Kana Mwa Lumeleza Jehova Ku Ba Sanda Sa Mina?

“Mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.”—MAT. 6:33.

1, 2. (a) Ki mañi “Isilaele wa Mulimu” ya bulezwi kwa Magalata 6:16? (b) “Masika a Isilaele a lishumi ka a mabeli” a bulezwi kwa Mateu 19:28 a yemela bo mañi?

HA MU bala libizo la Isilaele mwa Bibele, mu hupulangañi? Kana mu hupulanga Jakobo mwanaa Isaka, ya naa bizizwe Isilaele hasamulaho? Kamba kana mu nahananga ka za baikulu ba hae, ili sicaba sa Isilaele? Bibele hape i bulela ka za Isilaele wa kwa moya, kamba “Isilaele wa Mulimu,” ili batu ba 144,000 ba ba tozizwe ka moya o kenile kuli ba be malena ni baprisita mwa lihalimu. (Magal. 6:16; Sin. 7:4; 21:12) Kono ku na ni muitusisezo o muñwi wa libizo la Isilaele o lu bala kwa Mateu 19:28.

² Jesu naa ize: “Linto, nako ye li ka ezwa sinca, mi Mwanaa mutu a ina fa lubona lwa kanya ya hae, mina be mu ni latelezi, mu ka ina ni mina fa mabona a lishumi ka a mabeli, mu atule masika a Isilaele a lishumi ka a mabeli.” Mwa timana ye, “masika a Isilaele a lishumi ka a mabeli” ki batu ba ba ka fiwa bupilo bo bu sa feli mwa Paradaisi fa lifasi. Ba 144,000 ba ka ba baatuli ni baprisita ba bona.

3, 4. Batoziwa ba ba sepahala ba tomile mutala ufi o munde?

³ Ka ku swana sina baprisita ni Malivi ba  kwaikale, batoziwa kacenu ba nga musebezi wa bona kuli ki wa butokwa hahulu. (Num. 18:20) Batoziwa ha ba libeleli kuli ba ka fiwa kalulo ye ñwi fa lifasi sina sanda. Kono ka ku ya ka liñolo la Sinulo 4:10, 11, ba ka zwelapili ku sebeleza Jehova mwa lihalimu ko ba ka yo ba malena ni baprisita hamoho ni Jesu Kreste.—Ezek. 44:28.

⁴ Batoziwa ha ba nze ba li fa lifasi, ba pila ka mukwa o bonisa kuli Jehova ki yena sanda sa bona. Nto ya butokwa hahulu ku bona ki ku sebeleza Mulimu. Ba bonisa tumelo mwa sitabelo sa Kreste se si liulula mi ba mu latelela kamita. Ha ba eza cwalo ba “tiisa ku bizwa ni ku ketwa” kwa bona. (2 Pit. 1:10) Ba na ni buikoneli bo bu shutana-shutana mi miinelo ye ba li ku yona ha i swani. Kono ha ba tuheleli mifokolo ya bona ku ba palelwisa ku eza ze ñata mwa sebelezo ya Mulimu. Ba sebeleza Mulimu ka mo ba konela kaufela. Mi ba tomela batu ba ba na ni sepo ya ku pila fa lifasi mwa Paradaisi mutala o munde.

5. Bakreste kaufela ba tokwa ku ezañi kuli Jehova a be sanda sa bona, mi ki kabakalañi ku eza cwalo ha ku kona ku ba bela taata?

⁵ Ibe kuli lu na ni sepo ya ku pila kwa lihalimu kamba fa lifasi, lu swanela ku ‘itoboha ni ku lwala kota ya luna ya linyando ni ku zwelapili ku latelela Kreste.’ (Mat. 16:24, NW) Batu ba bañata-ñata ba ba nyolezwi ku pila fa lifasi mwa Paradaisi ba lapela Mulimu ni ku latelela Kreste ka mukwa wo. Ha ba ezi ze nyinyani mwa sebelezo ya Mulimu inze ba ziba kuli ba kona ku eza ze ñata. Ba bañata ba nolofalize mupilelo wa bona mi ba bile mapaina ba kamita. Ba bañwi ba ezanga bupaina ka likweli li sikai ka silimo ni silimo. Mi ba bañwi ba ba sa koni ku eza bupaina ba ikatazanga ku eza ze ba kona mwa bukombwa. Ba swana sina Maria ya naa selile Jesu oli. Jesu naa ize: “U ni ezelize kezo ye nde. . . . U ezize mwa konezi kaufela.” (Mare. 14:6-8) Haki ko ku bunolo ku eza ka mo lu konela kaufela kakuli lu pila mwa lifasi le li busiwa ki Satani. Kono lu swanela ku sebeza ka taata ni ku sepa Jehova. Ha lu nyakisiseñi linzila zee ne ze lu kona ku eza cwalo ka zona.

