Musebezi O Ipitezi O no Ezizwe Mwa Bulgaria U Tahisize ze Nde

“Lukau ki lo lutuna luli, kono ba ba kutula ki ba banyinyani. Mu lapele kihona Muñaa lukau, kuli a lume babeleki mwa lukau lwa hae.” —MAT. 9:37, 38.

MANZWI a Jesu ao a talusa hande muinelo o mwa Bulgaria, ili naha ye buheha ye kwa mboela wa upa wa lifasi la Europe! Babeleki ba bañata ba sa tokwahala kuli ba yo kutaza taba ye nde kwa bayahi ba naha yeo ba ba fitelela 7 milioni. Ku na ni bahasanyi ba ba bato eza 1,700 mwa Bulgaria, kono ha ba koni ku kutaza bayahi ba naha yeo kaufela. Kacwalo, Sitopa se si Etelela ne si file tumelezo ya kuli ku memiwe Lipaki ba ba bulela puo ya Si-Bulgaria ba ba pila mwa linaha li sikai za Europe kuli ba yo tusa mwa musebezi o ipitezi ka silimo sa 2009. Musebezi wo ne u tomahanyizwe ku ezwa ka lisunda ze supile mwa nako ya mbumbi, mi ne u ka fela ka nako ya Mukopano wa Sikiliti wa “Mu Zwelepili ku Tona!” o no ka ezezwa mwa Sofia, ka la 14-16 August, 2009.

Baitateli ba Bañata ba Amuhela Memo

Mizwale ba fa ofisi ya mutai wa mwa Sofia ne ba sa zibi palo ya bahasanyi be ne ba ka taha ku zwa kwa linaha za France, Germany, Greece, Italy, Poland, ni Spain. Bahasanyi bao ne ba ka tokwa ku itifela mali a nzila ni ku itusisa nako ya bona ya pumulo mwa ku kutaza. Ne ku tabisize hahulu ku bona palo ya baitateli be ne ba kupa ku yo belekela mwa naha yeo ha ne i nze i ekezeha ku to fita fa 292! Bakeñisa kuli batu be ne ba itatezi ne li ba bañata, ne ku konahala ku ba lumela kwa mileneñi ye milalu ya mwa Bulgaria, ili ya Kazanlak, Sandanski, ni Silistra. Baokameli ba mipotoloho ba mwa Bulgaria ne ba memile mapaina ni bahasanyi ba mwa naha yeo kuli ba tuse mwa musebezi wo. Hamulaho wa nako, baitateli ba ekezeha ku fita fa 382, mi ba kutaza ka tukufalelo mwa libaka ze ne sa kutalezwangi hahulu taba ye nde.

Mizwale ba mwa liputeho za fakaufi ne ba lumilwe kuli ba batele cimo mafitelo. Ba lifela mandu a kuli baitateli ba to ina mwateñi mi ba lifela ni lihotela ze sa tuli. Mizwale bao ne ba sebelize ka taata ku tusa baitateli ha ne ba fitile mi ne ba ba tusize ku ze ne ba tokwa. Mwa mileneñi ye milalu yeo kaufela mizwale ne ba lifelanga libaka za ku kopanela teñi. Ne ku ezizwe litukiso za kuli mikopano ya puteho i zamaiswange ki mizwale be ne ba zwa kwa linaha li sili. Ne ku tabisa ku bona kuli mwa libaka mo ne ku si na nihaiba Paki a li muñwi ya naa pila mwateñi ne ku kopanelanga bahasanyi ba 50 ku lumbeka Jehova.

Bahasanyi bao be ne ba zwa kwa linaha li sili ili be ne ba izo tusa mwa musebezi o ipitezi wo ne ba na ni tukufalelo ye tuna. Ka nako ya mbumbi, mwa Bulgaria ku cisanga hahulu-hulu. Nihakulicwalo, ha ku na se ne si kona ku paleliswa mizwale ni likaizeli bao. Mwa lisunda ze talu za kwa makalelo, mizwale ni likaizeli ne ba pakile hahulu mwa munzi wa Silistra o li kwa munanga wa nuka ya Danube, ili o na ni bayahi ba 50,000. Kacwalo, mizwale ba yo kutaza ni mwa minzi ye ne li bukaufi, mane ni mwa munzi wa Tutrakan, o kwa wiko wa Silistra ili buhule bo bu eza likilomita ze 55. Hañata ne ba kalisanga ku kutaza ka 09:30. Hasamulaho wa sico sa musihali, ne ba  zwelangapili ku kutaza ku isa ka 19:00 kamba ku fitelela. Baitateli be ne ba kutaleza mwa Kazanlak ni Sandanski ni bona ne ba kutalize mwa minzi ni mileneñi ye ne li bukaufi bakeñisa tukufalelo ye tuna ye ne ba na ni yona.

