Mukopano O si ke wa Libalwa

“MUKOPANO wo ha se u felile, mu ka li, ‘Wo luli ne li mukopano wa ka silimo wa batu ba Mulimu o si ke wa libalwa!’” Manzwi ao a naa bulezwi ki bo Stephen Lett ba ba mwa Sitopa se si Etelela sa Lipaki za Jehova naa tahisize kuli batu ba bañata ba ne ba putehile ba nyolelwe hahulu mukopano wo. Ne ba putehile fa mukopano wa ka silimo wa bu 126 wa Watch Tower Bible and Tract Society of Pennsylvania, ka la 2 October, 2010. No ezelizwe kwa Ndu ya Mukopano ya Lipaki za Jehova ya mwa Jersey City, mwa sibaka sa New Jersey, ili kwa U.S.A. Ki lifi ze ñwi ze tabisa ze ne bulezwi fa mukopano wo?

Muzwale Lett naa kwaluzi mukopano wo ka ngambolo ye nyangumuna ye ne bulela ka za koloi ya Jehova ya kwa lihalimu ku likana ni mo i taluselizwe mwa buka ya Ezekiele. Koloi ye tuna yeo ili ye kanya i swaniseza kopano ya Jehova ye zamaiswa ki yena. Kalulo ya kwa lihalimu ya kopano yeo, ili ya libupiwa za moya, i zamaya ka lubilo lo lu komokisa. Ka mubulelelo o muñwi, i zamaya ka lubilo lwa lata Jehova kuli i zamaye ka lona, ku likana ni mwa naa bulelezi Muzwale Lett. Kalulo ya fa lifasi ya kopano ya Jehova Mulimu ni yona i sweli ya zamaya. Muzwale Lett naa bulezi ka za licinceho ze nde ze ezahezi mwa kalulo ya fa lifasi ya kopano ya Mulimu halaa lilimo za kwamulahonyana.

Ka mutala, mitai ya mwa linaha ze ñwi i sweli ku kopanyiwa hamoho. Nto yeo i ka konisa baitateli ba bañata ba ne ba sebeleza ba mahae a Betele mwa linaha zeo kuli ba ise hahulu pilu kwa musebezi wa ku kutaza. Muzwale Lett naa kupile bateelezi kuli ba tundamene ku lapelela Sitopa se si Etelela se si yemela sitopa sa mutanga, kuli si zwelepili ku sepahala ni ku ba ni kutwisiso.—Mat. 24:45-47.

Lipiho ni Lipuisano ze Susueza

Bo Tab Honsberger, ba ba mwa Katengo ka Mutai ka mwa Haiti, ne ba file piho ye tomohisa pilu ya ze ne ezahezi hamulaho wa zikinyeho ye ne bile teñi la 12 January, 2010, ye ne bulaile batu ba 300,000 mwa naha yeo, ka ku ya ka lipiho ze ñwi. Ne ba talusize kuli, baeteleli ba bulapeli ne ba bulelela batu kuli batu ba ne ba shwile bao ne ba otilwe ki Mulimu kabakala ku tokwa tumelo kwa bona mi naa silelelize batu ba bande. Kono likebenga ze ñata ze ne tamilwe ne li lukuluhile kakuli mamota a tolongo naa wisizwe ki zikinyeho. Hakulicwalo, batu ba bañata mwa Haiti ba omba-ombiwa ha ba nze ba ituta niti ka za libaka linako ze lu pila ku zona ha li li ze taata. Muzwale Honsberger naa bulezi manzwi a naa bulezwi ki muzwale ya naa shwezwi ki musalaa hae mwa kozi yeo, a li: “Ni la kacenu le ni sa lotisa mioko. Ha ni zibi kuli ni ka nga nako ye kuma kai inze ni sa lila,  kono ni tabile kabakala lilato le ni boniswa ki kopano ya Jehova. Ni na ni sepo, mi ni ka tusa ba bañwi kuli ni bona ba be ni sepo yeo.”

