Mu Omba-ombe Ba Ba Lila Kaufela
Mu Omba-ombe Ba Ba Lila Kaufela
‘Muñaa Bupilo u ni tozize kuli ni omba-ombe ba ba lila kaufela.’—ISA. 61:1, 2.
1. Jesu naa ezelizeñi batu ba ne ba lila, mi ki kabakalañi?
JESU KRESTE naa ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” (Joa. 4:34) Jehova naa file Jesu musebezi wa ku eza. Jesu ha naa eza musebezi wo, naa bonisize batu lilato le li swana ni la naa ba bonisize Ndatahe. (1 Joa. 4:7-10) Muapositola Paulusi naa bulezi ye ñwi ya linzila zeo Jehova a bonisa lilato ka zona ha naa bulezi kuli ki “Mulimu ya omba-omba mwa miinelo kaufela.” (2 Makor. 1:3, NW) Jesu naa bonisize lilato le li cwalo ha naa ezize ze ne polofitilwe ki Isaya. (Mu bale Isaya 61:1, 2.) Jesu naa bulezi kuli bupolofita bwa Isaya bo, ne bu bulela za hae. (Luka 4:16-21) Jesu ha naa eza bukombwa bwa hae naa omba-ombile batu ba ne ba lila mi naa ba susuelize ni ku ba fa kozo.
2, 3. Ki kabakalañi balateleli ba Kreste ha ba swanela ku omba-omba ba bañwi?
2 Balateleli ba Jesu kaufela ba tokwa ku mu likanyisa ka ku omba-omba batu ba ba lila. (1 Makor. 11:1) Paulusi naa ize: “Mu tiisane lipilu, mi mu yahisane.” (1 Mates. 5:11) Batu ba tokwa ku omba-ombiwa kakuli lu pila mwa “linako ze taata.” (2 Tim. 3:1) Batu ba bande ba bañata mwa lifasi kaufela ba pila mwahalaa batu ba ba bulelanga ni ku eza lika ze tahisa manyando ni maswabi.
3 Ku likana ni mo ne i polofitezi Bibele, batu ba bañata mwa mazazi a maungulelo a lifasi le li maswe le, ki ‘baitati, ba ba lata mali, ba ba itumbaeta ni ku ikuhumusa, banyefuli, ba ba sa utwi bashemi ba bona, ba ba si na buitumelo, ba ba hana za Mulimu, ba ba si na lilato la taho, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande, lishembi ni matanya, ni ba ba inuneka, ni ba ba lata minyaka, isi Mulimu.’ Mi sina mo i bulelela Bibele, batu ba ba maswe ba “zwelapili mwa bumaswe.”—2 Tim. 3:2-4, 13.
4. Miinelo i cwañi mwa lifasi mazazi a?
4 Taba yeo ha i lu komokisi kakuli Linzwi la Mulimu li lu bulelela kuli “lifasi kamukana li lapalezi mwatasaa ya maswe.” (1 Joa. 5:19) “Lifasi kamukana” li kopanyeleza lika ze cwale ka litaba za linaha, bulapeli, ni lipisinisi, hamohocwalo ni linzila za itusisa Satani ku hasanya mihupulo ya hae. Ku si na ku kakanya, Satani Diabulosi ki “mulena wa lifasi” mi ki “mulimu wa lifasi le.” (Joa. 14:30; 2 Makor. 4:4) Miinelo ya lifasi i zwelapili ku ba ye maswe kakuli Satani u halifile, mi wa ziba kuli nako ya hae ye siyezi ki ye nyinyani. (Sin. 12:12) Ku ziba kuli Mulimu ha na ku tuhelela Satani ni lifasi la hae ku zwelapili ka nako ye telele ni kuli taba ya naa kalisize Satani ye ama bubusi bwa Jehova i ka tatululwa kwa lu omba-omba luli.—Gen., kauha. 3; Jobo, kauha. 2.
Taba ye Nde ya Kutazwa Mwa Lifasi Kaufela
5. Bupolofita bo bu bulela ka za musebezi wa ku kutaza bu talelezwa cwañi kacenu?
5 Lika za naa polofitile Jesu li sweli za ezahala mwa linako ze taata ze. Naa polofitile kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mat. 24:14) Taba ye nde ya Mubuso wa Mulimu i sweli ya kutazwa hahulu mwa lifasi kaufela. Lipaki za Jehova ba ba fitelela 7,500,000 ba ba mwa liputeho ze fitelela 107,000 ba sweli ku eza musebezi wo kacenu. Jesu naa kutalize ni ku luta ka za Mubuso wa Mulimu mi Lipaki za Jehova ni bona ba eza cwalo. (Mat. 4:17) Ha ba eza musebezi wo, ba omba-omba batu ba bañata ba ba lila. Halaa lilimo ze peli ze sa zo fela, batu ba ba eza 570,601 ne ba kolobelizwe mi ba ba Lipaki za Jehova!
