Jehova wa Teelezanga Mihuwo ya Mutu ya Lobehile Pilu

SINA mwa naa lemuhezi Mulena Salumoni ya butali, kaufelaa luna ‘lu tamwa ki linako ze lu pila ka zona ni ki bushiko kamba bumai bwa luna.’ (Muek. 9:11) Likozi ze maswe ni manyando li kona ku tahisa masitapilu mwa bupilo bwa luna. Ka mutala, lifu la ka sipundumukela la mutu wa mwa lubasi lwa luna li kona ku lu tahiseza maswabi a matuna. Mi mwa lisunda ni likweli ze latelela, maswabi ni ku ikutwa ku zwafa li kona ku ba ze eshula hahulu. Mutu u kona ku lyangana maswe kuli mane u kona ku ikutwa kuli ha lukeli ku atumela Jehova ka tapelo.

Mutu ya li mwa muinelo o cwalo, u tokwa ku susuezwa, ku isezwa mamelelo, ni ku boniswa lilato. Walisamu Davida naa opezi manzwi a omba-omba, a li: “Muñaa Bupilo u tiisa ba ba bata ku wa kamukana, u inula ba ba kotobani.” (Samu 145:14) Bibele i lu bulelela kuli: “Meeto a Muñaa Bupilo a talimisisa lifasi kaufela, kuli a tahise maata a hae ku tusa ba ba mu file lipilu za bona, kaufelaa zona.” (2 Makol. 16:9) “Ba ba lobehile lipilu, wa ba folisa, u tama litombo za bona.” (Samu 147:3) Jehova u tusanga ni ku omba-omba ba ba lobehile lipilu ka nzila ifi?

“Linzwi le li Bulelwa ka ku Swaneleha”

Ye ñwi ya linzila zeo Jehova a lu fanga ka zona tuso ka nako ye swanela ki ka ku itusisa mizwale ba luna ba Sikreste. Bakreste ba elezwa kuli ba “tiise ba lipilu ze shekesha.” (1 Mates. 5:14) Balumeli ha ba bonisa kuli ba iseza mamelelo mulumeli ka bona ya li mwa maswabi ni ku mu bonisa lilato, wa konwa ku tiiswa hahulu. Nihaiba manzwi a bulelwa ka bukuswani kono ili a omba-omba a kona ku susueza mutu ya zwafile hahulu. Manzwi ao fokuñwi a konwa ku bulelwa ki mutu ya kile a ba ni masitapilu a swana ni a mutu yo. Kamba mwendi mulikanaa mutu ya kenezwi ki butata yo ili ya kile a talimana ni muinelo o swana, u kona ku mu bulelela manzwi a tiisa. Jehova u kona ku itusisa mizwale ni likaizeli kuli a tuse mutu ya lobehile pilu.

Ha mu nyakisise taba ya eluda yo muñwi ya naa sa zo nyala wa libizo la Alex, ili yo musalaa hae naa timezi ka sipundumukela bakeñisa kuli naa na ni butuku bo ne bu si na kalafo. Muokameli wa mupotoloho yo muñwi ya na ni kutwelo-butuku naa izo omba-omba bo Alex. Ni yena naa siyamezi mi ka nako ya cwale u nyezi hape. Muokameli yo a talusa ka mo maikuto a ku zwafa naa mu eshulezi. Naa ikutwanga hande ha naa banga ni ba bañwi mwa bukombwa ni kwa mikopano ya puteho.  Nihakulicwalo, ha naa kutelanga kwa ndu ni ku kena mwa muzuzu wa hae naa ikutwanga hahulu buinosi. Bo Alex ba bulela, ba li: “Ne ni ikutwile hahulu ku imululwa ha ne ni zibile kuli mutu ya mwa maswabi wa swanela ku ikutwa cwalo, ni kuli ba bañwi ni bona ne ba talimani ni muinelo o swana.” Kaniti, “linzwi le li bulelwa ka ku swaneleha” la kona ku tiisa lipilu za ba ba li mwa ziyezi.—Liprov.15:23.

