Mu Tiiseze Mwa Sebelezo ya Mulimu ha mu Babalela Wahabo Mina ya Kula

BO Nasilele, ba bañwi ba Lipaki za Jehova, ne ba fumanwi kuli ba na ni sikoto kwatuko ni muongola wa bona, mi ba swalwa ni butuku bwa kansa. * Bo Mulonda, bo muunaa bo Nasilele, ba li: “Bo Nasilele ha se ba pazuzwi ni ku zwisiwa sikoto seo, ba fiwa likalafo za kansa. Kabakala likalafo zeo, ba fokola hahulu mwa mubili. Ne ba fumana hahulu butata ku zamaya.”

Mu nahane feela butuku bo ne ba utwile bo Mulonda ha ne ba nze ba bona mulatiwa wa bona inzaa nyandiswa ki butuku bo bu fokolisa bo. Kana mwa lubasi lwa mina ku na ni ya kula butuku bo bu sweli ku mu totobelisa kamba ya katazwa ki busupali? (Muek. 12:1-7) Haiba ku cwalo, mu swanela ku ipabalela ilikuli mu kone ku babalela hande mulatiwa wa mina. Haiba mu fokola mwa sebelezo ya mina ku Mulimu, mu kona ku felelwa ki mwangalwa mi mu kona ku kula ni ku palelwa ku tusa hande wahabo mina. Mu kona cwañi ku zwelapili ku ba ni buitikaneleli mwa sebelezo ya mina ku Mulimu inze mu babalela wahabo mina ya kula kamba ya li musupali? Ki lika mañi ze ba kona ku eza ba mwa puteho ya Sikreste kuli ba tuse batu ba ba cwalo?

Mu Kona Cwañi ku ba ni Buitikaneleli?

Kuli mu zwelepili ku ba ni buitikaneleli mwa sebelezo ya mina ku Jehova ni ku ba ni buikangulo ha mu nze mu babalela wahabo mina ya kula, mu tokwa ku ezanga licinceho ka ku ya ka miinelo ni ku itusisa hande nako ni maata a mina. Liñolo la Liproverbia 11:2 li bulela kuli: “Butali bu inzi ku ba ba ikokobeza.” (Liprov. 11:2) Mwa liñolo leo, ku “ikokobeza” ku talusa ku lemuha lika za sa koni ku eza mutu. Kuli mu si ke mwa lika ku eza ze mu sa koni, mu nyakisise tomahanyo ya mina ni buikalabelo bwa mina.

Bo Mulonda ne ba bonisize butali ni  buikokobezo ka ku nyakisisa misebezi kaufela ye ne ba ezanga. Kwandaa mubeleko wa bona, ne ba sebeza sina muswalisanisi wa sitopa sa maeluda ni muokameli wa sebelezo mwa puteho ya Lipaki za Jehova mwa Ireland. Hape ne ba li mwa Katengo ka Kutwano ni ba Sipatela ka mwa silalanda sa bona. Bo Mulonda ba li: “Bo Nasilele ne ba si ka bilaela kuli ne ni sa ba isezi hahulu pilu kabakala kuli ne ni iyakatwa hahulu misebezi yeo. Kono ne ni ziba kuli ne ni ikimeza.” Bo Mulonda ne ba tatuluzi cwañi butata bo? Ba li: “Hamulaho wa ku nyakisisa taba yeo ni ku lapela, na ikatulela ku tuhela ku sebeza sina muswalisanisi. Ne ni zwezipili ku sebeza sina eluda, kono ha ne ni file ba bañwi ye miñwi ya misebezi ye ne ni eza mwa puteho, ne ni konile ku fumana nako ya ku inanga ni bo Nasilele ni ku ba tokomela.”

Hamulaho wa nako, bo Nasilele ba kalisa ku ikutwa hande. Bo Mulonda ni bo Nasilele ba nyakisisa muinelo wa bona hape, mi ka tuso ya bakubona, bo Mulonda ne ba kalile ku eza misebezi ye ne ba ezanga mwa puteho sapili. Bo Mulonda ba talusa kuli: “Ne lu itutile ku ezanga ze ne konahala ka nako ya na kula musalaa ka. Ni itumela hahulu ku Jehova kwa tuso ya hae ni ku musalaa ka kabakala kuli na sa bilaelangi niha na kula.”

 Hape ha mu nyakisise ze ne ba ezize bo Jerry, ba ba li muokameli wa maeto, ni basali ba bona bo Maria. Ne ba na ni ku cinca likonkwani za bona ilikuli ba babalele bashemi ba bona be ne ba supezi. Bo Maria ba li: “Na ni bo muunaa ka, ne lu na ni sikonkwani sa ku yo sebeza sina balumiwa kwa naha isili. Kono bo Jerry ne ba pepilwe ba nosi, mi bashemi ba bona ne ba tokwa ku babalelwa. Kacwalo, lwa ikatulela ku ina mwa Ireland ilikuli lu ba babalele. Ka ku eza cwalo, ne lu konile ku yo kulisa bo ndataa bona bo Jerry ka nako ye ne ba swelwi mwa sipatela ba si ka timela kale. Ka nako ya cwale, lu ambolanga ni bo maa bona bo Jerry zazi ni zazi, mi lu kona ku ba tusa ka bunolo ha ba tokwa tuso. Puteho ye ba li ku yona bo maa bona bo Jerry i lu tusize hahulu, mi nto yeo i lu konisize ku zwelapili mwa musebezi wa maeto.”

