Mu Ikatuluse Ka Ku Eza Misebezi Ye Ama Bulapeli Bwa Luna

“Mu itwese coko ya ka, . . . [mi] mu ka fumanela mioya ya mina pumulo.”—MAT. 11:29.

1. Mulimu naa ezize tukiso mañi fa Lilundu la Sinai, mi ki kabakalañi?

MWA bulikani bwa Mulao bo ne bu kalisize fa Lilundu la Sinai ne ku na ni mulao wa ku bulukanga lizazi la Sabata sunda ni sunda. Ka ku itusisa mubuleli wa hae Mushe, Jehova naa laezi sicaba sa Isilaele kuli: “U ka na u eza musebezi wa hao mazazi a 6, mi u pumule ka la bu 7, kuli komu ya hao ni mbongolo ya hao li pumule ni zona, ni kuli mwanaa mushimani wa mutangaa hao wa musizana, ni muzwahule, ba katuluhe.” (Ex. 23:12) Kaniti, Jehova naa iyakatwa batu ba hae ba naa file Mulao, mi kona libaka ha naa ba file lizazi la pumulo ilikuli ba ‘katuluhange.’

2. Maisilaele ne ba tusizwe cwañi ki ku mamela Sabata?

² Kana lizazi la Sabata ne li la ku ikatulusanga feela? Batili, Sabata ne li lizazi la butokwa hahulu mwa bulapeli bwa Maisilaele ku Jehova. Ku mamela Sabata ne ku fanga litoho za mabasi nako ya ku luta mabasi a bona “kuli ba mamele nzila ya Muñaa Bupilo, ba eze niti.” (Gen. 18:19) Lizazi la Sabata hape ne li fanga mabasi ni balikani kolo ya ku kopana hamoho ku nahanisisa misebezi ya Jehova ni ku ikola siango. (Isa. 58:13, 14) Mi sa butokwa hahulu kikuli, lizazi la Sabata ne li supa kwa nako ya kwapili ili mo batu ne ba ka fumana pumulo sakata mwahalaa Puso ya Kreste ya Lilimo ze Sikiti. (Maro. 8:21) Kono mwa miteñi ya luna bo? Ki kakai ko Bakreste ba niti ba ba lata linzila za Jehova ba kona ku fumana pumulo ye cwalo, mi ba kona ku i fumana cwañi?

Mu Fumane Pumulo ka ku Eza Siango ni Bakreste Sina Mina

3. Bakreste ba makalelo ne ba tiisananga cwañi, mi ne ku zwileñi mwateñi?

³ Muapositola Paulusi naa talusize kuli puteho ya Sikreste ki “musumo ni sehezo ye seheza niti.” (1 Tim. 3:15) Bakreste ba makalelo ne ba tiiswanga hahulu ki ku susuezana ni ku yahisana ka lilato. (Maef. 4:11, 12, 16) Ha naa li mwa Efese, Paulusi naa potezwi ki balumeli ba mwa puteho ya Korinte be ne ba tilo mu tiisa. Mu lemuhe mo Paulusi naa tiiselizwe ki poto yeo. Naa bulezi kuli: “Ni tabezi ku taha kwa Setefanasi, ni Fortunato, ni Akaiko. . . . Ba katulusize pilu ya ka.” (1 Makor. 16:17, 18) Kamukwaoswana, Tite ha naa ile kwa Korinte ku yo sebeleza mizwale ba kwateñi, Paulusi naa ñolezi puteho yeo hape kuli: “Moya wa hae no katulusizwe ki mina kaufela.” (2 Makor. 7:13) Ni kacenu, Lipaki za Jehova ba katuluswa ki liango ze yahisa ze ba eza ni Bakreste sina bona.

4. Mikopano ya puteho i lu katulusanga kamukwaufi?

⁴ Mwa izibela hande kuli mikopano ya puteho i lu tahisezanga tabo ye tuna. Teñi ko, lu ‘kutazananga, kamba ku susuezana, ka tumelo ye li ku luna’ ni kwa mizwale ba luna. (Maro. 1:12) Mizwale ni likaizeli ba luna haki batu-tu feela be lu zibana ni bona kamba balikani feela be lu kopananga ni bona. Ki balikani ba niti; ki batu be lu lata ni ku kuteka. Ku kopananga ni bona kwa mikopano ya luna ku lu tahisezanga tabo ye tuna mi ku lu tiisanga hahulu lipilu.—Fil. 7.

