Lipuzo ze Zwa Kwa Babali

Ki kabakalañi Jesu ha naa kona ku bulelela musali ya naa zibahala sina muezalibi kuli libi za hae li swalezwi?—Luka 7:37, 48.

Jesu ha naa nzaa ca lico mwa ndu ya Mufalisi ya bizwa Simoni, musali yo muñwi a to “ina kwamulaho, kwa mautu a Jesu.” Musali yo a kolobisa mahutu a Jesu ka mioko ya hae ni ku a taula ka milili ya kwa toho ya hae. Mi cwale a tubeta Jesu kwa mahutu ni ku mu toza sende. Evangeli ya Luka i talusa kuli musali yo naa zibahala sina “muezalibi” mwa munzi. Ki niti kuli mutu kaufela ya si ka petahala ki muezalibi, kono Mañolo hañata a itusisanga linzwi leo ku talusa mutu ya zibahala hahulu ka libi za hae. Ku bonahala kuli musali yo ne li lihule. Musali ya cwalo yo ki yena ya naa bulelezwi ki Jesu kuli: “U swalezwi libi za hao.” (Luka 7:36-38, 48) Jesu naa talusañi? Bakeñisa kuli sitabelo se si liulula ne si si ka fiwa kale, musali yo naa kona ku swalelwa cwañi?

Musali yo ha sa tapisize mahutu a Jesu ni ku a toza sende kono pili a si ka swalelwa kale libi za hae, Jesu naa bulezi nguli ye ñwi ku Simoni ya naa mu memezi kwa sico kuli a mu taluseze taba ye ñwi ya butokwa. Jesu naa bapanyize sibi ni sikoloti se situna se si sa konwi ku lifiwa. Naa ize ku Simoni: “Mutu naa kolotisize ba babeli. Wa pili naa kolotile ma-sixpence a eza mianda iketalizoho; wa bubeli, ma-sixpence a eza mashumi aketalizoho. Cwale, kakuli ne ba tokwa se ba ka kutisa, a ba takulela mulatu ba babeli. Ku bona, ya ka mu lata hahulu ki ufi?” Simoni a alaba, a li: “Ni kakanya kuli ki ya takulezwi hahulu.” Mi Jesu a li: “U atuzi hande.” (Luka 7:41-43) Kaufelaa luna lu swanela ku utwa Mulimu, kacwalo ha lu sa mu utwi ni ha lu eza sibi, ku swana inge lu palelwa ku mu lifa se si mu swanela. Kabakaleo, lu ba ni likoloti, kamba milatu. Kono Jehova u swana sina mukolotisi ya lata ku swalela likoloti. Ki lona libaka Jesu ha naa susuelize balateleli ba hae kuli ba kupange Mulimu kuli: “U lu swalele milatu ya luna, mo lu swalelela ni luna ba ba lu foselize.” (Mat. 6:12) Liñolo la Luka 11:4 li talusa kuli milatu yeo ki libi.

Mulimu naa swalelanga cwañi libi mwa linako za kwamulaho? Katulo ya hae ye lukile i tokwa kuli mutu ya eza sibi a bulaiwe. Kacwalo, Adama naa lifezi sibi sa hae ka ku latehelwa ki bupilo bwa hae. Kono ka ku ya ka Mulao wa Mulimu wa naa file sicaba sa Isilaele, muezalibi naa kona ku swalelwa libi za hae ka ku ezeza Jehova sitabelo sa folofolo. Muapositola Paulusi naa ize: “Ka Mulao, i bata ku ba lika kaufela li keniswa ka mali; mi fo ku si na Suluho ya mali, ha ku na Swalelo ya libi.” (Maheb. 9:22) Majuda ne ba ziba kuli ne ku si na nzila ye ñwi ye ne ba kona ku swalelwa ki Mulimu ka yona kwandaa suluho ya mali. Ki lona libaka batu ba mwa miteñi ya Jesu ha ne ba hanyelize Jesu kabakala manzwi a naa bulelezi musali ya naa li muezalibi. Batu be ne ba ca ni Jesu ne ba ipulelisize mwa lipilu za bona, ba li: “Yo ki mañi, haa li u swalela batu libi?” (Luka 7:49) Kacwalo musali yo ya naa li muezalibi naa konwa ku swalelwa cwañi libi za hae?

