Ne ba Swalisani ka Lilato Piho ya Mukopano wa ka Silimo

KWA Ndu ya Mukopano ya Lipaki za Jehova ya mwa Jersey City, ili mwa New Jersey, kwa U.S.A., ne ku na ni tabo ye tuna. Ka la 3 October, 2009, batu ba ba fitelela 5,000 ne ba kopani hamoho kakusasana kwa mukopano wa ka silimo wa bu 125 wa Watch Tower Bible and Tract Society of Pennsylvania. Batu ba bañwi ba ba eza likiti-kiti ba ba pila mwa miyaho ya Betele ya United States ni mwa Betele ya Canada ne ba buhile tukiso yeo fa mazimumwangala. Palo hamoho ya batu be ne ba swalisani ka lilato la bona ku Jehova inze ba ikola mukopano wo wa lihola ze talu, ne li 13,235.

Bo Geoffrey Jackson, ba ba li mwa Sitopa se si Etelela, ne li bona bo muina-situlo. Ne ba kalisize mukopano wo ka ku mema sikwata sa baopeli sa mizwale ni likaizeli ba ba sebeleza fa Betele mi ba opela lipina ze ñwi za mwa buka ya luna ya lipina ye nca. Bo David Splane, ba bañwi ba mwa Sitopa se si Etelela, ki bona be ne ba etelela sikwata seo mwa ku opela, mi ne ba nyakisisize ka bukuswani butokwa bwa lipina mwa bulapeli bo bu kenile. Baputehi ne ba memilwe ku opela lipina ze nca ze talu fa mukopano wo; sikwata sa baopeli ne si opezi lipina zeo pili, mi hasamulaho sa li opela hamoho ni baputehi kaufela. Tukiso ya ku itusisa sikwata sa baopeli ne i lukiselizwe feela mukopano o ipitezi wo; hasi mutala o swanelwa ku latelelwa kwa mikopano ya puteho, ya mupotoloho, ni ya sikiliti.

Lipiho ze Zwa Kwa Mitai

Mizwale ba bapoti ba ba mwa Tutengo Twa Mitai ne ba file lipiho ze ne zwa kwa mitai ye ketalizoho. Bo Kenneth Little ne ba talusize kuli mutai wa Canada u ka tuha u kalisa ku hatisezanga mutai wa United States ni wa Canada buñata bwa limagazini, mi kacwalo ku hatiswa kwa limagazini fa mutai wo ku ka ekezeha halishumi. Kuli mulelo wo u petahale, likwata ze peli za babeleki li ka yapananga ku itusisa mushini o munca o hatisa, mi sikwata ni sikwata si ka belekanga ka lihola ze 8, ili ku talusa kuli likwata zeo li ka belekanga lihola ze 16 ka zazi.

Bo Reiner Thompson ne ba file piho ya mo u zamaela musebezi wa Mubuso mwa Dominican Republic, mi bo Albert Olih ne ba talusize za zwelopili ya musebezi wa luna mwa Nigeria. Bo Emile Kritzinger ba kwa Mozambique ne ba talusize kuli hamulaho wa lilimo ze ñata-ñata za nyandiso mwa naha yeo, Lipaki za Jehova ne ba ñolisizwe ka mulao ka 1992. Mwa lilimo za cwanoñu fa, palo ya bahasanyi ba mwa linaha ze talu zeo i ekezehile hahulu. Bo Viv Mouritz ba kwa mutai wa Australia ne ba talusize ka za lizwelopili ze sweli ku ezahala mwa sooli sa East Timor, ili se si okamelwa ki mizwale ba mwa Australia.

Tutengo Twa Sitopa se si Etelela

Ka 1976, misebezi kaufela ya Lipaki za Jehova ne i kalile ku zamaiswa ki tutengo to tu silezi twa Sitopa se si Etelela. Hasamulaho, ba bañwi ba lingu ze ñwi ne ba ketilwe ku ba batusi. Ka nako ya cwale, se ku na ni batusi ba 23 ba ba sweli ku tusa mwa musebezi. Ba ba silezi ku bona ne ba buzizwe lipuzo fa libulelelo. Palo hamoho ya lilimo ze ba tandile mwa sebelezo ya nako kaufela ki 341, ili ku talusa kuli ka avareji yo muñwi ni yo muñwi wa bona u tandile lilimo ze 57 mwa sebelezo yeo.

Bo Don Adams, be ne ba kalile sebelezo ya bona ya fa Betele ka 1943, ne ba talusize kuli mwa Katengo ka Baswalisanisi ku na ni baswalisanisi ba tutengo to tuñwi to tu ketalizoho, mi katengo kao ka bona teñi kuli tutengo to kaufela twa beleka hande ka ku swalisana. Katengo kao ka talimanga litaba ze ama likozi ze tuna, nyandiso, mizeko ya mwa likuta, ni litaba ze ñwi ze ama Lipaki za Jehova mwa lifasi kaufela.

