‘Misebezi ye ba Ezize I ba Latelezi’

BO Theodore Jaracz, be ne ba li ba bañwi ba Sitopa se si Etelela sa Lipaki za Jehova, ne ba felize sebelezo ya bona ya fa lifasi la Bulalu kakusasana ka la 9 June, 2010. Ne ba na ni lilimo ze 84 ha ba timela mi ba siile basali ba bona bo Melita be ne ba nyalani ni bona ka lilimo ze 53. Ba bañwi ba ba siyezi ki bo kaizelaa bona ni bana ba bona ba balalu, ili basali ba babeli ni muuna a li muñwi.

Muzwale Jaracz naa pepilwe la 28 September, 1925 mwa sibaka sa Pike County sa mwa Kentucky, ili kwa U.S.A. Naa bonisize buineelo bwa hae ku Jehova ka ku kolobezwa la 10 August, 1941 inzaa na ni lilimo ze 15 za buhulu. Hasamulaho wa lilimo ze peli ha to ba ni lilimo ze eza 17, a ba paina wa kamita, mi a kalisa sebelezo ya nako kaufela ya ezize ka lilimo ze bato ba 67.

Muzwale Jaracz naa keni Sikolo sa Giliadi sa Bibele sa busupa ka 1946, inzaa na ni lilimo ze 20. Ha sa kwazize, a lumiwa ku yo sebeza sina muokameli wa maeto mwa Cleveland, ili muleneñi o mwa Ohio, kwa United States. Ka 1951, naa lumilwe ku yo okamela musebezi fa mutai wa Australia. Mi mwa buka ya Yearbook of Jehovah’s Witnesses ya 1983, ne ku bihilwe kuli Muzwale Jaracz “naa susuelize hahulu mizwale mwa naha yote bakeñisa tukufalelo ya hae ya ku tukufalelwa kuli lika li ezwe ka ku ya ka zamaiso ya Mulimu ni bakeñisa mutala o munde wa naa tomile mwa simu.”

Muzwale Jaracz ha sa kutezi kwa United States a yo nyalana ni Kaizeli Melita Lasko la 10 December, 1956. Hamulaho feela wa ku nyalana ba kalisa musebezi wa maeto, mi ne ba sebelize ka tukufalelo mwa mipotoloho ni likiliti ze ñata za mwa United States. Kwa mafelelezo a 1974, Muzwale Jaracz naa memilwe kuli a yo ba yo muñwi wa Sitopa se si Etelela sa Lipaki za Jehova.

Muzwale Jaracz u ka hupulwa ka nako ye telele sina mutangaa Jehova ya ineezi ni ya sepahala, ili ya naa tukufalezwi sebelezo ya Mulimu ka pilu kaufela. Ne li muuna ya lilato, ya naa lata za Jehova ili ya naa tokomela hahulu za ba bañwi ku fita za hae. (1 Makor. 13:4, 5) Takazo ya hae ya kuli batu kaufela ba ezwe hande ni ka sishemo, ne i bonisa kuli naa iseza ba bañwi pilu. Hape lilato la hae ni kutwelo-butuku kwa batu ba bañwi, ne li bonahezi ka tukufalelo ya hae ya ku tukufalelwa bukombwa.

Nihaike kuli lu swabile hahulu bakeñisa ku latehelwa ki yo muñwi wa lubasi lwa Betele ya naa beleka ka taata ili wa mwa kopano ya mizwale ya mwa lifasi kaufela, lwa taba bakeñisa kuli Muzwale Jaracz u sebelelize Jehova ka busepahali ka lilimo ze ñata. Lu na ni sepo ya kuli bo Jaracz ba ‘sepahalile ku isa kwa lifu mi ba amuhezi kuwani ya bulena ya bupilo.’ (Sin. 2:10) Hape lu kolwa kuli ‘misebezi ye ba ezize i ba latelezi.’—Sin. 14:13.