Mu Bate Pili Mubuso wa Mulimu

6. (a) Batu ba lifasi ba bonisa cwañi kuli sanda sa bona ki sa mwa bupilo bwa cwale feela? (b) Ki kabakalañi ha lu swanela ku likanyisa Davida?

⁶ Jesu naa lutile balutiwa ba hae kuli ba bate pili Mubuso ni ku luka kwa Mulimu. Batu ba lifasi “ba ba lata za mwa bupilo bo feela” hañata ba ipatelanga za bona feela. (Mu bale Samu 17:1, 13-15.) Batu bao ha ba na taba ni Mubupi. Ba bañata ba lata feela ku ca nala, ku ba ni mabasi, ni ku siyela bana ba bona sanda. Sanda sa bona ki sa mwa bupilo bwa cwale feela. Kono Davida yena naa lata ku ba ni “libizo le linde” ku Jehova. Mwanaa hae Salumoni naa bulezi kuli kaufelaa luna lu swanela ku eza cwalo. (Muek. 7:1) Ka ku swana sina Asafi, Davida naa ziba kuli ku ba mulikanaa Jehova ki yona nto ya butokwa hahulu mwa bupilo. Naa tabezi ku zamaya ni Mulimu. Mwa miteñi ya luna, Bakreste ba bañata ba bonisize kuli ku sebeleza Jehova ki kwa butokwa hahulu ku fita mubeleko wa bona.

7. Muzwale yo muñwi naa fuyozwi cwañi kabakala ku bata pili Mubuso?

⁷ Bo Jean-Claude ba ba pila mwa Central African Republic, ki baana-bahulu mwa puteho ba ba na ni bana ba balaalu. Mwa naha yeo ku taata ku fumana mubeleko mi batu ba kona ku eza mo ba konela kaufela kuli ba bukeleze mubeleko wa bona. Ka zazi le liñwi, muzamaisi wa bona a ba bulelela kuli ba kalise ku belekanga busihu—ku kala ka 18:30 ka zazi ni zazi. Bo Jean-Claude ba mu bulelela kuli ba swanela ku babalela mabasi a bona kono hape ba swanela ku ba tusa ku ba ni bulikani bo bu tiile ni Mulimu. Hape ba bulela kuli ba na ni buikalabelo bwa ku tusa puteho. Muzamaisi yo a ba bulelela kuli: “Ha u na ni  litohonolo la ku ba ni mubeleko u swanela ku libala lika kaufela zo na ni zona, nihaiba musalaa hao, bana ba hao, ni butata bo na ni bona. U swanela ku isa pilu kwa mubeleko feela isiñi kwa nto ifi kamba ifi. Cwale u iketele so bata fa: bulapeli bwa hao kamba mubeleko.” Kambe ki mina, ne mu ka eza cwañi? Bo Jean-Claude ne ba ziba kuli haiba ba latehelwa ki mubeleko wa bona, Mulimu naa ka ba babalela. Ne ba ka zwelapili ku eza ze ñata mwa sebelezo ya Mulimu, mi Jehova naa ka ba tusa ku babalela lubasi lwa bona. Kabakaleo, ba ya kwa mikopano mwa sunda ye ne tatami. Hasamulaho, ba itukiseza ku ya kwa mubeleko nihaike kuli ne ba sa zibi nji ba ka zwelapili ku ba ni mubeleko wa bona. Hona fo feela, ba amuhela luwaile lwa kuli muzamaisi u lunduzwi fa mubeleko, kono bona ne ba zwezipili ku ba ni mubeleko.

