Bote ba Memiwa!

MUBAPALE

Bote ba Memiwa!

Bote ba Memiwa!

BA MEMELWA kai? Ba memiwa ku yo pota ku ye ñwi ya liofisi za mitai za Lipaki za Jehova ze bizwa Betele. Ku na ni liofisi ze eza 118 ze mwa linaha ze shutana-shutana. Hañata bapoti ba itumelanga hahulu ku bona lika ze ezahala fa Betele.

Ha mano bona batu ba ba sebeleza Jehova ka taata inze ba tabile fa ofisi ya mutai ya mwa Mexico, muituti yo muñwi wa Bibele wa mukulwani naa tabile hahulu kuli mane a buza, a li: “Ni swanela ku ezañi kuli ni kone ku pila fa sibaka se?” Naa bulelezwi kuli: “U swanela ku kolobezwa pili. Hasamulaho, u ka eza hande ku ba paina—ili mushaeli wa Mubuso wa nako kaufela.” Mutangana yo naa ezize za naa bulelezwi, mi hamulaho wa lilimo ze peli naa memilwe ku yo sebeleza fa Betele mwa Mexico, mi sa sebelelize fateñi ka lilimo ze 20 ze fitile.

Betele Kiñi?

Mwa puo ya Siheberu, libizo la “Betele” li talusa “Ndu ya Mulimu.” (Gen. 28:19) Miyaho ni lisebeliso ze fa liofisi za mitai ze shutana-shutana li itusiswa kwa ku hatisa ni ku hasanya Libibele ni lihatiso ze tomile fa Bibele ni ku tusa liputeho za Lipaki za Jehova ze fitelela 100,000 mwa lifasi lote. Ku na ni baana ni basali ba ba bato ba 20,000 ili ba lizo ze shutana-shutana ba ba sebeleza Jehova ni mizwale ni likaizeli ba bona mwa sebelezo ya nako kaufela fa Betele. Ba ba ezize sebelezo yeo ya Sikreste ka lilimo ze ñata ba sebezanga hamoho ni ba banca ba ba sa na ni maata. Ka nako ya manzibwana ni kwa mafelelezo a sunda, lilama za mabasi a Betele ba ikolanga ku kopana hamoho ni liputeho za Lipaki za Jehova ze li bukaufi ni ku yanga mwa bukombwa bwa Sikreste hamoho ni zona. Hape, ka nako ye ba sa sebezi ba itutanga Bibele, ku ikatulusa, ni ku eza lika ze ñwi za ka butu.

Lilama za lubasi lwa Betele ba amuhelanga penenyana ya ku itusisa kweli ni kweli. Ba ikolanga lico ze tabusa ni ze tiisa mibili mi ba pila mwa mizuzu ye minde, ye kenile. Mahae a Betele ha si ka yahelwa bupilo bwa simbombo. Kono a tusa ku peta musebezi wa yahezwi. Bapoti ha ba tabiswangi feela ki miyaho ni sibaka ze babalelwa hande ni musebezi o zamaiswa hande kono hape ba tabelanga sishemo ni swalisano ze ba bonisa ba ba sebeleza fa Betele. Mañi ni mañi u sebeza ka taata, kono ha ku na ya patehile hahulu kuli mane u palelwa ku iseza ba bañwi pilu. Mwa Betele ha ku na batu ba ba ketululana ka likwata kamba ba ba ikutwa kuli musebezi o ba eza ki wa butokwa ku fita wa ba bañwi. Misebezi kaufela ki ya butokwa, ibe ya ku kenisa, ku tokomela limela, ku apeha, ku hatisa kamba ku sebeleza mwa ofisi. Ba ba sebeleza fa Betele ba sebezanga hamoho ka swalisano kuli ba tuse ku zwisezapili musebezi wa Lipaki za Jehova wa ku kutaza.—Makolo. 3:23.

