Jehova U Nga Cwañi Mabaka A ku Ikemela?

MUUNA naa ize: “Musali yo ni file kuli a ine ni na, ki yena ya ni file kwa kota, mi ni cile.” Musali a alaba, a li: “Noha i ni pumile, mi ni cile.” Mukwa wa batu wa ku ikemela ne u kalile muta bashemi ba luna ba pili bo Adama ni Eva ne ba bulelezi Mulimu manzwi ao.—Gen. 3:12, 13.

Jehova naa atuzi bo Adama ni Eva kabakala ku sa utwa kwa bona, mi katulo ya hae ne i bonisize kuli mabaka e ne ba file naa si ka amuhelwa ki yena. (Gen. 3:16-19) Kacwalo, kana lu swanela ku nga kuli mabaka kaufela a ku ikemela a amuhelwangi ki Jehova? Kamba kana wa amuhelanga a mañwi? Haiba ku cwalo, lu kona ku ziba cwañi shutano ye mwahalaa mabaka a utwahala ni a sa utwahali? Lu si ka alaba kale lipuzo zeo, ha lu nyakisiseñi mabaka batu ha ba ikemelanga.

Hañata mutu u fanga mabaka a ku ikemela ha ezize nto ye fosahalile, ha si ka eza nto ya naa swanela ku eza, kamba ha sa lati ku eza nto ye ñwi. Mutu ya cwalo u shutana ni mutu ya fa libaka le li utwahala ha palezwi ku eza nto ye ñwi mi u kupa swalelo. Kono sina mo ne ba ezelize bo Adama ni Eva, batu ba bañwi ba fa fanga libaka le li fosahalile kuli ba pate libaka la niti. Mi ku na ni ba ba fanga mabaka a ku ikemela ilikuli ba si ke ba fiwa koto kabakala ze ba ezize.

Kono ha lu fa mabaka a ku ikemela, sihulu haiba a ama sebelezo ya luna ku Mulimu, lu swanela ku tokomela kuli lu si ke lwa “ipuma.” (Jak. 1:22) Kacwalo, ha lu nyakisiseñi mitala ni likuka ze mwa Bibele ze ka lu tusa kuli lu “batisise se si tabisa Mulena.”—Maef. 5:10.

Za Bata Mulimu Kuli lu li Eze

Mwa Linzwi la Mulimu ku na ni litaelo ze lu tokwa ku mamela ka ku ba batu ba Jehova. Ka mutala, taelo ya Kreste ya kuli “mu ye . . . mu lute macaba kaufela,” i sa tokwa ku mamelwa ki balateleli kaufela ba Kreste ba niti. (Mat. 28:19, 20) Ku mamela taelo yeo ki kwa butokwa hahulu kakuli mane muapositola Paulusi naa ize: “Ku maiba ku inzi ku na, ha ni sa buleli Evangeli”!—1 Makor. 9:16.

Nihakulicwalo, batu ba bañwi be lu itutile ni bona Bibele ka nako ye telele ba sa zina-zina ku kutaza taba ye nde ya Mubuso wa Mulimu. (Mat. 24:14) Ba bañwi be ne ba kutazanga ba tuhezi ku eza cwalo. Ki afi mabaka a mañwi e ba fanga batu ba ba sa kutazi? Jehova naa ezize cwañi batu be ne zina-zinile ku utwa litaelo za hae mwa linako za kwakale?

Mabaka A sa Amuhelangi Mulimu

“U taata hahulu.” Musebezi wa ku kutaza u kona ku bonahala ku ba o taata hahulu, sihulu kwa batu ba ba na ni maswabi. Kono ha mu nyakisise ze lu kona ku ituta kwa mutala wa Jonasi. Naa filwe musebezi wa naa ikutwile kuli ne u li o taata hahulu—Jehova naa mu bulelezi kuli a zibahaze za ku sinyiwa kwa Ninive. Lwa kona ku utwisisa libaka Jonasi ha naa saba ku eza musebezi wo. Ninive ne li muleneñi wa Asirya, mi Maasiriya ne ba zibahala kuli ne ba na ni hahulu situhu. Mwendi Jonasi naa ikalezwi kuli: ‘Ni ka pila cwañi mwahalaa batu ba situhu cwalo? Ba ka ni eza cwañi?’ Hañihañi, Jonasi a sabela ku sili. Nihakulicwalo, Jehova naa si ka amuhela libaka  la Jonasi la naa si ka ezeza musebezi wo. Kono Jehova naa mu bulelezi hape kuli a yo kutaza batu ba mwa Ninive. Jonasi cwale a peta musebezi wa hae ka bundume, mi Jehova a fuyola buikatazo bwa hae.—Jona. 1:1-3; 3:3, 4, 10.

