Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze tatama:

• Ki kabakalañi Mesia ha na lukela ku shwa?

Lifu la Jesu ne li bonisize kuli mutu ya petehile wa kona ku zwelapili mwa bulapeli niha ka likiwa hahulu-hulu. Mi hape na lifezi koto ya sibi se ba yambuzi baikulu ba Adama, ilikuli kwapili ba kone ku fumana bupilo bo bu sa feli.—12/15, makepe 22-23.

• Ku ambolisana hande ni bana ku kopanyelezañi?

Ku ambolisana hande ni bana ha ku talusi feela ku bulela ni bona; ku kopanyeleza ku ba buza lipuzo ni ku teeleza kwa likalabo za bona ka pilu-telele. Ba bañata ba fumani kuli nako ya ku ca i ba fanga kolo ye nde ya ku ambolisana.—1/15, makepe 18-19.

• Ki miinelo mañi ye kona ku tahiseza mutu ku nahana za ku kolobezwa sinca?

Mutu u kona ku nahana za ku kolobezwa sinca haiba ka nako ya na kolobezwa na patile muinelo wa na li ku ona kamba mukwa o no kona ku tahisa kuli a zwisiwe mwa puteho kambe kuli na kolobelizwe kale.—2/15, likepe 22.

• Mwa nguli ya Jesu ya buloto ni mufuka, ku caliwa kwa peu ye nde ku yemelañi?

Mwanaa mutu, yena Jesu, na lukisize simu mwahalaa sebelezo ya hae fa lifasi. Peu ye nde ne i kalisizwe ku calwa ka Pentekonta ya 33. C.E., muta Bakreste ne ba tozizwe kuli ba be bana ba Mulimu, ili bana ba Mubuso.—3/15, likepe 20.

• Buloto bwa swanisezo bwa na bulezi Jesu mwa nguli ya hae bu kubukanywa cwañi mwa sishete sa Jehova? (Mat. 13:30)

Buloto bwa swanisezo bu kubukanywa mwahalaa nako ye telele ili mwa mazazi a mafelelezo a lifasi. Bana ba Mubuso ba ba tozizwe, ili bona buloto bwa swanisezo, ba kubukanywa mwa sishete sa Jehova ha ba kopanyiwa mwa puteho ya Sikreste ye swalisani kamba ha ba fiwa mupuzo wa bona kwa lihalimu.—3/15, likepe 22.

• Ki bo mañi be ne ba ketile libuka za Mañolo A Sigerike A Sikreste ze ne ngiwa kuli li tahile ka moya wa Mulimu?

Ne si katengo ka keleke kamba mueteleli yo muñwi wa bulapeli. Kono Bakreste ba niti ne ba zibile libuka ze ne tahile luli ka moya o kenile wa Mulimu, mi moya wo ki ona o no ba tusize ku ziba libuka zeo. Seo si lumelelana ni taba ya kuli ye ñwi ya limpo ze makaza za moya ze ne filwe ba bañwi mwa puteho ya Sikreste ya makalelo ne li mpo ya “ku keta mioya,” kamba ku lemuha manzwi a tahile ka susumezo ya moya wa Mulimu. (1 Makor. 12:4, 10)—4/1, likepe 28.