Mu Zibe ba Bañwi ba ba Sebeleza fa Betele

Ha lu ituteñi se siñwi ka za ba ba sebeleza fa Betele. Ki kabakalañi ha ba itatezi ku sebeleza fa Betele? Mu nyakisise mutala wa bo Mario. Ka nako ye ne ba bile ba bañwi ba Lipaki za Jehova, bo Mario ne ba na ni mubeleko o ocolisa pene mwa kampani ya limota ye tumile ya mwa Germany mi ne ba kona ku onyoka. Hamulahonyana wa ku kolobezwa, ne ba itatezi ku yo sebeleza fa Betele ya mwa naha ya habo bona ka sunda i liñwi. Ne ba filwe musebezi wa ku yo sebeleza mwa lihatisezo. Bo Mario ne ba iponezi shutano ye tuna ye mwahalaa be ne ba sebelisana ni bona fa Betele ni be ne ba sebelisana ni bona kwa mubeleko wa bona. Kabakaleo, ba ikupela kuli ba be silama sa lubasi lwa Betele. Nihaike kuli buñata bwa bahabo bona ni balikani ba bona ne ba si ka utwisisa keto ye ne ba ezize, bo Mario cwale ba tabile ku sebeleza fa Betele ya mwa Germany.

Ba bañata ba kalisanga sebelezo ya fa Betele ba si na tuto ye ipitezi kamba zibo ya musebezi o muñwi. Ne ku li cwalo ku bo Abel, ba ba se ba sebelelize fa Betele mwa Mexico ka lilimo ze 15. Ba li: “Ni itutile ze ñata fa Betele. Ni itutile ku sebelisa mishini ye taata ye hatisa libuka. Na ziba kuli zibo yeo i kona ku ni fumanisa mali a mañata kwande a Betele, kono ha ni koni ku ba ni ze ni ikola fa Betele—ili bupilo bwa kozo bo bu si na lipilaelo ni likangisano ze atile kwa mibeleko. Ni ikutwa kuli ni amuhezi tuto ye nde hahulu ye ni tusize ku zwelapili mwa bulapeli bwa ka ku Mulimu ni ku ba ni butali. Ne ni si ke na fumana limbuyoti zeo nihaiba kwa sikolo se si pahami hahulu.”

Ku Pota fa Betele Kwa Kona ku mi Tiisa

Ku pota fa Betele kwa kona ku tusa mutu ku tiisa bulikani bwa hae ni Mulimu. Ne ku li cwalo ku bo Omar ba ba pila mwa Mexico. Bo maa bona ne ba ba lutile lituto za mwa Bibele. Kono ha ne ba na ni lilimo ze 17, bo Omar ba tuhela ku yanga kwa mikopano ya Sikreste ni mwa sebelezo ya mwa simu. Hamulaho wa nako, ba kalisa ku pila ka mikwa ye maswe ni ku ndongwama sifumu. Hasamulaho, ha ne ba beleka mwa kampani ye ñwi, bo Omar ba yo pota kwa Betele ya mwa Mexico ni be ne ba beleka ni bona kuli ba yo bonisa mizwale mo li itusisezwa libelekiso ze ñwi. Bo Omar ba talusa kuli: “Ha se lu ba bonisize, ba lu pota-potisa fa sibaka. Ze ne ni iponezi ni sishemo se ne ni bonisizwe, ne li tahisize kuli ni nahane ka za mupilelo wa ka wa ku ikauhanya ku Jehova. Kapili-pili na kalisa hape ku fumanehanga kwa mikopano ni ku ituta Bibele. Hamulaho wa likweli ze silezi ku zwa fo ne ni potezi fa Betele, na kolobezwa. Ni itumela ku Jehova kabakala susuezo ye ne ni filwe ha ne ni izo pota fa Betele.”

Bo Masahiko ba ba pila mwa Japan ni bona ne ba huliselizwe mwa lubasi lwa Lipaki. Kono ba kalisa ku ikutwa kuli ku pila bupilo bwa Sikreste ku taata hahulu. Ba ikenya hahulu mwa lika za kwa sikolo mi ba tuhela ku yanga kwa mikopano ni mwa musebezi wa ku kutaza. Bo Masahiko ba li: “Zazi le liñwi lubasi lwa luna ni balikani ba bañwi ba Sikreste ba eza tukiso ya ku yo pota fa Betele. Bakeñisa kuli ba lubasi lwa ka ne ba tundamezi kuli ni ye, na ya ni bona. Ku pota-pota fa Betele ne ku ni susuelize hahulu. Mwa musipili wo, ne ni ikozi siango se sinde hahulu ni Bakreste ba bañwi ili se ne ni si ka ikola kale ni balikani ba ka ba ba si Lipaki. Takazo ya ka ya ku pila bupilo bwa Sikreste ya hula, mi na kupa ku lutiwa Bibele.” Ka nako ya cwale, bo Masahiko se ba li likombwa za nako kaufela mwa puteho ya habo bona.

