Nako ya ku Sebeleza Mulimu ha I si ka Fela Kale

Me ni mwanaa hae wa musizana ba ba bizwa ka libizo la Ana, ili ba ba pila mwa tolopo ya Málaga ye kwa mboela wa Spain, ne ba kolobelizwe ka la 19 December, 2009. Ne li ba bañwi ba batu ba 2,352 be ne ba kolobelizwe mwa Spain ka 2009. Kono ne ku na ni nto ye ñwi ye komokisa ka za me yo ni mwanaa hae—ili lilimo za bona. Me yo naa na ni lilimo ze 107 za buhulu mi mwanaa hae yena naa na ni lilimo ze 83!

Ki lika mañi ze ne ba susuelize ku kolobezwa, ili ku bonisa buineelo bwa bona ku Jehova? Kwa makalelo a ma-1970, Paki yo muñwi ya naa pila mabapa ni bona naa memanga bo Ana ba banana ku yo fumaneha kwa Tuto ya Buka ya Puteho ye ne ezezwanga fa lapa la Paki yo. Bo Ana ne ba yo fumanehanga kwateñi ka linako ze ñwi. Kono bakeñisa musebezi wa bona, bo Ana ne ba si ka eza zwelopili.

Hamulaho wa lilimo ze bato eza ze lishumi, ba bañwi ba bana ba bo Ana ba kalisa ku ituta Bibele mi hamulaho wa nako, ba ba batanga ba Jehova. Ba bañwi ku bona, ili bo Mari Carmen, ba susumeza bo maa bona ku tabela hape niti ya mwa Bibele mi ba ba tusa ku amuhela tuto ya Bibele. Mi bo kukwaa bo Mari Carmen, ili bo Ana ba bahulu, ni bona ba kalisa ku tabela Bibele. Hamulaho wa nako, batu ba ba lishumi ba mwa lubasi lo ba kolobezwa.

Bo Ana ba bahulu ni bo Ana ba banana bao, ne ba tabile hahulu ka lizazi le ne ba kolobezwa. Bo Ana ba lilimo ze 107, ne ba ize: “Jehova u ni ezize ka sishemo luli, kakuli u ni tusize ku mu ziba.” Bana ba bona ba ekeza kuli: “Paradaisi i si ka taha kale, ni bata ku sebeleza Jehova ka ku eza tato ya hae ni ku kutaza taba ye nde ka mo ni konela kaufela.”

Nto ye tahisezanga limbelwa ze peli zeo tabo ye tuna ki ku fumanehanga kwa mikopano. Yo muñwi wa maeluda ba mwa puteho ya bona u li: “Ha ba shutangi mukopano ni o mukana. Kamita ba itukisezanga ku alaba ka nako ya Tuto ya Tawala ya Mulibeleli.”

Mutala wa bona wa busepahali u lu hupulisa mbelwa ya bizwa Anna, ya “naa sa zwi mwa tempele, [ili ya] naa nzaa sebeleza Mulimu busihu ni musihali ka ku itima lico ni ka ku lapela.” Kabakala ku fumanehanga mwa tempele nako kaufela, naa bile ni tohonolo ya ku bona Jesu inzaa li mwana yo munyinyani. (Luka 2:36-38) Anna niha naa li musupali wa lilimo ze 84, naa sa kona ku sebeleza Jehova. Bo Ana ba babeli ba ba bulezwi mwa taba ye ni bona ba sa kona ku sebeleza Jehova.

Kana mu na ni bahabo mina ba ba tabela ku teeleza kwa litaba ze mwa Bibele? Kamba kana mu kile mwa katana mutu wa musupali ya naa tabela ku mi teeleza ha ne mu mu potezi kwa ndu ya hae? Batu ba ba cwalo ba kona ku ba sina bo Ana ba babeli ba ba bulezwi mwa taba ye, kakuli nako ya ku sebeleza Jehova, Mulimu wa niti, ha i si ka fela kale.

[Manzwi a fa likepe 25]

“Jehova u ni ezize ka sishemo luli”

[Manzwi a fa likepe 25]

“Paradaisi i si ka taha kale, ni bata ku sebeleza Jehova”