Eluda yo muñwi ya zibana ni batu ba bañata ba ba siyamezi, naa susumelizwe ku ikambota ni bo Alex manzwi a tiisa. Naa bonisize kuli naa mu utwela butuku mi a mu bulelela kuli Jehova wa ziba mo lu ikutwela ni ze lu tokwa. Muzwale yo naa ize: “Haiba u ka ikutwa kuli u tokwa mulikani mwa likweli kamba mwa lilimo ze taha, Jehova u lukisize tukiso ye lilato ya kuli wa kona ku nyala hape.” Nihakulicwalo haki bote ba ba siyamezi ili ba ba tabela ku nyala ba ba konanga ku nyala hape. Hasamulaho wa ku kengeela manzwi a naa bulezi muzwale yo, bo Alex ne ba ize: “Ku hupuliswa kuli ku kena mwa linyalo hamulaho wa ku siyamena ki tukiso ya Jehova, ku tusa mutu ku sa ba ni muhupulo wa kuli mutu ha eza cwalo u bonisa ku sa sepahala ku mulikanaa hae ya timezi kamba kwa tukiso ya Jehova ya linyalo.”—1 Makor. 7:8, 9, 39.

Walisamu Davida ya naa talimani ni butata ni miliko ye miñata naa ize: “Meeto a Muñaa Bupilo a talimile ba ba na ni niti, mi lizebe za hae li teeleza mihuwo ya bona. Muñaa Bupilo u fakaufi ni ba ba na ni pilu ye lobehile.” (Samu 34:15, 18) Kaniti, Jehova wa kona ku alaba mihuwo ya ba ba lobehile lipilu ka nako ye swanela, ka ku itusisa Bakreste ba ba hulile mwa tumelo ba ba na ni mufelañeke ili ba ba kona ku bulela mazwi a mande. Tukiso ye cwalo ki ya butokwa mi ya tusa.

Ku Tusiwa ki Mikopano ya Sikreste

Mutu ya lobehile pilu u kona ku ba ni mihupulo ye maswe ka bunolo, ili ye kona ku tisa kuli a ikambuse ku ba bañwi. Liñolo la Liproverbia 18:1 li lemusa kuli: “Mutu ya sa lati siango ni ba bañwi, u bata za lakaza yena a nosi, u lwanisa za ngana kaufela.” Bo Alex ne ba itumelezi kuli: “Ha u latehelwa ki mutu yo nyalani ni yena, u kona ku atelwa ki mihupulo ye maswe.” Ba hupula kuli ne ba ipuzize  cwana: “‘Kana ku na ni nto ye ñwi ye ne ni kona ku eza? Hasi mwendi ne ni swanela ku mu iseza hahulu mamelelo ni ku mu utwisisa hahulu?’ Ne ni sa tabeli ku ba ni li nosi. Ne ni sa tabeli ku ba likwasha. Ku taata hahulu ku tuhela ku nahana cwalo kakuli ka zazi ni zazi u lemuha kuli u inzi u nosi.”

Nto ye tokwahala hahulu ku mutu ya lobehile pilu ki ku swalisana ni batu ba bande. Mi swalisano yeo i fumanwa kwa mikopano ya puteho. Ha lu li kwa mikopano, lu isanga mamelelo kwa litaba za Mulimu ze nde ni ze yahisa.

Mikopano ya Sikreste i lu tusa ku ba ni mubonelo o munde ka za muinelo o lu li ku ona. Ha lu nze lu teeleza ni ku yeya litaba za Bibele, lu isa mamelelo kwa litaba ze peli za butokwa—ili za ku luka kwa bubusi bwa Jehova ni ku keniswa kwa libizo la hae. Mi ha lu eza cwalo, ha lu na ku nahananga feela za manyando a luna. Kaniti, ha lu nze lu lutiwa ka za Jehova kwa mikopano ya Sikreste lwa tiiswanga ka ku lemuha kuli ba bañwi niha ba sa zibi mo lu katazehela kamba niha ba sa utwisisi mo lu ikutwela, Jehova yena wa ziba. Wa ziba kuli “pilu ye inzi mwa maswabi, i loba mutu fahali.” (Liprov. 15:13) Mulimu wa niti u bata ku lu tusa, mi ku ziba nto yeo kwa lu susueza ni ku lu tiisa kuli lu zwelepili.—Samu 27:14.

