Kana Luli Mwa Tabela Linzwi la Mulimu?

BO Lorraine ba bulela kuli: “Ha ne ni kalile ku balanga Bibele ne ni sa ikolangi ku i bala. Ne i li taata ku i utwisisa, mi kamukwaocwalo hañata ne ni sa isezangi pilu ku ze ne ni balanga.”

Ba bañwi ni bona ba bulela kuli ne ba kalile ku balanga Bibele kono ne ba sa ikolangi yona. Kono ne ba tundamezi ku bala Mañolo A Kenile kakuli ne ba ziba kuli ku eza cwalo ki yona nto ya butokwa ye ne ba swanela ku ezanga. Bo Marc ba li: “Ku bunolo ku tuhelela lika ze ñwi ku lyanganisa tomahanyo ya ku bala Bibele ni ya ku eza tuto ya ka butu. Ne ni lapezi ka taata ni ku ikataza hahulu kuli ni kone ku balanga Bibele ka zazi ni zazi.”

Mu swanela ku ezañi kuli mu bonise kuli mwa itumela hahulu ka ku ba ni Linzwi la Mulimu, yona Bibele? Mu kona ku eza cwañi kuli mu ikolange ku i bala? Ha mu nyakisise liakalezo ze latelela.

Za ku Eza ni Mwa ku li Ezeza

Mu lapele ku Mulimu kuli a mi tuse ku balanga Bibele ni ku i utwisisa. Mu kupe Jehova kuli a mi tuse ku tabela ku ituta Linzwi la hae. Mu mu kupe kuli a mi tuse ku utwisisa butali bwa hae. (Samu 119:34) Ha mu sa ezi cwalo, ha mu na ku ikolanga ku bala Bibele mi mwendi mane mu ka tuhela ku i balanga. Bo Lynn ba bulela kuli: “Ka nako ye ñwi ni balanga ka ku mata-mata kuli mane na palelwanga ku lemuha lisupo ze ñwi. Hañata ha ni utwisisangi lisupo za butokwa. Nihakulicwalo, na lapelanga kuli ni be ni buiswalo, mi ku eza cwalo ku ni tusanga ku isa muhupulo ku ze ni bala.”

Mu sebelise ze mu ituta. Mu hupule kuli ha mu utwisisa ze mu ituta ni ku li sebelisa mu ka fumana bupilo bo bu sa feli. Kamukwaocwalo, mu ikataze hahulu kuli mu fumanange lisupo ze kona ku mi tusa mi mu li sebelisange. Bo Chris ba li: “Ha ni bala, ni batanga litaba ze kona ku ni tusa ku lemuha bufokoli bo ni na ni bona. Na susuezwanga ha ni fumana kuli mwa Bibele ni mwa lihatiso za luna ku na ni litaba ze ni tusa, nihaike kuli bañoli ba zona ba li ku ba ba bonane ni na.”

Mu itomele likonkwani ze mu kona ku peta. Mu like ku ituta nto ye ñwi kwa batu ba ba bulezwi mwa Bibele. Mwa kona ku batisisa litaba ze bulela ka za bona mwa Bibele ni mwa lihatiso za luna ze fumaneha mwa puo ya mina. Ha mu ziba kuli baana ni basali ba ba bulezwi mwa Bibele ne li batu luli, mu ka tusiwa hahulu ha mu nze mu ituta ka za bona.

Mu bate linzila ze nca za mwa ku taluseza ka zona Mañolo. (Lik. 17:2, 3) Bo Sophia ba itutanga Mañolo ka mulelo wo. Ba li: “Ni bata kuli ni itute linzila ze ñwi za mwa ku taluseza Mañolo ha ni li mwa bukombwa ni ka linako ze ñwi, ilikuli ni kone ku bulelanga litaba za mwa Bibele ka ku utwahala hande. Tawala ya Mulibeleli i ni tusa hahulu ku ziba mwa ku taluseza Mañolo.”—2 Tim. 2:15.

Mu beyange mwa pono litaba ze mu bala. Liñolo la Maheberu 4:12 li bulela kuli: “Linzwi la Mulimu ki le li pila.” Ha mu nze mu bala Mañolo mu nahanisisange manzwi a Mulimu ka ku eza inge kuli mane mwa bona ze ne ba bona batu ba ba bulezwi mwa Bibele. Mu like ku utwa ze ne ba utwa ni ku ikutwa mo ne ba  ikutwela. Mu bapanye miinelo ye ne ba ipumani ku yona ni ye mu ipumana ku yona mwa bupilo bwa mina. Mu itute mo ne ba ezelize mwa miinelo yeo. Ku eza cwalo ku ka mi tusa ku utwisisa litaba za mwa Bibele ni ku li hupulanga.

Mu tandange nako ye ñata ku nyaka mañolo a taata ni litaluso za ona ilikuli mu kone ku a utwisisa hande. Mu bange ni nako ye ñata ha mu ituta. Ha mu nze mu ituta mwendi mu kona ku fumana taba ye ñwi ye mu tokwa ku batisisa. Mu batisise manzwi e mu sa zibi a ñozwi mwa Bibele, mi mu tatube mañolo a bonisizwe ku yona ili a zamaelela ni taba ye mu bala. Ha mu utwisisa hahulu ze mu bala ni ku li sebelisa mu ka tabela hahulu ku balanga Linzwi la Mulimu le li ñozwi. Mi mu ka bulela sina mwa naa bulelezi wa lisamu, ha naa ize: “Lituto za hao [Jehova] ki buswa bwa ka, ku ya ku ile, kakuli ki zona ze tabisa pilu ya ka.”—Samu 119:111.