Bupolofita bwa pili bo ne bu bulezwi hamulaho feela wa ku kwenuha kwa muuna ni musali ba pili ne bu bulezi ka za mulelo wa Jehova wa ku tahisa “peu” ye ne i ka lumwa kwa lisito ki Satani ni “peu” ya hae. (Gen. 3:15) Jesu naa lumilwe kwa lisito ha naa bulailwe ki lila za Mulimu. (Magal. 3:13, 16) Mali a Kreste a naa suluzwi ki ona tiululo ye liulula batu kwa sibi ni lifu. Kabakala kuli ha ku na se si kona ku palelwisa Jehova ku peta za lelile, manzwi a kwa Genese 3:15 ha mano bulelwa feela, ne ku swana inge kuli tiululo ne i lifilwe kale mwa meeto a Mulimu. Kacwalo Mulimu naa kona ku swalela libi za batu be ne ba lumela lisepiso za hae.

 Pili Bukreste bu si ka kalisa kale, Jehova naa nga batu ba bañwi kuli ki ba ba lukile. Ba bañwi ba ku bona ne li Enoke, Nuwe, Abrahama, Rahaba, ni Jobo. Ne ba na ni tumelo ya kuli lisepiso za Mulimu ne li ka talelezwa. Mulutiwa Jakobo naa ñozi kuli: “Abrahama a lumela ku Mulimu, mi ku lumela kwa hae, Mulimu a mu balela kuli ki ku luka.” Mi ha naa bulela ka za Rahaba, Jakobo naa ize: “Kamukwaocwalo, Rahaba wa lihule, ha ni li, a bewa ya lukile ka misebezi?”—Jak. 2:21-25.

Mulena Davida wa Isilaele wa kwaikale naa ezize libi ze tuna, kono naa na ni tumelo ye tiile ku Mulimu wa niti mi naa bonisanga ku baka kwa niti. Mañolo hape a bulela kuli: “[Mulimu u tahisize Jesu], kuli i be yena sitabelo sa tifo ya ya na ni tumelo kwa mali a hae. U bonahalisize cwalo ku luka kwa hae, niha naa si ka talima libi za pili, za mwa nako ya buiswalo bwa hae; ni li: U bonahalisize ku luka kwa hae mwa nako ya cwale; a bonwe kuli ki Ya lukile, ni kuli mutu ya na ni tumelo ku Jesu, Mulimu u mu beya ya lukile.” (Maro. 3:25, 26) Bakeñisa sitabelo se si liulula sa Jesu se ne si ka fiwa kwapili, Jehova naa kona ku swalela libi za Davida a sa lobi likuka za Hae za katulo ye lukile.

Musali ya naa tozize mahutu a Jesu ka sende ni yena naa li mwa muinelo o bato swana ni wa naa li ku wona Davida. Naa na ni muzamao o maswe, kono naa bakile. Naa ziba kuli u tokwa ku liululwa kwa sibi, mi naa bonisize ka likezo za hae kuli naa itebuha mutu ya naa itusisizwe ki Jehova ku mu liulula. Nihaike kuli sitabelo seo ne si si ka fiwa kale, ne si tamehile ku fiwa mi Mulimu naa kona ku swalela batu ba ba cwale ka musali yo kabakala sona. Ki lona libaka Jesu ha naa bulelezi musali yo kuli: “U swalezwi libi za hao.”

Sina mo li boniseza likande le, Jesu naa sa ambukangi baezalibi. Naa ba ezanga hande. Fahalimwaa seo, Jehova u lata ku swalela baezalibi ba ba bakile. Kaniti, yeo ki taba ye tabisa ni ye susueza ku luna batu ba ba si ka petahala!

[Siswaniso se si fa likepe 7]

Ne ba beilwe ba ba lukile