Tawala ya Mulibeleli ya Sikuwa se si Nolofalizwe

LU BA ba tabile ku kalisa ku hatisa Tawala ya Mulibeleli ya pili ya Sikuwa se si nolofalizwe. Hatiso ye nca ye i ka hatiswa ka silimo si li siñwi mi haiba i bonahala kuli ya tusa, i ka zwelapili ku hatiswanga. I ka lumelwanga kwa liputeho hamoho ni hatiso ya kamita ye itutiwanga.

Ki kwa butokwa kuli mañi ni mañi a utwisise litaba ze lu itutanga mwa Tawala ya Mulibeleli ka sunda ni sunda. Libaka kikuli “mutanga ya sepahala, ya na ni kutwisiso” u itusisa hahulu Tuto ya Tawala ya Mulibeleli kuli a lute batu ba Mulimu kacenu. (Mat. 24:45) Kono ki kabakalañi Tawala ya Mulibeleli ya Sikuwa se si nolofalizwe ha i tokwahala?

Mizwale ni likaizeli ba luna ba bañata mwa lifasi ba yanga kwa mikopano ya puteho ya Sikuwa kono ha ba utwisisangi hande Sikuwa se si itusiswa mwa Tawala ya Mulibeleli. Ku na ni mabaka a sikai ha ku li cwalo. Ka mutala, Sikuwa si itusiswa mwa linaha ze ñata za mwa Africa, mwa Asia, ni mwa South Pacific. Mizwale ba luna ba ba mwa libaka zeo ba itusisanga Sikuwa kwa mikopano ni ha ba kutaza, kono ba bulelanga lipuo li sili ha ba li kwa mandu a bona. Hape, Sikuwa se si bulelwa mwa linaha zeo sa shutana ni Sikuwa se si itusiswa mwa hatiso ya kamita ya Tawala ya Mulibeleli. Mizwale ni likaizeli ba bañwi ba ba balehezi mwa linaha li sili ba kona feela ku yanga kwa mikopano ya Sikuwa. Kono ku taata kuli ba utwisise Tawala ya Mulibeleli kakuli Sikuwa haki yona puo ya bona. Banana ba bañwi ba ba bulela puo ya Sikuwa ba fumananga taata ku utwisisa Tawala ya Mulibeleli. Magazini ya Sikuwa se si nolofalizwe i ka tusa mizwale ni likaizeli ba bañata mwa lifasi kuli ba utwisisange Tuto ya Tawala ya Mulibeleli.

Nihaike kuli magazini ye i ka itusisanga Sikuwa se si bunolo ku fita se si mwa magazini ya kamita, bubeli bwa zona li ka luta lituto ze swana za mwa Bibele. Kaufelaa zona li ka ba ni palo ye swana ya maparagilafu, mi li ka banga ni lipuzo, maswaniso, ni lipuzo za lundululo. Kacwalo, mutu ni mutu u ka iketela magazini ya bata ku itusisa ka nako ya Tuto ya Tawala ya Mulibeleli. Mu bone mutala o kwatasi o zwa mwa paragilafu ya 2 ya taba ya pili ye ka itutiwa mwa magazini ye, ili o bonisa shutano ya mwa beezwi manzwi mwa hatiso ya Sikuwa ya kamita ni ya Sikuwa se si nolofalizwe.

Lu na ni sepo ya kuli magazini ya Sikuwa se si nolofalizwe i ka tusa mizwale ni likaizeli ni banana ku itukisezanga hande Tuto ya Tawala ya Mulibeleli ka sunda ni sunda. Jehova wa lata kopano ya “banabahabo” luna, mi lwa itumela ku yena kakuli u itusisa “mutanga ya sepahala, ya na ni kutwisiso” ku lu fa ze lu tokwa ka nako ye lukela.—1 Pit. 2:17.

Sitopa se si Etelela sa Lipaki za Jehova