Mo ba Kona ku Tuseza ba Bañwi

Ha na talusa mo li swanelwa ku tusezwa limbelwa ze supezi za mwa puteho, muapositola Paulusi na ñozi kuli: “Mutu ha sa babaleli banabahabo, sihulu ba ndu iliñwi ni ya hae, ki ya latuzi tumelo, mi u fitwa ki ya si ka lumela.” Paulusi na hupulisize Bakreste sina yena kuli ne ba swanela ku babalela bashemi ba bona ba ba supezi ni bo kukwaa bona kuli bulapeli bwa bona bu ‘katelwe ki Mulimu.’ (1 Tim. 5:4, 8) Nihakulicwalo, ba bañwi mwa puteho ni bona ba kona ku tusa, mi ba swanela ku eza cwalo.

Ha mu nyakisise mutala wa bo Hakan ni bo Inger, bo muuna ni musalaa hae ba ba supezi, ili ba ba pila kwa Sweden. Bo Hakan ba li: “Musalaa ka ha na fumanwi ni kansa, sibeli sa luna ne lu sabile maswe. Bo Inger ne ba ikanguzi hande. Kono cwale ne lu na ni ku yanga kwa sipatela zazi ni zazi kuli ba yo alafiwa, mi milyani ye ne ba fiwa ne i ba fokolisa. Mwahalaa nako yeo, bo Inger ne ba inanga kwa ndu, mi ne ni tokwa ku tolanga ni bona kuli ni ba babalele.” Bo Hakan ni bo Inger ne ba tusizwe cwañi ki puteho ya habobona?

Maeluda ba mwa puteho ne ba ezize tukiso ya ku tusa bo Hakan ni bo Inger ku teelezanga kwa mikopano ya Sikreste ka ku itusisa luwaile. Mi mizwale ni likaizeli ne ba potelanga bo Hakan ni bo Inger ni ku ba lizezanga mawaile. Hape ne ba ba lumelanga mañolo ni makadi. Bo Hakan ba li: “Ne lu iponezi mo ne ba lu tuselize mizwale kaufela ni mwa na lu tuselize Jehova. Ku lu iseza mamelelo cwalo ne ku lu tusize ku zwelapili lu tiile mwa sebelezo ya luna ku Mulimu. Ka litohonolo, bo Inger ba folile, mi hape se lu kona ku yanga kwa mikopano ya Sikreste kwa Ndu ya Mubuso.” Mizwale ni likaizeli ha ba lika ka taata ku tusa bakuli ni basupali ba mwa puteho ya habobona, ba bonisa kuli ki ‘balikani ba bona ba ba ba lata ka nako ni nako, ba ba pepezwi kuli ba be bana bahabo bona mwa liziyezi za bona.’—Liprov. 17:17.

Jehova wa Itebuha Buikatazo Bwa Mina

Kaniti, ku babalela wahabo mina ya kula kwa kona ku mi katalisa. Kono Mulena Davida na ñozi kuli: “U filwe mbuyoti mutu ya tokomela ba ba tokwile,” ba ba cwale ka mutu ya tokwa tuso kabakala ku kula.—Samu 41:1.

Ki kabakalañi ba ba babalela batu ba ba kula kamba ba ba nyanda ha ba kona ku ba ni mbuyoti, kamba tabo? Bibele i bulela kuli ya tusa mubotana, kamba mutu ya tokwa tuso, u cisa Jehova sikoloti mi Jehova u ka mu kutiseza se si mu lukela. (Liprov. 19:17) Mulimu wa niti u iyakatwa hahulu batanga ba hae ba ba sepahala ba ba kula, mi u fuyaula mutu ya ba tusa. Walisamu Davida na ñozi kuli: “Muñaa Bupilo u ka [tiisa mutu ya cwalo] ha lobezi mwa bulobalo bwa butuku: U mu bonela bulobalo bwa hae kaufela ha kula.” (Samu 41:3) Lwa kona ku kolwa kuli haiba mutu ya babalela mukuli a tahelwa ki butata kamba kozi, Jehova u ka mu tusa.

Kwa tabisa luli ku ziba kuli Jehova Mulimu wa bona ze lu eza ha lu babalela wahabo luna ya kula mi wa tabela ha lu eza cwalo! Nihaike kuli ku tusa bakuli ku tokwa buikatazo, Mañolo a lu kolwisa kuli “Mulimu u tabela matabelo a cwalo.”—Maheb. 13:16.

[Litaluso za kwatasi]

[Maswaniso a fa likepe 18]

Mu zwelepili ku ba ni buitikaneleli mwa sebelezo ya mina ku Mulimu mi mu amuhele tuso ye mu fiwa ki ba bañwi