8, 9. Lu kona cwañi ku likanyisa baprisita ni Malivi kuli Jehova a be sanda sa luna?

⁸ Mwendi ba bañwi ba ba kile ba ba mwa muinelo o swana ni o ne ba li ku ona bo Jean-Claude, ne ba bilaezi ka za mo ne ba ka babalelela lubasi lwa bona haiba ba zwa musebezi. (1 Tim. 5:8) Ibe kuli nto yeo i mi ezahalezi kamba ha i si ka mi ezahalela, mwa izibela kuli Mulimu ha swabisangi batu ba ba mu nga kuli ki yena sanda sa bona ni ba ba katelwa sebelezo ya hae. Jesu ha naa bulelezi balutiwa ba hae kuli ba zwelepili ku bata pili mubuso, naa ba sepisize kuli Mulimu naa ka ba fa lika ze ñwi kaufela, ze cwale ka za ku ca, za ku nwa, ni za ku apala.—Mat. 6:33.

⁹ Ha mu nahane ka za Malivi ba ne ba si ka fiwa sanda sa naha. Bakeñisa kuli musebezi wa bona ne li wa ku etelela sicaba mwa bulapeli bwa niti, ne ba swanela ku sepa Jehova kuli ne li yena sanda sa bona ni kuli naa ka ba babalela. (Num. 18:20) Niha lu sa sebelezi mwa tempele sina mo ne ba ezezanga baprisita ni Malivi, ni luna lwa kona ku sepa Jehova. Mafelelezo ha nzaa sutelela, lu tokwa hahulu ku sepa Mulimu kuli u ka lu babalela.—Sin. 13:17.

Mu Bate Pili ku Luka Kwa Mulimu

10, 11. Batu ba bañwi ba bonisize cwañi kuli ba sepile Jehova ha ba keta mubeleko? Mu fe mutala.

¹⁰ Jesu hape naa bulelezi balutiwa ba hae kuli ba bate pili ku luka kwa Mulimu. (Mat. 6:33) Ku eza cwalo ku talusa ku ba ni mubonelo wa Jehova wa ze lukile ni ze si ka luka isiñi mubonelo wa batu. (Mu bale Isaya 55:8, 9.) Batu ba bañwi ne ba limanga kamba ku lekisa kwai, ku luta batu ndwa, kamba ku panga ni ku lekisa lilwaniso. Ha se ba itutile niti, ba bañata ba iketela ku cinca mubeleko wa bona ilikuli ba kone ku kolobezwa.—Isa. 2:4; 2 Makor. 7:1; Magal. 5:14.

¹¹ Bo Andrew ki ba bañwi ba batu ba ne ba ezize cwalo. Bona ni basali ba bona ha ne ba itutile ka za Jehova ba iketela ku mu sebeleza. Bo Andrew ne ba lata hahulu musebezi wa bona kono ba u tuhela. Ki kabakalañi? Kakuli ne ba eza musebezi wa busole mi ne ba bata ku eza se si lukile mwa meeto a Mulimu. Bo Andrew ha ne ba tuhezi musebezi, ne ba na ni bana ba babeli ni mali e ne ba ka kona ku ifepa ka ona ka likweli li sikai feela. Ne ku bonahala inge kuli ne ba si na sanda, sina Malivi ha ne ba si na sanda. Ba bata musebezi inze ba sepile Mulimu. Cwale, ha ba hupula nako yani, bo Andrew ni lubasi lwa bona ba kozwi kuli lizoho la Jehova haki le li kuswani. (Isa. 59:1) Bakeñisa kuli ba nolofalize mupilelo wa bona, bo Andrew ni bakubona ba konile ku eza bupaina. Bo Andrew ba li: “Ka linako ze  ñwi ne lu bilaelanga bakeñisa kutokwa masheleñi, ku sa ba hande ni maino, mapongo, ni taba feela ya ku supala. Kono Jehova kamita u bile ni luna. . . . Lu kona ku bulela ku si na kakanyo kuli, ku sebeleza Jehova ki ona musebezi o munde ka ku fitisisa ni wa butokwa hahulu.” *—Muek. 12:13.