6. Mu liñi ka za ku ekezeha kwa musebezi wa ku kutaza?
6 Lipaki za Jehova cwale ba toloka ni ku abela batu lihatiso ze tomile fa Bibele mwa lipuo ze fitelela 500. Kwa li ku ba ku ezwe musebezi o cwalo! Batu ba Jehova niha ba pila mwa lifasi le li busiwa ki Satani, ba patehile mwa sebelezo ya Mulimu mi ba zwelapili ku ekezeha. Nto yeo ne i si ke ya konahala kambe ha ba tusiwi ni ku zamaiswa ki moya wa Mulimu o kenile. Bakeñisa kuli taba ye nde i sweli ya kutazwa mwa lifasi kaufela, batu ba ba amuhela taba ya Mubuso ba omba-ombiwa sina mo ba omba-ombelwa batu ba Jehova.
Ku Omba-Omba ba Bañwi Mwa Puteho
7. (a) Ki kabakalañi ha lu sa swaneli ku hupula kuli Jehova u ka zwisa lika kaufela ze tahisa maswabi ka nako ya cwale? (b) Lu ziba cwañi kuli lwa kona ku itiisa mwa manyando ni ñalelwa?
7 Bakeñisa kuli lu pila mwa lifasi le li tezi bumaswe, kaufelaa luna lu ka talimana ni miinelo ye taata. Ha lu swaneli ku hupula kuli Mulimu u ka zwisa lika kaufela ze tahisa maswabi ka nako ya cwale, kakuli lu sa na ni ku libelela kuli a sinye lifasi le. Hape ku polofitilwe kuli lu ka nyandiswa, mi nyandiso i lu fa kolo ya ku bonisa kuli lwa sepahala ku Jehova ni kuli lu yemela bubusi bwa hae. (2 Tim. 3:12) Kono bakeñisa kuli Ndataa luna ya kwa lihalimu wa lu tusa ni ku lu omba-omba, lwa kona ku ba sina Bakreste ba ba tozizwe ba ne ba pila mwa Tesalonika wa ikale ili ba ne ba bile ni “tiisezo ni tumelo” mwa manyando ni ñalelwa.—Mu bale 2 Matesalonika 1:3-5.
8. Bibele i bonisa cwañi kuli Jehova wa omba-ombanga batanga ba hae?
8 Kaniti, Jehova wa omba-ombanga batanga ba hae. Ka mutala, muoli ya maswe Jezabele ha naa bata ku bulaya mupolofita Elia, Elia a saba mi a baleha. Mi a bulela kuli ki hande ha naa ka shwa. Jehova naa si ka nyaza Elia, kono naa mu omba-ombile ni ku mu fa bundume kuli a zwelepili mwa musebezi wa hae wa ku ba mupolofita. (1 Mal. 19:1-21) Jehova hape naa bonisize kuli wa omba-ombanga batu ba hae ha naa tusize puteho mwa miteñi ya baapositola. Bibele i bulela kuli “puteho kaufela ya mwa Judea, Galilea, ni Samaria ya ba mwa kozo, i nze i tiiswa.” Mi “ha ne i zamaya ka sabo ya Jehova ni ka ku omba-ombiwa ki moya o kenile ya zwelapili ku hula.” (Lik. 9:31, NW) Ni luna lu itumela hahulu kuli lu “omba-ombiwa ki moya o kenile”!
9. Ki kabakalañi ku ituta ka za Jesu ha ku kona ku lu omba-omba?
9 Luna Bakreste lu omba-ombilwe ka ku ituta ka za Jesu ni ka ku latelela mutala wa hae. Jesu naa ize: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka, mi mu itute ku na; kakuli ni na ni musa ni pilu ye bunolo, [mi] mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.” (Mat. 11:28-30) Ha lu ituta ka za mo Jesu naa tiisezanga batu ni ha lu mu likanyisa, lwa kona ku imululwa kwa lika ze katalisa.
10, 11. Ki bo mañi mwa puteho ba ba kona ku lu omba-omba?
