cwale ha lu nyakisiseñi mo Jehova na itusiselize moya o kenile mwa linako za kwakale, mwa itusiseza ona mwa linako za cwale, ni mwa ka itusiseza ona kwapili, kuli a taleleze mulelo wa hae.

Mo Jehova na Itusiselize Moya O Kenile Mwa Linako za Kwakale

4. Jehova u patuluzi cwañi mulelo wa hae hanyinyani-hanyinyani?

⁴ Mwa linako za Bibele, Jehova na patuluzi mulelo wa hae hanyinyani-hanyinyani. Sapili, Peu ye ne sepisizwe ne i sa zibahali; ne li “kunutu.” (Makolo. 1:26) Hasamulaho wa lilimo ze bato eza 2,000 ku zwa fa na bulelezi ka za peu yeo lwa pili, Jehova hape na bulezi ka za yona ku Abrahama kuli: “Luli ni ka ku fuyola, mi luli ni ka atisa peu ya hao, i be sina linaleli za lihalimu, ni sina lishabati le li fa likamba la liwate; mi peu ya hao i ka luwa minyako ya lila za yona. Mi macaba kamukana a lifasi a ka ipumanela mbuyoti ka peu ya hao, kabakala kuli u utwile linzwi la ka.” (Gen. 22:17, 18, NW) Sepiso yeo Jehova na file Abrahama ne i patuluzi litaba ze ekezehile ka za peu ni limbuyoti ze ne ka tahiswa ki tukiso yeo. Manzwi a li “ka peu ya hao,” na bonisa hande-nde-nde kuli Peu yeo ne i ka taha sina mutu, ili ya na ka simuluha ku Abrahama. Lwa kona ku kolwa kuli Satani na shaamezi ku bona taba yeo inze i patululwa. Ku si na ku kakanya, Sila seo ne si bata feela ku sinya lusika lwa Abrahama kamba ku palelwisa Peu ku pepelwa mwa lusika lo, ilikuli mulelo wa Mulimu u si ke wa petahala. Kono ne ku sa konahali kuli mulelo wa Mulimu u pale, kakuli moya wa hae o sa bonwi ne u sebeza. Ka linzila lifi?

5, 6. Jehova na itusisize cwañi moya wa hae ku sileleza batu ba mwa lusika mo ne ku ka pepelwa Peu?

⁵ Jehova na itusisize moya wa hae ku sileleza batu ba mwa lusika mo ne ku ka pepelwa Peu. Jehova na ize ku Abrame (Abrahama) kuli: “Ki Na tebe ya hao.” (Gen. 15:1) Manzwi ao ne si a mbango. Ka mutala, ha mu nyakisise se ne si ezahalile ibato ba ka 1919 B.C.E. muta Abrahama ni Sara ne ba izo nyunyumana mwa Gerari. Ka ku sa ziba kuli Sara ne li musalaa Abrahama, Abimeleki mulena wa Gerari, na ngile Sara kuli a be musalaa hae. Kana Satani na lika ku zamaisa muinelo wo, ba sa zibi, ilikuli a palelwise Sara ku pepa peu ya Abrahama? Bibele ha i buleli se siñwi. Se i lu bulelela feela kikuli Jehova na ngile muhato ka za teñi. Na lemusize Abimeleki mwa tolo kuli a si ke a swala Sara.—Gen. 20:1-18.

⁶ Yeo ne si yona feela nako ya na ba silelelize Jehova. Jehova na silelelize Abrahama ni ba lubasi lwa hae ka linako ze ñata. (Gen. 12:14-20; 14:13-20; 26:26-29) Kona libaka walisamu ha na bulezi ka za Abrahama ni baikulu ba hae kuli: “[Jehova] ha si ka lumelela mutu ku ba eza maswe, mane a nyaza malena kabakala bona; a li: Si swali batoziwa ba ka, mu si ke mwa eza bapolofita ba ka maswe.”—Samu 105:14, 15.

