“Muokameli yo Munde ni Mulikani ya Lilato”

BO John Barr, be ne ba li ba bañwi ba Sitopa se si Etelela sa Lipaki za Jehova, ne ba felize sebelezo ya bona ya fa lifasi la Mukibelo kakusasana, ili la 4 December, 2010. Ne ba na ni lilimo ze 97 za buhulu. Ne ba taluswanga kuli ki “muokameli yo munde ni mulikani ya lilato.”

Muzwale Barr naa pepezwi mwa muleneñi wa Aberdeen o mwa Scotland. Ne li ba balalu mwa mba ya bona mi ne li yena ñomba. Bashemi ba hae kaufela ne ba li batoziwa. Muzwale Barr hañata naa bulelanga lika ze nde ka za mo ne ba pilelanga mwa lubasi lwa bona inzaa sa li mwanana; naa itumelanga bakeñisa mutala o munde o ne ba mu tomezi bo ndatahe ni bo mahe.

Muzwale Barr ha naa na ni lilimo ze mwahalaa 13 ni 19, ne ku mu belanga hahulu taata ku ambola ni batu ba sa zibi. Kono naa ezize ka taata kuli a tule butata bo, mi ka silimo sa 1927 la Sunda musihali, a bulelela bo ndatahe kuli naa bata ku ya ni bona kwa ku kutaza fa ndu ni ndu. Ka nako yeo naa na ni lilimo ze 14 za buhulu. Ao ne li ona makalelo a sebelezo ya hae ku Jehova. Ku zwa ka lona lizazi leo, Muzwale Barr naa zwezipili ku kutaza taba ye nde ka tukufalelo ku fitela lifu la hae.

Kozi ye maswe-maswe ye ne batile ku bulaya bo mahe ne i tahisize kuli Muzwale Barr ya naa sa li mutangana ka nako yeo a nahanisise ka za mulelo wa bupilo. Ka silimo sa 1929 a ineela ku Jehova, mi ka 1934 a bonisa buineelo bwa hae ka ku kolobezwa. Ka silimo sa 1939 a ba yo muñwi wa silama sa lubasi lwa Betele mwa London, ili mwa naha ya England. Mi fo ki fona fa naa kaliselize sebelezo ya nako kaufela ya naa ezize ka lilimo ze 71.

La 29 October, 1960, Muzwale Barr a iswala bulikani bwa naa talusize kuli ne li “bo bu butokwa hahulu” ha nyalana ni Kaizeli Mildred Willett, ya naa sebelize ka nako ye telele sina paina ni mulumiwa ya tukufalezwi. Bo Barr ni bakubona ne ba zibwa ka mutala wa bona o munde wa ku sepahala ni ku ifana, mi ne ba zwezipili cwalo ku fitela bo Mildred ba feza sebelezo ya bona ya fa lifasi mwa October ka 2004. Bo Barr ni bakubona ne ba balanga hamoho Bibele ka zazi ni zazi mwa bupilo bwa bona kaufela.

Batu be ne ba ziba Muzwale Barr ba ka mu hupulanga kuli ne li muuna ya naa fanga likelezo ze nde, ze musa, ni ze tomile fa Mañolo. Naa belekanga ka taata mi naa li muokameli ya musa ni ya lilato ni mulikani ya sepahala. Likalabo za hae, lingambolo za naa fanga, ni litapelo za naa lapelanga ne li bonisa kuli naa lata niti ni kuli naa na ni bulikani bo bu tiile ni Jehova.

Nihaike kuli muzwale wa luna Barr lu ka mu tonda hahulu, lu tabile hamoho ni yena kuli u amuhezi mpo ya ku sa shwa—ili tohonolo ya naa libelezi ni ku bulelanga ka za yona hañata. Ki mpo ya naa nyolelwanga hahulu.—1 Makor. 15:53, 54. *

[Litaluso za kwatasi]