Mabasi A Sikreste—“Mu Yeme Mu Itukisize”

“Mu yeme mu itukisize, kakuli Mwanaa mutu u ka taha ka nako ye mu sa hupuli.”—LUKA 12:40.

1, 2. Ki kabakalañi ha lu swanela ku mamela kelezo ya Jesu ya kuli lu be ba ba “itukisize”?

“MWANAA mutu nako ya ka taha mwa kanya ya hae” ku to “keta ba bañwi ku ba bañwi,” ki sika mañi se si ka ezahala ku mina ni kwa lubasi lwa mina? (Mat. 25:31, 32) Bakeñisa kuli Jesu u ka taha ka nako ye lu sa hupuli, ki kwa butokwa hahulu kuli lu mamele kelezo ya Jesu ya kuli lu be ba ba “itukisize”!—Luka 12:40.

² Taba ye felile ne i bulezi ka za mo mañi ni mañi mwa lubasi a kona ku tuseza lubasi kaufela kuli lu zwelepili ku tona ka ku peta buikalabelo bwa hae. Ha lu nyakeñi linzila ze ñwi ze lu kona ku tusa ka zona lubasi lwa luna kuli lu zwelepili ku ba ni bulikani bo bu tiile ni Jehova.

Mu be ni Liito le li “Bona Hande”

3, 4. (a) Mabasi a Sikreste a swanela ku tokomelañi? (b) Ku talusañi ku ba ni liito le li “bona hande”?

³ Kuli mabasi a itukiseze ku taha kwa Kreste, a swanela ku tokomela kuli a si ke a yaululwa ki lika ze kona ku tahisa kuli a keshebise bulapeli bwa niti. A swanela ku ambuka lika ze cwalo. Bakeñisa kuli lilato la ku lata sifumu ki lilaba le se li swasize mabasi a mañata, ha lu boneñi za naa bulezi Jesu ka za ku ba ni liito le li “bona hande.” (Mu bale Luka 11:34.) Sina lambi ha i kona ku mi  monyehela mwa nzila ni ku mi tusa kuli mu zamaye hande mu sa wi, ze lu bona ka “meeto a lipilu” za luna a swanisezo za kona ku lu tusa kuli lu si ke lwa wela mwa sibi.—Maef. 1:18.

⁴ Ku talusañi ku ba ni liito le li “bona hande”? Ku talusa ku isa pilu kwa nto i liñwi feela. Ku fita ku ndongwama sifumu ni ku tukufalelwa feela ku batela lubasi za bupilo, lu swanela ku isa pilu kwa lika za kwa moya. (Mat. 6:33) Taba yeo i talusa kuli lu swanela ku kolwa ka lika ze lu na ni zona ni ku sebeleza Mulimu ka pilu ya luna kaufela.—Maheb. 13:5.

5. Musizana yo muñwi naa bonisize cwañi kuli “liito” la hae ne li talimile feela sebelezo ya Mulimu?

⁵ Banana ba kona ku tusiwa hahulu haiba ba lutiwa ku ba ni liito le li bona hande. Ki wo mutala wa musizana yo muñwi ya pila mwa naha ya Ethiopia. Naa ezize hande hahulu mwa lituto za hae za kwa sikolo mi ha sa felize sikolo, naa sepisizwe ku lifelwa mali kuli a itute tuto ye pahami. Kono bakeñisa kuli naa isize hahulu pilu kwa ku sebeleza Jehova, naa hanile mpo yeo. Hamulahonyana wa fo, naa sepisizwe musebezi kwa naa ka holanga mali a eza K18,600,000 ka kweli—ili mali a mañata hahulu ku fita e ba holanga babeleki ba bañata mwa naha ya habo yena. Kono “liito” la hae ne li talimile feela sebelezo ya bupaina. Naa hanile mubeleko wo a si ka buza bashemi ba hae za naa tokwa ku eza. Bashemi ba hae ne ba ikutwile cwañi ha ne ba zibile za naa ezize mwanaa bona? Ne ba nyakalalile mi ne ba mu bulelezi kuli naa tabisize lipilu za bona!

6, 7. Ki lilaba lifi le lu swanela ‘ku tokomela’?

⁶ Manzwi a Jesu a ñozwi kwa Luka 11:34 hape a lu lemusa ka za mukwañuli, kakuli linzwi la Sigerike le li tolokilwe kuli “maswe” hape li kona ku talusa “mukwañuli.” Jehova u nga cwañi batu ba ba na ni mukwañuli? Bibele i li: “Haili ka za buhule, ni mikwa ye maswe kaufela, ni takazo ya ku luwa [kamba, “mukwañuli”], ku si ke kwa bulelwa nihaiba mabizo a lika zeo ko ku mina.”—Maef. 5:3.