7. Jehova na silelelize sicaba sa Isilaele ka linzila lifi?

⁷ Ka ku itusisa moya wa hae, Jehova na silelelize sicaba sa Isilaele wa ikale, ili mo ne ku ka pepelwa Peu ye ne sepisizwe. Ka moya wa hae, Jehova na file Isilaele Mulao o ne u bukeleza bulapeli bwa niti ni ku sileleza Majuda kwa lika ze ne ka silafaza bulapeli bwa bona, mizamao ya bona, ni mibili ya bona. (Ex. 31:18; 2 Makor. 3:3) Mwa linako za Baatuli, moya wa Jehova ne u matafalize baana ba bañwi kuli ba lamulele Isilaele kwa lila za hae. (Baat. 3:9, 10) Halaa lilimo-limo pili Jesu a si ka pepwa kale, yena kalulo ya pili ya peu ya Abrahama, ku lukela ku ba kuli moya o kenile ne u tusize mwa ku sileleza  Jerusalema, Betelehema, ni tempele—ili libaka ze ne ka amiwa mwa ku talelezwa kwa bupolofita ka za Jesu.

8. Ki lika mañi ze bonisa kuli moya o kenile ne u tusize Mwanaa Mulimu mwa bupilo ni sebelezo ya hae?

⁸ Moya o kenile ne u tusize Jesu mwa bupilo bwa hae ni mwa sebelezo ya hae. Moya o kenile ha ne u nze u sebeza mwa mba ya mwalyanjo Maria, ne u petile nto ye ne si ka ezwa kale kwa li ku simwa. Ne u tahisize kuli musali ya si ka petahala a itwale ni ku pepa Mwana ya petehile ya na sa amiwi ki koto ya lifu. (Luka 1:26-31, 34, 35) Moya hasamulaho ne u silelelize Jesu kuli a si ke a bulaiwa inge a sa li mbututu. (Mat. 2:7, 8, 12, 13) Jesu ha na li wa lilimo ze bato ba 30, Mulimu na mu tozize ka moya o kenile, ili ku mu keta kuli ite a yole situlo sa bulena sa Davida ni ku mu fa musebezi wa ku kutaza. (Luka 1:32, 33; 4:16-21) Moya o kenile ne u file Jesu maata a ku eza limakazo ze cwale ka ku folisa bakuli, ku fepa buñata, ni ku zusa bafu. Likezo ze maata ze cwalo ne li sisupo sa limbuyoti ze lu kona ku libelela kuli li ka ba teñi mwa puso ya Mulena Jesu.

9, 10. (a) Moya o kenile ne u tusize cwañi balutiwa ba Jesu ba kwa makalelo? (b) Ki cinceho mañi ye ne patuluzwi mwa miteñi ya baapositola ka za mo Jehova na ka petela mulelo wa hae?

⁹ Ku kala ka Pentekonta ya 33 C.E., Jehova na itusisize moya wa hae ku toza batu ba ba li kalulo ya bubeli ya peu ya Abrahama, mi buñata bwa bona ne ba sa simuluhi ku Abrahama. (Maro. 8:15-17; Magal. 3:29) Moya o kenile ne u tusize balutiwa ba Jesu ba kwa makalelo, ili ku ba konisa ku kutaza ka tukufalelo ni ku ba fa maata kuli ba eze limakazo. (Lik. 1:8; 2:1-4; 1 Makor. 12:7-11) Ku amuhela kwa bona limpo ze makaza za moya ne ku patuluzi nto ye ñwi ye nca ka za mo Jehova na ka petela mulelo wa hae. Jehova cwale na sa tokwi kuli batu ba mu lapele ka nzila ya na tomile lilimo-limo kwamulaho, yona ya ku yo mu lapelanga mwa tempele ya mwa Jerusalema. Sishemo sa hae ne si shimbulukezi kwa puteho ya Sikreste ye ne sa zo tomiwa. Ku zwa ka nako yeo, Jehova u itusisize puteho ya ba ba tozizwe ku eza tato ya hae.

