Kana Mwa Tuhelelanga Jehova ku mi Buza?

BIBELE i na ni lipuzo ze ñata-ñata ze kona ku tusa mutu ku tatuba pilu ya hae. Mane Jehova Mulimu u itusisanga lipuzo ku luta batu litaba za butokwa. Ka mutala, Jehova na itusisize lipuzo ha na lemusize Kaine kuli a si ke a eza nto ye maswe. (Gen. 4:6, 7) Ka ku swana, Jehova na buzize Isaya lipuzo kuli a mu susumeze ku nga muhato o munde. Ha na utwile Jehova ha buza kuli: “Ni ka luma mañi? ku ka ya mañi bakeñisa luna?” mupolofita Isaya a alaba kuli: “Ki na yo, u lume na!”—Isa. 6:8.

Jesu, Muluti yo Mutuna, ni yena na itusisanga hande lipuzo. Libuka za Evangeli li na ni lipuzo za na buzize Jesu ze fitelela 280. Nihaike kuli fokuñwi na itusisanga lipuzo ku kwala milomo ya bahanyezi ba hae, hañata mulelo wa hae ne li wa kuli a fite bateelezi ba hae kwa lipilu, ilikuli ba nahane ka za libizo le ne ba sweli ku ikezeza ku Mulimu. (Mat. 22:41-46; Joa. 14:9, 10) Ka ku swana, muapositola Paulusi ya na ñozi libuka ze 14 za mwa Mañolo A Sigerike A Sikreste, na itusisize lipuzo ka nzila ye kolwisa. (Maro. 10:13-15) Ka mutala, liñolo la na ñolezi Maroma li na ni lipuzo ze ñata. Lipuzo za na buzize Paulusi li susumeza babali ku ituta ni ku itebuha “buliba bwa bufumu ni bwa butali ni bwa zibo ya Mulimu.”—Maro. 11:33.

Lipuzo ze ñwi li tokwanga likalabo, kono ze ñwi zona li buziwanga ka mulelo wa ku tusa mutu ku nahanisisa. Mwa libuka za Evangeli, Jesu na itusisize hahulu lipuzo ze tusa mutu ku nahanisisa. Ka nako ye ñwi, Jesu na lemusize balutiwa ba hae kuli: “Mu tokomele, mu sabe luli mumela wa bafalisi, ni mumela wa Heroda,” ili ku talusa buipi bwa bona ni lituto za bona za buhata. (Mare. 8:15; Mat. 16:12) Balutiwa ba Jesu ne ba si ka utwisisa sa na talusa, mi ba kala ku bulelisana za kuli ne ba libezi buhobe. Mu lemuhe mo Jesu na itusiselize lipuzo mwa ngambolo-nyana ye ne ba bile ni yona. “A li ku bona: Kiñi ze mu bulela za ku tokwa buhobe? Ha mu si ka lemuha kale ni ku utwiseza? Kikuli lipilu za mina li sa li tata? Mu na ni meeto, kikuli ha mi bonisi? Mu na ni lizebe, ha li mi utwisi? . . . Ni ka nako ye, ha mu utwisezi?” Mulelo wa lipuzo za Jesu ne li wa kuli balutiwa ba hae ba nahanisise taluso ya manzwi a na ba bulelela.—Mare. 8:16-21.

“Ni ku Buze”

Jehova Mulimu na itusisize lipuzo kuli a sikulule muhupulo wa mutangaa hae Jobo. Ka ku itusisa lipuzo ze ñata, Jehova na lutile Jobo kuli ki yo munyinyani hahulu ha bapanywa ni Mubupi wa hae. (Jobo, likauha. 38-41) Kana Jehova na bata kuli Jobo a alabe puzo ni puzo ya na mu buzize? Ha ku bonahali cwalo. Lipuzo ze cwale ka ya kuli, “No li kakai ha ne ni toma mitomo ya lifasi?” ku bonahala kuli ne li lelezwi ku mu tusa ku nahanisisa. Jobo na kakamalile hamulaho wa ku buziwa lipuzo ze ñwi ze taata zeo. Na bulezi feela kuli: “Ze ni ka ku alaba ki lifi? Ni iswala kwa mulomo ka lizoho.” (Jobo 38:4; 40:4) Jobo na utwisisize sa na talusa Mulimu mi a ikokobeza. Kono Jehova na sa luti feela Jobo ku ba ni buikokobezo. Hape na sikuluzi muhupulo wa Jobo. Ka mukwa ufi?

