Ki Kabakalañi ha lu Swanela ku Kuteka Basupali?

KWA likamba la California, le li kwa U.S.A., ku fumaneha ye ñwi ya likota ze swaniswanga hahulu ka likamera. Kota yeo i bizwa Lone Cypress. Ku bulelwa kuli kota yeo i bile teñi ka lilimo ze fitelela 250. Bakeñisa ku tiya kwa yona, kota yeo i babalezwi ka linzila ze shutana-shutana. Ka mutala, i tiisizwe ka mihala ni ka macwe a yahezwi kwa lisina la yona.

Kota yeo i lu hupulisa Bakreste ba ba supezi ba ba li teñi mwahalaa luna ili ba ba itiisa hahulu. Ye ñwi ya linzila ze ba bonisa ka zona kuli ba itiisa ki ka ku zibahaza taba ye nde. Mupolofita Joele na polofitile kuli “baana-bahulu” ne ba ka shaela litaba ze mwa Bibele. (Joe. 2:28-32; Lik. 2:16-21) Basupali bao ba tandanga lihola ze ñata-ñata inze ba tusa batu ku ituta ka za “Evangeli ye ya mubuso.” (Mat. 24:14) Ba bañwi kwa basupali bao ba ba zibahaza za Mubuso ba itiisize mwa nyandiso kamba matata a mañwi ka lilimo ze ñata. Haiba kota feela ya Lone Cypress i lemuhilwe ku ba ye tiile mi i tiisizwe ka macwe ni mihala, u zibe basupali be lu na ni bona ba swanela ku isezwa pilu ni ku kutekiwa hahulu!

Jehova Mulimu na laezi batu ba hae ba kwaikale kuli: “U yeme, ha u li fapilaa wa toho ye ize pululu, u kuteke muuna-muhulu.” (Liv. 19:32) Mwahalaa batanga ba Jehova kacenu ku na ni mitala ye minde ya basepahali ba ba se ba ‘zamaile ni Mulimu’ ka  lilimo-limo. (Mika 6:8) Kaniti, ha ba nze ba sebelisa likuka za mwa Mañolo, milili ya bona ye li pululu i ba “mushukwe wa ku kutekiwa.”—Liprov. 16:31.

Muapositola Paulusi na laezi mutangana Timotea kuli: “Ya hulile, u si ke wa mu kalimela ka taata.” Kono Timotea na swanela ku ‘mu kutaza inge u kutaza ndatahe’ ni ku kutaza ‘basali ba ba hulile inge u kutaza bo mahe.’ (1 Tim. 5:1, 2) Ka ku eza cwalo, Timotea na ka bonisa kuli na ‘yema’ fapilaa milili ye ize pululu. Kwa iponelwa hande kuli Jehova u bata kuli lu kuteke basupali mwa lipulelo za luna.

Liñolo la Maroma 12:10 li bulela kuli: “Mu [beyane] kwapili ka ku fanana likute.” Baokameli mwa puteho ba bonisanga likute kwa Bakreste ba ba hulile. Kono kaufelaa luna lu swanela ku beyananga kwapili ka ku fanana likute.

Kaniti, ba mwa lubasi ba na ni buikalabelo bwa ku babalela bashemi ba bona ni bo kukwaa bona. Batu ba ikatalize ku babalela kota ya Lone Cypress, mi ba sa zwelapili ku ikataza. Kaniti luli, ni luna lu swanela ku ikataza ku kuteka bashemi ba luna ba ba se ba supala hamohocwalo ni bo kukwaa luna. Ka mutala, ku ba bateelezi ba bande ku ka lu tusa ku sa pihelela kuli lika li eziwe mo lu latela lu sa isi pilu kwa maikuto a bona.—Liprov. 23:22; 1 Tim. 5:4.

Basupali be lu na ni bona ki ba butokwa hahulu ku Jehova. Jehova ha ba yumbangi simulamu. (Samu 71:18) Mane Mulimu wa niti wa ba tiisanga kuli ba zwelepili ku mu sebeleza ka busepahali. Haike ni luna lu zweleñipili ku tusa basupali ni ku ba kuteka.

[Maswaniso a fa likepe 7]

Sina kota ya “Lone Cypress” ha i tokwa ku tiiswa, basupali ni bona ba tokwa ku kutekiwa

[Manzwi a bañi ba siswaniso]

American Spirit Images/age fotostock