¹⁰ Mwa linako za Bibele Jehova na itusisize moya o kenile ku sileleza, ku fa maata, ni ku toza batanga ba hae. Mi zeo ki ze ñwi feela za linzila zeo Jehova na itusisize ilikuli mulelo wa hae ite u petahale. Kacenu bo? Jehova u itusisa cwañi moya wa hae ka nako ya cwale kuli a pete mulelo wa hae? Lu tokwa ku ziba mwa itusiseza moya wo kakuli lu bata ku zamaiswa ki wona. Kacwalo, ha lu nyakisiseñi linzila zee ne kwa linzila zeo Jehova a itusisa moya wa hae ka zona mwa linako za cwale.

Mo Jehova A Itusiseza Moya O Kenile Mwa Linako za Cwale

11. Ki nto mañi ye bonisa kuli moya o kenile u tusa batu ba Mulimu ku ba ba ba kenile, mi mu kona ku bonisa cwañi kuli mu latelela zamaiso ya moya wo?

¹¹ Pili, moya o kenile u tusa batu ba Mulimu ku ba ba ba kenile. Ba ba sebeleza Jehova ka ku lumelelana ni tato ya hae ba swanela ku ba ni mizamao ye kenile. (Mu bale 1 Makorinte 6:9-11.) Ba bañwi ba ba fetuha ku ba Bakreste ba niti, kale ne ba ezanga lika ze maswe ze cwale ka buhule, bubuki, ni kalombe. Litakazo ze tahisanga likezo za sibi li kona ku ba ze tomile mibisi. (Jak. 1:14, 15) Nihakulicwalo, batu ba ba cwalo ba “tapisizwe,” ili ku bonisa kuli ba ezize licinceho mwa bupilo bwa bona kuli ba tabise Mulimu. Ki nto mañi ye konisa mutu ya lata Mulimu kuli a si ke a latelela litakazo ze maswe? Liñolo la 1 Makorinte 6:11 li bulela kuli ki “Moya wa Mulimu wa luna.” Ka ku zwelapili ku ba ni muzamao o kenile, mu bonisa kuli mu tuhelela moya wo ku zamaisa bupilo bwa mina.

12. (a) Ka ku ya ka pono ya Ezekiele, Jehova u zamaisa cwañi kopano ya hae? (b) Mu kona ku bonisa cwañi kuli mu latelela zamaiso ya moya?

¹² Sa bubeli, Jehova u itusisa moya wa hae ku zamaisa kopano ya hae mwa nzila ya bata. Mwa pono ya Ezekiele, kalulo ya kwa lihalimu ya kopano ya Jehova i taluswa sina koloi ye zamaya i sa tibelwi, kuli i pete mulelo wa Jehova. Ki nto  mañi ye zamaisa koloi yeo? Ki moya o kenile. (Ezek. 1:20, 21) Lu hupuleñi kuli kopano ya Jehova i na ni likalulo ze peli, ili kalulo ya kwa lihalimu ni ya fa lifasi. Haiba kalulo ya kwa lihalimu i zamaiswa ki moya o kenile, u zibe ya fa lifasi ni yona i zamaiswa ki moya wo. Ha mu ipeya ku utwa ni ku latelela litaelo ze lu fiwa ki kalulo ya fa lifasi ya kopano ya Mulimu, mu bonisa kuli mu zamaelela ni koloi ya Jehova ye kwa lihalimu ni kuli mu latelela zamaiso ya moya o kenile.—Maheb. 13:17.

13, 14. (a) Ki bo mañi ba ba li “lusika lo lwa kacenu” lwa na bulezi Jesu? (b) Mu fe mutala o bonisa kuli moya o kenile u sweli ku lu tusa ku utwisisa lituto za niti za Bibele. (Mu bone kambokisi ka ka li “Kana Mwa Zamaelela ni Liseli le li Sweli ku Ekezeha?”)

