Lipuzo ze Zwa Kwa Babali

Ki kabakalañi Mushe ha na halifezi bana ba Aruni bo Eliazare ni Itamare, bana bahabo bona bo Nadabi ni Abihu ha se ba shwile, mi buhali bwa hae ne bu kuyuzwi cwañi?—Liv. 10:16-20.

Hamulahonyana feela wa ku tomiwa kwa sebelezo ya buprisita kwa tabernakele, Jehova naa bulaile bo Nadabi ni Abihu, bana ba Aruni, kakuli ne ba tisize mulilo o sa swaneli fapilaa Hae. (Liv. 10:1, 2) Mushe a laela bana ba Aruni ba ne ba siyezi kuli ba si ke ba lila bana bahabo bona. Hamulahonyana wa fo, Mushe a halifela bo Eliazare ni Itamare kakuli ne ba si ka ca kwa sicembwe sa sitabelo sa sibi. (Liv. 9:3) Ki kabakalañi Mushe ha naa ezize cwalo?

Milao yeo Jehova naa file Mushe ne i bonisize hande kuli muprisita ya naa cisa sitabelo sa sibi naa lukela ku cela kalulo ya sona mwa lapa la tende ya kopano. Ku eza cwalo ne ku ngiwa kuli ne li ku lwala libi za ba ne ba file sitabelo seo. Kono a mañwi kwa mali a sitabelo ha naa ka iswa mwa Sibaka se si Kenile, ona muzuzu wa pili wa tabernakele, sitabelo seo ne si sa lukeli ku ciwa. Kono ne si lukela ku ciswa.—Liv. 6:24-26, 30.

Ku bonahala kuli hamulaho wa kozi ye ne ezahezi zazi leo, Mushe naa boni butokwa bwa ku bona teñi kuli litaelo za Jehova kaufela ne li latelezwi. Ha to lemuha kuli sicembwe sa sitabelo sa sibi si cisizwe, a buza bo Eliazare ni Itamare ka buhali libaka ha ne ba si ka si ca ka mo ne ku laelezwi, kakuli mali a sona naa si ka tiswa fapilaa Jehova mwa Sibaka se si Kenile.—Liv. 10:17, 18.

Aruni a alaba puzo ya Mushe, kakuli baprisita ba ne ba siyezi bao ku bonahala kuli ne ba ezize lika ka tumelezo ya hae. Bana ba hae ba babeli ha se ba bulailwe, mwendi Aruni naa kakanyize haiba ku na ni muprisita ya naa ka lumelezwa ki lizwalo la hae ku ca kwa sitabelo sa sibi zazi leo. Mwendi naa ikutwile kuli ha ne ba ka ca kwateñi ne ba si ke ba tabisa Jehova, nihaike kuli mafosisa a bo Nadabi ni Abihu naa sa ba ami luli.—Liv. 10:19.

Sihulu mwendi Aruni naa nahanile kuli lubasi lwa hae ha ne lu eza musebezi wa buprisita lwa pili, ne lu swanela ku tokomela hahulu kuli lu tabise Mulimu nihaiba mwa lika ze nyinyani hahulu. Kono bo Nadabi ni Abihu ne ba nyefuzi libizo la Jehova mi buhali bwa Mulimu ne bu ba tukezi. Kacwalo mwendi Aruni naa nahanile kuli ba mwa lubasi lwa buprisita mo ne ku fumanwi sibi se si cwalo ne ba sa lukeli ku ca kwa sitabelo se si kenile.

Ku bonahala kuli Mushe naa amuhezi kalabo ya muhabo yena, kakuli taba yeo i fela ka ku bulela kuli: “Cwale Mushe ha utwa cwalo, a kolwa.” (Liv. 10:20) Mi ku bonahala kuli Jehova ni yena naa kozwi kalabo ya Aruni.