Mu si ke mwa balanga ka ku mata-mata. Mu abe hande nako ye mu tandanga ha mu eza tuto ya ka butu ni nako ye mu itukisezanga mikopano ya puteho. Bo Raquel ba li: “Hañata ni ikutwanga ku ikalelwa hahulu kuli mane na palelwanga ku iseza pilu ku ze ni bala. Se si ni tusanga ki ku ituta ka nakonyana. Ka ku eza cwalo, ni tusiwanga hahulu ki ze ni ituta.” Bo Chris ba bulela kuli: “Ha ni ituta ka ku mata-mata lizwalo la ka la ni sisitanga kakuli ni hupulanga feela litaba ze nyinyani. Litaba zeo hañata ha li ni fitangi kwa pilu.” Kamukwaocwalo, mu balange ka ku iketa.

Mu shukelwe hahulu linzwi la Mulimu. Muapositola Pitrosi naa bulezi kuli: “Sina bana ba ba sa zwo pepwa, mu shukelwe mabisi a moya, a si ka zwakwa, kuli ka ona mu hulele ze pilisa.” (1 Pit. 2:2) Limbututu ha li ikatazangi ku shukelwa mabisi; lishuke leo li itahelanga feela. Kono Mañolo a lu bonisa kuli luna lu tokwa ku shukelwa linzwi la Mulimu. Haiba mu bala feela likepe li li liñwi ka zazi ni zazi, mu ka kala ku shukelwanga ku bala Bibele mi mu ka ikolanga ku ituta yona.

Mu yeyange ze mu bala mwa Mañolo. Ku yeyanga ze mu bala ni kona kwa tusa hahulu. Ku eza cwalo ku ka mi tusa ku bona mo li swalisanela litaba ze mu batisisize. Mi mu ka fumana nto ya butokwa hahulu ye tahisa tabo, ili butali.—Samu 19:14; Liprov. 3:3.

 Mu Itusise Hande Nako

Ki niti kuli ku itutanga ka mukwa o lukile ku tokwa ku ikataza, kono ku eza cwalo ku tahisa limbuyoti ze ñata. Mu ka utwisisa hande Mañolo. (Maheb. 5:12-14) Butali ni temuho ze mu fumana mwa Mañolo a tahile ka moya wa Mulimu li ka mi tahiseza tabo ni kozo. Butali bo bu mwa Linzwi la Mulimu ki “kota ya bupilo” kwa batu ba ba bu fumana ni ku bu sebelisa.—Liprov. 3:13-18.

Ku ituta Linzwi la Mulimu ka butungi kwa kona ku mi tusa ku ba ni pilu ye utwisisa. (Liprov. 15:14) Ku ba ni pilu ye cwalo ku ka mi tusa ku fanga likelezo ze tomile fa Bibele. Haiba mu eza liketo ka ku latelela ze mu bala mwa Mañolo ni mwa lihatiso za “mutanga ya sepahala, ya na ni kutwisiso,” mu ka katuluswa ni ku tiiswa ki Linzwi la Jehova. (Mat. 24:45) Mu ka ba ni mubonelo o munde wa lika mi munahano, likezo, ni lipulelo za mina li ka lumelelana ni ze li bulela Linzwi la Jehova. Kacwalo lika kaufela ze ama bulikani bwa mina ni Mulimu li ka konda.—Samu 1:2, 3.

Lilato le mu na ni lona ku Mulimu li ka mi susumeza ku bulelela ba bañwi za tumelo ya mina. Mi ku eza cwalo ni kona ku ka mi fumanisa limbuyoti. Bo Sophia ba sweli ku lika ka taata ku hupulanga mañolo a shutana-shutana ni ku itusisa ona ka mulelo wa kuli ba tusange bañi ba mandu ku teeleza, ni kuli ba kone ku ikola sebelezo ya bona ya Sikreste ni ku i peta hande. Bo Sophia ba li: “Ku bona mo ba ikutwela batu ha ba boniswa litaba ze mwa Bibele kwa nyakalalisa.”

Mbuyoti ye tuna ka ku fitisisa ye lu ka ba ni yona ha lu tabela Linzwi la Mulimu, ki bulikani bo bu tiile ni Jehova. Ku ituta Bibele ku ka mi tusa ku ziba likuka za hae ni ku itebuha lilato la hae, bufani bwa hae, ni ku luka kwa hae. Ha ku na nto ya butokwa kamba ye nde hahulu ku fita ku ituta Bibele. Kacwalo, mu tukufalelwe ku ituta Linzwi la Mulimu. Ha mu eza cwalo mu itusisa hande nako ya mina.—Samu 19:7-11.

[Manzwi/Siswaniso se si fa likepe on page 5]

KU BALA LINZWI LA MULIMU: ZA KU EZA NI MWA KU LI EZEZA

▪ Mu lapele ku Mulimu kuli a mi tuse ku balanga Bibele ni ku i utwisisa.

▪ Mu sebelise ze mu ituta.

▪ Mu itomele likonkwani ze mu kona ku peta.

▪ Mu bate linzila ze nca za mwa ku taluseza ka zona Mañolo.

▪ Mu beyange mwa pono litaba ze mu bala.

▪ Mu tandange nako ye ñata ku nyaka mañolo a taata ni litaluso za ona ilikuli mu kone ku a utwisisa hande.

▪ Mu si ke mwa balanga ka ku mata-mata.

▪ Mu shukelwe hahulu linzwi la Mulimu.

▪ Mu yeyange ze mu bala mwa Mañolo.

[Caption on page 4]

Ha mu bala likande la mwa Bibele, mu bone inge mu mwa muinelo o swana