5. Lu kona ku katulusana cwañi ha lu li kwa mikopano ya sikiliti ni ya mwa mupotoloho?

 ⁵ Ko kuñwi ko lu katuluswanga ki kwa mikopano ya sikiliti ni ya mwa mupotoloho ye eziwanga silimo ni silimo. Kwandaa ku lu fa mezi a pilisa a yemela niti ye mwa Linzwi la Mulimu, yona Bibele, mikopano ye mituna yeo hape i lu fanga kolo ya ku ‘atamisa lipilu za luna,’ ili ku eza siango ni mizwale ni likaizeli ba ba shutana-shutana. (2 Makor. 6:12, 13) Kono ku cwañi haiba lu na ni maswabi mi lu fumananga taata ku atumela batu? Nzila ye ñwi ye lu kona ku zibana ka yona ni mizwale ni likaizeli ba luna ki ka ku ifananga ha lu li kwa mukopano wa sikiliti. Kaizeli yo muñwi ya naa tusize mwa musebezi o muñwi kwa mukopano wa macaba naa bulezi kuli: “Ne ni sa zibi batu ba bañata kwa mukopano wo; ne ni ziba feela ba lubasi lwa ka ni balikani ba ka ba sikai. Kono ha ne ni tusize mwa musebezi wa ku kenisa, ne ni fitile fa ku zibana ni mizwale ni likaizeli ba bañata! Ne ni tabile hahulu!”

6. Ki ifi nzila ye ñwi ye lu kona ku ikatulusa ka yona ha lu li fa pumulo?

⁶ Maisilaele ne ba yanga kwa Jerusalema ku yo lapela Mulimu kwa mikiti ye milalu ye ne eziwanga ka silimo ni silimo. (Ex. 34:23) Hañata ne ba na ni ku siyanga masimu ni lipisinisi za bona ni ku zamaya musipili wa mazazi a mañata ka mahutu mwa mikwakwa ya maluli. Kono ku yanga kwa tempele ne ku ba tahisezanga “tabo ye tuna” kakuli batu be ne ba banga kwateñi ne ba “lumba Muñaa Bupilo.” (2 Makol. 30:21) Batanga ba Jehova ba bañata kacenu ni bona ba fumani kuli ku yo potanga ni lubasi lwa bona kwa Betele, ili sibaka sa mutai wa Lipaki za Jehova se si li bukaufi ni bona, ku ba tahisezanga tabo ye tuna. Kana mwa kona ku lukisa musipili o cwalo lubasi lwa mina ha lu ka ba fa pumulo?

7. (a) Linako za ku itabisa li kona ku mi tusa cwañi? (b) Mu tokwa ku ezañi kuli mu itabise ka nzila ye nde ye yahisa?

⁷ Ku itabisanga hamoho ni lubasi lwa mina ni balikani ni kona kwa kona ku mi susueza. Mulena ya butali Salumoni naa bulezi kuli: “Ku  mutu, se sinde ki ku ca, ni ku nwa, ni ku tabisa pilu ya hae ka bunde bwa misebezi ya hae.” (Muek. 2:24) Ku itabisanga hamoho ni ba bañwi kwa katulusa mi hape ku tiisa lilato le li mwahalaa luna ni Bakreste ka luna ha lu nze lu ba ziba hande. Kuli mu itabise ka nzila ye yahisa ili ye mu ka hupulanga, ki hande ku memanga batu ba ba likani kwa mikopano ye cwalo ni ku bona teñi kuli lika za zamaiswa hande, sihulu haiba ku na ni bucwala.

Bukombwa Bwa Katulusa

8, 9. (a) Lushango lwa Jesu ne lu shutana cwañi ni lituto za bañoli ni Bafalisi? (b) Ku taluseza ba bañwi niti ya mwa Bibele ku lu tusa cwañi?