⁷ Ku bunolo ku lemuha mutu ya na ni mukwañuli. Kono haiba ki luna ba ba na ni mukwañuli ku taata ku u lemuha. Kacwalo lu swanela ku utwa kelezo ya Jesu, ye li: “Mu tokomele, mi mu ipuluke kwa takazo kaufela ya bufumu [kamba, “mukwañuli”].” (Luka 12:15) Kuli lu eze cwalo lu tokwa ku itatuba kuli lu bone ko li tengamezi lipilu za luna. Ba ba mwa mabasi a Sikreste ba swanela ku nahanisisa ka mo ba itusisezanga nako ni masheleñi ha ba itabisa kamba ha ba leka lika.

8. Ha lu leka nto ye ñwi, lu kona ku bonisa cwañi kuli lu na ni butali?

⁸ Ki lika ze ñata ze mu tokwa ku nyakisisa ha mu leka nto ye ñwi isiñi feela ku bona haiba mu na ni masheleñi a ku i leka. Mu nyakisise lika ze cwale ka ze: ‘Kana ni ka ba ni nako ya ku itusisanga nto ye ni ku i babalela? Ni ka nga nako ye kuma kai kuli ni itute mwa ku i sebeliseza hande?’ Mina banana, mu si ke mwa lumela litaba kaufela ze ba bulela bafundoti ka za lika ze ba lekisa. Ku eza cwalo ku kona ku tahisa kuli mu kataze bashemi ba mina kuli ba mi lekele mufuta o muñwi wa liapalo ze tula kamba lika ze ñwi. Mu no iswala. Hape, yo muñwi ni yo muñwi mwa lubasi u swanela ku nahanisisanga ka za haiba nto ya bata ku leka i ka tusa lubasi ku itukiseza ku taha kwa Mwanaa mutu. Mu kolwe sepiso ya Jehova ye li: “Ha ni na ku ku tuhela, ha ni na ku ku fulalela.”—Maheb. 13:5.

Mu Ikataze ku Peta Likonkwani za Kwa Moya

9. Ku peta likonkwani za kwa moya ku kona ku tusa cwañi lubasi?

⁹ Nzila ye ñwi ye ba kona ku tiisa ka yona tumelo ya bona ba mwa lubasi ni ku tusana kuli ba tiise bulikani bwa bona ni Jehova, ki ku toma likonkwani za kwa moya ni ku ikataza  ku li peta. Ku eza cwalo ku ka ba tusa ku bona haiba ba eza hande mwa sebelezo ya bona ku Jehova ni ku lemuha misebezi ya butokwa ye ba swanela ku eza.—Mu bale Mafilipi 1:10.

10, 11. Ki likonkwani lifi za kwa moya ze lu ikataza ku peta lubasi lwa mina, mi ki likonkwani lifi ze mu bata ku itomela kwapili?

¹⁰ Nihaiba ku itomela likonkwani ze nyinyani za kona ku peta yo muñwi ni yo muñwi wa mwa lubasi kwa kona ku tusa hahulu. Ka mutala, mwa kona ku itomela sikonkwani sa ku nyakisisanga liñolo la zazi ka zazi ni zazi. Ze ba bulela ba mwa lubasi za kona ku tusa toho ya lubasi ku bona mo ba latela Jehova ni niti. Ku itomela sikonkwani sa ku balanga Bibele hamoho sina lubasi ku kona ku tusa banana kuli ba balange hande ni ku utwisisa hande litaba za mwa Bibele. (Samu 1:1, 2) Mi mwa kona ku itomela sikonkwani sa ku bolosola mulapelelo wa mina. Hape mwa kona ku itomela sikonkwani sa ku ituta ku bonisa hahulu muselo wa moya. (Magal. 5:22, 23) Kamba mwa kona ku itomela sikonkwani sa ku bonisanga kutwelo-butuku kwa batu be mu katana ha mu kutaza. Lubasi ha lu ikataza ku eza cwalo, banana ba kona ku ituta ku ba ni mukekecima, mi ba kona ku ba ni takazo ya ku sebeza sina mapaina ba kamita kamba balumiwa.

¹¹ Mu nyakisise likonkwani ze mu kona ku peta ni lubasi lwa mina. Kana lubasi lwa mina lwa kona ku itomela sikonkwani sa ku tandanga nako ye ñata mwa bukombwa? Haiba ku mi belanga taata ku kutaza ka luwaile, kamba ku kutaleza mwa makululu kamba mwa libaka za lipisinisi, kana mwa kona ku ikataza ku tula butata bo? Kana mwa  kona ku yo belekela ko ku tokwahala hahulu bakutazi ba Mubuso? Kana yo muñwi mwa lubasi wa kona ku ituta puo i sili kuli a kutazange batu ba ba zwa kwa linaha li sili?

