Lipuzo ze Zwa Kwa Babali

Lu swanela ku utwisisa cwañi lipalo ze mwa piho ya silimo sa sebelezo?

Ka silimo ni silimo, piho ya musebezi wa ku kutaza ya hatiswanga mwa Yearbook ni mwa Bukombwa Bwa Luna Bwa Mubuso bwa February. Lwa nyakalalanga ha lu bala ze ba eza batu ba Jehova mwa lifasi lote ha ba nze ba kutaza Mubuso wa Mulimu ni ku luta ba bañwi ka za ona. Kono lu tokwa ku ziba ze li talusa lipalo ni litaba ze bulelwanga mwa piho kuli lu i utwisise hande. Ki ye mitala i sikai.

Silimo sa sebelezo. Silimo sa sebelezo si kalisanga mwa September ku isa mwa August. Piho i banga ya silimo sa sebelezo se si sa zo fela. Kamukwaocwalo, mwa Bukombwa Bwa Luna Bwa Mubuso bwa February 2011 ku na ni piho ya silimo sa sebelezo sa 2010, se ne si kalile la 1 September, 2009, ku isa la 31 August, 2010.

Palo ya bahasanyi ni avareji ya bahasanyi. “Bahasanyi” ki Lipaki ze kolobelizwe hamoho ni ba bañwi ba ba lumelelizwe ku kutaza taba ye nde ya Mubuso. “Palo ya bahasanyi” i ngiwanga mwa kweli ya mwa silimo sa sebelezo ye na ni palo ye tuna ka ku fitisisa ya bahasanyi ba ne ba bihile, mi i kona ku kopanyeleza lipiho ze ne liyehile za kweli ye felile. Kamukwaocwalo, bahasanyi ba bañwi ba konwa ku baliwa habeli. Kono palo yeo ha i kopanyelezi palo ya bahasanyi ba ne ba kutalize kono ili ba ne ba libezi ku biha. Taba yeo i bonisa kuli ki kwa butokwa kuli muhasanyi ni muhasanyi a bihange ka bunako ka kweli ni kweli. “Avareji ya bahasanyi” ki palo hamoho ya lipiho za bahasanyi za likweli ze 12 ili ye aluzwi ka 12.

Palo hamoho ya lihora. Ka ku ya ka Yearbook ya 2011, Lipaki za Jehova ne ba tandile lihora ze fitelela 1.6 bilioni mwa musebezi wa ku kutaza. Kono palo yeo ha i kopanyelezi nako kaufela ye lu itusisanga mwa bulapeli bwa luna ku Jehova. Ka mutala, ha i kopanyelezi nako ye ba itusisanga maeluda ku lisa mutapi, ni nako ye lu itusisanga ha lu li kwa mikopano, ha lu ituta Bibele, ni ha lu kengeyela ze lu itutile.

Mali a itusisizwe. Mwahalaa silimo sa sebelezo sa 2010, Lipaki za Jehova ba itusisize mali a fitelela madola a eza 155 milioni ku babalela mapaina ba ba ipitezi, balumiwa, ni baokameli ba maeto. Kono mali ao ha kopanyelezi mali a tokwahala kuli ku hatiswe Libibele, libuka, ni limagazini, ni mali a itusiswanga kwa ku babalela baitateli ba ba sebeleza fa mahae a Betele mwahalaa lifasi lote.

Baci ba fa Kupuzo. Ye ki palo ya ba ba kolobelizwe kaufela ba ba canga kwa sinkwa ni ku nwa kwa veine fa Kupuzo. Kono haki kuli yeo ki yona palo luli ya batoziwa ba ba li fa lifasi. Ka mutala, ba bañwi ba kona ku nahana ka mafosisa kuli ba ka ya kwa lihalimu kabakala tumelo ye ne ba na ni yona sapili kamba kabakala ku sa iketa hande mwa munahano. Kamukwaocwalo, ha lu koni ku ziba palo luli ya batoziwa ba ba li teñi fa lifasi, mi ha lu tokwi ku i ziba. Sitopa se si Etelela ha si na mukoloko wa mabizo a batu kaufela ba ba canga sinkwa ni ku nwa veine fa Kupuzo. *

Se lu ziba kikuli ba bañwi kwa “batanga ba Mulimu wa luna” ba ba tozizwe ba ka ba teñi fa lifasi muta ñalelwa ye tuna i kalisa. (Sin. 7:1-3) Ha ba sa li fa lifasi, batoziwa ba sebeza ka taata mwa musebezi wa ku kutaza ni ku luta batu. Piho ya silimo i bonisa ze ba eza batu ba Jehova mwa musebezi wa butokwa hahulu wo.

[Litaluso za kwatasi]