Moya O Kenile U lu Tusa ku Tula Miliko ni ku Itiisa ha lu Zwafa

“Mu ka amuhela maata, Moya o Kenile ha u ka ta ku mina.”—LIK. 1:8.

1, 2. Jesu naa sepisizeñi balutiwa ba hae, mi ki kabakalañi?

JESU naa ziba kuli balutiwa ba hae ne ba sa koni ku mamela lika kaufela za naa ba laezi ka ili bona. Kaniti, ne ba tokwa maata a matuna hahulu bakeñisa kuli musebezi wa bona wa ku kutaza ne li o mutuna, lila za bona ne li ze maata, mi hape ne ba fokola. Kamukwaocwalo, Jesu a si ka kambamela kale kwa lihalimu naa sepisize balutiwa ba hae kuli: “Mu ka amuhela maata, Moya o Kenile ha u ka ta ku mina; mi mu ka ba lipaki za ka mwa Jerusalema, ni mwa naha kaufela ya Judea ni ya Samaria, ni ku isa kwa mafelelezo a lifasi.”—Lik. 1:8.

² Sepiso yeo ne i kalile ku talelezwa ka Pentekonta ya 33 C.E. moya o kenile ha ne u file balutiwa ba Jesu Kreste maata a ku kutaza mwa Jerusalema kaufela. Ne ku si na balwanisi be ne ba kona ku ba palelwisa. (Lik. 4:20) Balateleli ba Jesu ba ba sepahala ne ba ka tokwa hahulu maata ao a zwa ku Mulimu “ka mazazi kaufela, ku isa kwa mafelelezo a lifasi,” mi ni luna lwa a tokwa.—Mat. 28:20.

3. Maata a zwa ku Jehova a kona ku lu tusa cwañi?

³ Jesu naa sepisize balutiwa ba hae kuli ‘ne ba ka amuhela maata, moya o kenile ha ne u ka taha ku bona.’ Maata ao Jehova a fanga batanga ba hae a konisa mañi ni mañi wa luna ku peta buineelo bwa luna bwa Sikreste ni ku hanyeza lika ze maswe ze kona ku lu tahela.—Mu bale Mika 3:8; Makolose 1:29.

4. Lu ka nyakisisañi mwa taba ye, mi ki kabakalañi?

⁴ Maata e lu fiwa ka moya o kenile a kona ku bonahala ka nzila ifi? Moya o kenile u kona ku lu susumeza ku eza cwañi ha lu li mwa miinelo ye shutana-shutana? Ha lu nze lu ikataza ku sebeleza Mulimu ka busepahali, lu talimananga ni butata bo buñata, ili bo bu tahiswanga ki Satani, lifasi la hae, kamba ku sa petahala kwa luna. Ki kwa butokwa kuli lu tule butata bo kuli lu kone ku zwelepili ku ba Bakreste, ku kutazanga kamita, ni ku ba ni bulikani bo bunde ni Jehova. Ha lu nyakeñi ka mo moya o kenile u lu tuseza ku tula miliko ni ku itiisa ha lu katezi ni ha lu zwafile.

Ku Tula Miliko

5. Tapelo i kona ku lu tusa cwañi?

⁵ Jesu naa lutile balateleli ba hae kuli ba lapelange cwana: “U si ke wa lu kenya mwa muliko, kono u lu lamulele ku ya maswe.” (Mat. 6:13) Jehova ha na ku fulalela batanga ba hae ba ba sepahala ba ba mu kupa cwalo. Ka nako ye ñwi hape, Jesu naa ize: “Ndate ya kwa lihalimu u ka . . . fa Moya o Kenile ku ba ba u kupa ku yena.” (Luka 11:13) Ki nto ye susueza ku ziba kuli Jehova u lu sepisa kuli u ka lu fa moya o kenile o ka lu tusa hahulu ku eza se si lukile. Nihakulicwalo, taba yeo ha i talusi kuli Jehova u ka tibela miliko kuli i si ya lu tahela. (1 Makor. 10:13) Kono ha lu likwa, lu swanela ku lapelanga ka taata.—Mat. 26:42.

6. Jesu naa itusisizeñi ha naa alaba Satani ya naa mu lika?

⁶ Jesu ha naa alaba Diabulosi ya naa mu  lika, naa mu bulelezi ze ñozwi mwa Mañolo. Jesu naa hupula hande Linzwi la Mulimu ha naa alabile kuli: “Ku ñozwi . . . Zwa Satani, kakuli ku ñozwi kuli: Kubamela Mulena Mulimu wa hao, mi u sebeleze Yena a nosi.” Ku lata Jehova ni Linzwi la hae ne ku susumelize Jesu ku hanela Muliki. (Mat. 4:1-10) Jesu ha sa kuta-kutezi ku mu hanela, Satani a zwa ku yena.