Bo Mark Sanderson, ba ba sebeleza fa Betele ya kwa Brooklyn ka nako ya cwale, ne ba file piho ya za naha ya Philippines. Ne ba banga mwa Katengo ka Mutai mwa naha yeo. Ne ba bulezi ka tabo ka za kekezeho ye tuna ya palo ya bahasanyi ba Mubuso ni ka za palo ya baituti ba Bibele ye fitelela hahulu palo ya bahasanyi. Mi ne ba bulezi ka za muzwale wa libizo la Miguel ili yo muikulyae naa bulailwe. Bo Miguel ne ba ikatalize ku isa mubulai kwa kuta ni ku mu tamisa. Hasamulaho, bo Miguel ba kopana ni mubulai yo ha ne ba nze ba kutaleza mwa tolongo. Bo Miguel niha ne ba saba-saba, ba ambola ni yena ka musa. Hamulaho wa nako, ba ituta ni yena niti, a i amuhela mi a kalisa ku lata Jehova. Ka nako ya cwale u kolobelizwe. Bo Miguel ki balikani ba hae ba batuna mi ba ikataza ku mu tusa kuli a lukululwe kapili mwa tolongo. *

Ku tuha fo, bo Mark Noumair, ba ba li baluti mwa Liluko le li Okamela Likolo za Bibele za Kwa Patterson, ba buisana ni mizwale ba balaalu hamoho ni bakubona—ili bo Alex Reinmueller ni bakubona bo Sarah, bo David Schafer ni bakubona bo Krista, ni bo Robert Ciranko ni bakubona bo Ketra. Bo Alex Reinmueller, ba ba li batusi ba Katengo ka Bahatisi, ne ba kandekile mo ne ba tiiselize bulikani bwa bona ni Jehova ha ne ba eza bupaina mwa Canada inze ba na ni lilimo ze 15 za buhulu. Hañata ne ba kutazanga ba nosi. Bo Reinmueller ha ne ba buzizwe kuli ki bo mañi ba ne ba ba susuelize hahulu fa Betele, ne ba bulezi mizwale ba balaalu ba ba sepahala. Ne ba bulezi yo muñwi ni yo muñwi mwa naa ba tuselize ku tiya mwa bulikani bwa bona ni Jehova. Bakubona, bo Sarah, ne ba bulezi ka za bulikani bwa bona ni kaizeli yo muñwi ya naa itiisize ka lilimo-limo ha naa tamezwi mwa litolongo za mwa China kabakala tumelo ya hae. Bo Sarah ne ba bulezi kuli ba itutile ku sepa Jehova ka ku itapelelanga.

Bo David Schafer, ba ba li batusi ba Katengo ka Tuto, ne ba babalize bo maa bona kabakala tumelo ya bona ye tiile mi ne ba kandekile za mizwale ba ne ba lemanga likota za mabala ili ba ne ba ba tusize ku eza bupaina bwa ku tusa ha ne ba li banana. Bakubona, bo Krista, bona ne ba bulezi kuli ne ba susumelizwe ki lilama za lubasi lwa Betele ba ba belekile nako ye telele ili ba ne ba “sepahala ku ze nyinyani,” ka ku ya ka manzwi a Jesu.—Luka 16:10.

Bo Robert Ciranko, ba ba li batusi ba Katengo ka Bañoli, ne ba kandekile ka za bo kukwaa bona ba bane, ba ne ba zwa kwa naha ya Hungary ili ba ne ba li Bakreste ba ba tozizwe. Ha ne  ba sa li mitangana, ne ba tabelanga ha ne ba fumanehanga kwa mikopano ye mituna mwa lilimo za ma 1950 mi ne ba zibile kuli kopano ya Jehova ne li ye tuna hahulu ku fita puteho ya habo bona. Bakubona, bo Ketra, ne ba talusize ka za mo ne ba itutezi ku ba ni busepahali ha ne ba li mapaina mwa puteho ye ne na ni bakwenuheli ni butata bo buñwi. Ne ba itiisize mi hasamulaho ba lumelwa ku yo ba mapaina ba ba ipitezi mwa puteho ye ñwi mo ne ku na ni swalisano ye ne ba susumelize hahulu.