⁸ Jesu naa tukufalezwi bukombwa, mi naa susuelize balutiwa ba hae ku ba ni tukufalelo ye cwalo. Lu lemuha taba yeo mwa manzwi a hae a li: “Lukau ki lo lutuna luli, kono ba ba kutula ki ba banyinyani. Mu lapele kihona Muñaa lukau, kuli a lume babeleki mwa lukau lwa hae.” (Mat. 9:37, 38) Lushango lwa naa luta Jesu ne lu katulusa luli; ne lu li “Evangeli,” kamba taba ye nde. (Mat. 4:23; 24:14) Lushango lo ne lu shutana hahulu ni milao ye buima yeo Bafalisi ne ba tomezi batu.—Mu bale Mateu 23:4, 23, 24.

⁹ Ha lu taluseza batu lushango lwa Mubuso, lwa ba katulusa, mi ka nako ye swana lu ekeza kwa kutwisiso ya luna ya niti ya mwa Bibele mi lu fita fa ku itebuha hahulu niti yeo. Kona libaka walisamu ha naa bulezi kuli: “A mu lumbeke Muñaa Bupilo; kakuli ku opela za ku lumba Mulimu wa luna, ku munati; e, kwa kateleha.” (Samu 147:1) Kana mwa kona ku ekeza kwa tabo ye mu sweli ku fumana ha mu nze mu lumba Jehova kwa batu ba bañwi?

10. Kana se si bonisa kuli lu sweli ku peta hande bukombwa bwa luna ki batu ha ba amuhela hande lushango lwa luna? Mu taluse.

¹⁰ Ki niti kuli mwa libaka ze ñwi, batu ba tabela hahulu taba ye nde ku fita mwa likalulo ze ñwi. (Mu bale Likezo 18:1, 5-8.) Haiba mwa sibaka se mu pila ku sona batu ha ba tabeli hahulu lushango lwa Mubuso, mu like ku bona ze nde ze mu sweli ku eza mwa bukombwa. Mu hupule kuli buikatazo bwa mina bwa ku zwelapili ku shaela libizo la Jehova haki bwa mbango. (1 Makor. 15:58) Ku zwa fo, batu mo ba ngela taba ye nde hasi sona sizibelo sa kuli lu sweli ku peta hande bukombwa bwa luna kamba ku tokwa. Lwa kona ku kolwa kuli Jehova u ka bona teñi kuli batu ba lipilu ze nde ba fiwa kolo ya ku utwa lushango lwa Mubuso.—Joa. 6:44.

Ku Lapelanga Sina Lubasi Kwa Katulusa

11. Jehova u file bashemi buikalabelo mañi, mi ba kona ku bu peta cwañi?

¹¹ Bashemi ba ba saba Mulimu ba swanela ku luta bana ba bona ka za Jehova ni linzila za hae. (Deut. 11:18, 19) Haiba mu bashemi, kana mu tomile nako ya ku lutanga bana ba mina ka za Ndataa luna wa kwa lihalimu ya lilato? Kuli mu kone ku peta buikalabelo bwa butokwa bo ni ku babalela lubasi lwa mina, Jehova u lu file lico za moya ze ñata ze cwale ka libuka, limagazini, mavidio, ni lihatiso za fa matapa.

12, 13. (a) Ku banga ni Nako ya ku Lapela Sina Lubasi ku kona ku tusa cwañi mabasi? (b) Bashemi ba kona ku ezañi kuli nako ya bona ya ku lapela sina lubasi i bange ye katulusa?

¹² Hape sitopa sa mutanga ya sepahala ya na ni kutwisiso si ezize tukiso ya Nako ya ku Lapela Sina Lubasi. Yeo ki nako ye tomezwi ku itutanga Bibele sina lubasi sunda ni sunda. Ba bañata ba fumani kuli tukiso yeo i ba tamahanyize hamoho ka lilato mi i tiisize bulikani bwa bona ni Jehova. Kono bashemi ba kona ku ezañi kuli Nako ya ku Lapela Sina Lubasi i bange ye katulusa?

