Mu Yeyange za mi Ezelize Jehova

JESU ha mano zuswa kwa bafu, balutiwa ba hae ba babeli ne ba nze ba zamaya ku zwa mwa Jerusalema ku liba kwa Emausi. Evangeli ya Luka i bulela kuli: “Ba li ba sa ambola, ba buzana, Jesu, yena luli, a sutelela, a zamaya ni bona. Kono meeto a bona naa palelwa ku mu ziba.” Mi Jesu a li ku bona: “Ki zañi litaba ze mu ipulelela, mu nze mu zamaya? Ba yema, ba swabile.” Ki kabakalañi ha ne ba swabile? Balutiwa ne ba nahana kuli Jesu naa ka ba lukulula kwa puso ya Balicaba, kono ne ku si ka ba cwalo. Jesu ye ne ba libelela kuli na ka ba lukulula, naa bulailwe. Mi ki lona libaka ha ne ba swabile.—Luka 24:15-21; Lik. 1:6.

Jesu a kala ku kolwisa balutiwa. “A kala ka Mushe, a isa kwa bapolofita kaufela, inzaa ba taluseza mwa mañolo kaufela za bulezwi ka zona.” Kaniti, likezahalo ze ñata za butokwa ni ze tiisa tumelo ne li ezahezi ka nako ya bukombwa bwa Jesu! Balutiwa ha ne ba teeleza ku Jesu ha naa nzaa talusa litaba zeo, maswabi a bona a fetuha tabo. Hamulaho wa nako ka ona manzibwana ao, balutiwa bao ba li: “Ha lu li, lipilu za luna ne li tuka mwa lifuba za luna, ha naa lu bulelisa mwa nzila, a lu taluseza Mañolo?” (Luka 24:27, 32) Lu itutañi kwa balutiwa ba Jesu ka mo ne ba ikutwezi Jesu ha naa ba bulelela litaba zeo?

Lu Amiwanga Cwañi ze lu Libelezi ha li sa Tahi?

Balutiwa ba babeli be ne ba ya kwa Emausi ne ba swabile kabakala kuli lika ze ne ba libelela ne li si ka ezahala. Ne ba ikutwile sina mo li taluseza liñolo la Liproverbia 13:12, le li bulela kuli: “So sepile ha si liyeha ku taha, pilu i tahelwa ki ndiulu.” Kamukwaoswana, ba bañwi ku luna ba ba sebelelize Jehova ka busepahali ka lilimo ze ñata, ne ba nahana kuli nako ye kambe “ñalelwa ye tuna” i ezahalile kale. (Mat. 24:21; Sin. 7:14) Kwa utwahala kuli lwa kona ku ikutwa ku swaba ka nakonyana haiba lika ze ne lu libelela li pala ku talelezwa.

Kono mu hupule kuli, balutiwa ba babeli bao, ne ba bile ni tabo Jesu ha naa ba tusize ku nahanisisa bupolofita bo ne bu se bu talelelizwe kale, mi bo buñwi bwa bupolofita bo, ne bu talelelizwe mwa nako ya bona. Ni luna  lwa kona ku zwelapili ku ba ni tabo ni ku itiisa ha lu swabile, sina mo ne ba ezelize balutiwa bao. Eluda ya yeziseli ya bizwa Michael naa ize: “Mu si ke mwa nahananga hahulu ka za lika za si ka eza kale Jehova. Kono mu yeyange za ezize kale.” Ki kelezo kwa bunde!

Za Ezize Jehova

Ha mu nyakisise lika ze ñwi ze ipitezi za petile kale Jehova. Jesu naa ize: “Ya lumela ku na, ni yena u ka eza misebezi ye ni eza; mane u ka eza ye mituna ku fita.” (Joa. 14:12) Kacenu batanga ba Jehova ba peta misebezi ye mituna ku fita ye ne ba petile Bakreste ba kwamulaho kaufela. Batu ba ba fitelela 7 milioni ba libelela ku punyuha mwa ñalelwa ye tuna. Mu nahane feela kuli kwa li ku simwa, ku sa bi batanga ba Jehova ba ba sepahala ba bañata cwalo ba ba sebeza ka taata mwa libaka ze ñata za lifasi! Jehova u tusize batanga ba hae ku eza ‘misebezi ye mituna ku fita’ ya naa ezize Jesu, ku likana ni mwa naa polofitezi Jesu.

Ki lika mañi ze ñwi hape za lu ezelize Jehova? U tusize batu ba lipilu ze na ni niti kuli ba zwe ka swanisezo mwa lifasi le li maswe ni ku kena mwa paradaisi ya moya ya lukisize—ili muinelo wa kozo ni wa swalisano. (2 Makor. 12:1-4) Mu nahanisisange ka za lika ze ñwi ze ama paradaisi yeo. Ka mutala, ha mu talime mwa sibulukelo sa libuka sa mwa ndu ya mina kamba sa mwa Ndu ya Mubuso. Mu tatube mwa Watch Tower Publications Index, kamba mwa Watchtower Library. Mu teeleze kwa papali ye tomile fa Bibele. Mu nahane ka za mukopano wa sikiliti o sa zo fela. Hape mu nahane ka za silikani se sinde se lu ikolanga ni mizwale ni likaizeli ba luna. Jehova u bonisize bufani bo butuna ka ku lu fa lico za moya ze ñata ni swalisano ye lilato ya mwahalaa mizwale—yona paradaisi ya moya luli!

Walisamu Davida naa bulezi kuli: “Muñaa Bupilo, Mulimu wa ka; ki ye miñata misebezi ye komokisa yo ezize, ni zo hupuzi ku lu ezeza.” (Samu 40:5) Kaniti, ka ku yeyanga lika ze nde za lu ezelize kale Jehova ni ka ku kengeyelanga lika za hupuzi ku lu ezeza ka lilato, lu ka ba ni maata a ku tiiseza ka busepahali ni ka pilu kaufela mwa sebelezo ya luna ye lu ezeza Ndataa luna wa kwa lihalimu, Jehova.—Mat. 24:13.

[Siswaniso se si fa likepe 31]

Jesu naa tusize balutiwa ba hae ku yeyanga lika ze nde za naa ba ezelize kale Jehova

[Maswaniso a fa likepe 32]

Mu nahane ka za mukopano wa sikiliti o sa zo fela