Kana Mwa Latelela Kreste ka ku Tala?

“Sina ha mu itutile ku luna mo mu swanelela ku zamaya . . . , mu ekeze kwateñi ka nako ni nako.”—1 MATES. 4:1.

1, 2. (a) Batu ba mwa miteñi ya Jesu ne ba iponezi lika mañi ze nde? (b) Ki kabakalañi nako ye lu pila ku yona ha i li ya butokwa hahulu?

KANA mu kile mwa nahana mo ne ku tabiseza ku pila ka nako ya na li teñi Jesu fa lifasi? Mwendi ne mu nahanile kuli Jesu na ka folisa butuku bwa mina bo bu mi kataza. Kamba mwendi ne mu nahanile mo ne ku ka tabiseza ku bona Jesu ni ku ikutwela yena ha bulela, ili ku ituta ku yena kamba ku mu bona ha eza limakazo. (Mare. 4:1, 2; Luka 5:3-9; 9:11) Ne ku ka tabisa hahulu ku iponela Jesu ha eza misebezi yeo kaufela! (Luka 19:37) Ha ku na batu ba bañwi be ne ba iponezi lika ze cwalo kwandaa be ne ba li teñi ka nako yeo, mi za na petile Jesu fa lifasi “ka sitabelo sa tifo” sa hae ha li na ku ezwa hape.—Maheb. 9:26; Joa. 14:19.

² Nihakulicwalo, ni luna lu pila mwa nako ya butokwa hahulu. Kabakalañi? Lu pila mwa nako ye ne polofitilwe mwa Mañolo kuli “nako ya mafelelezo” ni “mazazi a maungulelo.” (Dan. 12:1-4, 9; 2 Tim. 3:1) Mwahalaa nako ye ya mafelelezo, Satani na lunduzwi kwa lihalimu. Ona cwale-cwale fa, u ka tamiwa ni ku nepelwa mwa “mukoti.” (Sin. 12:7-9, 12; 20:1-3) Ki ka yona nako ye hape lu na ni tohonolo ye tuna ya ku zibahaza ‘Evangeli ya mubuso’ mwa lifasi lote, ili ku bulelela batu ka za sepo ya Paradaisi ye taha, ili musebezi o si ke wa kutelwa ku ezwa hape.—Mat. 24:14.

3. Nakonyana pili Jesu a si ka kambamela kale kwa lihalimu, na bulelezi balateleli ba hae ku ezañi, mi musebezi wo ne u kopanyelezañi?

 ³ Nakonyana pili Jesu a si ka kambamela kale kwa lihalimu, na bulelezi balateleli ba hae kuli: “Mu ka ba lipaki za ka mwa Jerusalema, ni mwa naha kaufela ya Judea ni ya Samaria, ni ku isa kwa mafelelezo a lifasi.” (Lik. 1:8) Musebezi wo ne u kopanyeleza ku luta batu mwa lifasi kaufela. Ka mulelo ufi? Ka mulelo wa ku ba tusa kuli ba be balutiwa—ilikuli ni bona ba be balateleli ba Kreste—pili mafelelezo a si ka taha kale. (Mat. 28:19, 20) Lu swanela ku ezañi kuli lu pete musebezi wa lu file Kreste?

4. (a) Manzwi a Pitrosi a fumaneha kwa 2 Pitrosi 3:11, 12 a bonisa butokwa bwa ku ezañi? (b) Lu tokwa ku tokomelañi?

⁴ Mu lemuhe manzwi a muapositola Pitrosi, a li: “Mu lukela ku pila ka mizamao ye kenile hahulu, ni ka bulapeli; inze mu libelezi ni ku akufisa lizazi la Mulimu.” (2 Pit. 3:11, 12) Manzwi ao a bonisa kuli lu tokwa hahulu ku libelela mwa mazazi a maungulelo a, kuli lu bone teñi kuli lu zwelapili ku pila ka bulapeli. Ku pila ka bulapeli ku kopanyeleza ku kutaza taba ye nde. Kacwalo kwa tabisa luli ku bona tukufalelo ye ba na ni yona mizwale ba luna mwa lifasi kaufela ha ba nze ba eza musebezi wa ku kutaza wa ba file Kreste! Mi hape lwa ziba kuli lu tokwa ku tokomela kuli matata a zazi ni zazi a mwa lifasi la Satani ni matata a tahiswa ki mikwa ya luna ye lu hozize, ha fukuzi kwa tukufalelo ya luna mwa sebelezo ya Mulimu. Kacwalo, ha lu nyakisiseñi mo lu kona ku ezeza kuli lu bone teñi kuli lu zwelapili ku latelela Kreste.