12. Ki lika mañi ze ba kona ku eza litoho za mabasi kuli ba tuse mabasi a bona ku eza zwelopili?

¹² Ka ku ba toho ya lubasi, mu lemuhe ze lu tokwa ku eza lubasi lwa mina kuli lu eze zwelopili. Mi mu tome likonkwani ze kona ku mi tusa ku peta mulelo wo. Likonkwani ze mu itomela sina lubasi li swanela ku ba ze mu kona ku peta ku likana ni buikoneli bwa mina ni miinelo ye mu li ku yona. (Liprov. 13:12) Ku peta sikonkwani se sinde ku nganga nako. Kacwalo mu itusisange nako ye ñwi ye mu buhanga mazimumwangala kuli mu eze lika za kwa moya. (Maef. 5:15, 16) Mu eze ka taata kuli mu pete likonkwani ze mu tomela lubasi lwa mina. (Magal. 6:9) Zwelopili ye lu eza lubasi lo lu ikataza ku peta likonkwani za lona i ka ‘lemuhiwa ki batu kaufela.’—1 Tim. 4:15.

Mu Bange ni Nako ya ku Lapela Sina Lubasi

13. Ki cinceho ifi ye ne ezizwe ye ama tomahanyo ya mikopano ya sunda ni sunda, mi ki lipuzo lifi ze lu swanela ku nahanisisa?

¹³ Nto ye nde hahulu ye kona ku tusa mabasi ‘ku itukiseza’ ku taha kwa Mwanaa mutu ki cinceho ye ne ezizwe ye ama tomahanyo ya mikopano ya sunda ni sunda ili ye ne kalile la 1 January, 2009. Ha lu sa kopananga ka nako i sili mwahalaa sunda kuli lu be ni mukopano o no bizwanga Tuto ya Buka ya Puteho. Mukopano wo se u eziwanga hamoho ni Sikolo sa Bukombwa sa Teokratiki ni Mukopano wa Sebelezo. Cinceho yeo ne i ezizwe ilikuli mabasi a Sikreste a kone ku tiisa bulikani bwa ona ni Jehova ka ku banga ni Nako ya ku Lapela Sina Lubasi. Se ku fitile nako ye telele ku zwa fo ne i ezelizwe cinceho yeo, kacwalo lwa kona ku ipuza kuli: ‘Kana na itusisanga nako yeo kuli ni bange ni tukiso ya ku Lapela Sina Lubasi kamba ku eza tuto ya ka butu? Kana ni konile ku peta mulelo wa tukiso yeo?’

14. (a) Ki ufi mulelo o mutuna o lu swanela ku belanga ni Nako ya ku Lapela Sina Lubasi kamba ku eza tuto ya ka butu? (b) Ki kabakalañi ku toma nako ya ku ituta ha ku li kwa butokwa?

¹⁴ Mulelo o mutuna o lu swanela ku belanga ni Nako ya ku Lapela Sina Lubasi kamba ku eza tuto ya ka butu ki wa kuli lu sutelele hahulu ku Mulimu. (Jak. 4:8) Ha lu ituta Bibele kamita ni ku ekeza kwa zibo ya luna ya ku ziba Mubupi, bulikani bwa luna ni yena bu ka tiya. Ha lu nze lu sutelela hahulu ku Jehova, lu ka susumezwa hahulu ku mu lata ‘ka pilu ya luna kaufela, ka moyo wa luna kaufela, ka kutwisiso ya luna kaufela, ni ka maata a luna kaufela.’ (Mare. 12:30) Kaniti, lwa lata ku utwa Mulimu ni ku mu likanyisa. (Maef. 5:1) Kacwalo ku banga ni Nako ya ku Lapela Sina Lubasi kamita ku ka tusa hahulu lilama kaufela za lubasi lwa luna ‘ku itukiseza’ ku taha kwa “ñalelwa ye tuna.” (Mat. 24:21) Ku eza cwalo ki kwa butokwa kuli lu to piliswa.

15. Tukiso ya Nako ya ku Lapela Sina Lubasi i kona ku tusa cwañi lilama za lubasi ku latana?

¹⁵ Mulelo o muñwi wa tukiso ya Nako ya ku Lapela Sina Lubasi ki wa kuli lilama za lubasi li kone ku sutelela ku yo muñwi ni yo muñwi. Ku ambolisana lika za kwa moya hamoho ka sunda ni sunda kwa kona ku tusa hahulu ba mwa lubasi ku latana. Batu ba ba nyalani ba utwananga hahulu ha ba ituta Bibele hamoho. (Mu bale Muekelesia 4:12.) Bashemi ni bana ba ba lapelanga hamoho ba ka swalisana ka lilato, ili “tamo ye lu fa bupetehi.”—Makolo. 3:14.

