“I ni Tusanga ku Fita Batu Kwa Lipilu”

KWAMULAHONYANA mwa munzi o kwa mboela wa Brazil o bizwa Porto Alegre ne ku ezelizwe mukopano o no bulela za swalisano ya sicaba. Batu ba bañata-ñata be ne ba zwa mwa linaha ze 135 ne ba fumanehile kwa mukopano wo. Ka linako za ku ikatulusa, sikwata sa Lipaki ze ne zwa mwa puteho ye ñwi ya mwa Porto Alegre ne li atumezi batu ba bañata be ne ba tile kwa mukopano wo ni ku ambola ni bona ka za taba ya Mubuso ya mwa Bibele. Lipaki zeo ne li ambolisani cwañi ni bona?

Paina yo muñwi wa libizo la Elizabete, u li: “Ne lu itusisize bukanyana ya Good News for People of All Nations.” U ekeza kuli: “Batu ba bañata be ne ba tile kwa mukopano wo ne ba si ka utwa kale taba ye nde ya Mubuso, kono ne ba amuhezi lushango lo ne lu kutaza. Ne lu ambozi ni batu be ne ba zwa kwa Bolivia, China, France, India, Israel, ni Nigeria. Ne lu na ni lihatiso ze tomile fa Bibele za mwa lipuo ze ñwi za batu be ne ba tile bao, mi ne ba li amuhezi ka tabo.”

Paina yo muñwi wa libizo la Raúl wa kwa Mexico ni yena u itusisanga bukanyana yeo mi u na ni ze nde ze zwile mwateñi. Kalenyana, naa atumezi muuna wa Mumbali wa lilimo ze 80 ili ya naa sa zo siyamena. Muuna yo ha sa balile likepe la mwa bukanyana yeo fo ku na ni taba ya Mubuso mwa puo ya hae ya Si-Arabic, a lotisa mioko kabakala tabo. Ki kabakalañi? Sepiso ya Mulimu ye kwa Sinulo 21:3, 4, ya kuli lifu ha li sa na ku ba teñi, ne i mu fitile hahulu kwa pilu ha naa i balile mwa puo ya hae. Ka nako ye ñwi bo Raúl ha ne ba nze ba kutaza ka ku tandalelwa, ne ba kopani ni muuna ya naa bulela Siputukisi. Muuna yo ni yena naa shwezwi ki mwanaa hae ya latwa. Bo Raúl ne ba mu balisize fa likepe fo ku na ni puo ya Siputukisi. Ha sa balile mwa bukanyana yeo, a bulela kuli naa bata ku ziba ze ñata ka za Bibele mi a lumela ku ituta Bibele.

Bo Raúl ba itusisize bukanyana ya Good News for People of All Nations kuli ba kutaze batu ba ba bulela lipuo za Si-Armenian, Sichaina, Sifura, Si-Hindi, Sijelemani, Sikorea, Sikuwa, Si-Mixe, Siperesia, Si-Russian, ni Si-Zapotec. Ba bulela kuli: “Ni boni kuli ki kwa butokwa hahulu ku itusisanga bukanyana ye mwa bukombwa. I ni tusanga ku fita batu kwa lipilu niha ni sa zibi lipuo za bona.”

Batu ba bañata ha ba nze ba tama misipili ni ku yo pila kwa linaha li sili, lu banga ni kolo ya ku ambola ni batu ba ba bulela lipuo li sili. Lu ka kona ku ambola ni bona ka za Mubuso ka ku itusisa bukanyana ya Good News for People of All Nations. Kana mwa i shimbanga?

[Maswaniso a fa likepe 32]

Bo Raúl ba sweli bukanyana ye ba tusanga ku fita batu kwa lipilu