 Bo Dan Molchan ne ba talusize ka za musebezi wa Katengo ka ka Talima za ba ba Sebeleza fa Betele, ili ba ba eza 19,851 mwa lifasi kaufela. Bo David Sinclair ne ba talusize mo Katengo ka Bahatisi ka okamelela musebezi wa ku leka lika ni liitusiso ze tokwahala mwa mitai. Ku zwa fo, bo Robert Wallen, ba se ba sebelelize fa Betele ka lilimo ze bato ba 60, ne ba talusize mo Katengo ka Sebelezo ka okamelela musebezi o ba eza batu ba Jehova mwa simu ni mwa liputeho. Bo William Malenfant ne ba talusize musebezi-tuna o ka eza Katengo ka Tuto wa ku lukisanga progilamu ya mukopano wa sikiliti. Mi bo John Wischuk ne ba talusize mo Katengo ka Bañoli ka okamelela musebezi wa ku lukisa litaba ze ñolwanga mwa lihatiso za luna. *

Liñolo la Silimo sa 2010 li Bulela za Lilato

Lingambolo ze talu ze ne latelezi ne li filwe ki mizwale ba mwa Sitopa se si Etelela. Bo Gerrit Lösch ne ba kalisize ngambolo ya bona ka puzo ye li, “Kana mwa tabela ku latiwa ki ba bañwi?” Ne ba talusize kuli batu kaufela ba tokwa lilato, mi kaufelaa luna lu tabelanga ku boniswa lilato. Lilato ki lona le li tahisize kuli lu be teñi kakuli Jehova naa lu bupile kabakala lilato la hae. Lilato la luna ku Jehova ki lona le li lu susueza hahulu ku eza musebezi wa ku kutaza ni ku luta batu.

Lilato sakata ha li boniswangi ku banabahabo luna feela, kono li boniswanga ni kwa lila za luna. (Mat. 5:43-45) Baputehi ne ba susuelizwe ku hupula za naa ipumani ku zona Jesu kabakala luna; naa natilwe, ku sheununwa, ku kwelwa mati, ni ku tabiwa. Niha naa ezizwe maswe cwalo, naa lapelezi masole be ne ba mu kokotezi. Kana seo ha si lu susuezi ku mu lata hahulu? Cwale Muzwale Lösch a zibahaza liñolo la silimo sa 2010: 1 Makorinte 13:7, 8, ‘Lilato li itiisa mwa linto kaufela. Lilato ha li na ku fela.’ Lu na ni sepo ya ku pila ku ya ku ile mane ni ya ku lata ba bañwi ni ku latiwa ki bona ku ya ku ile.

Kana mu Zamaisa Mota ye si na Hande Mafula?

Bo Samuel Herd ne ba kalisize ngambolo ya bona ka ku fa mutala. Mu nge kuli mulikanaa mina u ya ni mina mwa musipili wa likilomita ze eza 50. Ha mu nze mu kwezi mwa mota cwalo, mu lemuha kuli sisupo se si bonisa fo a zamaela mafula si supile fo ku ñozwi mukungulu. Mu taluseza mulikanaa mina kuli mota i tuha i fela mafula. U mi bulelela kuli mu si ke mwa bilaela kakuli mwa tanki ku sa na ni mafula a bato eza malita a mane. Kono ku si ka fita nako, mu felelwa ki mafula. Kana ki hande ku zwelapili ku “zamaisa mota ye si na hande mafula” inge mu ziba kuli a ka mi felela mwa musipili? Neikaba hande hahulu ku ba ni tanki ye tezi mafula! Ka swanisezo, ni luna lu swanela ku ba ni tanki ye tezi mafula, mi mafula ao ki zibo ya luna ya ku ziba Jehova.

Kacwalo, lu tokwa ku selanga mafula mwa tanki ya luna, mi lu swanela ku ezanga cwalo kamita. Ku na ni linzila zee ne ze lu kona ku eza cwalo ka zona. Nzila ya pili ki ka ku banga ni tuto ya ka butu kuli lu tekelele hande Bibele, ili ka ku i balanga ka zazi ni zazi. Ha lu swaneli ku balanga feela manzwi;  lu swanela ku utwisisa ze lu bala. Nzila ya bubeli ki ka ku itusisa hande Nako ya ku Lapela Sina Lubasi. Kana sunda ni sunda lwa tazanga tanki ya luna ka mafula kamba kana lu cunkanga feela mwateñi hanyinyani? Nzila ya bulalu ki ka ku fumanehanga kwa mikopano ya puteho ilikuli lu yo ituta hamoho ni yona. Nzila ya bune ki ka ku yeyanga linzila za Jehova inze lu li mwa sibaka se si kuzize. Liñolo la Samu 143:5 li bulela kuli: “Ni hupula mazazi a kwakale, ni kengeela zo ezize kaufela.”