16. Mu taluse ka mo li tusezwa likaizeli ze talu kabakala ku toma nako ya ku ituta Bibele hamoho.

¹⁶ Ha lu nyakeñi mo li tuselizwe likaizeli ze talu ka ku toma nako ya ku ituta Bibele hamoho. Nihaike kuli ha ku na mukowa mwahalaa likaizeli bao ba ba li limbelwa, ba pila  mwa muleneñi o swana mi ba bile balikani ka lilimo ze ñatanyana. Bakeñisa kuli ne ba bata ku ba ni nako ya ku ambolisananga isi feela za mwa bupilo kono sihulu za kwa moya, ne ba utwani kuli ba kopanange manzibwana ku ituta Bibele. Ne ba kalile ku eza cwalo ka ku itutanga buka ya “Bearing Thorough Witness” About God’s Kingdom. Yo muñwi ku bona u li: “Lu ikolanga hahulu tuto yeo kuli mane hañata i tandanga nako ye fitelela hola i liñwi. Lu likanga ku eza inge ba ba bona miinelo ye ne ba li ku yona mizwale ba luna ba mwa linako za baapositola mi lwa ikambotanga mo ne lu ka ezeza kambe ki luna be ne ba li mwa miinelo ye cwalo. Mi ha lu li mwa simu lu likanga ku sebelisa ze lu itutile. Ku eza cwalo ku lu tusize kuli lu petange hande musebezi wa luna wa ku kutaza Mubuso ni wa ku tusa batu ku ba balutiwa mi lwa ikolanga ona hahulu.” Tukiso yeo i ba tusize ku tiisa bulikani bwa bona ni Mulimu mi i tahisize kuli ba utwane hahulu. Ba li: “Lu nga tukiso yeo ku ba ya butokwa hahulu.”

17. Ki lika mañi ze kona ku tusa kuli tukiso ya Nako ya ku Lapela Sina Lubasi i latelelwange?

¹⁷ Mina bo? Mu tusiwa cwañi ki tukiso ya Nako ya ku Lapela Sina Lubasi kamba tuto ya ka butu? Haiba lu sa lateleli tukiso yeo kamita, milelo ya yona ha i na ku petahala. Yo muñwi ni yo muñwi mwa lubasi u swanela ku itukisezanga ku ituta ka nako ye tomilwe. Lika ze si za butokwa ha li swaneli ku mi palelwisa ku ituta. Hape mu swanela ku ketanga litaba ze kona ku tusa lubasi lwa mina ka zazi ni zazi. Ki lika mañi ze mu kona ku eza kuli tuto yeo i bange ye tabisa? Mu itusisange milutelo ye buanyu, mi tuto i eziwange ka likute ni ka kozo.—Jak. 3:18. *

Mu “Tone” mi “mu Yeme mu Itukisize”

18, 19. Ku ziba kuli Mwanaa mutu a tuha a taha ku swanela ku mi ama cwañi ni lubasi lwa mina?

¹⁸ Bumaswe bo bu nze bu ekezeha mwa lifasi bu bonisa hande fo ku sweu kuli lifasi le li maswe la Satani li mwa mazazi a maungulelo ku kala ka 1914. Ndwa ya Armagedoni i fa ngo ni mulomo. Ona cwale-cwale fa, Mwanaa mutu u ka tahisa katulo ya Jehova fahalimwaa batu ba ba maswe. (Samu 37:10; Liprov. 2:21, 22) Ku ziba taba yeo ku swanela ku mi ama ni ku ama lubasi lwa mina.

¹⁹ Kana mwa mamela kelezo ya Jesu ya kuli mu be ni liito le li “bona hande”? Batu ba mwa lifasi ha ba nze ba ikataza ku bata sifumu, libubo, kamba maata, kana lubasi lwa mina lona lwa ikataza ku peta likonkwani za kwa moya? Kana mwa latelela tukiso ya Nako ya ku Lapela Sina Lubasi kamba ku eza tuto ya ka butu? Kana mwa peta milelo ya tukiso yeo? Sina mo ku taluselizwe mwa taba ye felile, kana mwa peta buikalabelo bwa mina bwa bulela Mañolo ka za muuna, musali, kamba mwana, kuli mu tuse lubasi kaufela ku zwelapili ‘ku tona’? (1 Mates. 5:6) Haiba mu eza cwalo, mu ka ba ba ba ‘itukiselize’ ku taha kwa Mwanaa mutu.

[Litaluso za kwatasi]

Mu Itutileñi?

• Mu taluse mwa kona ‘ku itukiseleza’ mabasi a Sikreste . . .

ka ku ba ni liito le li “bona hande.”

ka ku toma likonkwani za kwa moya ni ku ikataza ku li peta.

ka ku banga ni Nako ya ku Lapela Sina Lubasi.

[Lipuzo za Tuto]

[Siswaniso se si fa likepe 13]

Ku ba ni liito le li “bona hande” ku ka lu tusa kuli lu si ke lwa yembululwa ki lika za lifasi