¹³ Sa bulalu, Jehova u lu fa liseli ka moya o kenile kuli lu utwisise lituto za niti ze mwa Bibele. (Liprov. 4:18) Magazini ye i itusisizwe ka nako ye telele ki “mutanga ya sepahala, ya na ni kutwisiso” sina nzila ye tuna ya patulula ka yona hanyinyani-hanyinyani lituto za niti ze mwa Bibele. (Mat. 24:45) Ka mutala, ha mu nyakisise mo lu utwisiseza taba ya na bulezi Jesu ya “lusika lo lwa kacenu.” (Mu bale Mateu 24:32-34.) Jesu na talusa lusika lufi? Mwa taba ye li “Ku Ba Teñi kwa Kreste—Ku Mi Ama Cwañi?” ne ku talusizwe kuli Jesu na sa buleli batu ba ba maswe, kono na talusa balutiwa ba hae, be ne ba tuha ba toziwa ka moya o kenile. * Balateleli ba Jesu ba ba tozizwe ba kwa makalelo ni ba mwa miteñi ya luna, ne li bona be ne ba ka bona sisupo ni ku utwisisa taluso ya sona, ya kuli Jesu “u fakaufi, u fa munyako.”

¹⁴ Taba ye i talusañi ku luna? Nihaike kuli ha lu koni ku pima butelele bwa nako ya “lusika lo lwa kacenu,” lu swanela ku hupula litaba li sikai ka za linzwi le li tolokilwe kuli “lusika”: Hañata li talusa batu ba ba na ni lilimo za buhulu ze shutana-shutana ili ba ba pila hamoho mwa silengo sa nako ye swana; nako yeo haki ye telele hahulu-hulu; mi i na ni mafelelezo. (Ex. 1:6) Kacwalo, lu swanela ku utwisisa cwañi manzwi a Jesu ka za “lusika lo lwa kacenu”? Ku bonahala kuli Jesu na talusa feela sikwata sa batoziwa be ne ba boni sisupo ha si kalisa ku bonahala ka 1914 ni batoziwa be ne ba ka bona makalelo a ñalelwa ye tuna ili be ne ba pilile ka nako ye swana nihaiba ka lilimo-nyana ni batoziwa be ne ba li teñi mazazi a maungulelo ha kalisa ka 1914. Lusika lo, ne lu na ni makalelo, mi kaniti lu ka ba ni mafelelezo. Ku talelezwa kwa likalulo ze shutana-shutana za sisupo ku bonisa hande  fo ku sweu kuli ñalelwa ye tuna i fakaufi. Ka ku zwelapili ku lemuha kuli mafelelezo a fakaufi, ni ku zwelapili ku tona, mu bonisa kuli mwa zamaelela ni licinceho za mo lu utwisiseza niti ya Bibele ni kuli mu latelela zamaiso ya moya o kenile.—Mare. 13:37.

15. Ki nto mañi ye bonisa kuli moya o kenile ki wona o lu fa maata kuli lu kone ku zibahaza taba ye nde?

¹⁵ Sa bune, moya o kenile u lu fa maata kuli lu kone ku zibahaza taba ye nde. (Lik. 1:8) Kana hasi niti kuli moya o kenile ki wona o lu tusa ku kutaza taba ye nde mwa lifasi kaufela? Mu nahane taba ye. Mwendi mu ba bañwi ba batu be ne ba na ni hahulu maswabi kamba sabo, mi ne mu ipulelelanga kuli, ‘Ha ni koni ku kutaza fa ndu ni ndu!’ Kono ka nako ya cwale mu eza musebezi wo ka tukufalelo. * Lipaki za Jehova ba ba sepahala ba bañata ba zwezipili ku kutaza ku si na taba ni twaniso kamba nyandiso. Moya o kenile wa Mulimu ki wona feela o kona ku lu fa maata kuli lu tule matata a matuna ni ku eza lika ze ne lu si ke lwa kona ku eza ka maata a luna feela. (Mika 3:8; Mat. 17:20) Ka ku kutaza ka mo mu konela kaufela, mu bonisa kuli mu latelela zamaiso ya moya o kenile.

