MO mu Kona ku Itiiseza ha mu Fetuhelwa ki Bakumina

BO Margarita ni bo muunaa bona bo Raúl, ne ba sebelelize Jehova hamoho ka lilimo ze ñata mwa sebelezo ya nako kaufela. * Kono hasamulahonyana wa ku pepwa kwa mwanaa bona wa pili, bo Raúl ba kalisa ku fulalela Jehova hanyinyani-hanyinyani. Mafelelezo bo Raúl ba kala ku pila ka mizamao ye maswe mi ba zwisiwa mwa puteho ya Sikreste. Bo Margarita ba li: “Litaba zeo kaufela ha ne li ezahalile, ne ni ikutwile kuli na shwa. Ne ni lobehile pilu, mi ne ni sa zibi sa ku eza.”

Bo Jane ba mano nyalwa, bo muunaa bona be ne ba sepa ni ku lata ba ba fetuhela ka mukwa o shutana ni o bulezwi mwa paragilafu ye felile. Ne ba kalile ku ba natanga. Bo Jane ba li: “Lizazi la pili le ne ba ni natile ñindi, ne ni komokile hahulu ni ku swaba. Ku zwa ona fo, ba kala ku ni natanga ni ku ni kupanga kuli ni ba swalele. Ne ni ikutwile kuli ka ku ba Mukreste, ne ni na ni ku ba swalelanga kamita ni ku libalanga bufosi bwa bona. Hape ne ni ikutwa kuli ku bulelela ba bañwi butata bwa luna—nihaiba maeluda ba mwa puteho—neikaba ku tokwa busepahali. Mukwa wa bo muunaa ka wa ku ni natanga inge ni ba swalelanga wa zwelapili ka lilimo-limo. Halaa nako yeo kaufela, ne ni nahananga kuli ku na ni se ne ni swanela ku eza kuli bo muunaa ka ba ni late. Mafelelezo ha ne ba ni yubekile ni mwanaa luna wa musizana, ne ni ikutwile kuli ku na ni lika ze ne ni palezwi ku eza kamba ku bulela ilikuli linyalo la luna li zwelepili.”

 Sina bo Margarita ni bo Jane, mwendi ni mina mu lobehile pilu, ha mu na hande masheleñi, kamba mu ikutwa kuli se mu fokola mwa tumelo kabakala bo muunaa mina ba ba mi fetuhezi. Kamba mwendi mu baana ba ba mwa masitapilu ni mwa butata kabakala bo musalaa mina ba ba si ka sepahala. Ku si na ku kakanya, lu pila mwa “linako ze taata,” sina mo ne i polofitezi Bibele. Bupolofita bo, bu bonisa kuli mwa “mazazi a maungulelo,” mabasi naa ka lwaniswa, mi lilato la taho ne li ka ba siyo mwa mabasi a mañata. Batu ba bañwi ne ba ka ipapata feela ku sebeleza Mulimu. (2 Tim. 3:1-5) Bakreste ba niti ni bona ba tahelwanga ki matata a cwalo; kacwalo ki sika mañi se si kona ku mi tusa ku itiisa haiba mu fetuhezwi ki bakumina?

Mu Ipone Sina Mwa mi Bonela Jehova

Kwa makalelo, ku kona ku mi bela taata ku lumela kuli mutu ye mu lata ki yena ya mi ezize maswe cwalo. Mane mu kona ku kala ku inyaza kabakala muzamao wa hae wa sibi.

Kono mu hupule kuli nihaiba Jesu ya naa li mutu ya petehile naa fetuhezwi ki mutu ya naa sepile ni ya naa lata. Jesu naa ketile balikani ba hae ba batuna, bona baapositola, hamulaho wa ku lapela hahulu ka za teñi. Ka nako yeo, baapositola ba 12 kaufelaa bona ne ba li batanga ba Jehova ba ba sepahala. Kacwalo, Jesu u swanela ku ba ya naa utwile hahulu butuku Judasi ha naa “fetuhile mubeteki.” (Luka 6:12-16) Kono Jehova naa si ka nga kuli Jesu ki yena ya naa tahisize kuli Judasi a be mubeteki.