7. Bibele i lu tusa cwañi kuli lu tule miliko?

⁷ Haiba kuli Jesu naa itusisize Mañolo kuli a hanele Diabulosi ya naa mu likile, luna bo? Kaniti, kuli lu kone ku hanyeza Diabulosi, lu swanela pili ku tiiseza ku ziba likuka za Mulimu ni ku li sebelisa hahulu. Batu ba bañata ba susumelizwe ku pila ka likuka za Bibele ha ne ba nze ba ituta Mañolo ni ku utwisisa butali bwa Mulimu ni ku luka kwa hae. Kaniti, ‘linzwi la Mulimu’ li na ni maata a ku lemuha “maikuto ni mihupulo ya mwa pilu.” (Maheb. 4:12) Ka mo mutu a balela hahulu Mañolo ni ku a nahanisisa, ki ka mwa ka utwisiseza hande ‘niti ya Jehova.’ (Dan. 9:13) Kamukwaocwalo, lu swanela ku kengeyelanga mañolo a ama mifokolo ya luna.

8. Ki lifi linzila ze lu kona ku amuhela ka zona moya o kenile?

⁸ Jesu naa kona ku tula miliko kakuli naa ziba Mañolo mi hape “naa tezi Moya o Kenile.” (Luka 4:1) Kuli ni luna lu kone ku eza cwalo, lu tokwa ku sutelela ku Jehova ka ku sebelisa hahulu linzila za lu fa ka zona moya o kenile, ze cwale ka ku ituta Bibele, ku lapela, ni ku kopana hamoho ni mizwale ni likaizeli ba luna. (Jak. 4:7, 8) Ba bañata hape ba boni bunde bwa ku ezanga misebezi kaufela ya Sikreste, ili ye ba tusa ku nahananga litaba ze yahisa.

9, 10. (a) Ki miliko mañi ye kona ku tahela Bakreste? (b) Ku kengeyela ni ku lapela ku kona ku mi tusa cwañi ku tula miliko niha mu ikutwa ku katala?

⁹ Ki miliko ifi ye mu tokwa ku tula? Kana mu kile mwa bata ku eza linyawe ni mutu ye mu si ka nyalana ni yena? Haiba ha mu si ka nyala kamba ku nyalwa, kana mu kile mwa ba ni takazo ya ku kena mwa libato ni mutu ya si mulumeli? Bakreste ha ba nze ba buha mazimumwangala kamba ku itusisa Intaneti, ba konwa ku tahelwa ki muliko wa ku bona lika ze maswe. Kana nto yeo i kile ya mi ezahalela? Haiba ku cwalo, ne mu ezize cwañi? Ki hande ku kengeyela ka mo ku eza nto ye maswe i liñwi ku kona ku tahiseza mutu kuli a eze nto ye ñwi ye maswe mi kwa mafelelezo a eze sibi se situna. (Jak. 1:14, 15) Mu nahane mo mu ka swabiseza Jehova, puteho, ni lubasi lwa mina haiba mu eza sibi se situna. Kono mwa kona ku ba ni lizwalo le li kenile haiba mu kumalela likuka za Mulimu. (Mu bale Samu 119:37; Liproverbia 22:3.) Ha mu tahelwa ki miliko ye cwalo, mu lapelange kuli mu be ni maata a kuli mu kone ku i tula.

¹⁰ Ku na ni nto ye ñwi ye lu swanela ku hupula ka za miliko ya Diabulosi. Jesu ha sa itimile lico ka mazazi a 40 mwa lihalaupa, Satani a mu atumela. Ku bonahala kuli Diabulosi naa nahanile kuli yeo ne li yona “nako” ya ku lika Jesu. (Luka 4:13) Satani u batanga nako ya ku lu lika ni luna. Kamukwaocwalo, ki kwa butokwa kuli lu zwelepili ku tiisa bulikani bwa luna ni Jehova. Hañata, Satani u lu likanga ka nako ya lemuha kuli lu fokozi luli. Kabakaleo, ha lu ikutwa ku katala kamba ku zwafa, lu swanela ku kupanga Jehova ka taata kuli a lu sileleze ni ku lu fa moya o kenile.—2 Makor. 12:8-10.

Ku Katala ni ku Zwafa

11, 12. (a) Ki kabakalañi batu ba bañata kacenu ha ba ikutwanga ku zwafa? (b) Ki nto mañi ye kona ku lu tusa ku itiisa ha lu zwafile?

