Lipuzo ze Zwa Kwa Babali

Ni swanela ku eza cwañi ha ni na ni puzo ye ama nto ye ñwi ye ni balile mwa Bibele kamba ha ni tokwa kelezo ya mwa ku tatululela butata bo ni na ni bona?

Liñolo la Liproverbia 2:1-5 li lu susueza kuli lu zwelipili ku “bata” zibo ni tuto sina mo lu kona ku ezeza ha lu bata “maluo a patilwe.” Taba yeo i lu tusa ku utwisisa kuli lu tokwa ku ikataza ku bata likalabo za lipuzo ze lu na ni zona ze ama litaba za mwa Bibele ni ku lika ku tatulula butata bo lu talimana ni bona. Lu kona ku eza cwañi cwalo?

Kauhanyo ye li “Mwa ku Ezeza Patisiso” ye fa likepe la 33 ku isa ku la 38 mwa buka ya Mu Fumane Tuso kwa Lituto za Sikolo sa Bukombwa sa Teokratiki, i talusa mo lu kona ku fumanela likalabo za lipuzo ze lu na ni zona ka ku itusisa lihatiso za lu fa “mutanga ya sepahala, ya na ni kutwisiso.” (Mat. 24:45) Litaba ze fa likepe la 36, li bonisa mo lu kona ku itusiseza buka ya Watch Tower Publications Index, ye na ni mukoloko wa litaba ni wa mañolo. Haiba lu na ni puzo ka za linzwi le liñwi kamba timana ye ñwi ya mwa Bibele, lwa kona ku bata linzwi leo kamba timana yeo mwa Index, mi yona i ka bonisa lihatiso mo lu kona ku fumana kalabo. Mu ka tokwa ku ba ni pilu-telele ha mu nze mu bata kalabo ya puzo ya mina. Mu hupule kuli mu bata “maluo a patilwe.” Ku eza cwalo ku tokwa nako ni ku ikataza.

Ku na ni mañolo ni litaba ze si ka bulelwa mwa lihatiso za luna. Mi fokuñwi lihatiso za luna li bulezi ka za timana ye mu nyakisisa, kono mwendi litaba zeo ha li alabi puzo ye mu na ni yona. Hape litaba ze ñwi za mwa Bibele ha li talusangi lika kaufela. Kabakaleo lu kona ku ba ni lipuzo ha lu bala litaba zeo. Ha lu swaneli ku nahana kuli lu ka fumana kalabo ya puzo ni puzo ye lu na ni yona honafo feela. Haiba ha lu si ka fumana kalabo mwa lihatiso za luna, ha lu swaneli ku ikupulela kalabo. Haiba lu eza cwalo, lu ka suhana lwa tahisa likañi ze zusa “lipuzo ze tokwa lipatisiso ku fita ku luta litaba ze zwa ku Mulimu ze tiisa tumelo.” (1 Tim. 1:4, NW; 2 Tim. 2:23; Tite 3:9) Mizwale ba ba sebeleza kwa ofisi ya mutai kamba kwa sibaka za zamaiso ha ba koni ku alaba puzo ni puzo ye ama litaba ze si ka taluswa mwa lihatiso za luna. Kono lu swanela ku kolwa kuli Bibele i lu fa litaba ze ñata ze lu tusa mwa bupilo bwa luna. Mi lika ze lu sa utwisisi cwale li lu fa kolo ya ku bonisa kuli lu na ni tumelo ku Mulimu ni mwa Linzwi la hae.—Mu bone buka ya Mu Sutelele ku Jehova, fa likepe la 185 ku isa ku la 186.

Mu swanela ku ezañi haiba mu likile ka mo mu konela kaufela ku batisisa taba ye ñwi ye mi ama kono ha mu si ka fumana kalabo? Mu lukuluhe ku ikambota ni Mukreste ya hulile, mwendi ili yo muñwi wa baana-bahulu ba mwa puteho ya mina. Ba ziba hande Bibele mi ba sebelelize Jehova ka lilimo ze ñata. Haiba mu tokwa kelezo ya mwa ku tatululela butata bo buñwi kamba ya mwa ku ezeza keto ye ñwi, ba kona ku mi tusa kakuli mu pila ni bona, ba mi ziba mi ba ziba muinelo wa mina. Mi mu si ke mwa libala ku lapela ku Jehova ka za lika kaufela ze mi kataza. Mu mu kupe kuli a zamaise munahano wa mina ka moya wa hae o kenile, kakuli Jehova ki “Yena ya fana butali . . . ni kutwisiso.”—Liprov. 2:6; Luka 11:13.