Lipuzo ze Zwa Kwa Babali

Bakeñisa kuli Jehova wa hanisa ku lapela milimu, kiñi ha na si ka fa koto Aruni ya na bupile namani ya gauda?

Aruni ha na bupile namani ya gauda sina mo ku ñolezwi mwa Exoda kauhanyo 32, na lobile mulao wa Mulimu o hanisa ku lapela milimu. (Ex. 20:3-5) Kacwalo, “Muñaa Bupilo na halifezi Aruni hahulu, a lata ku mu bulaya; kono [Mushe a] lapelela ni Aruni isali ka nako yeo.” (Deut. 9:19, 20) Kana tapelo ya Mushe, ya na li muuna ya lukile, ne i na ni “maata a matuna” a ku tusa Aruni? (Jak. 5:16) Eni. Ku bonahala kuli Jehova na alabile tapelo ya Mushe mi na si ka ota Aruni bakeñisa tapelo yeo ni bakeñisa mabaka a mañwi a mabeli.

Ku bonahala kuli le liñwi la mabaka Aruni ha na si ka fiwa koto ne li la kuli na li mutu ya sepahala. Mushe ha na lumilwe kuli a yo bonana ni Faro ni kuli a zwise Maisilaele mwa Egepita, Jehova na ketile Aruni kuli a mu sindekete ni kuli a be mubuleli wa hae. (Ex. 4:10-16) Baana ba babeli bao, ne ba kuta-kutezi ku yanga ku Faro, mulena wa Egepita, mi ne ba nyandile kabakala muñañatoho wa hae. Kacwalo, Aruni ha na sa li mwa Egepita na sebelelize Jehova ka busepahali.—Ex. 4:21.

Hape ha mu nyakisise se ne si tahisize kuli Aruni a bupe namani ya gauda. Mushe na li fa Lilundu la Sinai ka mazazi a 40. “Sicaba ha si se si bona kuli Mushe u liyehile ku shetumuka fa lilundu,” sa susueza Aruni kuli a si ezeze mulimu. Aruni a lumela mi eza siswaniso sa namani ya gauda. (Ex. 32:1-6) Kono za na ezize Aruni hamulaho wa fo li bonisa kuli na si ka lumelelana ni kezo yeo ya ku lapela mulimu wa siswaniso. Ku bonahala kuli na ezize cwalo bakeñisa ku hapelezwa feela ki batu. Ka mutala, Mushe ha na buzize kuli ba Jehova ki bo mañi, bana ba Livi kaufela—ku kopanyeleza ni Aruni—ne ba yemezi Jehova ka ku tiya. Batu ba 3,000 be ne ba tahisize kuli sicaba si lapele namani ya gauda ne ba bulailwe.—Ex. 32:25-29.

Hamulaho wa fo, Mushe na bulelezi sicaba kuli: “Mu fosize ka foso ye tuna.” (Ex. 32:30) Kacwalo, haki Aruni a nosi ya na fosize. Yena ni batu ba bañwi ne ba shemubilwe hahulu ki Jehova.

Hamulaho wa kezo yeo ya ku lapela namani ya gauda, Jehova na laezi kuli Aruni a be muprisita yo muhulu. Mulimu na bulelezi Mushe kuli: “U apese Aruni liapalo ze kenile, u mu toze, u mu kenise, kuli a lukele ku ni sebeleza mwa sebelezo ya buprisita.” (Ex. 40:12, 13) Kwa iponelwa hande kuli Jehova na swalezi Aruni kabakala bufokoli bwa hae. Kaniti, Aruni ne li mulapeli wa niti ya na sepahala, isi mukwenuheli ya na lapela milimu ya maswaniso.