12. Ki kalemeno kafi ke lu tokwa ku ba ni kona kuli lu bate pili ku luka kwa Mulimu? Mu fe mitala ya batu ba mwa sibaka se mu pila ku sona.

¹² Jesu naa bulelezi balutiwa ba hae kuli: “Kabe mu na ni tumelo ye likana ni peu ya masitete kwa butuna, niha ne mu ka bulelela lilundu leo, mu li: Zwa kwanu, u tutele mwani, kabe la tuta; mi kabe mu si na se mu sa koni.” (Mat. 17:20) Kana ne mu ka zwelapili ku bata pili ku luka kwa Mulimu niha ne mu ka tahelwa ki butata kabakala ku eza cwalo? Haiba ha mu zibi nji ne mu ka kona ku eza cwalo, mu ikambote ni ba bañwi mwa puteho ka za teñi. Ze ba ka mi taluseza ka za mo Jehova a ba tuselize li ka tiisa tumelo ya mina.

Mu Itumele Kwa Lika za mi fa Jehova

13. Ki sepo ifi ye lu kona ku ba ni yona haiba lu sebeleza Jehova ka taata?

¹³ Haiba mu nga sebelezo ya mina ku Jehova ku ba ya butokwa, mu kolwe kuli u ka mi fa ze mu tokwa kaufela, sina mwa naa fezi Malivi. Ha mu nahane ka za Davida. Niha naa ipatile mwa mukoti, naa na ni buikolwiso bwa kuli Mulimu naa ka mu tusa. Ni luna lwa kona ku sepa Jehova niha ku bonahala kuli ha ku na mutu ya kona ku lu tusa. Mu hupule kuli Asafi ha naa keni “mwa Sibaka se si kenile sa Mulimu,” naa konile ku utwisisa nto ye ne mu kataza. (Samu 73:17) Kamukwaoswana, lu lukela ku sepa Jehova kuli u ka lu fa ze lu tokwa ilikuli lu bukeleze bulikani bwa luna ni yena. Ha lu eza cwalo, lu ka bonisa kuli lu nga sebelezo ya luna ku Jehova ku ba ya butokwa ku si na taba ni muinelo o lu li ku ona. Mi Jehova u ka ba sanda sa luna.

14, 15. Lu swanela ku ezañi ha ku ezwa cinceho ya mo lu utwisiseza mañolo a mañwi, mi ki kabakalañi?

¹⁴ Kana mwa sepanga Jehova ha lu tusa ku utwisisa “ze tungile za Mulimu” ze mwa Bibele? (1 Makor. 2:10-13) Muapositola Pitrosi naa lu tomezi mutala o munde hahulu mwa taba yeo. Jesu naa bulelezi Majuda kuli: “Ha mu sa ci nama ya Mwanaa mutu, mi mu sa nwi mali a hae, bupilo ha bu yo ku mina.” Balutiwa ba bañata ne ba nahana kuli Jesu naa talusa nama luli ni mali a hae mi ba bulela, ba li: “Linzwi le, li taata; ya ka li utwa ki mañi?” Mi “ba kutela mwamulaho.” Kono Pitrosi a li: “Mulena, lu ka ya ku mañi? U na ni manzwi a bupilo bo bu sa feli.”—Joa. 6:53, 60, 66, 68.

¹⁵ Pitrosi naa si ka utwisisa manzwi a Jesu. Kono naa sepile kuli Mulimu naa ka mu tusa ku utwisisa manzwi ao. Ha ku na ni cinceho ya mo lu utwisiseza tuto ya mwa Bibele, kana mwa likanga ku utwisisa mabaka cinceho yeo ha i bile teñi? (Liprov. 4:18) Batu ba mwa Berea ne ba ‘amuhezi Linzwi ka ku li tukufalelwa, mi ba batisisa mwa Mañolo, ka mazazi kaufela.’ (Lik. 17:11) Haiba mu latelela mutala wa bona mu ka katelwa sebelezo ya mina ku Jehova mi mu ka itumela hahulu ku yena ka ku ba sanda sa mina.