Ze ne Petilwe

Mwa lisunda ze supile zeo bupaki bo butuna ne bu filwe. Sina mo ne ku bulelezwi mwa miteñi ya baapositola, bayahi ba mileneñi yeo ne ba kona ku bulela kuli: ‘Mu talize muleneñi wa luna ka tuto ya mina.’ (Lik. 5:28) Lipaki be ne ba tusize mwa musebezi wo ne ba abezi limagazini ze bato eza 50,000 mi ne ba kalisize lituto za Bibele ze 482. Ne li nto ye tabisa kuli ku kala ka la 1 September, 2009, ne ku tomilwe puteho mwa Silistra mi ku na ni likwata ze kopanela mwa Kazanlak ni mwa Sandanski. Kwa nyakalalisa ku bona batu be ne ba utwile taba ye nde lwa pili ka nako ya musebezi o ipitezi ha ba eza zwelopili!

Mwa sunda ya pili ya musebezi wo, kaizeli ya li paina ya ipitezi ya naa zwa kwa Spain ili ya bulela puo ya Si-Bulgaria naa kutalize musali ya bizwa Karina ya naa lekisa mitende mwa mukwakwa. Bo Karina ne ba tabezi ze ne ba bulelezwi mi ba ya kwa mikopano. Mi ne ba lumezi ku ituta Bibele. Bo muunaa bona ha ba lumeli kuli Mulimu u teñi, kacwalo ba kupa kuli ba yo itutelanga Bibele kwa sibaka se siñwi. Ne ba itutanga hamoho ni bana ba bona ba babeli ba basizana. Mwanaa bona yo muhulu ya bizwa Daniela naa tabezi hahulu lituto za mwa Bibele. Naa balile buka ya Bibele I Lutañi? mwa sunda i liñwi, mi honafo a kalisa ku eza se i bulela Bibele ka za ku sa itusisa maswaniso mwa bulapeli. Mi a kalisa ku bulelela balikani ba hae za naa itutile. Hasamulaho wa lisunda ze talu ku zwa fa naa kalezi ku fumanehanga kwa mikopano ya puteho, a taluseza ya naa ituta ni yena kuli: “Ni ikutwa inge kuli ni na ni Paki. Ni swanela ku ezañi kuli ni kalise ku kutazanga?” Daniela u zwelapili ku eza hande hamoho ni bo mahe ni munyanaa hae.

Muzwale ya bizwa Orlin naa zwile kwa Italy ku kutela habo yena kwa Bulgaria ku yo tusa mwa musebezi o ipitezi mwa Kazanlak. Ha naa zwa mwa simu ku ya kwa ndu, naa kutalize mitangana ba babeli be ne ba inzi fa sipula mwa sibaka se siñwi sa ku ikatuluseza. Naa ba file buka ya Bibele I Lutañi? mi a lukisa ku yo ba potela hape lizazi le li tatama. Bo Orlin ba yo kalisa ku ituta Bibele ni Svetomir mi tuto ya zwelapili lizazi le li tatama. Mwa mazazi a 9 bo Orlin ne ba itutile ni Svetomir ha 8. Svetomir naa ize: “Ne ni lapezi ku Mulimu mazazi a mabeli pili ni si ka kopana kale ni mina kuli a ni tuse ku mu ziba. Mi ne ni mu sepisize kuli haiba a ni tusa ni ka ineela ku yena.” Bo Orlin ha se ba kutezi kwa Italy, mizwale ba zwelapili ku ituta ni Svetomir mi u sweli wa tiiseza mwa niti.

 Ba ba Eza Buitomboli ba Fuyolwa Hahulu

Mizwale ni likaizeli be ne ba itusisize mazazi a bona a pumulo ni ku itifela kuli ba ye kwa naha i sili ku yo kutaza taba ye nde ne ba ikutwile cwañi? Eluda yo muñwi wa mwa Spain naa ñozi kuli: “Musebezi o ipitezi ne u tahisize kuli mizwale ba ba kutazanga batu ba ba bulela puo ya Si-Bulgaria mwa Spain ba swalisane hahulu. Mizwale be ne ba tusize mwa musebezi wo ne ba susuelizwe hahulu.” Bo muuna ni musalaa hae be ne ba zwile kwa Italy ne ba ñozi kuli: “Ne lu ikozi hahulu musebezi o ipitezi mwa kweli ye ne u eziwa!” Ne ba ekelize kuli: “Musebezi o ipitezi wo ne u cincize bupilo bwa luna!” Batu bao ne ba kalile ku nahanisisa hahulu ka za ku tutela kwa Bulgaria ku yo sebeleza ko ku tokwahala hahulu bakutazi. Bo Carina ki mapaina ba kamita ba ba si ka nyalwa ba kwa Spain ili be ne ba tusize mwa musebezi o ipitezi wo mwa Silistra. Hamulaho wa fo, ne ba tuhezi mubeleko wa bona mwa Spain mi ba tutela kwa Bulgaria kuli ba yo tusa puteho ye ne sa zo tomwa mwa muleneñi wo. Ne ba bulukile masheleñi a ku yo itusisa mwa Bulgaria ka silimo si li siñwi. Bo Carina ba bulela cwana ka za keto ya bona: “Ni tabile hahulu kuli Jehova u ni lumelelize ku to sebeleza kwanu kwa Bulgaria, mi ni sepa kuli ni ka ina kwanu ka nako ye telele. Se ni na ni lituto za Bibele ze ketalizoho, mi ba balalu ku bona ba fumanehanga kwa mikopano.”

