Haki Buikatazo Bwa Mbango!

KULI bana ba huliswe ‘ka ku lemusiwa ni ka tuto ya Mulena,’ Nako ya ku Lapela Sina Lubasi ni tuto ya Bibele ki za butokwa. (Maef. 6:4) Kono haiba mu bashemi, mwa ziba kuli banana ba nyikwa ka bubebe ku eza lika. Mu kona ku eza cwañi kuli ba si ke ba nyikwa? Mu bone ze ba ezize bashemi ba bañwi.

Bo George, ba kwa California, mwa U.S.A., ba li: “Banana ha ne ba sa li ba ba nyinyani luli, na ni bo musalaa ka ne lu likanga ku utwahaza tuto ya Bibele ya lubasi ku ba ye nca. Fokuñwi kaufelaa luna ne lu tinanga inge batu ba mwa Bibele ha ne lu balanga Buka Ya Ka ya Makande a Bibele ni ku eza papali ya likande le ne lu bala. Mane ne lu panganga ni liitusiso—mikwale, milamu, lizuma, ni ze ñwi cwalo. Hape ne lu bapalanga lipapali za ‘ki na mañi’ za mwa Bibele mi ne lu pangile papali ya fa libala ya litaba za mwa Bibele ye ne na ni lipuzo ze taata ni ze bunolo. Hape ne ku na ni misebezi ye cwale ka ku panga aleka ya Nuwe ya swanisezo kamba ku panga mundandwe wa likezahalo za mwa Bibele. Fokuñwi ne lu banga ni nako ya ku swanisa maswaniso a batu ba mwa Bibele kamba a makande a mwa Bibele. Ka nako ya cwale, lu sweli ku lukisa za mungendenge wa ku swanisa sisilelezo sa kwa moya se si talusizwe kwa Maefese 6:11-17, mi lu ka bata kuli mañi ni mañi a taluse ze yemelwa ki likalulo za sona. Miezezo yeo i lu tusize ku ikola tuto ya luna ya lubasi.”

Debi, me wa kwa Michigan, mwa U.S.A., u kandeka kuli: “Na ni bo muuna ka ne lu fumana butata ku hoha mamelelo ya mwanaa luna ha naa na ni lilimo ze taalu. Kono zazi le liñwi ha ne ni nze ni bala ka ku tumusa likande la Isaka ni Rebeka mwa Buka Ya Ka ya Makande a Bibele, na nopa lipupe ze peli ni ku kala ku itusisa zona, ku panga papali. Mi cwale a kala ku teeleza luli! Mwa likweli ze ne latelezi, lipupe ze peli zeo za itusiswa mwa ku ba batu ba ba shutana-shutana ba mwa Bibele. Ha se lu balile likande, mwanaa luna naa bata-batanga libapaliso kamba lika feela ze ñwi mwa ndu ze ne konwa ku itusiswa kwa ku eza papali ya likande. Ne se ku eza inge kuli lu bata nto ya butokwa ye patilwe! Mbokisi ya makatulo ni muhala o mufubelu ya ba ndu ya Rahaba mo ne ku kolekilwe muhala o mufubelu. Noha ye telele ye ne lu pangile ye ne tamelezwi kwa kota ya lufiyelo ne i swaniselize hande noha ya kopa ya kwa Numere 21:4-9. Lika zeo ne lu li bulukile mwa mukotana o mutuna. Ne lu tabela ku bona kuli mwanaa luna hañata naa inanga fa ndandulo inzaa alunguta mwa ‘mukotana wa hae wa makande a mwa Bibele.’ Ne ku tabisa luli ku mu bona ha panga lipapali za makande ao ka nzila ya hae ye ipitezi!”

Ku hulisa bana ki musebezi, mi ku ama ze ñata ze fita tuto feela ya ka sunda kuli ba be ni takazo ya ku sebeleza Jehova. Kono nako ya ku lapela sina lubasi ni tuto ya Bibele li kona ku ba kolo ye nde ya ku fa liketelelo ze ñwi za kwa moya. Kaniti luli, buikatazo bwa ku eza cwalo haki bwa mbango!