Ki niti kuli ka nako ya cwale, ha ku na mutu ya mwa linyalo ya petehile. Muuna ni musali ba ba nyalani ba ka eza mafosisa. Ka susuezo ya moya o kenile, walisamu naa bonisize buniti bwa taba yeo ha naa ñozi kuli: “Muñaa Bupilo, ha u ka londoloza bumaswe, Mulena, ku ka pila mañi?” (Samu 130:3) Batu ba ba nyalani ba swanela ku likanyisa Jehova ka ku lata ku swalelananga mafosisa.—1 Pit. 4:8.

Kono “mutu kaufela ku luna u ka ba ni ku ikalabela ku Mulimu, ka za hae.” (Maro. 14:12) Haiba yo muñwi ku ba ba nyalani a ba ni mukwa wa ku itusisanga lipulelo ze maswe kamba ku ezanga maswe mutu ya nyalani ni yena, sifosi yo ki yena ya ka ikalabela ku Jehova. Jehova u nyaza mifilifili ni lipulelo ze maswe, kacwalo ha ku na ya na ni swanelo ya ku nyandisa mutu ya nyalani ni yena ka nzila ye cwalo ye bonisa ku tokwa lilato ni likute. (Samu 11:5; Maef. 5:33; Makolo. 3:6-8) Mi mane haiba Mukreste a zwelapili ku bonisanga buhali ku ba bañwi a sa baki, u swanelwa ku zwisiwa mwa puteho ya Sikreste. (Magal. 5:19-21; 2 Joa. 9, 10) Muuna kamba musali ha swaneli ku ikutwa bufosi ha bihela maeluda likezo ze cwalo ze sa swaneli kwa Bakreste. Kaniti, Jehova u utwela butuku batu ba ba nyandiswa cwalo.

Mutu ya mwa linyalo ha buka, ha fosezi feela ya nyalani ni yena kono u foseza ni Jehova. (Mat. 19:4-9; Maheb. 13:4) Haiba ya si na mulatu yena naa nzaa ikataza ku pila ka ku lumelelana ni likuka za Bibele, ha swaneli ku ikutwa bufosi kabakala sibi sa mutu ya nyalani ni yena ya bukile.

Mu hupule kuli Jehova wa ziba mo mu ikutwela. U italusa kuli ki yena muunaa sicaba sa Isilaele, mi Linzwi la hae li na ni litaba ze ñata ze bonisa butuku bwa naa utwile muta sicaba seo ne si mu fulalezi ka ku lapela milimu ya buhata. (Isa. 54:5, 6; Jer. 3:1, 6-10) Haiba mu fetuhezwi ki bakumina ka nzila ye ñwi, mu kolwe kuli Jehova wa bona mioko ya mina. (Mala. 2:13, 14) Wa ziba kuli mu tokwa ku omba-ombiwa ni ku tiiswa.

Mwa Omba-Ombelanga Jehova

Puteho ya Sikreste ki ye ñwi ya linzila zeo Jehova a omba-omba batu ba hae ka zona. Bo Jane ne ba tiisizwe ka nzila yeo. Ha ba iheta ba li: “Muokameli wa mupotoloho naa tilo potela puteho ya luna ka nako ye ne ni lembwalile. Naa ziba mo ne ni lembwalezi kabakala muhato o ne ba ngile bo muunaa ka wa ku bata telekano. Naa ikatalize ku ni tusa ku nahanisisa mañolo a cwale ka 1 Makorinte 7:15. Litimana za Bibele ni manzwi a hae a musa, ne li ni  tusize ku sa ikutwa mulatu mi ne ni bile ni mombecima.” *

