Ni Tukufalelwa ku Eza Misebezi ya Mwa Kopano Ya Jehova

Ka mo li kandekezwi ki bo Vernon Zubko

NE NI huliselizwe kwa simu ye li bukaufi ni munzi wa Stenen o fumaneha mwa provinsi ya Saskatchewan, ili mwa Canada. Bashemi ba ka, bo Fred ni bo Adella, ne ba sebelize ka taata ku babalela na ni muhulwanaa ka wa musali, Aurellia, ni banyani ba ka bo Alvin, Allegra, ni Daryl, ni ku lu luta ka za Jehova. Ni la kacenu le, lu sa itumela hahulu kwa bashemi ba luna ka ku lu luta niti.

Bo ndate, be ne ba li Bakreste ba ba tozizwe, ne li bakutazi ba ba bundume. Ne ba sebelize ka taata ku lu batela za mwa bupilo, kono hape ne ba izibahazanga ku mañi ni mañi kuli ne li Lipaki. Ka nako kaufela ne ba bulelanga ka za niti. Ni ka na ni hupula mutala wa bona wa ku ba ni tukufalelo ni bundume. Hañata ne ba ni bulelelanga kuli: “U tukufalelwe ku eza misebezi ya mwa kopano ya Jehova, mi u ka pima matata a mañata.”

Hañata ne lu kutalezanga mwa makululu a mwa Stenen ni mwa libaka ze ñwi ze li bukaufi. Kamita, ku kutaleza mwa makululu ne ku si ko ku bunolo ku na, kakuli mwa tolopo ni tolopo ne ku na ni batolisi, ili be ne ba to sheununanga luna banana. Ka nako ye ñwi ha ne ni na ni lilimo ze 8 za buhulu, ne ni yemi fo u lobela mukwa inze ni sweli magazini ya Tawala ya Mulibeleli ni ya Mu Zuhe! mi sikwata sa banana sa to ni bupa. Ba ni byangula kuwani ya ka mi ba i beya fa musumo o no li kwatuko ni na. Ka litohonolo, muzwale yo muñwi yo muhulu ye ne ni sebeza ni yena naa bona ze ne ezahala. A sutelela mi a buza, a li: “Vern, butata ki bufi?” Honafo feela bashimani bao ba hasana. Nihaike kuli kezahalo yeo ne li ye nyemisa, ne i ni lutile tuto ya kuli ha ni kutaleza mwa likululu, ni swanela ku zamayanga isi ku yema feela sina musumo. Ku lutiwa cwalo ku zwa kwa bwanana ne ku ni tusize ku ba ni bundume bwa ku kutazanga fa ndu ni ndu.

Na ni Alvin ne lu kolobelizwe mwa May ka 1951. Ne ni na ni lilimo za buhulu ze 13. Ni sa hupulanga manzwi a Muzwale Jack Nathan, ya naa file ngambolo ya kolobezo, a ku lu susueza kuli lu si ke lwa fitisanga kweli lu sa buleli ka za Jehova. * Lubasi lwa luna ne lu nga sebelezo ya bupaina sina musebezi o munde hahulu. Kacwalo ka 1958 ha se ni felize sikolo, na tutela kwa muleneñi wa Winnipeg, o mwa provinsi ya Manitoba, kuli ni yo eza bupaina. Nihaike kuli bo ndate ne ba tabelanga ha ne ni belekanga ni bona mwa pisinisi ya lubasi ya bubeti sina mubebuli wa mabala, bona ni bo me ne ba ni susuezanga hahulu ku eza sebelezo ya nako kaufela mi ne ba ni lumelelize ku tutela kwa Winnipeg.

Ni Tutela Kwa Sibaka se Sinca mi ni ba ni Mulikani yo Munca

Ka 1959, ofisi ya mutai ne i kupile batu kaufela be ne ba kona kuli ba tutele kwa provinsi ya  Quebec, ko ne ku tokwahala hahulu bakutazi. Ne ni tutezi mwa muleneñi wa mwa Quebec o bizwa Montreal kuli ni yo eza bupaina. Yeo ne li cinceho ye tuna! Ne li lwa pili ku ituta puo ya Sifura ni sizo si sili. Muokameli wa luna wa mupotoloho naa ni bulelezi kuli: “U si ke wa li, ‘Ne lu ezanga cwana ko ni zwa.’” Yeo ne li kelezo ye nde.—1 Makor. 9:22, 23.

Ne ni si na paina ye ne ni belekisana ni yena ha ne ni tutezi kwa Quebec. Kono kalibe wa libizo la Shirley Turcotte ye ne ni kile na kopana ni yena mwa Winnipeg, naa bile mulikanaa ka wa kamita ha ne lu nyalani mwa February ka 1961. Ni yena naa zwa mwa lubasi lo lu lata Jehova. Ka nako yeo ne ni si ka ziba kuli naa ka ni tiisanga ni ku ni susueza hahulu halaa lilimo ze kaufela.