¹³ Nako ya ku Lapela Sina Lubasi i swanela ku ba nako ye tabisa. Esi mane lu lapela “Mulimu ya tabile,” mi Mulimu u bata kuli lu mu lapele inze lu tabile. (1 Tim. 1:11, NW; Mafil. 4:4) Ku toma nako ya ku nyakisisanga litaba za mwa Bibele ku ka lu tusa hahulu. Bashemi ba kona ku cinca-cincanga mulutelo wa bona, ili ka ku ikupulelanga linzila ze shutana-shutana. Ka mutala, bashemi ba bañwi ne ba lumelelize mwanaa bona wa mushimani wa libizo la Brandon wa lilimo ze lishumi kuli a fe piho ya toho ya taba ye li, “Ki Kabakalañi Jehova ha Naa Itusisize Noha ku Swaniseza Satani?” Brandon naa katalizwe ki  taba yeo bakeñisa kuli u lata linoha, mi naa si ka tabela taba ya kuli Satani u bapanyizwe ni noha. Ka linako ze ñwi, mabasi a mañwi a ikabelanga ku bala manzwi a batu ba ba bulezwi mwa likande la Bibele le ba bata ku bala, kamba ku eza papali ye tomile fa likande leo. Milutelo ye cwalo ya tabisa, mi i tusa bana ba mina ku ikutwa kuli ba amiwa, ili nto ye tahisa kuli likuka za Bibele li ba fite kwa lipilu. *

Mu Ambuke Lika ze Kona ku mi Imeza

14, 15. (a) Lika ze imeza ni ze kalelwisa li ekezehile cwañi mwa mazazi a maungulo? (b) Ki matata afi a mañwi a kona ku lu tahela?

¹⁴ Lika ze imeza ni ze kalelwisa se li ze ñata hahulu mwa mazazi a maungulo a lifasi le li maswe le. Batu ba bañata-ñata ba tokwile mibeleko mi ba talimana ni matata a ku tokwa mali. Nihaiba batu ba ba na ni mibeleko hañata ba ikutwanga kuli mali e ba holanga ba a shimbelanga mwa lipokoto ze tezi masuba, mi ba palelwanga ku tusa hande lubasi lwa bona. (Mu bapanye Hagai 1:4-6.) Babuabui ba litaba za naha ni babusi ba bañwi ba palezwi ku felisa likezo za bubembi ni businyi ni likezo ze ñwi ze maswe. Mi batu ba bañata ba katazwa ki mifokolo ya bona beñi.—Samu 38:4.

¹⁵ Bakreste ba niti ni bona ba tahelwanga ki matata a tiswa ki lifasi la Satani. (1 Joa. 5:19) Mwa miinelo ye miñwi, balutiwa ba Kreste ba kona ku talimana ni matata a mañwi ha ba nze ba satalala ku zwelapili ku sepahala ku Jehova. Jesu naa ize: “Ha ba ni nyandisize, ba ka mi nyandisa ni mina.” (Joa. 15:20) Kono niha lu ‘nyandiswa, ha lu fulalelwi.’ (2 Makor. 4:9) Ki kabakalañi ha ku li cwalo?

16. Ki nto mañi ye kona ku lu tusa ku zwelapili ku ba ni tabo?

¹⁶ Jesu naa ize: “Mu tahe ku na mina kamukana ba ba katezi, ba ba imezwi, mi ni ka mi imulula.” (Mat. 11:28) Ha lu ba ni tumelo ye tezi mwa sitabelo sa Kreste se si liulula, ku swana inge lu ipeya mwa mazoho a Jehova. Ka ku eza cwalo, lu fumana ‘maata a matuna hahulu.’ (2 Makor. 4:7) “Mutiisapilu,” ona moya o kenile wa Mulimu, u tiisa hahulu tumelo ya luna ilikuli lu kone ku tiyela miliko ni liñalelwa ze lu talimana ni zona mane ni ku zwelapili ku ba ni tabo.—Joa. 14:26; Jak. 1:2-4.