Mo Jehova A ka Itusiseza Moya O Kenile Kwapili

16. Ki kabakalañi ha lu kona ku kolwa kuli Jehova u ka sileleza batu ba hae mwahalaa ñalelwa ye tuna?

¹⁶ Kwapili, Jehova u ka itusisa moya wa hae o kenile ka linzila ze makaza kuli a taleleze mulelo wa hae. Pili ha lu nyakisiseñi taba ya ku silelezwa. Sina mo se lu bonezi, Jehova na itusisize moya wa hae kwakale kuli a sileleze batu ka buñwi ni sicaba sa Isilaele mukatumbi. Kacwalo, lu na ni buikolwiso bwa kuli u ka itusisa moya o swana wo o mataa kuli a sileleze batu ba hae mwahalaa ñalelwa ye tuna ye fa ngo ni mulomo. Ha lu tokwi ku kabangisa ka za mo Jehova a ka lu babalelela ka nako yeo. Kono lu swanela ku libelela ka sepo, inze lu ziba kuli ba ba lata Jehova ha ba na ku ba mwa sibaka se ba sa konwi ku bonwa ki yena kamba se u sa koni ku fita ku sona moya o kenile.—2 Makol. 16:9; Samu 139:7-12.

17. Jehova u ka itusisa cwañi moya wa hae o kenile mwa lifasi le linca?

¹⁷ Jehova u ka itusisa cwañi moya wa hae o kenile mwa lifasi le linca? Moya wo ki wona o ka tusa mwa ku ñolwa kwa libuka ze nca ka nako yeo. (Sin. 20:12) Ki lika mañi ze ka ñolwa mwa libuka zeo? Ku bonahala kuli ki litaelo kaufela za Jehova za ka tokwa kuli lu li mamele mwa lilimo ze sikiti. Kana mu nyolezwi ku nyaka ze ka ñolwa mwa libuka zeo? Lu libelezi ka ku shukelwa hahulu lifasi le linca leo. Ha lu koni ku utwisisa luli mo ku ka bela ku pila ka nako ye nde hahulu yeo muta Jehova a ka itusisa moya wa hae o kenile ku taleleza mulelo wa hae ka za lifasi ni batu ba ba ka pila ku lona.

18. Mu ikatulezi ku ezañi?

¹⁸ Lu si libali kuli mulelo wa Jehova u tamehile ku talelezwa, kakuli u itusisa moya wa hae o kenile—ona maata a matuna ka ku fitisisa mwa pupo kamukana—kuli a pete mulelo wo. Mulelo wo wa mi ama. Kacwalo, haike mu ikatulele ku kupa Jehova ka taata kuli a mi fe moya wa hae mi mu latelele zamaiso ya ona. (Luka 11:13) Ha mu eza cwalo, mu ka ba ni sepo ya ku pila ka mwa na lelezi Jehova kuli batu ba pile—ili ku pila ku ya ku ile mwa Paradaisi fa lifasi.

[Litaluso za kwatasi]

Kana Mwa Hupula?

• Jehova na itusisize cwañi moya wa hae o kenile mwa linako za Bibele kuli mulelo wa hae ite u talelezwe?

• Jehova u itusisa cwañi moya wa hae mwa linako za cwale?

• Jehova u ka itusisa cwañi moya wa hae kwapili kuli a taleleze mulelo wa hae?

[Lipuzo za Tuto]

[Mbokisi fa likepe 10]

Kana Mwa Zamaelela ni Liseli le li Sweli ku Ekezeha?

Jehova u zwelapili ku benyiseza batu ba hae liseli kuli ba utwisise lituto za niti ze mwa Bibele. Ki lifi licinceho ze ñwi ze se hatisizwe mwa Tawala ya Mulibeleli?

▪ Nguli ya Jesu ya mumela i talusa nto mañi ye nde ka za zwelopili ya ezanga mutu kuli a be mulutiwa wa Kreste? (Mat. 13:33)—July 15, 2008, makepe 19-20.

▪ Bakreste ba ba ya kwa lihalimu ba fezwa ku bizwa lili?—May 1, 2007, makepe 30-31.

▪ Ku lapela Jehova “ka moya” ku talusañi? (Joa. 4:24)—July 15, 2002, likepe 15.

▪ Buñata bo butuna bu sebeleza mwa lapa lifi? (Sin. 7:15)—May 1, 2002, makepe 30-31.

▪ Lingu ni lipuli li ketahanywa lili? (Mat. 25:31-33)—October 1, 1995, makepe 19-29.