Mu Si Ke Mwa Swabisa Moya O Kenile Wa Jehova

“Mu si ke mwa swabisa Moya o Kenile wa Mulimu o mu swailwe nombolo ka Ona.”—MAEF. 4:30.

1. Ki nto mañi ya ezelize batu ba bañata-ñata Jehova, mi ba swanela ku ezañi?

JEHOVA u ezelize batu ba bañata-ñata ba ba pila mwa lifasi la maswenyeho le nto ye nde hahulu. U tahisize kuli ba kone ku sutelela ku yena ka Mwanaa hae wa libanda, Jesu Kreste. (Joa. 6:44) Mu ba bañwi ba batu bao haiba mu ineezi ku Mulimu mi mu pila ka ku lumelelana ni buineelo bwa mina. Bakeñisa kuli mu kolobelizwe ka libizo la moya o kenile, mu swanela ku pila ka ku lumelelana ni ona.—Mat. 28:19.

2. Ki lipuzo lifi ze lu ka nyakisisa?

² Luna ba ba “calela Moya” lu sweli ku apala  mutu yo munca. (Magal. 6:8; Maef. 4:17-24) Kono muapositola Paulusi u lu fa likelezo mi u lu lemusa kuli lu si ke lwa swabisa moya o kenile wa Mulimu. (Mu bale Maefese 4:25-32.) Cwale ha lu nyakeñi likelezo za na file muapositola Paulusi. Paulusi na talusañi ha na bulezi ka za ku swabisa moya wa Mulimu? Mutu ya ineezi ku Jehova u kona cwañi ku eza cwalo? Mi lu kona ku eza cwañi kuli lu si ke lwa swabisa moya wa Jehova?

Za na Talusa Paulusi

3. Mu kona ku talusa cwañi manzwi a ñozwi kwa Maefese 4:30?

³ Sapili, ha mu nyake manzwi a Paulusi a ñozwi kwa Maefese 4:30. Na ñozi kuli: “Mu si ke mwa swabisa Moya o Kenile wa Mulimu o mu swailwe nombolo ka Ona, bakeñisa lizazi la ku liululwa kwa mina.” Paulusi na sa bati kuli balumeli sina yena ba sinyehelwe ki bulikani bwa bona ni Mulimu. Moya wa Jehova ne li ona ‘o ne ba swailwe nombolo ka ona bakeñisa lizazi la ku liululwa kwa bona.’ Moya o kenile wa Mulimu ne u li liswayo mi u sa li liswayo kamba “swalele” ya ze ba bulukezwi batoziwa ba ba sepahala. (2 Makor. 1:22) Liswayo leo li bonisa kuli ki ba Mulimu ni kuli ba ka amuhela bupilo bwa kwa lihalimu. Palo ya ba ba ka be ba filwe liswayo la mafelelezo ki 144,000.—Sin. 7:2-4.

4. Ki kabakalañi ha ku li kwa butokwa ku sa swabisa moya o kenile wa Mulimu?

⁴ Ku swabisa moya ku kona ku ba nto ya pili ye kona ku tahisa kuli Mukreste a si ke a zamaiswa ki moya wa Mulimu mwa bupilo bwa hae. Manzwi a na bulezi Davida ha mano fosa ni Bati-Sheba a bonisa kuli nto yeo ya kona ku ezahala. Ha na bakile, Davida na kupile Jehova kuli: “U si ke wa ni lelekela kwahule ni pata ya hao; mi u si ke wa ni amuha Moya wa hao o kenile.” (Samu 51:11) Ki batoziwa feela ba ba ‘sepahala ku isa kwa lifu’ ba ba ka fiwa “kuwani ya bulena” ya bupilo bo bu sa shwi kwa lihalimu. (Sin. 2:10; 1 Makor. 15:53) Bakreste ba ba na ni sepo ya ku pila fa lifasi ni bona ba tokwa moya o kenile kuli ba zwelepili ku sepahala ku Mulimu ni ku amuhela bupilo kabakala ku lumela sitabelo se si liulula sa Kreste. (Joa. 3:36; Maro. 5:8; 6:23) Kacwalo, kaufelaa luna lu swanela ku tokomela kuli lu si ke lwa swabisa moya o kenile wa Jehova.