Ku zwa fo, bo Manfred Tonak ba fa piho ya za naha ya Ethiopia. Naha yeo ne i li teñi mwa linako ze bulezwi mwa Bibele mi ka nako ya cwale i na ni bahasanyi ba ba fitelela 9,000 ba ba kutaza taba ye nde. Ba bañata ku bona ba pila mwa muleneñi o mutuna wa Addis Ababa kamba bukaufi ni ona. Kamukwaocwalo, ku tokwahala hahulu bahasanyi mwa libaka za mwa matakanyani. Mi kabakaleo, Lipaki ba kwa Ethiopia ba ba pila mwa linaha li sili ne ba memilwe kuli ba yo pota ilikuli ba yo kutaleza mwa libaka ze ñwi za mwa matakanyani za mwa naha yeo. Ba bañata ne ba ile. Ba susueza Lipaki ba kwateñi mi ba yo fumana batu ba ne ba tabela ku teeleza kwa taba ye nde.

Kalulo ye ne ipitezi fa mukopano wo ne li lingambolo za ka ku tatamana ze ne bulela ka za Lipaki za Jehova ba mwa Russia ni mizeko ya bona. Bo Aulis Bergdahl ba ba li mwa Katengo ka Mutai wa mwa Russia, ne ba bulezi ka za mo ne ba kalezi ku nyandisezwa Lipaki mwa Russia, sihulu mwa Moscow. Bo Philip Brumley ba ba mwa Liluko le li Talima Litaba za Mulao kwa mutai wa United States, ne ba kandekile ka za likatulo ze tabisa ze ezizwe mwa likwelinyana ze felile muta Kuta ya Mwa Europe ye Talima Litaba ze Ama Liswanelo za Sicaba (ECHR) ne i nyakile litaba ze 9 ze ne ba tamilikelizwe Lipaki. Ba Kuta yeo ne ba fumani kuli litaba ze 9 zeo kaufela ne li za buhata, mi mane ne ba ikatalize ku tolongosha libaka bupaki bo buñwi ha ne bu li bwa buhata. Nihaike kuli lu sa libelela ku bona ze ka ezahala, Muzwale Brumley naa bulezi ka za mo katulo ya Kuta yeo i kona ku amela mizeko ya mwa linaha ze ñwi.

Zibiso ye tabisa yeo ha se i filwe, Muzwale Lett a zibisa kuli ba kuta ya ECHR ne ba lumezi ku talima taba ya za mutelo ye ngile nako ye telele ili ye ama muuso wa France ni Lipaki za Jehova. Kuta yeo ye kutekiwa hahulu i lumelanga ku talima litaba ze nyinyani feela kwa litaba ze tiswanga ku yona. Ka nako ya cwale, kuta ya ECHR se i talimile litaba ze 39 ze ama Lipaki za Jehova, mi lu winile kwateñi ze 37. Muzwale Lett naa susuelize batu ba Mulimu kaufela kuli ba lapele ku Jehova Mulimu ka za taba ye swelwi ku talimwa cwale.

 Piho ya mafelelezo ne i filwe ki bo Richard Morlan, ba ba li baluti ba Sikolo sa Baana-Bahulu ba Puteho. Ne ba bulezi ka tabo ka za sikolo seo ni ka mo ba itebuhela sona maeluda ba ba se ba si keni.

Lingambolo ze Ñwi ze ne Filwe ki ba ba Mwa Sitopa se si Etelela

Bo Guy Pierce ba ba mwa Sitopa se si Etelela ne ba file ngambolo ye nde ye ne bulela ka za liñolo la silimo sa 2011, le li li: ‘Libizo la Jehova li be masabelo a mina.’ (Zef. 3:12, NW) Ne ba ize nihaike kuli ye ki nako ye tabisa kwa batu ba Jehova, kono hape ki nako ye lu sa tokwi ku eza lika ka likesha. Lizazi le lituna la Jehova li fakaufi. Kono batu ba zwelapili ku bata masabelo mwa bulapeli bwa buhata, likopano za litaba za naha, bufumu, ni ze ñwi cwalo. Kuli lu fumane masabelo a luli, lu tokwa ku biza libizo la Jehova ka ku li ziba, ku li kuteka, ni ku sepa Muñaa lona, ni ku mu lata ka lika kaufela ze lu na ni zona.

