Kana Mwa Hupula?

Kana mu balile ka tokomelo limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze tatama:

• Ki lika mañi za butokwa ze taalu ze kona ku lu tusa ku ambuka mukwa wa ku sa sepahala?

Ki ze: (1) Mu be ni sabo ya ku saba Mulimu. (1 Pit. 3:12) (2) Mu be ni lizwalo le li lutilwe ki Bibele. (3) Mu ikataze ku kolwa ka se mu na ni sona.—4/15, makepe 6-7.

• Lu ziba cwañi kuli ku sebeleza Mulimu ku si na likesha ha ku talusi kuli lu swanela ku sosobana fa pata ka nako kaufela kamba ku ambuka ku itabisa?

Lwa kona ku ituta kwa mutala wa Jesu. Naa ikolanga ku ca lico ni batu ba bañwi. Lwa ziba kuli Jesu naa lata ku eza silikani ni ba bañwi. Batu ba bañwi mane ni banana ne ba sutelelanga ku yena mi ne ba tabelanga ku ba ni yena.—4/15, likepe la 10.

• “Tifo” ye bulezwi mwa liñolo la Jobo 33:24 ki nto mañi mi Jobo naa tusizwe cwañi ki yona?

Linzwi le li itusisizwe fa la “tifo,” kamba “tiululo,” li talusa “ku kwahela.” Mwa muinelo wa Jobo, tiululo ne i kona ku ba sitabelo sa folofolo, ili ya naa ka amuhela Jehova kuli a kwahele, kamba ku swalela mafosisa a Jobo. Ku bonahala kuli Jehova naa amuhezi tiululo ye ne zwa ku Jobo, ilikuli i kwahele mafosisa a hae ni ku kwalula nzila ya kuli Mulimu a mu folise ni ku mu fa mupuzo. (Jobo 1:5; 42:12-17)—7/1, likepe la 11.

• Kota ya olive ye bulezwi mwa Maroma kauhanyo ya 11 i swanisezañi?

Kota ya olive i talusa ka za kalulo ya bubeli ya lusika lwa Abrahama, ili Isilaele wa kwa moya. Jehova u swana sina nonge ya kota ya olive yeo ya swanisezo mi Jesu u swana sina lisina la yona. Majuda ba bañata ha ne ba hanile Jesu, Balicaba ba ne ba bile balumeli ne ba konwa ku shangelwa ku yona, ilikuli palo kaufela ya kalulo ya bubeli ya lusika lwa Abrahama i kwane.—5/15, makepe 22-25.

• Lu ziba cwañi kuli Gehena haki sibaka sa tukufazo ya mulilo?

Taba ya ku cisa batu ba ba pila ya nyenyisa ku Jehova. (Jer. 7:31) Ku tuha fo, taba ya ku tukufaza bafu ya lwanisana ni butu bwa Mulimu ya lilato mi hape ya lwanisana ni tuto ya mwa Bibele ya kuli ba ba shwile “ha ba na se ba ziba.” (Muek. 9:5, 10)—7/1, likepe la 15.

• Jehova u nga cwañi batu “ba ba na ni pilu ye lobehile” ni “ba ba ikutwa ku swaba mwa moya wa bona”? (Samu 34:18)

Sina mushemi ya lilato ya babalela ni ku omba-omba mwanaa hae ya mwa butata, Jehova u fakaufi ni balapeli ba hae ba ba kupa tuso ku yena. Jehova u nyolelwa ku omba-omba ni ku folisa lipilu za bona ze lobehile ni moya wa bona wo mwa maswabi. Wa kona ku ba fa butali ni maata a tokwahala kuli ba tiyele butata kaufela bo ba kona ku kopana ni bona. (2 Makor. 4:7; Jak. 1:5)—7/1, likepe la 23.

• Kana batu ba ba petehile ba ne ba ka simuluha ku Jesu ne ba ka be ba bile kalulo ya tifo ye liulula?

Batili. Nihaike kuli Jesu naa kona ku tahisa lusika lwa batu ba bañata-ñata ba ba petehile, batu bao ne ba si ke ba ba kalulo ya tifo ye liulula. Bupilo bo bu petehile bwa Jesu ki bona feela bo ne bu likanelezi ni bwa Adama. (1 Tim. 2:6)—6/15, likepe la 13.

• Bakreste ba kona ku bonisa cwañi kuli ba mamela temuso ye bulela za baluti ba buhata ye ñozwi kwa Likezo 20:29, 30?

Ha ba amuheli baluti ba buhata mwa mandu a bona kamba ku ba lumelisa. (Maro. 16:17; 2 Joa. 9-11) Bakreste ha ba swaneli ku bala libuka za bakwenuheli, ku ba buha fa mazimumwangala, ni ku bala ze ba ñola fa Intaneti.—7/15, makepe 15-16.

• Ka ku ya ka likande le li kwa Luka 10:40-42, ki lifi libaka le lituna ha lu swanela ku swalisana ni balumeli ka luna?

Lu swalisana ni balumeli sina luna, isiñi ka mulelo wa ku ba fa kamba ku fiwa lico ze tula hahulu, kono kuli lu susuezane ni ku fanana limpo za kwa moya. (Maro. 1:11, 12) Ka linako ze cwalo ha mu nze mu tiisana, mu ka tokwa feela lico ze likani.—7/1, makepe 29-30.