Ki Lika Mañi ze Kona ku Tahisa Kuli Mukreste A Swabise Moya?

5, 6. Ki lika mañi ze kona ku tahisa kuli Mukreste a swabise moya wa Jehova?

⁵ Ka ku ba Bakreste ba ba ineezi, lwa kona ku ambuka ku swabisa moya. Lu kona ku eza cwalo ka ku zwelapili ‘ku zamaya ni ku pila ka moya’ ilikuli lu si ke lwa komiwa ki litakazo za nama ni ku ba ni mikwa ye maswe. (Magal. 5:16, 25, 26) Kono hape lwa kona ku swabisa moya wa Mulimu. Ku kona ku ba cwalo haiba lu ikenya hanyinyani-hanyinyani mwa mizamao ye hanisizwe mwa Linzwi le li tahile ka moya wa Mulimu, mi seo si kona ku ezahala lu sa lemuhi.

⁶ Lu swabisa moya o kenile haiba lu zwelapili ku eza lika ze lwanisana ni zamaiso ya ona, mi lu swabisa ni Jehova, yena Muñaa ona. Ku nyaka Maefese 4:25-32 ku ka lu tusa ku ziba mo lu swanela ku pilela, mi ku ka lu tusa ku ambuka ku swabisa moya wa Mulimu.

Mwa ku Ambukela ku Swabisa Moya

7, 8. Mu taluse mabaka ha lu swanela ku ba ni niti.

⁷ Lu swanela ku ba ni niti. Ka ku ya ka Maefese 4:25, Paulusi na ñozi cwana: “Cwale mu tobohe bupumi, mi mutu ni mutu a bulelele wahabo niti; kakuli lu lilama za ba bañwi ku ba bañwi.” Bakeñisa kuli lu swalisani sina “lilama za ba bañwi ku ba bañwi,” ha lu swaneli ku puma balapeli ka luna kamba ku lika ku ba kwasheka. Mutu ya zwelapili ku eza cwalo u ka sinyehelwa ki bulikani bwa hae ni Mulimu.—Mu bale Liproverbia 6:16, 17.

⁸ Ku puma ba bañwi ka manzwi kamba ka likezo ku kona ku tahisa likauhano mwa  puteho. Kacwalo, lu swanela ku ba sina mupolofita ya sepahala Daniele, ya na si ka fumanwa mulatu ki ba bañwi. (Dan. 6:4) Mi lu swanela ku hupulanga kelezo ya na file Paulusi kwa Bakreste ba ba na ni sepo ya ku ya kwa lihalimu ya kuli mañi ni mañi ya li silama sa “mubili wa Kreste” ki wa ba bañwi kaufela mi u tokwa ku zwelapili ku swalisana ni balateleli bote ba Jesu ba ba tozizwe ili ba ba na ni niti. (Maef. 4:11, 12) Haiba lu na ni sepo ya ku pila ku ya ku ile mwa Paradaisi fa lifasi, ni luna lu swanela ku bulelanga niti, mi haiba lu eza cwalo lu ka zwisezapili swalisano ye lu ikola ni mizwale mwa lifasi kaufela.

