Lipuzo ze Zwa Kwa Babali

Jesu naa bulelezi bateelezi ba hae kuli: “Mu be ba ba petehile, sina Ndataa mina ya kwa lihalimu ha li Ya petehile.” Batu kacenu ba kona ku ba cwañi ba “ba ba petehile”?—Mat. 5:48.

Kuli lu fumane kalabo ya puzo yeo, lu tokwa ku utwisisa mwa itusiselizwe manzwi a kuli “petehile” ni “bupetehi” mwa Bibele. Haki lika kaufela ze i talusa Bibele kuli ki ze “petehile” ze kona ku ba ze petehile ka ku tala. Kono Jehova yena ki ya petehile ka ku tala. Batu kamba lika ba kona ku ba ba ba petehile kono isi ka ku tala. Manzwi a mwa Bibele ya Siheberu ni ya Sigerike a tolokilwe kuli “petehile” hañata a talusanga “ka ku tala,” “ku kola,” kamba “ku tokwa koli” ka ku ya ka likuka ze tomilwe ki ba mulao.

Bo Adama ni Eva ha ne ba bupilwe, mizamao ya bona, bulikani bwa bona ni Mulimu, ni mibili ya bona ne li ze petehile. Ne ba petehile ka ku ya ka sikuka sa naa tomile Mubupi wa bona. Bakeñisa ku sa ipeya ku utwa, ne ba si ka pila ka ku ya ka likuka ze ne tomilwe mi kacwalo ne ba latehezwi ki bupetehi mi bana ba bona ne ba ka ba ba ba si ka petahala. Kacwalo sibi, ku sa petahala, ni lifu, ne li tile kwa batu kaufela ka Adama.—Maro. 5:12.

Nihakulicwalo, sina Jesu mwa naa taluselize mwa Ngambolo ya fa Lilundu, nihaiba batu ba si ka petahala ba kona ku ba ba ba petehile, kono isi ka ku tala. Mwa ngambolo yeo naa talusize ka mo batu ba kona ku boniseza lilato le li petehile. Mi lilato leo li swana ni la naa boniseze Mulimu kwa batu. Jesu naa ize: “Mu late be ili lila ku mina, . . . mi mu lapelele ba ba mi eza maswe, ba ba mi nyandisa; kuli mu be bana ba Ndataa mina ya kwa lihalimu; kakuli Yena u pazuliseza ba ba maswe ni ba bande lizazi la hae, mi u neliseza ba ba lukile ni ba ba maswe lipula za hae.” (Mat. 5:44, 45) Ka ku bonisa lilato le li cwalo, balutiwa ba Jesu ne ba ka likanyisa mutala o petehile wa Mulimu.

Kacenu Lipaki za Jehova mwa lifasi lote ba lika ka mo ba konela kaufela ku bonisa lilato le li cwalo kwa batu ba bañwi. Ba lakaza ku tusa batu kaufela kuli ba be ni zibo ye nepahezi ya ku ziba niti ye mwa Bibele, ku si na taba ni ko ba simuluha, mushobo wa bona, kamba bulapeli bwa bona. Mwa linaha ze eza 236, Lipaki za Jehova ka nako ya cwale ba tusa batu ba ba tabela ba ba fitelela 7,000,000 ku ituta Bibele.

Jesu naa buzize kuli: “Ha mu latana ni ba ba latana ni mina, mu lukelwa ki mupuzo ufi? Ha ni li, batelisi ki mo ba ezeza ni bona? Mi ha mu itumelisa ni banabahabo mina feela, mu fita ba bañwi mwañi? Ha ni li, batelisi ki mo ba ezeza ni bona?” (Mat. 5:46, 47) Bakreste ba niti ha ba bonisangi ketululo kwa batu bakeñisa lituto ze ba itutile kamba lisimuluho za bona. Mi ha ba bonisangi feela lilato kwa batu ba ba kona ku bonisa lilato ku bona. Kono bona, ba tusa babotana ni bakuli, banana ni ba bahulu. Mwa linzila ze cwalo, Bakreste ba kona ku ba ba ba petehile ka ku likanyisa lilato la Jehova.

Kana kwapili lu ka ba ni bupetehi bwa naa latehezwi ki bona Adama? Eni. Ka ku lumela sitabelo sa Jesu se si liulula, batu ba ba ipeya ku utwa ba ka ba ba ba petehile ka nako ya Puso ya Kreste ya Lilimo ze Sikiti, muta ‘Mwanaa Mulimu a ka felisa misebezi ya Diabulosi.’—1 Joa. 3:8.