Mu Amuhele Buikalabelo Bwa mi File Mulimu

5, 6. (a) Ki kabakalañi Paulusi ha na babalize balumeli sina yena ba mwa Jerusalema, mi na ba lemusizeñi? (b) Ki kabakalañi ha lu sa swaneli ku keshebisa buikalabelo bwa lu file Mulimu?

⁵ Mwa liñolo la na ñolezi Bakreste ba mwa Jerusalema, muapositola Paulusi na lumbile balumeli sina yena kabakala kuli ne ba itiisize ka ku sepahala niha ne ba nyandiswa. Na ize: “Mu hupule mazazi ale a pili, ha mu mano bonisezwa, mwa itiisa mwa ndwa ye tuna ye butuku.” Kaniti, Jehova na hupuzi busepahali bwa bona. (Maheb. 6:10; 10:32-34) Ku bonahala kuli pabazo ya Paulusi ne i susuelize hahulu Bakreste ba Maheberu. Nihakulicwalo, mwa liñolo le li swana leo, Paulusi na lemusize ka za mukwa wa butu o kona ku fukuza kwa tukufalelo ya mutu mwa sebelezo ya Mulimu, haiba mukwa wo u sa tibelwi. Na bulezi kuli Bakreste ba swanela ku tokomela kuli ba si ke ba “hana,” kamba ku itatula, ku latelela milao ya Mulimu.—Maheb. 12:25.

⁶ Bakreste kacenu ni bona ba swanela ku latelela temuso yeo ya kuli ba si ke ba ba ni mukwa wa ku “hana” buikalabelo bwa ba file Mulimu. Lwa ziba kuli lu tokwa ku tiiseza ku peta buikalabelo bwa luna bwa Sikreste ni ku zwelapili ku tukufalelwa mwa sebelezo ya luna ku Mulimu. (Maheb. 10:39) Mane ku sebeleza Mulimu ku kona ku fumanisa mutu bupilo, mi ku sa eza cwalo ku kona ku mu tahiseza lifu.—1 Tim. 4:16.

7, 8. (a) Kiñi se si ka lu tusa ku zwelapili ku tukufalelwa mwa sebelezo ya Mulimu? (b) Haiba ha lu sa na tukufalelo ye ne lu na ni yona sapili, lu swanela ku hupulañi ka za Jehova ni Jesu?

⁷ Kiñi se si ka lu tusa ku tibela mukwa wa ku hana buikalabelo bwa luna ku Mulimu? Nzila ye ñwi ya butokwa ye lu kona ku lwanisa ka yona mukwa wo ki ku zwelapili ku nahananga taluso ya buitamo bo ne lu ezize ha ne lu ineezi ku Mulimu. Ne lu sepisize Jehova kuli ku eza tato ya hae i ka ba yona nto ya butokwa hahulu mwa bupilo bwa luna, mi lu bata ku taleleza sepiso yeo. (Mat. 16:24) Kacwalo, ka linako ze ñwi lu tokwa ku kutumananga ni ku ipuza kuli: ‘Kana ni sa na ni tukufalelo ya ku pila ka ku lumelelana ni buineelo bwa ka ku Mulimu ili ye ne ni na ni yona ha ni kolobezwa? Kamba kana tukufalelo ya ka i fukuzehile mwa lilimo ze fitile ku zwa fo ni kolobelezwa?’

 ⁸ Haiba hasamulaho wa ku itatuba ka tokomelo lu lemuha kuli lu fokozi mwa sebelezo ya luna ku Jehova, lu ka eza hande ku hupula manzwi a tiisa a na bulezi mupolofita Zefania. Na ize: “Mazoho a hao a si ke a fokola! Muñaa Bupilo Mulimu wa hao u yahile mo ku wena; ki ndume ya pilisa! U ka ku tabela ka tabo ye tuna.” (Zef. 3:16, 17) Manzwi a tiisa ao na talelelizwe pili kwa Maisilaele ba kwaikale be ne ba kutezi kwa Jerusalema ku zwa mwa butanga bwa Babilona. Kono manzwi ao hape a ama batu ba Mulimu kacenu. Kabakala kuli musebezi o lu eza ki wa Jehova, lu swanela ku hupula kuli Jehova ni Mwanaa hae ba lu tusa ni ku lu tiisa kuli lu pete ka ku tala buikalabelo bwa lu file Mulimu. (Isa. 12:2; Mat. 28:20) Haiba lu zwelapili ku eza musebezi wa Mulimu ka tukufalelo, u ka lu fuyola ni ku lu tusa ku eza zwelopili.

