Mu Bone Libizo Mwa Musindi

ST. MORITZ. Kana libizo leo mwa li utwanga? Mwendi mwa li utwanga kakuli ki libizo la sibaka se si tumile ko ba yo pumulelanga batu ili se si fumaneha mwa Musindi wa Engadine mwa naha ya Switzerland. Kono St. Moritz ki se siñwi feela sa libaka ko ba yanga batu ba bañata kuli ba yo bona musindi o buheha wo, o mwahalaa malundu a bizwa Alps a apesizwe ki litwa. Musindi wo u fumaneha kwa upa wa mboela wa Switzerland bukaufi ni museto wa Italy. Mwa musindi wo hape ku fumaneha sibaka sa lifolofolo sa naha ya Switzerland, ili sibaka se si buheha se si na ni limela ni lifolofolo ze ñata-ñata ili ze lumbeka Mubupi wa luna yo mutuna, Jehova. (Samu 148:7-10) Mi lusika lwa batu lo ne lu kalile mwa lilimo za fahalaa ma-1600 ni lona lu lumbeka Jehova mwa sibaka seo.

Ku na ni nto ye ñwi ye komokisa ye bonahala fa mandu a mwa musindi wo ye kona ku hoha mamelelo ya mina. Mu sa kona ku fumana libizo le li ñozwi fapilaa ndu, inge cwalo fahalimwaa sikwalo sa  ndu. Mwa lilimo-limo za kwamulaho, batu ne ba basanga mandu a bona ka miñolo-ñolo, ili ka ku basa mupende fa limota, ku falula fa limota, kamba ku cakula fa licwe. Mu bone siswaniso sa ndu ye ñwi ye mwa munzi wa Bever fa likepe le. Toloko ya muñolo o fa ndu yeo ki ye: “I yahilwe ka silimo sa 1715. Jehova ki yena makalelo, mi Jehova ki yena mafelelezo. Lika kaufela za konwa ku ezwa ka tuso ya Mulimu, mi ha ku na nto ye kona ku petiwa ku si na yena.” Kaniti, muñolo wa kale wo u bonisa libizo la Mulimu habeli.

Mwa munzi wa Madulain, mwa kona ku bona muñolo wa kale o fita wo. Muñolo wo u li: “Samu 127. Kambesi Jehova ku yaha ndu, ba ba i yaha kambe ba sebelelize mbango. Lucius Rumedius. Ka silimo sa 1654.”

Ki kabakalañi libizo la Mulimu ha li ñozwi fa mandu a mwa musindi wo? Mwa nako ye ne ba ikauhanyize batu ba bañwi kwa Keleke ya Katolika ni ku hana lituto ze ñwi za yona, Bibele ne i hatisizwe mwa puo ya Romansh, ye zwa fa Silatini ili ye bulelwa mwa Engadine. Mane ne li yona buka ya pili ye ne tolokilwe mwa puo yeo. Ka ku susumezwa ki ze ne ba bala mwa Linzwi la Mulimu, batu ba bañata ba ñola mabizo a bona fa mandu a bona mi ba ñola cwalo ni litimana za mwa Bibele ze na ni libizo la Mulimu.

Lilimo-limo ku zwa fo ne i ñolezwi miñolo yeo fa mandu ku to fita ni la kacenu le, i sa zibahaza libizo la Jehova ni ku mu lumbeka. Bapoti hamohocwalo ni bayahi ba mwa musindi wo ba kona ku ituta ze ñata ka za Mulimu yo munde hahulu, Jehova, ka ku ya kwa muyaho o muñwi o ñozwi libizo la hae, ili Ndu ya Mubuso ya Lipaki za Jehova ye mwa Bever.

[Manzwi a bañi ba siswaniso fa likepe 7]

© Stähli Rolf A/age fotostock