17, 18. (a) Lu swanela ku tokomela kuli lu si ke lwa ba ni moya ufi? (b) Ki sika mañi se si kona ku ezahala haiba lu isa hahulu pilu kwa minyaka?

¹⁷ Bakreste ba niti kacenu ba swanela ku tokomela kuli ha ba yambuli moya wa lifasi le o tahisa kuli batu ba late hahulu minyaka. (Mu bale Maefese 2:2-5.) Haiba lu sa tokomeli, lwa kona ku swasiwa ki “takazo ya nama, ni takazo ya meeto, ni buikuhumuso bwa bupilo.” (1 Joa. 2:16) Kamba lu kona ku ba ni mubonelo o fosahalile wa kuli ku ya ka litakazo za nama ku ka lu katulusa. (Maro. 8:6) Ka mutala, batu ba bañwi ba kalile ku itusisa milyani ye kola ni ku nwa maswe bucwala, ku buha maswaniso a mapunu, ku ikenya mwa lipapali ze lubeta, kamba ku eza lika ze shutana-shutana ze loba mulao ka mulelo wa kuli ba itabise. Satani u itusisa “makilikicani a maswe” kuli a yembulule batu ka ku ba susueza ku ba ni mubonelo o fosahalile wa ku ikatulusa.—Maef. 6:11, Bibele ye Kenile, hatiso ya 1984.

¹⁸ Ki niti kuli ku ca, ku nwa, ni ku itabisa ka linzila ze nde ha ku si ka fosahala haiba ku ezwa  ka tikanyo. Nihakulicwalo, ha lu swaneli ku lumeleza lika ze cwalo ku ba za butokwa hahulu mwa bupilo bwa luna. Lu tokwa ku ba ni buitikaneleli ni buiswalo, sihulu kabakala linako ze lu pila ku zona. Ku ndongwama likonkwani za ka butu ku kona ku lu imeza hahulu kuli mane lu fite fa ku ba ni “buzwa ni ku palelwa, mwa ku beya miselo mwa zibo ya Mulenaa luna Jesu Kreste.”—2 Pit. 1:8.

19, 20. Ku ikatulusa kwa niti ku konwa ku fumanwa cwañi?

¹⁹ Haiba munahanelo wa luna wa lumelelana ni milao ya Jehova, lu ka lemuha kuli minyaka kaufela ya mwa lifasi le ki ya nakonyana feela. Mushe naa lemuhile taba yeo, mi ni luna lu swanela ku i lemuha. (Maheb. 11:25) Niti kikuli, ku ikatulusa kwa niti ko ku tahiseza mutu tabo ye tuna ye sa feli, ku fumanwa ka ku eza tato ya Ndataa luna wa kwa lihalimu.—Mat. 5:6.

²⁰ Haike lu zweleñipili ku ikatulusa ka ku eza misebezi ye ama bulapeli bwa luna. Ka ku eza cwalo, lu “tuhela mukwa wa ku sa saba Mulimu ni wa ku shukelwa za lifasi . . . lu nze lu talimezi sepo ye na ni mbuyoti, ni ku bonahala kwa kanya ya Mulimu yo muhulu, ni ya Mupilisi wa luna Jesu Kreste.” (Tite 2:12, 13) Kacwalo, ha lu zweleñipili ku lwala coko ya Jesu ka ku ipeya kwatasaa zamaiso ya hae. Ka ku eza cwalo, lu ka fumana tabo ni ku ikatulusa kwa niti!

[Litaluso za kwatasi]

Mu Kona ku Alaba Cwañi?

• Batu ba Jehova ba ikatulusanga cwañi kacenu?

• Bukombwa bu lu katulusa cwañi, mi bu katulusa cwañi ni batu be lu kutaza?

• Litoho za mabasi ba kona ku ezañi kuli nako ya bona ya ku lapela sina lubasi i bange ye katulusa?

• Ki lika mañi ze kona lu imeza ha lu nze lu sebeleza Jehova?

[Lipuzo za Tuto]

[Maswaniso a fa likepe 26]

Ka ku itwesa coko ya Jesu, lu fumana linzila ze ñata za ku ikatulusa ka zona