Mu Tukufalelwe ku ‘Bata Pili Mubuso’

9, 10. Ki sifi sa na talusa Jesu mwa nguli ya mulalelo o mutuna, mi ki tuto mañi ye lu kona ku ituta kwa nguli yeo?

⁹ Ha na nzaa ca lico mwa ndu ya yo muñwi wa ba bahulu ba Bafalisi, Jesu na bulezi nguli ya mulalelo o mutuna. Mwa nguli yeo, na talusize ka za kolo ye ne ba filwe batu ba ba shutana-shutana kuli ba yo ca sanda sa Mubuso wa kwa lihalimu. Hape na bonisize se ku talusa ku “hana,” kamba ku “itatula.” (Mu bale Luka 14:16-21.) Batu ba mwa nguli ya Jesu be ne ba bizelizwe kwa mulalelo, ne ba file mabaka a na ba palelwisa ku fumaneha kwa mulalelo wo. Yo muñwi na bulezi kuli na tokwa ku yo bona simu ya na sa zo leka. Mi yo muñwi na bulezi kuli na lekile mapulu mi na bata ku yo a lika. Yo muñwi yena na ize: ‘Ni palezwi ku taha. Kihona ni sa zo nyala.’ Mabaka ao na sa utwahali. Hañata mutu ya leka simu kamba limunanu wa li tatubelanga cimo. Kacwalo ha tokwi hahulu ku yo li tatuba hasamulaho. Mi mutu ya sa zo nyala ha koni ku palelwa ku amuhela pizo ya butokwa yeo. Ki lona libaka muñaa ndu wa mwa nguli yeo ha na halifile maswe!

¹⁰ Batu ba Mulimu kamukana ba kona ku ituta se siñwi kwa nguli ya Jesu ye. Ki tuto mañi ye ba kona ku ituta? Ha lu swaneli ku tuhelela litaba za luna, ze cwale ka ze talusizwe mwa nguli ya Jesu, ku ba za butokwa hahulu ku fita sebelezo ya luna ku Mulimu. Haiba Mukreste a isa hahulu pilu kwa lika za hae, tukufalelo ya hae mwa bukombwa i ka fukuzeha hanyinyani-hanyinyani. (Mu bale Luka 8:14.) Kuli tukufalelo ya luna isike ya fukuzeha, lu swanela ku latelela kelezo ya Jesu ye li: “Mu bate pili mubuso wa Mulimu ni Ku Luka kwa Hae.” (Mat. 6:33) Kwa susueza luli ku bona kuli batanga ba Mulimu—banana ni ba bahulu—ba latelela kelezo ya butokwa yeo! Mane ba bañata ba nolofalize mupilelo wa bona kuli ba be ni nako ye ñata ya ku kutaza. Ba iponezi kuli ku tukufalelwa ku bata pili Mubuso ku tahisa tabo sakata ni mombecima.

11. Ki likande lifi la mwa Bibele le li bonisa butokwa bwa ku sebeleza Mulimu ka tukufalelo ni ka pilu yote?

¹¹ Ha mu nyakisise taba ye ne ezahalile mwa bupilo bwa mulena wa Isilaele Joasi, kuli mu bone butokwa bwa ku tukufalelwa mwa sebelezo ya Mulimu. Ka ku ikalelwa kuli Maisilaele ba ka komiwa ki mpi ya Siria, Joasi a taha ku Elisha inzaa lila. Mupolofita a mu laela kuli a kunupe lisho mwa lihaulo kwa neku la Siria, ili ku bonisa kuli u ka tula sicaba seo ka tuso ya Jehova. Kaniti, taba yeo i lukela ku ba ye ne tiisize mulena. Elisha cwale a bulelela Joasi kuli a nge masho a hae ni ku a kunupela fafasi. Joasi a kunupa fafasi halalu. Elisha a nyema hahulu, kakuli ku kunupa fafasi haketalizoho kamba hasilezi ne ku ka bonisa kuli Joasi na ka “koma Masiria, mane [ku] ba feza.” Kono cwale Joasi na ka tula feela Masiria halalu mi na si ke a ba feza. Bakeñisa kuli na si ka eza ka tukufalelo, Joasi na si ka  koma lila za hae ka ku tala. (2 Mal. 13:14-19) Lu kona ku itutañi kwa taba yeo? Lu ituta kuli Jehova u ka lu fuyola hahulu haiba lu eza musebezi wa hae ka pilu yote ni ka tukufalelo.