10 Hape lwa kona ku omba-ombiwa ki Bakreste sina luna. Ka mutala, ha mu nahanisise ka za mo baana-bahulu mwa puteho ba kona ku tuseza batu ba ba na ni tumelo ye fokola. Jakobo naa ñozi kuli: “Kana ku na ni ya kula mwahalaa mina? A bize baana-bahulu ba puteho, mi ba mu lapelele.” Ki nto mañi ye ka zwa mwateñi? “Tapelo ye ezizwe ka tumelo i ka folisa ya kula, mi Jehova u ka mu zusa. Hape, haiba u na ni libi za ezize, u ka swalelwa.” (Jak. 5:14, 15, NW) Kono baana-bahulu haki bona feela ba ba kona ku lu omba-omba mwa puteho.
11 Basali hañata ku ba belanga bunolo ku taluseza basali ba bañwi butata bo ba talimana ni bona. Sihulu likaizeli ze hulile ili ze na ni yeloseli za kona ku fa likaizeli ze li likalibe likelezo ze nde. Basali ba Sikreste ba ba hulile bao mwendi ba kile ba ba mwa miinelo ye bato swana ni ye li li ku yona likalibe zeo. Ba kona ku tusa hahulu likalibe zeo ka ku teeleza ku zona ni ku li iseza pilu. (Mu bale Tite 2:3-5.) Mi baana-bahulu ni ba bañwi ba kona ku ‘tiisa ba lipilu ze shekesha’ mwahalaa luna mi ba swanela ku eza cwalo. (1 Mates. 5:14, 15) Hape lu swanela ku hupulanga kuli Mulimu ki yena “ya lu omba-omba mwa liñalelwa za luna kamukana, kuli lu kone ku omba-omba ni ba bañwi ba ba mwa ñalelwa ya mufuta ufi kamba ufi.”—2 Makor. 1:4, NW.
12. Ki kabakalañi ha ku li kwa butokwa kuli lu yange kwa mikopano ya Sikreste?
12 Nzila ye ñwi ya butokwa hahulu ye lu kona ku omba-ombiwa ka yona ki ka ku yanga kwa mikopano ya Sikreste. Litaba za mwa Bibele ze lu yo utwanga kwateñi za lu susuezanga. Bibele i lu bulelela kuli Judasi ni Silasi ne ba ‘kutalize balumeli ka manzwi a mañata, mi ba ba tiisa.’ (Lik. 15:32) Ba ba mwa puteho ba susuezananga ka manzwi pili mikopano i si ka kalisa kale ni ha i se i felile. Kamukwaocwalo, haiba lwa nyanda kabakala butata bo lu na ni bona, lu si ke lwa ikambusa kwa Bakreste ba bañwi, kakuli ku eza cwalo ha ku na ku lu tusa. (Liprov. 18:1) Lu swanela ku mamela manzwi a muapositola Paulusi, a li: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.”—Maheb. 10:24, 25.
Linzwi la Mulimu la lu Omba-Omba
13, 14. Mañolo a kona ku lu omba-omba cwañi?
13 Lwa kona ku omba-ombiwa hahulu ki Linzwi la Mulimu ibe kuli lu Bakreste ba ba kolobelizwe kamba kihona lu sa zo kalisa ku ituta niti ka za Mulimu ni milelo ya hae. Paulusi naa ñozi kuli: “Lika kaufela ze ne ñozwi kwamulaho ne li ñolezwi ku lu luta, kuli ka buitiiso bwa luna ni ka ku omba-ombiwa ki Mañolo lu kone ku ba ni sepo.” (Maro. 15:4, NW) Mañolo a Kenile a kona ku lu omba-omba ni ku lu tusa kuli lu ‘petahale ni ku talifela luli misebezi kaufela ye minde.’ (2 Tim. 3:16, 17) Lwa kona ku ziba niti ka za milelo ya Mulimu ni ku ba ni sepo ya lika ze nde za kwapili ka ku balanga Bibele ni lihatiso za luna. Haiba lu eza cwalo, lwa kona ku omba-ombiwa ni ku tiiswa ki sepo ye tomile fa Bibele.
14 Jesu naa lu tomezi mutala o munde ka ku itusisa Mañolo kuli a lute batu ni ku ba omba-omba. Ka mutala, Jesu ha sa zusizwe kwa bafu, naa iponahalize kwa balutiwa ba hae ba babeli mi a ba “taluseza Mañolo.” Ha naa nzaa ambola ni bona, lipilu za bona za susumezwa. (Luka 24:32) Muapositola Paulusi naa latelezi mutala o munde hahulu wa naa tomile Jesu mi “a bulela ni [Majuda], ka ku ya ka Mañolo.” Ha naa li mwa Berea, bateelezi ba hae “ba amuhela Linzwi ka ku li tukufalelwa, mi ba batisisa mwa Mañolo, ka mazazi kaufela.” (Lik. 17:2, 10, 11) Kamukwaoswana, lu swanela ku balanga Bibele ka zazi ni zazi ilikuli lu tusiwe ki yona hamohocwalo ni lihatiso za luna ze lukiselizwe ku lu omba-omba ni ku lu fa sepo mwa linako ze, ze taata.