Davida ha naa katalizwe hahulu ki lila za hae, naa itilelezi ku Mulimu, a li: “Bupilo bwa ka bu ya kwatasi, pilu ya ka i felelwa ki sepo.” (Samu 143:4) Butata hañata bu fokolisanga mutu mi bu tahisanga kuli pilu ya hae i felelwe ki sepo. Fokuñwi lu konwa ku nyandiswa ki makulano kamba ku fokola mwa mubili ka nako ye telele. Kono lu na ni sepo ya kuli Jehova u ka lu tusa ku itiisa. (Samu 41:1-3) Nihaike kuli Jehova ha folisangi ka makazo kacenu, u fanga batu ba ba mwa butata butali ni maata kuli ba tiyele muinelo o ba li ku ona. Mu hupule kuli Davida ha naa imezwi ki miliko, naa kupile tuso ku Jehova. Naa opezi kuli: “Ni hupula mazazi a kwakale, ni kengeela zo ezize kaufela; ni nahana za misebezi ya mazoho a hao.”—Samu 143:5.

Ku ñolwa kwa litaba zeo mwa Linzwi la Mulimu ku bonisa bupaki bwa kuli Jehova wa utwisisa mo lu ikutwela. Manzwi ao a lu kolwisa kuli wa teelezanga likupo za luna. Haiba lu amuhela tuso ya Jehova, ‘u ka lu tiisa.’—Samu 55:22.

“Mu Lapele ka ku sa Lisela”

Liñolo la Jakobo 4:8 li bulela kuli: “Mu sutelele ku Mulimu mi u ka sutelela ku mina.” Ye ñwi ya linzila ze mu kona ku sutelela ka zona ku Mulimu ki ka tapelo. Muapositola Paulusi u lu eleza kuli lu “lapele ka ku sa lisela.” (1 Mates. 5:17) Niha ku kona ku lu bela taata ku bulela luli mo lu ikutwela, “moya isali ona wa lu lapelela, ka sitongo se si sa konwi ku taluswa.” (Maro. 8:26, 27) Jehova wa utwisisa luli mo lu ikutwela.

Bo Monika, ba ba na ni silikani se situna cwalo ni Jehova ba bulela, ba li: “Ni ikutwa kuli Jehova ki mulikanaa ka yo mutuna kabakala ku lapelanga, ku balanga Bibele, ni ku ezanga tuto ya ka butu. U inzi hahulu fakaufi ni na kuli mane na iponela mwa ni tuseza mwa bupilo bwa ka kamita. Kacwalo, na omba-ombiwa ka ku ziba kuli niha ni sa koni ku talusa mo ni ikutwela, yena wa ni utwisisa. Na ziba kuli musa wa hae ni limbuyoti za hae ki za kamita.”

Kacwalo, haike kaufelaa luna lu amuhelange manzwi a mande ili a omba-omba e ba lu bulelelanga Bakreste ba bañwi, lu sebelise likelezo ni likupuliso ze tiisa tumelo ze lu utwanga kwa mikopano ya Sikreste, mi lu bulelelange Jehova lika zote ze mwa pilu ya luna. Lika ze kaufela ki zona za itusisa Jehova kuli a lu bonise kuli wa lu babalela. Bo Alex ba bulela cwana ka ku ya ka ze ba iponezi, ba li: “Haiba lu sebelisa lika kamukana za lu file Jehova ilikuli lu tiise silikani sa luna ni yena, lu ka ba ni ‘maata . . . a matuna hahulu’ a ku itiisa ha lu kopana ni muliko ufi kamba ufi.”—2 Makor. 4:7.

[Mbokisi/Siswaniso se si fa likepe 18]

Manzwi A Omba-Omba Mutu ya Lobehile Pilu

Buka ya Lisamu i na ni mazwi a mañata a bonisa maikuto a batu mi i kuta-kutela ku lu kolwisa kuli Jehova wa teelezanga kwa mihuwo ya mutu ya lobehile pilu, ili ya eshuzwi ki minahano. Ha mu nyakisise manzwi a lipina ze latelela:

“Mwa ñalelwa ya ka, na biza ku Muñaa Bupilo; mi na huweleza ku Mulimu wa ka. A li mwa Tempele ya hae, a utwa linzwi la ka, mi sililo sa ka sa yo fita mwa lizebe za hae.”—Samu 18:6.

“Muñaa Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.”—Samu 34:18.

“Ba ba lobehile lipilu, [Jehova] wa ba folisa, u tama litombo za bona.”—Samu 147:3.

[Siswaniso se si fa likepe 17]

“Linzwi le li bulelwa ka ku swaneleha” li kona ku ba le li omba-omba luli ka nako ya ziyezi!