12. (a) Ki nto mañi ye ka lu tusa ku zwelapili ku ba ni tukufalelo mwa sebelezo ya Mulimu ha lu nze lu talimana ni matata a mwa bupilo? (b) Mu kandeke mo mu tusezwanga kabakala ku pateha mwa bukombwa.

¹² Matata a mwa bupilo a kona ku fukuza kwa tukufalelo ya luna mwa sebelezo ya Mulimu ni ku lu palelwisa ku peta sebelezo yeo ka ku tala. Mizwale ni likaizeli ba bañata ba talimana ni matata a ku tokwa masheleñi. Ba bañwi ba zwafile bakeñisa butuku bo butuna bo ba kula bo bu ba palelwisa ku eza ze ñata mwa sebelezo ya Jehova. Nihakulicwalo, mañi ni mañi wa luna u swanela ku bona teñi kuli wa zwelapili ku ba ni tukufalelo ni ku latelela Kreste ka ku tala. Mu bone liakalezo ze ñwi ni mañolo a kolohanyizwe mwa kambokisi ka ka li, “Ki Lika Mañi ze ka mi Tusa ku Zwelapili ku Latelela Kreste?” Mu nyakisise mo mu kona ku itusiseza liakalezo ni mañolo ao ka ku tala. Haiba mu eza cwalo, mu ka fuyolwa. Ku pateha mwa bukombwa kwa lu tiisa, ku lu tusa ku pila bupilo bo bunde, mi ku lu tahiseza kozo ni tabo ye tuna. (1 Makor. 15:58) Hape, ku sebeleza Mulimu ka pilu ya luna kaufela ku lu tusa “ku akufisa lizazi la Mulimu.”—2 Pit. 3:12.

Mu Nyake Miinelo ya Mina

13. Lu kona ku lemuha cwañi se ku talusa ku sebeleza Mulimu ka pilu ya luna kaufela?

¹³ Kono mu swanela ku hupula kuli ku sebeleza Jehova ka pilu ya luna kaufela ha ku si ka itinga fa nako ye lu tandanga mwa bukombwa. Miinelo ya batu ha i swani. Mutu ya tandanga feela hola i liñwi kamba lihola ze peli mwa simu ka kweli ni kweli u kona ku katelwa ki Jehova haiba nji zeo ki zona feela za kona ku eza ku likana ni buikangulo bwa hae. (Mu bapanye Mareka 12:41-44.) Kacwalo, kuli lu lemuhe se ku talusa ku sebeleza Mulimu ka pilu ya luna kaufela, lu tokwa ku nyaka buikoneli ni miinelo ya luna. Ka ku ba balateleli ba Kreste, hape lu swanela ku nga lika ka mwa li ngela yena. (Mu bale Maroma 15:5; 1 Makor. 2:16) Ki nto mañi ya na nga Jesu ku ba ya butokwa hahulu mwa bupilo bwa hae? Na bulelezi undi wa nyangela mwa  Kapernauma kuli: “Ni swanezi ku yo bulelela ni minzi ye miñwi taba ye munati ya mubuso wa Mulimu; kakuli ki sona se ni lumezwi.” (Luka 4:43; Joa. 18:37) Ha mu nze mu hupula tukufalelo ya Jesu mwa bukombwa bwa hae, mu nyakisise miinelo ya mina kuli mu bone nji mwa kona ku peta ze ñata mwa bukombwa bwa mina.—1 Makor. 11:1.

14. Lu kona ekeza cwañi ku ze lu peta mwa bukombwa bwa luna?

¹⁴ Ku nyakisisa miinelo ya luna ka tokomelo ku kona ku lu tusa ku lemuha kuli lwa kona ku ekeza kwa nako ye lu tandanga mwa bukombwa. (Mat. 9:37, 38) Ka mutala, ba banca ba bañata-ñata ba ba sa zo kwaza likolo ba kalile ku eza ze ñata mwa bukombwa bwa bona mi cwale ba tabile kabakala ku ba mapaina ba ba tukufalezwi. Kana ni mina mwa bata ku ba ni tabo ye cwalo? Mizwale ni likaizeli ba bañwi ba nyakisisize miinelo ya bona mi ba boni kuli ba kona ku tutela kwa sibaka se siñwi mwa naha ya bona kamba mwa naha isili ili ko ba tokwahala hahulu bashaeli ba Mubuso. Ba bañwi bona ba itutile puo isili kuli ba tuse batu ba ba bulela puo yeo. Ku kona ku ba taata ku peta ze ñata mwa bukombwa, kono ku eza cwalo ku lu fumanisa limbuyoti, mi lu kona ku tusa batu ba bañata kuli “ba fite fa zibo ya ku ziba niti.”—1 Tim. 2:3, 4; 2 Makor. 9:6.