Bo Margarita ba ba bulezwi kwa makalelo ni bona ne ba itutile kuli Jehova u tusanga batu ba hae ka ku itusisa puteho ya Sikreste. Bo Margarita ba li: “Ha ne ni boni kuli bo muunaa ka ne ba sa baki, na tutela kwa tolopo isili ni bana ba ka. Ha ne lu fitile mwa tolopo yeo, na fumana mizuzu ye mibeli ya ku telela. Lizazi le li tatama, ka nako ye ne ni li mwa maswabi inge ni sweli ku longola libyana mwa mikotana, na utwa mutu ya ngongota fa sikwalo. Na hupula kuli ya naa ngongota ne li musali ya naa li muñaa ndu, ya naa pila mwa ndu ye tatama. Kono na makala hahulu kuli kanti ne li kaizeli ya naa itutanga Bibele ni bo ma ili ya naa tusize lubasi lwa luna ku ituta niti. Naa si ka taha ku to bona na, kono naa tile fa ndu yeo bakeñisa kuli naa itutanga Bibele ni muñaa ndu. Na ikutwa ku imululwa hahulu—mi na palelwa ku tiya pilu. Na mu taluseza muinelo o ne ni li ku wona, mi sibeli sa luna lwa lila. Kapili-pili a eza litukiso za kuli na ni bana ba ka lu ye kwa mukopano zazi leo. Ne lu amuhezwi ki puteho, mi maeluda ne ba ezize litukiso za kuli ni kone ku tusa bana ba ka ku zwelapili mwa niti.”

Mo ba Kona ku Tuseza ba Bañwi

Kaniti, ku na ni linzila ze ñata ze ba kona ku tusa ka zona ba mwa puteho ya Sikreste. Ka mutala, bo Margarita ne ba na ni ku fumana mubeleko cwale. Lubasi lo luñwi lwa mwa puteho ne lu sepisize kuli lu ka babalelanga bana ba bo Margarita ha ba zwile kwa sikolo.

Bo Margarita ba li: “Ni itebuhanga hahulu mizwale ni likaizeli ha ba itakalezanga ku ya mwa sebelezo ya mwa simu ni na ni bana ba ka.” Ka ku tusana ka linzila ze cwalo, ba mwa puteho ba ‘lwalisana milwalo ya bona,’ mi ka ku eza cwalo ba peta “mulao wa Kreste.”—Magal. 6:2.

Batu ba ba nyanda kabakala libi za ba bañwi ba itebuha hahulu tuso ye cwalo. Bo Monique, be ne ba yubekilwe ki bo muunaa bona be ne ba ba siile ni sikoloti sa $15,000 (ibato ba K70,500,000) ni bana ba bane, ba li: “Mizwale ni likaizeli ba ka ne ba na ni lilato le lituna. Ha ni zibi mo ne ni ka pilela kambe ne ba si ka ni tusa. Ni ikutwa kuli Jehova naa ni file mizwale ba bande hahulu, be ne ba ifanile ku tusa banake. Ni bile ni tabo ya ku iponela bana ba ka ha ba eza zwelopili ku fita fa ku ba Bakreste ba ba hulile kabakala tuso ye ne ba filwe. Ha ne ni tokwanga likelezo, maeluda ne ba ni fanga zona. Ha ne ni tokwanga ku ba bulelela maikuto a ka, ne ba ni teelezanga.”—Mare. 10:29, 30.

 Ki niti kuli mulikani ya lilato wa lemuhanga nako ya sa swaneli ku ambolisa mulikanaa hae ka za matata a naa ipumani ku ona mulikanaa hae yo. (Muek. 3:7) Bo Margarita ba li: “Hañata ne ni ikolanga ku ambola ni likaizeli za mwa puteho ya ka ye nca ka za musebezi wa ku kutaza, ka za lituto za Bibele za luna, ka za bana ba luna, kamba ka za nto ifi kamba ifi kwandaa matata a ka. Ne ni tabile kuli ne ba sa ni hupulisangi ze ne ni ipumani ku zona kwamulaho mi ne ba ni tusize ku kalisa bupilo bo bunca.”

Mu si ke Mwa Kutiseza Bumaswe

Mwendi fokuñwi ha mu ikutwangi bufosi kabakala libi za bakumina, kono mwendi mu nyemiswanga ki taba ya kuli mu sweli ku nyanda kabakala mafosisa a bona. Haiba bunyemi bo mu bu tuhelela ku zwelapili, bu kona ku tahisa kuli mu si ke mwa tiiseza mwa ku sepahala ku Jehova. Ka mutala, mu kona ku ba mwa muliko wa ku bata linzila za mwa ku kutiseza bumaswe bo ba mi ezize bakumina.