¹¹ Ka ku ba batu ba ba si ka petahala, fokuñwi lwa zwafanga. Taba yeo i kona ku ezahala hahulu kacenu kakuli lu pila mwa linako ze taata. Lu mwa linako ze bonahala ku ba ze taata hahulu ili ze ba si ka ipumana kale ku zona batu kwa li ku simwa. (2 Tim. 3:1-5)  Armagedoni ha i nze i atumela, butata bo bu shutana-shutana bu sweli bwa ekezeha. Kamukwaocwalo, ha lu swaneli ku komoka batu ba bañwi ha ku ba bela taata hahulu ku peta buikalabelo bwa bona bwa ku uta mabasi a bona. Ba ikutwa ku katala, ku imelwa, mane ni ku topwela. Haiba ni mina mwa ikutwanga cwalo, mu kona ku tiyela cwañi butata bo?

¹² Mu hupule kuli Jesu naa sepisize balutiwa ba hae kuli u ka ba fa mutiisa-pilu—ona moya o kenile wa Mulimu. (Mu bale Joani 14:16, 17.) Moya wo ki maata a matuna ka ku fitisisa. Ka ona, Jehova wa kona ku “eza hahulu ni ku fita” mwa ku lu tiisa kuli lu tiyele muliko ufi kamba ufi. (Maef. 3:20) Muapositola Paulusi naa bulezi kuli haiba lu itinga ku ona, lu ka fiwa ‘maata a matuna hahulu’ niha lu li “mwa butata mwa maneku kaufela.” (2 Makor. 4:7, 8) Jehova ha sepisi kuli u ka tibela lika ze imeza ka nako ya cwale, kono u lu sepisa kuli u ka lu fa maata ka moya wa hae kuli lu kone ku li tiyela.—Samu 46:1.

13. (a) Kalibe yo muñwi u tusizwe cwañi ku tiyela muinelo o taata? (b) Kana ku na ni mitala ye miñwi ye mu ziba ye bato swana ni wa kalibe yo?

¹³ Ha mu nyake mutala wa Stephanie, kalibe wa lilimo ze 19 ya li paina wa kamita. Ha naa na ni lilimo ze 12, naa kulile butuku bo bu batisa lineku la mubili mi naa fumanwi ni sitombo sa kwa booko. Ku zwa ka nako yeo, u pazuzwi habeli ni ku fiwa kalafo ya butuku bwa kwa booko, mi u shiukezwi habeli ki butuku bo bu batisa lineku la mubili, ili bo bu mu batisize ku la nzohoto ni ku mu palelwisa ku bona hande. Stephanie u itusisanga maata a hae kwa ku eza lika za nga ku ba za butokwa, ze cwale ka ku fumanehanga kwa mikopano ya Sikreste ni ku kutaza. Nihakulicwalo, u ikutwa kuli moya wa Jehova u mu tusa ka linzila ze ñata. Lihatiso ze tomile fa Bibele ze na ni litaba ze ba kopani ni zona Bakreste ba bañwi li mu tiisize ka nako ya naa ikutwanga ku zwafa. Mizwale ni likaizeli ba mu tusize ka ku mu lumelanga mañolo kamba ka ku mu susuezanga pili mikopano i si ka kalisa kale ni hasamulaho. Batu ba ba tabela niti ba bonisize buitumelo kwa lika za ba luta Stephanie ka ku yanga kwa ndu ya hae kuli a yo ba luta Bibele. Stephanie u itumela hahulu ku Jehova ka lika zeo kaufela. Liñolo la lata hahulu ki la Samu 41:3, ili la lumela kuli li talelelizwe ku yena.

14. Ki sika mañi se lu sa swaneli ku eza ha lu katezi kamba ku imelwa, mi ki kabakalañi?

¹⁴ Ha lu katezi kamba ku imelwa, ha lu  swaneli ku nahana kuli lu ka imululwa ka ku tuhela ku eza misebezi ye miñwi ya Sikreste. Ku eza cwalo ku fosahalile hahulu. Ki kabakalañi? Kakuli misebezi ye cwale ka ku ituta Bibele lu nosi, ku ituta Bibele sina lubasi, ku kutaza, ni ku fumanehanga kwa mikopano ku lu tusa ku amuhela moya o kenile o ka lu tiisa. Misebezi ya Sikreste ya katulusanga kamita. (Mat. 11:28, 29.) Hañata mizwale ni likaizeli ba fitanga kwa mikopano inge ba katezi, kono hasamulaho wa mikopano ba katuluswanga ni ku tiiswa.

15. (a) Kana Jehova wa sepisa kuli u ka tusa Bakreste ku pila ba sa ikatazi? Mu taluse ka ku ya ka Mañolo. (b) Mulimu u lu sepisañi, mi nto yeo i zusa puzo ifi?