9. Ki kabakalañi ha lu swanela ku mamela manzwi a kwa Maefese 4:26, 27?

⁹ Lu swanela ku hanela Diabulosi kuli lu si ke lwa mu fa kolo ya ku lu ezisa nto ye lwanisana ni tato ya Jehova. (Jak. 4:7) Moya o kenile u lu tusa ku hanela Satani. Ka mutala, lwa kona ku mu hanela ka ku ambuka mabifi. Paulusi na ñozi kuli: “Niha mu ka halifa mu si ke mwa eza sibi; mu si ke mwa likelelwa ki lizazi mu nze mu halifile, mi mu si ke mwa fa Diabulosi sibaka.” (Maef. 4:26, 27) Haiba lu nyemiswa, ku lapela kapili-pili mwa pilu kwa kona ku lu tusa ku ‘wa pilu,’ ili ku lu tusa ku iswala mwa sibaka sa ku eza kezo ye kona ku swabisa moya wa Mulimu. (Liprov. 17:27) Kacwalo, lu si ke lwa nyemanga ka nako ye telele ni ku fa Satani sibaka sa ku lu ezisa nto ye maswe. (Samu 37 :8, 9) Ye ñwi ya linzila za mwa ku hanyeleza Satani ki ku felisa lifapano kapili-pili, ku likana ni likelezo za Jesu.—Mat. 5:23, 24; 18:15-17.

10, 11. Ki kabakalañi ha lu sa swaneli ku uzwa kamba ku eza ka ku sa sepahala?

¹⁰ Ha lu swaneli ku komiwa ki muliko wa ku uzwa kamba ku eza ka ku sa sepahala. Paulusi na ñozi ka za busholi kuli: “Ya na uzwa, a si ke a uzwa hape; kono a sebeze ka taata, a eze ze nde ka mazoho a hae, kuli a be ni sa ka tusa ya tokwile.” (Maef. 4:28) Mukreste ya ineezi ha uzwa u “nyefulisa Libizo la Mulimu.” (Liprov. 30:7-9) Nihaiba mubotana ha swaneli ku uzwa. Batu ba ba lata Mulimu ni batu ba bañwi ba ziba kuli ku uzwa ha ku si ka luka.—Mare. 12:28-31.

¹¹ Paulusi ha buleli feela ze lu sa swaneli ku eza kono hape u lu bulelela ze lu swanela ku eza. Haiba lu pila ni ku zamaya ka moya o kenile, lu ka beleka ka taata kuli lu babalele lubasi lwa luna ni ku fumana se lu ka “tusa ya tokwile” ka sona. (1 Tim. 5:8) Jesu ni baapositola ba hae ne ba bulukanga mali a ku tusa ka ona babotana, kono mubeteki Judasi Isikariota na ikungelanga kwa mali ao. (Joa. 12:4-6) Kaniti na sa zamaiswi ki moya o kenile. Luna ba ba zamaiswa ki moya wa Mulimu lu “eza  se si lukela” mwa lika kaufela sina mwa na ezelize Paulusi. (Maheb. 13:18) Ka ku eza cwalo lu pima ku swabisa moya o kenile wa Jehova.

Linzila ze Ñwi za mo lu Kona ku Ambukela ku Swabisa Moya

12, 13. (a) Sina mo ku boniselizwe kwa Maefese 4:29, ki lipulelo ze cwañi ze lu swanela ku ambuka? (b) Lipulelo za luna li swanela ku ba ze cwañi?

¹² Lu swanela ku tokomela ze lu bulela. Paulusi na bulezi kuli: “Ku si ke kwa zwa linzwi le li maswe mwa milomo ya mina, kono ku zwe taba ye nde feela, ye tusa ku yahisa, kuli i batiseze ba ba i utwa sishemo.” (Maef. 4:29) Muapositola Paulusi hape ha lu buleleli feela ze lu sa swaneli ku eza kono u lu bulelela ni ze lu swanela ku ezanga. Ha lu zamaiswa ki moya wa Mulimu, lu ka susumezwa ku bulela “taba ye nde feela, ye tusa ku yahisa, kuli i batiseze ba ba i utwa sishemo.” Hape mwa milomo ya luna ha ku swaneli ku zwa “linzwi le li maswe.” Linzwi la Sigerike le li tolokilwe kuli “maswe” li itusisizwe ku talusa linto ze bolile ze cwale ka muselo, tapi, kamba nama. Sina feela ha lu toile lico ze cwalo, lu toile lipulelo ze maswe mwa meeto a Jehova.