Haiba mu lemuha kuli mu na ni maikuto a cwalo, mwa kona ku hupula mutala wa bo Joshua ni Kalebu. Baana ba ba sepahala bao ne ba beile bupilo bwa bona mwa lubeta ka ku yo twela Naha ya Sepiso. Matwela ba bañwi ne ba si na tumelo mi ne ba tahiselize sicaba ku tuhela ku utwa Jehova. Mane bo Joshua ni Kalebu ha ne ba likile ku susueza sicaba kuli si zwelepili ku sepahala, Maisilaele ba bañwi ne ba batile ku ba pobaula ka macwe. (Num. 13:25–14:10) Likezo za Maisilaele ne li tahisize kuli bo Joshua ni Kalebu ni bona ba yambaele mwa lihalaupa ka lilimo ze 40, isi kabakala bufosi bwa bona kono kabakala bufosi bwa ba bañwi.

Nihaike kuli bo Joshua ni Kalebu mwendi ne ba swabisizwe ki taba yeo, ne ba si ka tuhelela libi za banabahabo bona ku ba nyemisa. Ne ba iyakatwile hahulu sebelezo ya bona ku Jehova. Hamulaho wa lilimo ze 40 ze ne ba zamaile mwa lihalaupa, bo Joshua ni Kalebu hamoho ni Malivi, ne ba filwe mupuzo ka ku piliswa ni ku lumelezwa ku kena mwa Naha ya Sepiso, kono batu kaufela ba lusika lwa bona ne ba felile ku shwa.—Num. 14:28-30; Josh. 14:6-12.

Likezo za bakumina ba ba mi fetuhezi za kona ku tahisa kuli mu nyande ka nako ye telele. Linyalo la kona ku fela, kono hasamulaho mu kona ku swaba maswe ni ku ba ni butata bwa ku tokwa masheleñi. Kono mwa sibaka sa ku nahananga hahulu matata a mina, mu hupule kuli Jehova ki yena ya ziba hande mwa ka ezeza batu ba ba loba milao ya hae ka bomu, sina mo u boniseza mutala wa ze nee ezahezi kwa Maisilaele be ne ba si na tumelo ha ne ba li mwa lihalaupa.—Maheb. 10:30, 31; 13:4.

Mwa Kona ku Itiisa!

Mwa sibaka sa ku imezwa ki ku nahananga za matata a mina, mu nahanange mihupulo ya Jehova. Bo Jane ba li: “Ku teelezanga kwa matepu a Tawala ya Mulibeleli ni Mu Zuhe! ne ku ni tusize ku itiisa. Hape ne ni tiiswanga hahulu ki mikopano. Ku banga ni kabelo mwa mikopano ne ku ni tusize ku sa nahananga hahulu za matata a ka. Musebezi wa ku kutaza ni ona u ni tusize cwalo. Ka ku tusa ba bañwi ku ba ni tumelo ku Jehova, ni tiisize tumelo ya ka. Mi ku iyakatwa baituti ba Bibele ku ni tusize ku nahananga lika za butokwa hahulu.”

Bo Monique, be se ba bulezwi kale, ba bulela kuli: “Ku fumanehanga kwa mikopano kamita ni ku yanga mwa sebelezo ya mwa simu ka mo ni konela kaufela ku ni tusize ku itiisa. Lubasi lwa ka lu fitile fa ku swalisana hahulu ni ku sutelela hahulu kwa puteho. Butata bo bu ni ezahalezi bu ni tusize ku lemuha mifokolo ya ka. Ni likilwe, kono Jehova u ni tusa ku itiisa.”

Ni mina mwa kona ku itiisa mwa miinelo ye cwalo. Ku si na taba ni butuku bo mu kona ku utwa ha mu fetuhelwa ki bakumina, mu like ka taata ku latelela kelezo ye tahile ka moya ya naa file Paulusi, ye li: “Lu si ke lwa katala ku eza hande, kakuli lu ka kutula mwa nako ya teñi ha lu sa zwafi.”—Magal. 6:9.

[Litaluso za kwatasi]

[Siswaniso se si fa likepe 31]

Ba ba yubekilwe ki bakubona ba itebuhanga mizwale ni likaizeli ba ba yanga ni bona mwa sebelezo ya mwa simu