Haiba mu ikutwa kuli musebezi wa ku kutaza taba ye nde u taata hahulu ku mina, mu hupule kuli “ku Mulimu linto kaufela za konahala.” (Mare. 10:27) Mwa kona ku ba ni sepo ya kuli Jehova u ka mi tiisa haiba mu mu kupa kuli a mi tuse, mi u ka mi fuyola haiba mu ikataza ku ba ni bundume kuli mu pete sebelezo ya mina.—Luka 11:9-13.

“Ha ni tabeli ku u eza.” Mu kona ku eza cwañi haiba ha mu tabeli luli ku eza sebelezo ya mina ya Sikreste? Mu hupule kuli Jehova wa kona ku sebeza ku mina ni ku mi susumeza kuli mu be ni takazo ya ku eza sebelezo. Paulusi naa ize: “Mulimu ki Yena ya sebeza ku mina kuli mu late mi mu eze, mwa latela yena.” (Mafil. 2:13) Kacwalo, mwa kona ku kupa Jehova kuli a mi tuse ku eza tato ya hae. Mulena Davida naa ezize cwalo. Naa kupile Jehova kuli: “U ni zamaise mwa niti ya hao.” (Samu 25:4, 5) Ni mina mwa kona ku eza cwalo ka ku lapela ka taata ku Jehova kuli a mi susumeze ku ba ni takazo ya ku eza se si mu tabisa.

Ki niti kuli fokuñwi ha lu katezi kamba ha lu zwafile lwa ikapelezanga ku ya kwa mikopano kwa Ndu ya Mubuso kamba ku ya mwa simu. Haiba ku cwalo, kana lu swanela ku nga kuli luli ha lu lati Jehova? Batili. Batanga ba Mulimu ba ba sepahala ba kwakale ni bona ne ba ikatazanga hahulu ku eza tato ya Mulimu. Ka mutala, Paulusi na bulezi kuli ‘naa ezize mubili wa hae ka taata’ ilikuli a utwe milao ya Mulimu. (1 Makor. 9:26, 27) Kacwalo, niha lu ikapelezanga kuli lu eze sebelezo, lwa kona ku ba ni buikolwiso bwa kuli Jehova u ka lu fuyola. Kabakalañi? Lu ikapeleza ku eza tato ya Jehova kabakala kuli lwa mu lata. Ha lu eza cwalo, lu bonisa kuli taba ya naa bulezi Satani ya kuli batanga ba Mulimu ba ka mu latula haiba ba likiwa ki ya buhata.—Jobo 2:4.

“Ni patehile hahulu.” Haiba ha mu yangi mwa simu bakeñisa kuli mu ikutwa kuli mu patehile hahulu, mu tokwa hahulu ku nyakisisa lika ze mu nga kuli ki za butokwa hahulu mwa bupilo bwa mina. Jesu naa ize: “Mu bate pili mubuso wa Mulimu.” (Mat. 6:33) Kuli mu latelele sikuka seo, mwendi mu ka tokwa ku nolofaza mupilelo wa mina kamba ku fukuza kwa nako ye mu itabisanga kuli mu itusise yona mwa simu. Ki niti kuli lu tokwa ku itabisanga ni ku eza lika ze ñwi, kono lika zeo ha li swaneli ku lu palelwisa ku peta sebelezo ya luna. Mutangaa Mulimu u nganga litaba ze ama Mubuso ku ba za butokwa hahulu mwa bupilo bwa hae.

“Ha ni koni ku u eza.” Mu kona ku ikutwa kuli ha mu koni ku ba mukutazi wa taba ye nde. Batanga ba bañwi ba Jehova ba ba sepahala ba mwa miteñi ya Bibele ne ba ikutwanga kuli ne ba sa koni ku peta misebezi ya naa ba  file Jehova. Mu nyake mutala wa Mushe. Jehova ha naa mu file musebezi wa ku eza, Mushe naa ize: “Mawe Mulena! na, ha ni mutu ya na ni bukwala kwa ku bulela, ni kwakale, nihaili cwanoñu isamba u bulela ni mutangaa hao; kakuli ni bulela ka mombela.” Nihaike kuli Jehova naa mu tiisize, Mushe naa alabile kuli: “Mawe Mulena, na ku lapela, luma yo ka luma.” (Ex. 4:10-13) Jehova naa ezize cwañi?