Nihaike kuli Jobo na li “muuna ya lukile hahulu, ya sepahala,” za na bulelanga fokuñwi ne li bonisa kuli na banga ni mubonelo o si ka luka. Elihu na lemuhile mubonelo wo, mi na mu kalimezi kuli a si ke a “tiisa niti kuli ha na mulatu ku Mulimu.” (Jobo 1:8; 32:2;  33:8-12) Kacwalo, lipuzo za na buzize Jehova, hape ne li tusize Jobo ku ba ni kutwisiso ye lukile. Mulimu inzaa li mwa liñungwa, na bulelezi Jobo kuli: “Ki mañi yo ya tisa lififi mwa milelo ya ka, ka manzwi a hae a si na ngana? Itame mwa teka sina muuna, ni ku buze; wena u ni talifise.” (Jobo 38:1-3) Ka ku itusisa lipuzo, Jehova na bonisize Jobo butali ni maata a hae a matuna a bonahala mwa pupo ya hae. Taba yeo ya na tusizwe Jobo ku utwisisa, ne i mu tusize hahulu ku sepa likatulo za Jehova ni mwa ezezanga lika. Jobo na buzizwe lipuzo ki Mulimu ya Maata Ote ka sibili, ili nto ye makaza!

Mo lu Kona ku Tuhelela Jehova ku lu Buza

Luna bo? Kana ni luna lwa kona ku tusiwa ki lipuzo ze mwa Bibele? Eni, lwa kona! Haiba lu nahanisisa lipuzo zeo lu ka fumana mipuzo ye miñata. Lipuzo ze mwa Bibele ili ze tusa mutu ku nahana, li ekeza kwa maata a Linzwi la Mulimu. Kaniti, “Linzwi la Mulimu . . . li na ni maata; . . . li na ni bubebe mwa ku atula maikuto ni mihupulo ya mwa pilu.” (Maheb. 4:12) Kono kuli lu tusiwe hahulu, lu swanela ku nga lipuzo zeo inge kuli Jehova u li buza luna ka sibili. (Maro. 15:4) Ha lu nyakisiseñi mitala ye miñwi.

“Muatuli wa lifasi kaufela kana a si ke a eza ka ku luka?” (Gen. 18:25) Abrahama na buzize Jehova puzo ye ka nako yeo Mulimu na atula Sodoma ni Gomora. Abrahama na boni kuli ha ku konahali kuli Mulimu a eze ka ku sa luka—ili ku bulaya ya lukile hamoho ni ya maswe. Puzo ya Abrahama i bonisa kuli naa na ni tumelo ye tuna ya kuli Jehova ki ya lukile.

Kacenu, batu ba bañwi ba kona ku kabangisa ka za likatulo za Jehova za kwapili, ze cwale ka za kuli ki bo mañi luli ba ba ka punyuha Armagedoni kamba ba ba ka zusiwa kwa bafu. Mwa sibaka sa ku bilaezwanga ki litaba ze cwalo, lu swanela ku hupulanga puzo ya Abrahama. Ku ziba Jehova kuli ki Ndate wa kwa lihalimu ya lukile ni ku sepa ka ku tala kuli ki ya atula ka ku luka mi ki ya sishemo, sina mwa na mu zibela Abrahama, ku lu tusa kuli lu si ke lwa ipulaisa ku ikalelwa, ku honona, ni ku ezanga likañi ze si na tuso.

“Ku mina ki mañi ya kona ku ekeza kwa butelele [bwa bupilo] bwa hae, se si likana ni ñokolwa, ka ku isa pilu kwateñi?” (Mat. 6:27; “NW”) Ha na bulela kwa likwanamunu le ne li kopanyeleza ni balutiwa ba hae, Jesu na itusisize puzo yeo kuli a ba bonise kuli ne li kwa butokwa hahulu kuli ba ipeye mwa pabalelo  ya Jehova. Ku pila mwa mazazi a mafelelezo a lifasi le li maswe le ku kona ku lu tahiseza lipilaelo ze ñata, kono ku iseza hahulu pilu kwa lipilaelo zeo ha ku na ku ekeza kwa butelele bwa bupilo bwa luna kamba ku lu tusa ku ba ni bupilo bo bunde.

Ha lu bilaela ka za matata a lu tahela kamba a tahela balatiwa ba luna, ku hupulanga puzo ya Jesu ku ka lu tusa ku utwisisa hande litaba ze lu bilaeza zeo. Puzo yeo ya kona ku lu tusa ku felisa lipilaelo ni mihupulo ye zwafisa ni ye fokolisa. Sina mwa na lu sepiselize Jesu, Ndataa luna wa kwa lihalimu, ya uta linyunywani za lihalimu ni ku apesa bucwañi bwa naha, wa ziba ze lu tokwa kaufela.—Mat. 6:26-34.