¹³ Lipulelo za luna li swanela ku ba ze lukela, ze musa, ze “lungilwe lizwai.” (Makolo. 3:8-10; 4:6) Batu ba swanela ku lemuha kuli lwa shutana ni batu ba bañwi ha ba utwa ze lu bulela. Kacwalo, ha lu tuseñi ba bañwi ka ku bulela manzwi a “tusa ku yahisa.” Mi haike lu ikutwe sina walisamu ya na opezi kuli: “Manzwi a mwa mulomo wa ka, ni minahano ya mwa pilu ya ka, ibe zo ka amuhela Muñaa Bupilo, Wena Licwe la ka, ni Muliululi wa ka.”—Samu 19:14.

14. Ka ku ya ka Maefese 4:30, 31, ki lika mañi ze lu swanela ku ambuka?

¹⁴ Lu swanela ku ambuka ze baba, buhali, matapa, ni lunya kaufela. Hamulaho wa ku fa mamela ya kuli lu si ke lwa swabisa moya wa Mulimu, Paulusi na ñozi kuli: “Ze baba kaufela, ni ku nyema, ni buhali, ni komano, ni matapa, ni lunya kaufela li zwiswe ku mina.” (Maef. 4:30, 31) Ka ku ba batu ba ba si ka petahala, kaufelaa luna lu tokwa ku beleka ka taata kuli lu no iswala mwa mihupulo ni mwa likezo za luna. Haiba lu ituhelela ku komiwa ki “ze baba kaufela, ni ku nyema, ni buhali,” lu ka swabisa moya wa Mulimu. Hape lu kona ku swabisa moya haiba lu buluka lifoso za ba bañwi, ku ba ni ndimbelela, ni ku hana ku kutisana lipilu ni mutu ya lu foselize. Haiba lu sa lateleli likelezo za Bibele, lu kona ku ba ni mikwa ye kona ku lu tahiseza ku foseza moya, mi lu kona ku tahelwa ki kozi.

15. Lu swanela ku ezañi haiba lu fosezwa?

¹⁵ Lu swanela ku ba ni musa, ku utwelana butuku, ni ku swalelana. Paulusi na ñozi kuli: “Mu ezane ka musa, mu utwelane butuku, mu swalelane, sina Mulimu ni Yena ha mi swalezi ka Kreste.” (Maef. 4:32) Niha lu utwisizwe hahulu butuku ki kezo ye ñwi ya lu foselize mutu, lu swanela ku mu swalela, sina Mulimu ha swalelanga batu. (Luka 11:4) Ha lu ngeñi kuli mulumeli ka luna u bulezi nto ye ñwi ye  maswe ka za luna. Lwa mu atumela kuli lu tatulule butata. Cwale u ikutwa bufosi mi u lu kupa swalelo. Lwa mu swalela, kono ku na ni ze ñwi ze lu tokwa ku eza. Liñolo la Livitike 19:18 li bulela kuli: “U si ke wa likanyisa bumaswe, mi u si ke wa bulukela bana ba sicaba sa henu lutimbo; kono u late wahenu mo itatela. Ki Na Muñaa Bupilo.”

Lu Tokwa ku Tokomela

16. Ha mu fe mutala o bonisa licinceho ze lu kona ku eza kuli lu si ke lwa swabisa moya wa Jehova.

¹⁶ Lu kona ku likiwa ku eza nto ye sa tabisi Mulimu niha lu li kwa mukunda. Ka mutala, mwendi muzwale u teelezanga kwa lipina ze sa swaneli. Lizwalo la hae li kala ku mu kataza bakeñisa kuli ha si ka latelela likelezo za Bibele ze mwa lihatiso za “mutanga ya sepahala, ya na ni kutwisiso.” (Mat. 24:45) U lapela ka za butata bo mi u hupula manzwi a Paulusi a ñozwi kwa Maefese 4:30. Bakeñisa kuli ha lati ku eza nto ni ye kana ye kona ku swabisa moya wa Mulimu, u itama kuli ha sa tola a teeleza kwa lipina ze sa swaneli. Jehova u ka fuyaula muzwale yo kabakala moya wa bonisa. Kacwalo, lu no tokomelanga kamita kuli lu si ke lwa swabisa moya wa Mulimu.