Mu Nyalele Feela ku Mulena

16. Bakreste ba ba li makwasha ba kona ku eza cwañi kuli Mulimu a be sanda sa bona ka ku ya ka 1 Makorinte 7:39?

¹⁶ Nzila ye ñwi ye ba kona ku bonisa ka yona Bakreste kuli ba hupula milelo ya Mulimu ki ka ku mamela taelo ya mwa Bibele ya kuli lu ‘nyalele feela ku Mulena.’ (1 Makor. 7:39) Ba bañata ba iketezi ku ba makwasha ku fita ku loba taelo yeo. Mulimu wa babalelanga ba ba utwa taelo yeo. Davida naa ezize cwañi ha naa ikutwile kuli ha ku na ya naa  kona ku mu tusa? Naa ize: “Ni tumusa sililo sa ka fapilaa [Mulimu], ni mu taluseza ku ziyeleha kwa ka . . . pilu ya ka ha i letuka.” (Samu 142:1-3) Jeremia ni yena mwendi naa ikutwanga buinosi. Kono naa zwezipili ku sebeleza Mulimu ka busepahali ka lilimo ze ñata inze a li likwasha.

17. Kaizeli yo muñwi wa likwasha u ezanga cwañi ha ikutwa buinosi?

¹⁷ Kaizeli yo muñwi ya pila mwa United States naa bulezi kuli naa si ka iketela ku ba likwasha. U itakaleza ku nyalwa ha ka fumana mutu ya swanela. Bo mahe ba ba sa lapeli ne ba bata kuli a inyalelwe ki mutu ufi kamba ufi. Kaizeli yo a ba buza nji ne ba ka tabela ku ikalabela haiba linyalo la hae li pala. Kono ha ne ba boni kuli naa na ni mubeleko o munde, naa ipabalela, mi naa tabile, ba tuhela ku mu kataza. Kaizeli yo fokuñwi u ikutwanga buinosi. U li: “Ni ikatazanga ku sepa Jehova. Ha ni yumbi simulamu.” Ki nto mañi ye mu tusize ku sepa Jehova? U alaba kuli: “Tapelo i ni tusa ku sutelela ku Mulimu ni ku lemuha kuli ha ni yo ni nosi. Muambakani ya Pahami wa ni teelezanga, mi kabakaleo ni na ni tabo mi ni ikutwa ku ba wa butokwa.” U kolwa ze i bulela Bibele, ha i li: “Ku na ni mbuyoti mwa ku fana, ye fita ye mwa ku fiwa.” Kamukwaocwalo, u ikatazanga ku tusa ba bañwi a sa libeleli ku fiwa se siñwi. U zwelapili ku bulela kuli: “Ni banga ni tabo ha ni ipuza kuli, ‘Ni kona ku tusa cwañi mutu yo?’” (Lik. 20:35) Jehova ki yena sanda sa hae, mi u tabile ku mu sebeleza.

18. Mu kona cwañi ku ba sanda sa Jehova?

¹⁸ Ku si na taba ni muinelo o mu li ku ona, Jehova wa kona ku ba sanda sa mina. Haiba mu lumeleza Jehova ku ba sanda sa mina, mu ka ba yo muñwi wa batu ba hae ba ba tabile. (2 Makor. 6:16, 17) Mi mwa kona ku ba sanda sa Jehova sina mo ne ba bezi batanga ba hae ba kwamulaho. (Mu bale Deuteronoma 32:9, 10.) Sina sicaba sa Isilaele ha ne si bile sanda sa Mulimu mwahalaa macaba, ni mina wa kona ku mi keta kuli mu be sanda sa hae mi u ka mi babalela.—Samu 17:8.

[Litaluso za kwatasi]

Mu Kona ku Alaba Cwañi?

Mu kona ku lumeleza cwañi Jehova ku ba sanda sa mina

• ka ku bata pili Mubuso wa Mulimu ni ku luka kwa hae?

• ka ku itumela kwa lika za mi fa Jehova?

• ka ku mamela taelo ya Mulimu ya ku nyalela feela ku Mulena?

[Lipuzo za Tuto]

[Manzwi a fa likepe 13]

Jehova u ba sanda sa luna ha lu nga sebelezo ya hae ku ba ya butokwa hahulu

[Siswaniso se si fa likepe 15]

Mutala wa Jeremia wa susueza