Paki yo muñwi wa kwa France naa tutezi kwa Moscow kwa naa ilo belekela. Teñi ko, naa si ka fumana batu ba Jehova mi bulikani bwa hae ni Jehova bwa fokola. A eza bufosi mi hamulaho wa nako a nyalwa ki muuna ya naa si Paki. Hasamulaho, kaizeli yo muñwi wa kwa France a yo mu potela mi ba tama musipili hamoho wa ku ya kwa St. Petersburg, kwa Russia, kuli ba yo pota fa lihae la Betele. U ñola kuli: “Ne lu amuhezwi hande hahulu kwa Betele, mi taba yeo ne i ni susuelize. Ne ni ikutwa ku ba mwa kozo ye tuna. Mi ne ni ikutwa kuli moya wa Jehova u fahalimu a ka. Kiñi ha ne ni ezize mafosisa a ku zwa mwa kopano ya Jehova? Hamulaho wa ku yo pota fa Betele, na lapela ku Jehova kuli a ni tuse mi na kalisa ku luta bana ba ka Bibele ka tukufalelo.” Mwendi Paki ya naa fokozi yo naa filwe tuso ye ñwi, kono hape naa tiisizwe hahulu ha naa izo pota fa Betele mi hasamulaho naa ezize zwelopili ye nde.

Batu ba ba sa zibi hande Lipaki za Jehova ba kona ku amiwa cwañi ha ba pota fa Betele? Ka 1988, bo Alberto be ne ba ikenyize hahulu mwa litaba za naha, ne ba izo pota fa Betele ya mwa Brazil. Ne ba tabisizwe hahulu ki ku kena kwa sibaka ni ku zamaiswa hande kwa lika, mi sihulu ne ba tabile ku bona kuli misebezi i ezwa ka ku sa pata-pata. Nakonyana ba si ka yo pota kale fa Betele, bo Alberto ne ba izo pota kwa sikolo sa baprisita kwa naa sebeleza mulamwaa bona sina muprisita. Bo Alberto ne ba lemuhile shutano. Ba li: “Fa sikolo sa baprisita lika kaufela ne li ezwa ka ku pata-pata.” Hamulahonyana wa ku pota fa Betele, bo Alberto ne ba lumezi ku ituta Bibele, ba tuhela litaba za naha, mi cwale se ba li maeluda mwa puteho.

Ha mu to Pota fa Betele!

Batu ba bañata ba ezize buikatazo bo butuna kuli ba yo pota fa ofisi ya mutai ya mwa naha ya habo bona. Ka mutala, bo Paulo ni bo Eugenia ba ba pila mwa Brazil ne ba bulukanga pene ka lilimo zee ne ilikuli ba kone ku tama musipili wa mazazi a mabeli ka mbasi ili o eza likilomita ze 3,000, kuli ba yo pota fa Betele mwa naha ya habo bona. Ba li: “Musipili wa luna ne si wa mbango. Cwale se lu ziba hande kopano ya Jehova ku fita sapili. Ha lu talusezanga baituti ba luna ba Bibele musebezi o ezwa fa Betele, fokuñwi ba lu buzanga kuli, ‘Kana mu kile mwa ya kwateñi?’ Cwale lwa kona ku alaba kuli eni.”

Kana ku na ni ofisi ya mutai kamba lihae la Betele mwa naha ya habo mina kamba mwa naha ye li bukaufi ni mina? Lu mi mema kuli mu yo pota kwateñi. Ku si na ku kakanya, haiba mu pota fa Betele, mu ka amuhelwa hande hahulu mi mu ka susuezwa ku zwelapili ku sebeleza Jehova.