Temuho I Tahisa ze Nde

KANA mwa lemuhanga kolo ya ku kutaza mwa kalulo ya simu ya puteho ya mina? Mizwale ba luna ba Sikreste ba mwa tolopo ya Turku, ye mwa Finland, ili ye kwa likamba la liwate, ne ba ezize cwalo mi ze ne zwile mwateñi ne li ze nde.

Ka nako ye ñwi kwamulaho, mizwale ba mwa Turku ne ba lemuhile sikwata sa baana ba kwa Asia be ne ba tile mwa tolopo yeo ku to feleleza sisepetuna se ne si swelwi ku yahiwa mwa sibaka mo ku yahelwanga lisepe. Hasamulaho muzwale yo muñwi a fumana lihotela mo ne ba fitezi babeleki bao. Hape naa lemuhile kuli babeleki bao ne ba to ngiwanga ki limbasi kwa lihotela ni ku isiwa kwa likamba kakusasa-sasa. Kapili-pili a lemusa mizwale ba mwa puteho ya Sikuwa ya mwa Turku.

Maeluda ba mwa puteho yeo ba lemuha kuli ku ba teñi kwa bazwahule ba bañata-ñata bao ne ku ba fa kolo ya ku ba bulelela litaba za Mubuso, mi kapili-pili ba eza tukiso ye ipitezi kuli ba kutazwe. La Sunda mwahalaa sunda yeo, bahasanyi ba ba lishumi ba putehana bukaufi ni sitishini sa limbasi ka 7 ya kakusasana. Pili ne ba si ka bona mubeleki ni yo mukana. Mizwale ba ipuza kuli: ‘Kikuli lu liyehile hahulu? Kana ba zwile mwa Turku?’ Kono mubeleki ya naa tinile obolosi a punya. Mubeleki yo muñwi a mu latelela mi ba bañwi ni bona ba punya. Ka nakonyana feela, babeleki ba bañata-ñata ba kubukana bukaufi ni sitishini. Bahasanyi ba kalisa ku ba kutaza ka ku itusisa lihatiso za Sikuwa. Ka litohonolo, ne ku fitile nako ye ne bato eza hola kuli babeleki kaufela ba fumane lipula mwa limbasi, mi nto yeo ne i tahisize kuli mizwale ba ambole ni ba bañata ku bona. Limbasi ha ne li fundukile, babeleki ne ba se ba filwe libukanyana ze 126 ni limagazini ze 329!

Ze nde ze ne zwile mwa ku eza cwalo ne li susuelize mizwale ku eza tukiso ye swana mwa sunda ye ne tatami ka nako ya naa tilo ba potela muokameli wa mupotoloho. Ka lizazi le ne ku nelile pula, muokameli wa mupotoloho a zamaisa mukopano wa ku zwela mwa simu ka 6:30 ya kakusasana, mi bahasanyi ba 24 ba liba kwa sitishini sa limbasi. Mwa musipili wo ba lwala lihatiso za puo ya Tagalog kakuli ne ba lemuhile kuli buñata bwa babeleki bao ne ba zwa kwa Philippines. Kakusasana wo limbasi ha ne li fundukile ku ya kwa likamba, babeleki ne ba abezwi libuka ze 7, libukanyana ze 69, ni limagazini ze 479. Mu nahane tabo ni nyakalalo ye ne ba bile ni yona mizwale ni likaizeli be ne ba bile ni kabelo mwa tukiso yeo!

Pili babeleki bao ba si ka kutela kale kwa linaha za habobona, mizwale ne ba konile ku potela ba sikai ku bona kwa lihotela ko ne ba fitezi ni ku talusa litaba za Mubuso ka butungi. Babeleki ba bañwi ne ba ize ba kile ba potelwa ki Lipaki mwa linaha ze ñwi. Babeleki ne ba itumezi kwa mizwale kabakala buikatazo bo ne ba ezize bwa ku ba potela ha ne ba li mwa Finland.

Kana ni mina mwa lemuhanga kolo ya ku kutaza mwa kalulo ya simu ya puteho ya mina? Kana mwa ikatazanga ku ambola ni batu ba ba simuluha ku sili? Haiba ku cwalo, ni mina mwa kona ku ba ni ze bonwi ze swana ni ze ne ba bile ni zona mizwale ba mwa Turku.

[Mapa/Siswaniso se si fa likepe 32]

FINLAND

HELSINKI

Turku