¹⁵ Kono taba yeo ha i talusi kuli ku ba mulutiwa wa Kreste ki nto ye bunolo. Ku ba Mukreste ya sepahala ku tokwa ku ikataza. (Mat. 16:24-26; Luka 13:24) Nihakulicwalo, Jehova wa kona ku fa ya katezi maata ka moya o kenile. Mupolofita Isaya naa ñozi kuli: “Ba ba sepa Muñaa Bupilo ba fiwa maata a manca; ba pahama inze ba fufa sina mbande; ba mata, mi ha ba katali; ba zamaya, mi ha ba fokoli.” (Isa. 40:29-31) Hakulicwalo, lu swanela ku ipuza kuli, Ki nto mañi luli ye tahisa kuli lu ikutwe kuli ku eza misebezi ya Sikreste kwa katalisa?

16. Lu kona ku ezañi kuli lu tokolomohe lika ze katalisa kamba ze zwafisa?

¹⁶ Linzwi la Jehova li lu susueza kuli lu “zibe ku lemuha linto ze nde ku fita.” (Mafil. 1:10) Muapositola Paulusi ha naa susumelizwe ki moya o kenile, naa bapanyize mupilelo wa Sikreste ni siyano ya ku mata musipili o mutelele. Naa ize: “Lu tuhele kaufela ze lu imela, . . . mi lu zamaye inze lu mata ka ku itiisa mwa siyano ye lukiselizwe luna.” (Maheb. 12:1) Sa naa talusa fo kikuli lu swanela ku tokolomoha lika za mbango, ze imeza ili ze katalisa. Mwendi ba bañwi ku luna ba lika ku eza lika ze ñata hahulu. Kamukwaocwalo, haiba hañata mu ikutwanga ku katala kamba ku imelwa, mwa kona ku tusiwa ka ku nyakisisa mo u mi patehiseza mubeleko wa mina, ku beya cwalo ni buñata bwa misipili ye mu tamanga kuli mu yo itabisa, ni nako ye mu tandanga ku eza lipapali kamba lika ze ñwi za ku ikatulusa ka zona. Ku ba ni kutwisiso ku swanela ku lu tusa ku lemuha lika ze lu sa koni ku peta ni ku fukuza kwa misebezi ye si ya butokwa.

17. Ki kabakalañi ba bañwi ha ba kona ku ikutwa ku zwafa, kono Jehova u lu sepisañi?

¹⁷ Mwendi ba bañwi mwahalaa luna ba kona ku zwafa bakeñisa kuli muinelo wa lifasi le ha u si ka fela kale ka mo ne ba nahanela. (Liprov. 13:12) Batu ba ba cwalo ba konwa ku susuezwa ki manzwi a fumaneha kwa Habakuki 2:3, a li: “Pono yeo i sa bulukezwi nako ya yona, kono i ka itahanela kwa maungulo, mi ha i na ku puma. Ha i ka liyeha, u i talimele, kakuli i ka bonahala; mi ha i na ku liyeha.” Jehova u lu sepisa kuli muinelo wa lifasi le u ka fela ka nako luli ya tomile!

18. (a) Ki lisepiso lifi ze mi tiisa? (b) Taba ye tatama i ka lu tusa cwañi?

¹⁸ Kaniti, batanga kaufela ba Jehova ba ba sepahala ba nyolelwa nako yeo ku katala ni ku zwafa li ka fela, ili fo mañi ni mañi ya pila u ka ikola “maata a kwa bucaha bwa hae.” (Jobo 33:25) Nihaiba ka nako ya cwale, mutu ye lu li yena mwahali wa konwa ku matafazwa ki moya o kenile ha lu nze lu eza misebezi ya Sikreste ye tiisa. (2 Makor. 4:16; Maef. 3:16) Mu si ke mwa tuhelela mukatalo ku mi palelwisa ku fumana limbuyoti za kamita.  Muliko ufi kamba ufi o kona ku mi tahela—ibe kuli u tiswa ki ku katala kamba ku zwafa—u ka fela kapili, mi ha u sa feli kapili u ka fela mwa lifasi le linca la Mulimu. Mwa taba ye tatama, lu ka nyakisisa ka mo moya o kenile u tuseza Bakreste kuli ba tiyele nyandiso, ku hana likukuezo ze maswe, ni ku tiyela butata bo bu shutana-shutana.

Mu Kona ku Alaba Cwañi?

• Ku bala Bibele ku lu tiisa cwañi?

• Ku lapela ni ku kengeyela ku lu tiisa cwañi?

• Mu kona ku tokolomoha cwañi lika ze kona ku lu zwafisa?

[Lipuzo za Tuto]

[Siswaniso se si fa likepe 24]

Mikopano ya Sikreste ya kona ku lu tiisa