“Ba ba Lukile ba ka Benya”

Bo John Barr ne ba file ngambolo ya bulalu ye ne i li ya mafelelezo, mo ne ba nyakisisize nguli ya Jesu ya buloto ni mufuka. (Mat. 13:24-30, 38, 43) Nguli yeo i bulela ka za “nako ya ku kutula,” mo “bana ba mubuso” ba ka kubukanywa mi mufuka u ka ketahanywa ilikuli u ciswe.

Muzwale Barr naa talusize kuli musebezi wa ku kubukanya ha u na ku zwelapili ku ya ku ile. Naa amile kwa liñolo la Mateu 24:34 le li bulela kuli: “Lusika lo lwa kacenu ha lu na ku fela, konji zeo kaufela li bonahale pili.” Naa kutezi ku bala manzwi a li: “Ku bonahala kuli Jesu naa talusa kuli batoziwa ba bañwi be ne ba boni sisupo ha si kalisa ku bonahala ka 1914 ne ba ka pila ka nako ye swana nihaiba ka lilimo-nyana ni batoziwa ba ba ka bona makalelo a ñalelwa ye tuna.” Ha lu zibi butelele luli bwa nako ye lu ka pila “lusika lo lwa kacenu,” kono lusika lo lu kopanyeleza likwata ze peli zeo za Bakreste ba ba tozizwe. Nihaike kuli batoziwa ba na ni lilimo za buhulu ze shutana-shutana, batoziwa ba ba mwa likwata ze peli zeo, ili ba ba li “lusika lo lwa kacenu,” ba pila mwa silengo sa nako ye swana mwahalaa mazazi a maungulelo. Kwa tabisa ku ziba kuli batoziwa ba ba li banana kwa batoziwa ba bahulu be ne ba lemuhile sisupo ha ne si kalile ku bonahala ka 1914 ili ba ba pilile ka nako ye swana ni batoziwa ba bahulu bao, ha ba na ku shwa kaufela bona pili ñalelwa ye tuna i si ka kalisa kale!

“Bana ba mubuso” ba nyolezwi mupuzo wa bona kwa lihalimu, kono kaufelaa luna lu swanela ku zwelapili ku sepahala, inze lu benya ku isa kwa mafelelezo. Lu na ni tohonolo ye tuna ya ku iponela “buloto” ha bu kutulwa mwa nako ya luna.

Hamulaho wa pina ya mafelelezo, bo Theodore Jaracz, ba ba mwa Sitopa se si Etelela, ne ba file tapelo ya ku kwala mukopano. Kaniti, mukopano wa ka silimo wo ne u li o yahisa!

[Litaluso za kwatasi]

[Mbokisi fa likepe 5]

SIKOLO SA MAELUDA

Kwa mukopano wa ka silimo wo, bo Anthony Morris, ba ba mwa Sitopa se si Etelela, ne ba zibisize kuli ku ka ba ni tukiso ye ka zwelapili ya ku luta maeluda ba mwa liputeho. Sikolo sa maeluda ba mwa United States ne si kalisize kwa makalelo a silimo sa 2008 kwa sibaka sa tuto sa kwa Patterson, mwa New York. Ka nako ya mukopano wo, sitopa sa bu 72 kona ha ne si sa zo fela, mi se ku lutilwe maeluda ba 6,720. Kono ku sa siyezi musebezi o mutuna. Mwa United States feela, ku na ni maeluda ba ba fitelela 86,000. Kacwalo, Sitopa se si Etelela ne si lumelelize kuli sikolo se siñwi si eziwe mwa Brooklyn, ili mwa New York, ku kala ka la 7 December, 2009.

Baokameli ba maeto ba bane ne ba ka lutiwa ka likweli ze peli kwa Patterson ilikuli ba be baluti. Hamulaho, ne ba ka lumelwa kwa Brooklyn kuli ba yo luta, mi ne ku ka lutiwa baokameli ba maeto ba bane hape. Bao ne ba ka yo luta kwa sikolo sa maeluda mwa Brooklyn, mi mizwale ba bane be ne ba lutilwe pili ne ba ka yo luta kwa likolo ze ne ka ezezwa kwa Mandu A Mikopano ni Mandu A Mubuso. Muezezo wo ne u ka zwelapili ku fitela ku ba ni baluti ba 12 ba ba ka na ba luta likolo ze silezi ka sunda ni sunda mwa puo ya Sikuwa mwa United States. Ku zwa fo, ne ku ka lutiwa baluti ba bane ili be ne ba ka luta mwa puo ya Spanish. Sikolo se ha si na ku yola Sikolo sa Bukombwa Bwa Mubuso; mulelo wa sona ki ku tusa maeluda kuli ba zwelepili ku tiya mwa niti. Mitai ya mwa lifasi kaufela i ka kalisa ku eza sikolo seo kwa Mandu A Mikopano ni Mandu A Mubuso mwa silimo sa sebelezo sa 2011.

[Maswaniso a fa likepe 4]

Mukopano wa ka silimo ne u kalisize ka lipina ze ne opezwi ku zwelela mwa buka ya luna ya lipina ye nca ya “Mu Opelele Jehova”