Jehova naa si ka lumelela Mushe kuli a hane ku eza musebezi wa na mu file. Kono naa ketile Aruni kuli a tuse Mushe ku peta musebezi wo. (Ex. 4:14-17) Hape mwa lilimo ze ne latelezi, Jehova naa tusize Mushe ni ku mu fa za naa tokwa kaufela kuli a kone ku peta misebezi ya naa filwe ki Mulimu. Kacenu, mwa kona ku ba ni sepo ya kuli Jehova u ka itusisa balumeli ka mina ba ba yeziseli kuli ba mi tuse ku peta sebelezo ya mina. Ku zwa fo, Linzwi la Mulimu li lu kolwisa kuli Jehova u ka lu konisa ku eza musebezi wa lu laezi kuli lu u eze.—2 Makor. 3:5; mu bone mbokisi ye li, “Lilimo ze ne Tabisa Hahulu Mwa Bupilo Bwa Ka.”

“Mutu yo muñwi naa ni foselize.” Ba bañwi ba tuhezi ku yanga mwa bukombwa kamba ku fumanehanga kwa mikopano bakeñisa kuli ne ba foselizwe, mi ba nahananga kuli Jehova u ka utwisisa libaka le ba tuhelezi ku eza sebelezo ya Sikreste. Kwa utwahala kuli lwa kona ku filikana mutu yo muñwi ha lu foseza, kono kana leo ki lona libaka luli le li kona ku lu tuhelisa ku eza misebezi ya Sikreste?  Hamulaho wa “fapano ye tuna” ya naa bile ni yona Paulusi ni mulumeli ka yena Barnabasi, ku bonahala kuli yo muñwi ni yo muñwi wa bona naa ikutwile ku fosezwa. (Lik. 15:39) Kono kana ne ba tuhezi bukombwa bwa bona kabakala fapano yeo? Ku tokwa!

Ka mukwa o swana, ha mu foselizwe ki mulumeli ka mina, mu hupule kuli sila sa mina haki muzwale wa mina ya si ka petahala kono ki Satani, ya bata ku mi ca. Kono Diabulosi ha na ku mi ca haiba mu ‘hana ku yena ka ku tiya mwa tumelo.’ (1 Pit. 5:8, 9; Magal. 5:15) Haiba mu na ni tumelo ye cwalo, ha mu na “ku swaba.”—Maro. 9:33.

Lu Swanela ku Ezañi Haiba ku na ni ze Ñwi ze lu sa Koni ku Eza?

Mabaka a ku ikemela e lu nyakisisize a bonisa kuli ha ku na libaka le li tomile fa Mañolo le li kona ku lu palelwisa ku peta litaelo za Jehova, ze kopanyeleza taelo ya ku kutaza taba ye nde. Nihakulicwalo, ku kona ku ba ni mabaka a utwahala a tisa kuli lu si ke lwa peta ze ñata mwa bukombwa. Buikalabelo bo buñwi bwa mwa Mañolo bu kona ku tahisa kuli lu si ke lwa banga ni nako ye ñata ya ku kutaza. Hape fokuñwi lu kona ku ikutwa ku katala hahulu kamba ku kula hahulu kuli mane lwa palelwa ku peta ze lu batanga ku peta mwa sebelezo ya Jehova. Kono Linzwi la Mulimu li lu kolwisa kuli Jehova wa ziba ze lu lakaza ku eza mi wa ziba mifokolo ya luna.—Samu 103:14; 2 Makor. 8:12.

Kacwalo, lu swanela ku tokomela kuli lu si ke lwa ikatula maswe kamba ku atula maswe ba bañwi mwa litaba ze cwalo. Muapositola Paulusi naa ñozi kuli: “Kana ki wena mañi, kuli u nyaze mutangaa mulena yo muñwi? Niha tiya kamba a wa, ki taba ya mulenaa hae.” (Maro. 14:4) Mwa sibaka sa ku ibapisa ni ba bañwi lu swanela ku hupula kuli “mutu kaufela ku luna u ka ba ni ku ikalabela ku Mulimu, ka za hae.” (Maro. 14:12; Magal. 6:4, 5) Ha lu lapela ku Jehova ni ku mu bulelela mabaka a lu palelwisa ku eza nto ye ñwi, lu ezeñi cwalo ka ‘lizwalo le linde.’—Maheb. 13:18.