Ku zwa fo, bo David Splane ba ba mwa Sitopa se si Etelela ne ba file ngambolo ye nyangumuna ye ne na ni toho ya taba ye li “Kana mu Keni Mwa Pumulo ya Mulimu?” Ne ba bulezi kuli pumulo ya Mulimu ha i talusi ku sa sebeza, kakuli Jehova ni Mwanaa hae ba zwezipili ku “sebeza ku fitela cwale” halaa lizazi la pumulo la swanisezo ilikuli ba pete mulelo wa Mulimu o ama lifasi. (Joa. 5:17) Kono cwale lu kona ku kena cwañi mwa pumulo ya Mulimu? Ha lu tokwi feela ku tuhela sibi ni misebezi ya ku ipatela ku luka kwa luna bañi. Kono hape lu swanela ku bonisa tumelo ni ku ikataza ku pila ka ku lumelelana ni mulelo wa Mulimu. Fokuñwi ku taata ku eza cwalo, kono lu tokwa ku mamela likelezo ni ku latelela zamaiso ye lu fiwa ki kopano ya Jehova. Muzwale Splane naa kupile bateelezi kuli ba eze ka mo ba konela kaufela kuli ba kene mwa pumulo ya Mulimu.

Ngambolo ya mafelelezo ye ne filwe ki bo Anthony Morris ba ba mwa Sitopa se si Etelela, ne i na ni toho ya taba ye li “Ki Lika Mañi ze lu Libelezi?” Muzwale Morris naa bulezi ka mafulofulo ni ka musa ku hupuza bateelezi ka za bupolofita bo bu tuha bu talelezwa, bo ba libelezi ku bona batu kaufela ba ba sepahala. Bo buñwi bwa bupolofita bo ki muhuwo wa “Kozo ni buiketo!” ni ku sinyiwa kwa bulapeli bwa buhata. (1 Mates. 5:2, 3; Sin. 17:15-17) Muzwale Morris naa lemusize kuli ha lu swaneli ku bulela kuli, “Ye ki yona Armagedoni,” ha lu utwa makande a ze ezahala ze sa talelezi bupolofita bo bu cwalo. Naa bulezi kuli lu tokwa ku ba ni moya wa ku libelela ka tabo ni ka pilu-telele o bulezwi kwa Mika 7:7. Mi naa susuelize bote kuli ba swalisane hahulu ni Sitopa se si Etelela, sina mo ba swalisanelanga masole ha ba ya kwa ndwa. Naa ize: “Lipilu za mina li tiye, mina kaufela ba ba sepile [“ba ba libelezi,” NW] Muñaa Bupilo.”—Samu 31:24.

Kwa mafelelezo a mukopano, ne ku filwe lizibiso ze tabisa ili za butokwa. Bo Geoffrey Jackson ba ba mwa Sitopa se si Etelela ne ba zibisize kuli ku ka ba ni Tawala ya Mulibeleli ya Sikuwa se si nolofalizwe kuli ku bonwe nji i ka tusa batu ba sa zibi hande Sikuwa. Hamulaho, bo Stephen Lett ba zibisa kuli Sitopa se si Etelela si ka lukisa kuli baokameli ba likiliti ni basali ba bona mwa United States ba lisiwange. Hape ba zibisa kuli ku zwa cwale Sikolo sa Tuto ya Bukombwa si ka biziwanga kuli Sikolo sa Bibele sa Mizwale ba Makwasha. Ku zwa fo, ba zibisa kuli ku ka ba ni sikolo se sinca se si bizwa Sikolo sa Bibele sa Bakreste ba ba Nyalani. Sikolo seo si ka luta batu ba ba nyalani kuli ba konwe ku itusiswa hahulu mwa kopano ya Jehova. Muzwale Lett hape naa zibisize kuli Sikolo sa Baokameli ba Maeto ni Basali ba Bona ni Sikolo sa Mizwale ba Mwa Tutengo Twa Mitai ni Basali ba Bona si ka eziwanga habeli ka silimo kwa Patterson, mi ku lukisizwe kuli ba ba keni kale likolo zeo ba li kene lwa bubeli.

Mukopano wo, no unguzwi ka tapelo ye susumeza ye ne filwe ki Muzwale John E. Barr wa lilimo ze 97, ya bile mwa Sitopa se si Etelela ka lilimo ze ñata. * Mukopano ha ne u felile, mañi ni mañi naa ikutwile kuli wo luli ne li mukopano o si ke wa libalwa.

[Litaluso za kwatasi]

[Manzwi a fa likepe 19]

Bateelezi kaufela ne ba ikozi lipuisano

[Manzwi a fa likepe 20]

Jehova u fuyozi musebezi wa ku kutaza mwa Ethiopia