Lu yo Kutaleza Mwa Sikuli sa Gaspé

Hamulaho wa lilimo ze peli ku zwa fo lu nyalanela, ne lu ketilwe ku ba mapaina ba ba ipitezi mi lwa yo sebeleza mwa tolopo ya Rimouski, ili mwa Quebec. Hamulaho wa fo, ili ka nako ya matabula a ya kwa maliha, ofisi ya mutai ya lu luma kuli lu yo kutaleza mwa Sikuli sa Gaspé, se si fumaneha kwa munanga o kwa upa wa Canada. Musebezi wa luna ne li wa ku yo cala lipeu za niti ya mwa Bibele ze ñata ka mo ne lu konela kaufela. (Muek. 11:6) Ne lu longile limagazini ze fitelela 1,000 ni libuka ze bato eza 400 mwa mota ya luna, ku beya cwalo ni lico ni liapalo, mi lwa liba kwa sikuli seo ko ne lu izo sebeleza ka kweli i liñwi. Ne lu kutalize ka tokomelo mwa minzi ye minyinyani kaufela ya mwa Gaspé. Ndu ya moya ya mwa sibaka seo ne i lemusize batu kuli ne ku taha Lipaki ni ku ba bulelela kuli ba si ke ba amuhela lihatiso za luna. Kono buñata bwa bayahi ba sibaka seo ne ba si ka utwisisa zibiso yeo mi ne ba nahana kuli ndu ya moya ne i zibahaza ka za lihatiso za luna, mi kacwalo ba amuhela lihatiso za luna.

Ka nako yeo, kihona ha ne lu sa zo ba ni tukuluho ya ku kutaza mwa libaka ze ñwi za mwa Quebec, mi hañata mapokola ne ba lu kaulezanga. Nto yeo ne i ezahalile mwa muleneñi o muñwi ha ne lu sweli ku abela lihatiso fa ndu ni ndu. Mupokola yo muñwi naa lu bulelezi kuli lu ye ni yena kwa polisi, mi lwa ya. Hasamulaho ne ni lemuhile kuli caziba yo muñwi wa mulao naa laezi kuli lu tuhele ku kutaza. Bakeñisa kuli yo muhulu wa mapokola naa siyo ka lizazi leo, na fa caziba wa mulao yo liñolo le ne li talusa za swanelo ya luna ya ku kutaza ili le ne li zwa kwa ofisi ya mutai ye ne li mwa muleneñi wa Toronto. Ha sa balile liñolo leo, caziba yo a li: “Bona, ha li lati ku kena mwa butata. Ki muprisita wa Mukatolika ya ni bulelezi kuli ni mi hanise.” Kuli batu ba mwa sibaka seo ba si ke ba bona kuli musebezi wa luna ne u hanisizwe ki mulao, kapili-pili lwa kutela fo ne lu tuheliselizwe ku kutaza ki mapokola mi lwa zwelapili ku eza musebezi wa luna.

Habusa ha ne lu izo bonana ni yo muhulu wa mapokola, naa halifile ha naa utwile kuli ne lu hanisizwe ku kutaza. Naa halifezi maswe caziba wa mulao ha naa ambola ni yena fa luwaile! Mupokola yo naa lu bulelezi kuli ha lu ka ba ni butata, lu mu lizeze luwaile kuli yena kasibili a tatulule butata bo. Nihaike kuli ne lu li baenyi mwa sibaka seo mi ne lu sa zibi hande Sifura, batu ba mwateñi ne li ba ba sishemo mi ne ba lata ku amuhela baenyi. Kono ne lu ipuzize kuli: ‘Kana batu ba, ba ka ziba niti luli?’ Puzo ya luna ne i alabilwe hamulaho wa lilimo ka nako ye ne lu kutezi kwa Gaspé ku yo yaha Mandu A Mubuso. Ne lu lemuhile kuli batu ba bañata be ne lu kutalize ne se ba li mizwale ba luna. Kaniti, Jehova ki yena ya melisa.—1 Makor. 3:6, 7.