Linzila ze Ñwi ze lu Kona ku Omba-Omba ba Bañwi ka Zona
15, 16. Ki lika mañi ze lu kona ku eza kuli lu tuse mizwale ba luna ni ku ba omba-omba?
15 Ku na ni lika ze ñata ze lu kona ku eza kuli lu tuse mizwale ba luna ni ku ba omba-omba. Ka mutala, lwa kona ku yo lekela balumeli ba ba hulile kamba ba ba kula lika ze ba tokwa. Lwa kona ku tusa ba bañwi ka ku ba ezeza misebezi ya fa lapa. Ha lu eza cwalo lu bonisa kuli lwa ba iseza pilu. (Mafil. 2:4) Lwa kona ku babaza mizwale ba luna kabakala buikoneli bwa bona ni tulemeno to tunde to ba na ni tona, to tu cwale ka lilato, bundume, ni tumelo.
16 Lwa kona ku omba-omba basupali ka ku ba potela ni ku teeleza ka tokomela ha ba lu bulelela ze ba iponezi mwa bupilo bwa bona ni limbuyoti ze ba bile ni zona mwa sebelezo ya Jehova. Ku eza cwalo kwa kona ku lu susueza ni ku lu omba-omba! Ha lu ba potela lwa kona ku bala ni bona Bibele kamba lihatiso za luna. Kamba lwa kona ku itukiseza ni bona taba ye ka itutiwa ka nako ya Tuto ya Tawala ya Mulibeleli kamba litaba ze ka itutiwa mwa Tuto ya Bibele ya Puteho mwa sunda yeo. Lwa kona ku buha hamoho ni bona matapa a luna a DVD. Mi lwa kona ku bala kamba ku kandeka ze ezahezi mwa bupilo bwa batu ba bañwi ze ñozwi mwa lihatiso za luna.
17, 18. Ki kabakalañi ha lu kona ku ba ni buikolwiso bwa kuli Jehova u ka tusa batanga ba hae ba ba sepahala ni ku ba omba-omba?
17 Haiba ku na ni muzwale kamba kaizeli ye lu ziba ya tokwa ku omba-ombiwa, lwa kona ku mu lapelela. (Maro. 15:30; Makolo. 4:12) Ha lu nze lu talimana ni miinelo ye taata ni ku ikataza ku omba-omba ba bañwi, lwa kona ku ba ni tumelo ye swana ni ya naa na ni yona wa lisamu ya naa opezi kuli: “U lwalise Muñaa Bupilo mulwalo wa hao, mi u ka ku tiisa. Ha na ku lumela kuli ya na ni niti a nyanganyiswe.” (Samu 55:22) Kaniti, Jehova u ka na a lu omba-omba ni ku lu tiisa ka ku ba batanga ba hae ba ba sepahala.
18 Mulimu naa bulelezi balapeli ba hae ba kwamulaho kuli: “Ki Na ya mi tiisa pilu.” (Isa. 51:12) Jehova u ka lu tiisa lipilu ni luna mi u ka lu fuyola ha lu nze lu omba-omba ba bañwi. Ku si na taba kuli sepo ye lu na ni yona ki ya ku yo pila kwa lihalimu kamba fa lifasi, kaufelaa luna lwa kona ku omba-ombiwa ki manzwi a Paulusi a naa ñolezi Bakreste ka yena ba ba tozizwe, a li: “Mulenaa luna Jesu Kreste, Yena luli, ni Mulimu Ndataa luna ya lu latile, mi a lu file ka sishemo sa hae ze lu tiisa kamita, ni sepo ye munati, a tiise lipilu za mina, mi a mi tiise mwa misebezi kaufela ye minde, ni mwa manzwi kaufela a mande.”—2 Mates. 2:16, 17.
Kana Mwa Hupula?
• Ki lika mañi ze bonisa kuli musebezi wa luna wa ku kutaza u eziwa hahulu?
• Ki lika mañi ze lu kona ku eza kuli lu omba-ombe ba bañwi?
• Bibele i bonisa cwañi kuli Jehova wa omba-ombanga batu ba hae?
[Lipuzo za Tuto]
[Siswaniso se si fa likepe 28]
Kana mwa omba-ombanga batu ba ba lila?
[Siswaniso se si fa likepe 30]
Banana ni ba bahulu ba kona ku omba-omba ba bañwi