Ki Kabakalañi ku Sebeleza Jehova ha ku lu Tahiseza Tabo?

Kaufelaa luna lwa kona ku sebeleza Jehova ka tabo kakuli za tokwa ku luna ki ze lu kona ku peta ku si na taba ni miinelo ye lu li ku yona. Lu bulelelañi cwalo?

Linzwi la Mulimu li bulela kuli: “U si ke wa hana ku tusa ka swanelo, mo konela ku fana, u fane.” (Liprov. 3:27) Mu lemuhileñi ka za tokwa Mulimu mwa lishitanguti leo? Jehova ha mi laeli kuli mu eze za kona ku eza muzwale wa mina kono u bata kuli mu mu sebeleze ka ‘mo mu konela.’ Kacwalo, mañi ni mañi wa luna wa kona ku sebeleza Jehova ka mwa konela kaufela ku si na taba kuli lwa fokola kamba lu na ni maata.—Luka 10:27; Makolo. 3:23.

[Mbokisi/Siswaniso se si fa likepe 14]

“Lilimo ze ne Tabisa Hahulu Mwa Bupilo Bwa Ka”

Niha lu na ni butata bo bu lu palelwisa ku eza ze ñata mwa sebelezo, ha lu swaneli ku nga kuli lika zeo li ka lu palelwisa ku ba ni kabelo ye tezi mwa bukombwa. Ka mutala, ha mu nyakisise ze ne ezahalezi muzwale yo muñwi wa kwa Canada wa libizo la Ernest.

Bo Ernest ne ba na ni butata bwa ku sa bulela hande mi ne ba na ni maswabi. Hasamulaho wa ku holofala maswe, ba tuhela mubeleko wa bona wa buyahi. Nihaike kuli ne se ba li lihole, muinelo wa bona ne u ba konisize ku ba ni nako ye ñata ya ku yanga mwa bukombwa. Susuezo ye ne filwe kwa mikopano ya puteho ya ku eza bupaina bwa ku tusa ne i ba tahiselize takazo ye tuna ya kuli ba eze cwalo. Kono ne ba ikutwile kuli ne ba sa koni ku eza sebelezo ye cwalo.

Kuli ba ikolwisise kuli ne ba sa koni ku eza bupaina bwa ku tusa, ba ikupela kuli ba eze bupaina bo ka kweli i liñwi. Ne ba komokile hahulu ha ne ba konile ku peta hande musebezi wo! Mi ba ipulelisa mwa pilu, ba li: ‘Ha ni na ku kona ku eza bupaina hape.’ Kuli ba ikolwisise, ba ikupela ku eza bupaina ka kweli i liñwi hape—mi ba kwanisa!

Bo Ernest ne ba ezize bupaina bwa ku tusa ka silimo si li siñwi, kono ba bulela, ba li: “Na ziba hande kuli ha ni koni ku ba paina wa kamita.” Hape kuli ba ikolwisise, ba ikupela sebelezo ya bupaina bwa kamita. Ne ba komokile hahulu ha ne ba boni kuli ne ba konile ku peta sebelezo ya bupaina bwa kamita mwa silimo sa pili. Ne ba zwezipili ku eza bupaina bwa kamita ka lilimo ze peli ku fitela butuku bwa bona bu ba omba moyo. Kono ba si ka timela kale, ne ba bulelelanga batu be ne ba ba lekulanga inze ba enga-enga mioko kuli: “Lilimo zani ze ne ni sebelelize Jehova sina paina ne li lilimo ze ne tabisa hahulu mwa bupilo bwa ka.”

[Siswaniso se si fa likepe 13]

Lwa kona ku tula lika ze kona ku lu palelwisa ku peta bukombwa bwa luna

[Siswaniso se si fa likepe 15]

Jehova wa tabelanga ha lu mu sebeleza ka moyo wa luna kaufela, ili ka ku eza ze lu kona kaufela ku likana ni miinelo ye lu li ku yona