“Kikuli mutu a ka beya mulilo fa sifuba sa hae, liapalo za hae li sa ci?” (Liprov. 6:27) Mwa likauhanyo za pili ze 9 za Liproverbia, ku na ni litaba ze bonisa ndate ya luta mwanaa hae butali. Puzo ye mwa Liproverbia 6:27, i talusa matata a kona ku ipumana ku ona mutu ya eza bubuki. (Liprov. 6:29) Haiba lu lemuha kuli lu sweli ku eza linyawe, kamba ku nahana za somano ye si ka luka, lu swanela ku hupula puzo yeo ye lu tusa ku saba kozi. Mi mane lwa kona ku ipuzanga puzo yeo nako kaufela ha lu likiwa ku eza nto ye maswe. Puzo yeo i bonisa hande sikuka sa mwa Bibele se si li: ‘Mutu u kutula sa cala.’—Magal. 6:7.

“Ki wena mañi, kuli u nyaze mutangaa mulena yo muñwi?” (Maro. 14:4) Mwa liñolo la na ñolezi Maroma, Paulusi na talusize matata a na zuhile mwa puteho ya mwa miteñi ya baapositola. Bakreste ba bañwi ba lizo ze shutana-shutana ne ba na ni mukwa wa ku nyaza ni ku atula balumeli ka bona kabakala likatulo ni likezo za balumeli bao. Puzo ya Paulusi ne i ba hupulisize kuli ba swanela ku amuhelana ni kuli ba tuhelele Jehova ku atula.

Batanga ba Jehova kacenu ni bona ba shutana-shutana. Kono Jehova u lu swalisanisize. Kana ni luna lwa zwisezapili swalisano yeo? Haiba lu na ni mukwa wa ku matukelanga ku nyaza za ezize muzwale yo muñwi ili za boni kuli li lukile, lu ka eza hande ku ipuza puzo ya na buzize Paulusi mwa Maroma 14:4.

Lipuzo li lu Tusa ku Sutelela ku Jehova

Mitala i sikai ye lu nyakisisize i bonisa mo lipuzo ze mwa Linzwi la Mulimu li kona ku tuseza mutu ku itatuba. Ku nyakisisisa mulelo wa puzo ni puzo ku kona ku lu tusa ku sebelisa ze lu ituta kwa lipuzo zeo. Mi ha lu nze bala Bibele, lu ka lemuha lipuzo ze ñwi ze ka lu tusa.—Mu bone kambokisi fa likepe la 14.

Ku nahanisisanga lipuzo ze mwa Linzwi la Mulimu kuli li lu fite kwa lipilu ku ka lu tusa ku ba ni mihupulo ni maikuto a lumelelana ni likuka za Jehova ze lukile. Ha sa buzizwe lipuzo ki Jehova, Jobo na ize: “Ne ni utwile za hao ka lizebe feela, kono cwale meeto a ka a ku bona.” (Jobo 42:5) Kaniti, Jobo na lemuhile kuli Jehova na li bukaufi ni yena inge kuli mane na iponela Yena ka meeto a hae. Mi mulutiwa Jakobo na talusize taba yeo cwana: “Mu sutelele ku Mulimu mi u ka sutelela ku mina.” (Jak. 4:8) Haike litaba kaufela ze mwa Linzwi la Mulimu, ku beya ni lipuzo ze ku lona, li lu tuse ku tiisa bulikani bwa luna ni Jehova ni ku mu “bona” hande hahulu!

[Mbokisi fa likepe 14]

Ku ipuza lipuzo ze ku kona ku mi tusa cwañi ku bona lika mwa li bonela Jehova?

▪ “ Muñaa Bupilo kana a ka tabela linubu za ku cisa, ni matabelo, sina mwa tabelela mutu ya utwa linzwi la Muñaa Bupilo?”—1 Sam. 15:22.

▪ “ Ya bupile liito, mu li a si ke a bona?”—Samu 94:9.

▪ “ Wena ya buzwa, u ka nga nako ye kuma kai unzoo lobala?”—Liprov. 6:9.

▪ “ Kikuli u eza hande ha u nyemile?”—Jona. 4:4.

▪ “ Ku ka tusañi mutu ha luwile lifasi kamukana, mi a sinyehelwa ki moya [“moyo,” NW] wa hae?”—Mat. 16:26.

▪ “ Ki mañi ya ka lu kauhanya ni lilato la Kreste?”—Maro. 8:35.

▪ “ Sa hao ki sifi so si ka fiwa?”—1 Makor. 4:7.

▪ “ Liseli li na ni kopano mañi ni lififi?”—2 Makor. 6:14.

[Siswaniso se si fa likepe 15]

Jobo na itutileñi kwa lipuzo za na mu buzize Jehova?