Mitala ya Mwa Bibele ye lu Swanela ku Latelela

15, 16. Ki bo mañi be lu kona ku likanyisa mwa ku latelela Kreste ka tukufalelo?

¹⁵ Ba bañwi be ne ba bile baapositola ne ba ezize cwañi Kreste ha na ba bizize kuli ba mu latelele? Bibele i bulela ka za Mateu kuli: “A siya linto kaufela, a nanuha mi a mu latelela.” (Luka 5:27, 28) Lu bala ka za Pitrosi ni Andreasi be ne sweli ku yamba kuli: “Ba pakisa ba tuhela tunyandi twa bona, ba mu latelela.” Hamulaho, Jesu a bona Jakobo ni Joani be ne ba sweli ku onga tunyandi ni ndataa bona. Ne ba ezize cwañi Jesu ha na ba memile? “Kapili ba tuhela sisepe ni ndataa bona, ba mu latelela.”—Mat. 4:18-22.

¹⁶ Mutala o muñwi o munde ki wa Saule, ya na bile muapositola Paulusi. Nihaike kuli na tukufalezwi ku nyandisa balateleli ba Kreste, na cincize bupilo bwa hae ni ku ba ‘sisebeliso se si ketilwe’ kuli a pake libizo la Kreste. Paulusi “a pakisa a bulela Jesu mwa masinagoge, a tiisa kuli Jesu ki mwanaa Mulimu.” (Lik. 9:3-22) Mi niha na talimani ni matata ni nyandiso, Paulusi na si ka felelwa ki tukufalelo ya naa na ni yona.—2 Makor. 11:23-29; 12:15.

17. (a) Mu lakaza ku ezañi ka za ku latelela Kreste? (b) Ki limbuyoti mañi ze lu ikola kabakala ku eza tato ya Jehova ka pilu ya luna kaufela ni ka maata a luna kaufela?

¹⁷ Kaniti lu bata ku likanyisa mitala ye minde ya balutiwa bao ni ku latelela Jesu ku si na ku kata-kata. (Maheb. 6:11, 12) Lu kona ku fumana limbuyoti mañi ha lu nze lu zwelapili ku latelela Kreste ka tukufalelo ni ka ku tala? Lu fumana tabo sakata ha lu eza tato ya Mulimu ni mombecima kabakala ku amuhela misebezi ye miñwi ni buikalabelo bo bu ekezehile mwa puteho. (Samu 40:8; mu bale 1 Matesalonika 4:1.) Kaniti, ha lu nze lu ikataza ku latelela Kreste, lu ikola limbuyoti ze sa feli ze cwale ka ku ba ni mombecima, tabo, ku katelwa ki Mulimu, ni ku ba ni sepo ya ku pila ku ya ku ile.—1 Tim. 4:10.

Kana Mwa Hupula?

• Ki musebezi mañi wa butokwa o lu filwe, mi lu swanela ku u nga cwañi?

• Ki mukwa ufi wa butu o lu swanela ku tokolomoha, mi ki kabakalañi?

• Lu swanela ku inyaka cwañi?

• Ki lika mañi ze ka lu tusa ku zwelapili ku latelela Kreste?

[Lipuzo za Tuto]

[Mbokisi/Siswaniso se si fa likepe 27]

Ki Lika Mañi ze ka mi Tusa ku Zwelapili ku Latelela Kreste?

▪ Mu balange Linzwi la Mulimu zazi ni zazi ni ku nahanisisa ze mu bala.—Samu 1:1-3; 1 Tim. 4:15.

▪ Kamita mu lapelange kuli Mulimu a mi tuse ni ku mi zamaisa ka moya wa hae.—Zak. 4:6; Luka 11:9, 13.

▪ Mu swalisane ni batu ba ba tukufalezwi mwa bukombwa.—Liprov. 13:20; Maheb. 10:24, 25.

▪ Mu lemuhe butokwa bwa nako ye lu pila ku yona.—Maef. 5:15, 16.

▪ Mu lemuhe likozi ze tiswa ki ‘ku itatula.’—Luka 9:59-62.

▪ Kamita mu nahanisisange ka za buineelo bwa mina ni limbuyoti ze mu na ni kabakala ku sebeleza Jehova ni ku latelela Kreste ka pilu ya mina kaufela.—Samu 116:12-14; 133:3; Liprov. 10:22.