Lu Amuhela Sanda

Ka 1970, ne lu pepile mwana wa musizana wa libizo la Lisa. Sanda se ne lu filwe ki Jehova seo ne si ekelize kwa tabo ya luna. Shirley ni Lisa ne ba swalisani ni na mwa musebezi wa ku yaha Mandu A Mubuso. Lisa ha sa felize sikolo, naa ize: “Tate ni mina bo ma, bakeñisa kuli ku pepwa kwa ka ne ku tahisize kuli mu lilimale mwa sebelezo ya nako kaufela, ni ka lika ku yolisa nako yeo ka ku ba paina.” Lisa u sa zwelapili ku eza bupaina ili bwa sa ezize ka lilimo ze fitelela 20, mi ka nako ya cwale u bu eza hamoho ni muunaa hae, Sylvain. Ba bile ni litohonolo la ku beleka hamoho mwa misebezi ya buyahi mwa  linaha ze shutana-shutana. Mulelo wa luna sina lubasi ki ku zwelapili ku pila bupilo bo bu bunolo ni ku ifana kuli lu itusiswe mwa sebelezo ya Jehova. Ha ni si ka libala manzwi a naa bulezi Lisa ha naa kalile ku eza bupaina. Mane Lisa naa ni susuelize ku kutela mwa sebelezo ya nako kaufela ka 2001, mi ni sa eza bupaina ku to fita ni la kacenu le. Bupaina bu zwelapili ku ni luta ku sepa Jehova mwa linto kaufela ze ni eza mi bu ni tusa ku pila bupilo bo bu bunolo ni ku kolwa ka ze ni na ni zona ni ku ba ni tabo.

Ze Tokwahala Mwa Musebezi wa Buyahi ki Lilato ni Busepahali

Jehova u ni lutile kuli haiba lu ifana ni ku amuhela musebezi ufi kamba ufi wa lu fa, lu ka fumana limbuyoti ze ñata. Ku ba mwa Katengo ka Miyaho ya Mwa Silalanda sa Naha, ni ku sebeza hamoho ni mizwale ni likaizeli mwa musebezi wa buyahi mwa Quebec ni mwa libaka ze ñwi ki tohonolo ye tuna.

Nihaike kuli baitateli ba bañwi ha ba fangi lingambolo ka mukwa o ipitezi, ba ezanga hande hahulu musebezi wa bona wa ku yaha Mandu A Mubuso. Mizwale ni likaizeli ba ba latwa bao ba isezanga pilu kwa musebezi wa bona, mi bukwala bwa bona bwa bonahalanga ka musebezi o ba petile. Ba yahanga mandu a mande a itusiswanga mwa ku lapela Jehova.

Batu ba bañwi ba ni buzanga kuli: “Ki tulemeno tufi twa butokwa hahulu twa swanela ku ba ni tona muitateli mwa musebezi wa ku yaha Mandu A Mubuso?” Ka ku ya ka ze ni iponezi, mutu pili u lukela ku lata Jehova ni Mwanaa hae hamohocwalo ni mizwale. (1 Makor. 16:14) Kalemeno ka bubeli ka ka tokwahala ki busepahali. Lika fokuñwi ha li na ku eziwa ka mo lu latela, kono haiba lwa sepahala lu ka latelela zamaiso ya kopano mi lu ka itatela ku tusa hape mwa misebezi ya buyahi ya kwapili.

Ni Itumela ku Jehova

Nihaike kuli bo ndate ne ba shwile ka 1985, ni sa hupulanga kelezo ye ne ba ni file ya kuli ni tukufalelwe ku eza misebezi ya mwa kopano ya Jehova. Ni sepa kuli ni bona ba patehile sina mo ba patehezi ba bañwi ba ba amuhezi musebezi mwa kalulo ya kwa lihalimu ya kopano ya Jehova. (Sin. 14:13) Bo ma se ba na ni lilimo ze 97. Ha ba sa kona ku bulela hande kabakala butuku bo bu batisa lineku la mubili, kono ba sa ziba Bibele. Mwa mañolo e ba lu ñolelanga, ba ñolanga manzwi a mwa Mañolo mi ba lu susuezanga kuli lu zwelepili ku sebeleza Jehova ka busepahali. Luna bana ba bona kaufela lu itumela hahulu kwa lilato le ba lu bonisize bashemi ba luna!

Hape ni itumela hahulu ku Jehova ka ku ni fa Shirley, musalaa ka ni mulikanaa ka ya sepahala. U mamelanga kelezo ye ne ba mu file bo mahe ya kuli: “Bo muunaa hao ba ka pateha hahulu mwa sebelezo, kacwalo u ka tokwa ku utwisisa kuli ba tokwa nako ya ku tusanga ba bañwi.” Lilimo ze 49 ku zwa fo ne lu nyalanezi, ne lu itamile kuli lu ka supala hamoho inze lu sebeleza Jehova, mi haiba lu punyuha hamoho lifasi le ha li ka fela, lu ka kutela kwa bunca bwa luna hamoho mi lu ka zwelapili ku mu sebeleza ku ya ku ile. Kaniti, ne lu “[patehile] ku eza ze ñata mwa musebezi wa Mulena.” (1 Makor. 15:58, NW) Jehova u lu babalezi luli mi u boni teñi kuli ha ku na nto ye nde ye lu tokwile.

[Litaluso za kwatasi]

[Siswaniso se si fa likepe 31]

“Mulelo wa luna sina lubasi ki ku zwelapili ku pila bupilo bo bu bunolo ni ku ifana kuli lu itusiswe mwa sebelezo ya Jehova”