17. Kiñi se si kona ku ezahala haiba lu sa tokomeli ni ku tuhela ku lapela?

¹⁷ Haiba lu sa tokomeli mi lu tuhela ku lapela, lu kona ku eza nto ye si ka kena kamba kezo ye maswe ye swabisa moya. Moya o kenile ki maata a itusisanga Jehova ku eza tato ya hae. Kacwalo ha lu u swabisa lu swabisa Jehova, ili nto ye lu sa lati ku eza. (Maef. 4:30) Bañoli ba Sijuda ne ba ezize sibi ka ku bulela kuli limakazo za Jesu ne li ezwa ka maata a Satani. (Mu bale Mareka 3:22-30.) Lila zeo ne li ‘nyefuzi moya o kenile’ mi ka ku eza cwalo ne li ezize sibi se si sa swalelwi. Haike lu si ke lwa eza sibi se si cwalo!

18. Lu kona ku ziba cwañi kuli ha lu si ka eza sibi se si sa swalelwi?

¹⁸ Bakeñisa kuli ha lu lati ni hanyinyani ku eza nto ye kona ku lu tahiseza ku eza sibi se si sa swalelwi, lu tokwa ku hupulanga za na bulezi Paulusi ka za ku sa swabisa moya. Kono ku cwañi haiba lu ezize sibi se situna? Haiba lu bakile mi lu tusizwe ki maeluda, lwa kona ku kolwa kuli Mulimu u lu swalezi ni kuli ha lu si ka foseza moya o kenile. Mi ka tuso ya Mulimu, lwa kona ku pima ku eza nto ni ye kana ye kona ku swabisa moya hape.

19, 20. (a) Ki lika mañi ze lu swanela ku ambuka? (b) Lu swanela ku tiiseza ku ezañi?

¹⁹ Mulimu u itusisanga moya wa hae ku tusa batu ba hae ku ba ni lilato, tabo, ni swalisano. (Samu 133:1-3) Kacwalo, lu swanela ku ambuka ku swabisa moya ka ku sa seba kamba ku bulela lika ze bonisa ku tokwa likute kwa balisana ba ba ketilwe ki moya. (Lik. 20:28; Juda 8) Kono lu swanela ku kutekana ni ku eza lika ze tisa buñwi mwa puteho. Kaniti, ha lu swaneli ku susueza mukwa wa ku eza tukwata-kwata mwahalaa batu ba Mulimu. Paulusi na ñozi kuli: “Na mi lapela banabahesu, ka Libizo la Mulenaa luna, Jesu Kreste, kuli kaufelaa mina mu bulele taba i liñwi, mi likauhano li be siyo ku mina; kono mu kopane hande ka maikuto a li mañwi, ni ka muhupulo u li muñwi.”—1 Makor. 1:10.

²⁰ Jehova wa lata ku lu tusa kuli lu si ke lwa swabisa moya wa hae mi wa kona ku lu tusa ku sa eza cwalo. Ha lu zweleñipili ku lapelela moya o kenile ni ku tiiseza ku sa u swabisa. Mi lu zweleñipili ku “calela Moya,” ili ku tukufalelwa ku bata zamaiso ya ona cwale ni ku ya ku ile.

Mu Kona ku Alaba Cwañi?

• Ku swabisa moya wa Mulimu ku talusañi?

• Mutu ya ineezi ku Jehova u kona ku swabisa cwañi moya o kenile?

• Lu kona ku ambuka cwañi ku swabisa moya o kenile?

[Lipuzo za Tuto]

[Siswaniso se si fa likepe 30]

Mu tatululange lifapano kapili-pili

[Siswaniso se si fa likepe 31]

Ki muselo ufi o bonisa mo li inezi lipulelo za mina?