Kaizeli yo muñwi wa kwa Italy ni yena naa bata ku tusa mwa musebezi o ipitezi, kono naa si na mazazi a pumulo kakuli kihona ha naa sa zo kalisa mubeleko. Naa si ka zwafa, kono a kupa pumulo ya kweli i liñwi a sa holiswi, mi naa itukiselize ku tuhela mubeleko haiba ba mu hanela. Naa komokile, mubelekisi wa hae ha naa ize ku yena: “Ku lukile, kono u na ni ku eza nto i liñwi: U yo ni positela kadi ya kwa Bulgaria.” Kaizeli yo naa ikutwile kuli Jehova naa alabile litapelo za hae.

Kalibe ya bizwa Stanislava ya pila mwa muleneñi wa Varnai mwa Bulgaria, naa na ni mubeleko o ocolisa pene. Naa kupile sibaka kwa mubeleko kuli a yo tusa mwa musebezi o ipitezi mwa Silistra. Naa lotisize mioko ha naa boni tabo ya mapaina ba bañata be ne ba zwa kwa linaha ze kwahule ili be ne ba ilo kutaza taba ye nde mwa naha ya habo yena. A kalisa ku nahanisisa mwa naa pilela bupilo bwa hae ka ku ndongwama mubeleko. Hamulaho wa lisunda ze peli ha naa kutile kwahae, a tuhela mubeleko mi a ba paina wa kamita. Mi cwale u tabile hahulu kakuli u hupula Mubupi wa hae mwa bunca bwa hae.—Muek. 12:1.

Ku sebeleza Jehova ki tohonolo ye tuna. Ha ku na nto ye mu kona ku eza ye fita ku itusisa nako ni maata a mina mwa musebezi o butokwa wa ku kutaza ni ku luta taba ye nde. Kana ku na ni ze ñwi ze mu kona ku eza kuli mu ekeze kwa kabelo ya mina mwa musebezi wo wa ku tusa batu ku fumana bupilo? Mwendi mwa naha ya habo mina ku na ni libaka ko ku tokwahala hahulu bahasanyi. Kana mwa kona ku yo sebeleza kwa libaka zeo? Kamba mwendi mwa kona ku ituta puo ye ñwi ilikuli mu tuse batu ba ba pila mwa naha ya mina ba ba nyolelwa ku ituta niti ya mwa Bibele. Jehova u ka mi fuyola hahulu haiba mu eza licinceho ze mu kona ku eza kaufela kuli mu be ni kabelo ye tuna mwa bukombwa.—Liprov. 10:22.

[Mbokisi/Siswaniso se si fa likepe 32]

Lizazi le li si ke la Libalwa

Batu ba bañata be ne ba zwa kwa linaha ze ñwi za Europe ili be ne ba ilo tusa mwa musebezi o ipitezi mwa Bulgaria ne ba lelile ku yo fumaneha kwa Mukopano wa Sikiliti wa “Mu Zwelepili ku Tona!” o no ka ezezwa mwa Sofia. Mizwale ni likaizeli ba mwa Bulgaria ne ba susuelizwe hahulu ki siango se ne ba bile ni sona ni bapoti be ne ba zwa kwa linaha ze shutana-shutana. Batu ba ba fita fa 2,039 be ne ba li kwa mukopano wo ne ba nyakalalile Muzwale Geoffrey Jackson wa mwa Sitopa se si Etelela ha naa zwisize Bibele ye kwanile ya New World Translation of the Holy Scriptures mwa puo ya Si-Bulgaria! Be ne ba li teñi kaufelaa bona la Butanu ne ba bonisize buitumelo bwa bona bo butuna ka ku kandelela hahulu ka nako ye telele. Ba bañata mane ne ba lotisize mioko bakeñisa tabo. Toloko ye nepahezi yeo ye ñozwi ka puo ye bunolo i ka tusa batu ba mwa Bulgaria ba lipilu ze nde ku ziba Jehova.

 [Mapa ye fa likepe 31]

(Kuli mu bone mo i hatiselizwe luli, mu bone hatiso)

BULGARIA

SOFIA

Sandanski

Silistra

Kazanlak

[Maswaniso fa likepe 31]

Mwa lisunda ze supile zeo bupaki bo butuna ne bu filwe