Lipuzo ze Zwa Kwa Babali

Kana kwa konahala ku ziba nako luli ya naa kokotezwi Jesu Kreste?

Puzo ye, i buzizwe bakeñisa shutano ye bonahala ku ba teñi mwahalaa litaba ze ñozwi ka susumezo ya moya wa Mulimu ze bulela ka za lifu la Jesu ka mo li taluselizwe mwa Evangeli ya Mareka ni ya muapositola Joani. Mareka u li: “Neli nako ya bulaalu [masole] ha ba mu kokotela.” (Mare. 15:25) Joani yena u bulela kuli ne i “bata ku ba nako ya 12 ya musihali” Pilato ha naa file Jesu mwa mazoho a Majuda kuli ba mu kokotele. (Joa. 19:14-16) Batalusi ba litaba za mwa Bibele ba file litolongosho ze shutana-shutana kuli ba like ku tatulula taba yeo. Kono ha ku na litaba za mwa Mañolo ze likani ze talusa libaka litaba ze peli zeo ha li shutana. Nihakulicwalo, ku nyakisisa mo ne ba balelanga nako batu ba mwa miteñi yeo kwa kona ku lu tusa ku utwisisa.

Mwa miteñi ya Bakreste ba makalelo ne ku si na liwaci mi batu ne ba zibanga nako ka ku talimela lizazi fo li zamaela. Mi nako ye li pazulanga lizazi ni ku likela ya cinca-cincanga mwa silimo. Kabakaleo, litaba ze bulela ka za nako ya mwa miteñi yeo ha li talusi nako tenyene ye ne i ezahezi nto ye ñwi, kono ibato ba ka nako yeo. Mañolo A Sigerike A Sikreste a bulela ka za lika ze ne ezahezi ka nako ya 3, nako ya 6, ni nako ya 9, ili ku talusa ka nako ye bato ba yeo.—Mat. 20:3, 5; Lik. 10:3, 9, 30.

Litaba za Evangeli za lumelelana ha li bulela ka za nako ye ne li ezahezi lika mwa lizazi la mafelelezo la bupilo bwa Jesu fa lifasi. Litaba zee ne kaufela za Evangeli li bonisa kuli baprisita ni ba bahulu ba sicaba ne ba kopani ha bu se bu sile mi ba laela kuli Jesu a isiwe ku Mubusisi wa Roma Ponse Pilato. (Mat. 27:1; Mare. 15:1; Luka 22:66; Joa. 18:28) Bo Mateu, Mareka, ni Luka ba biha kuli Jesu naa sa kokotezwi kale ka nako ya 6, kamba ka nako ya musihali o mutuna, ni kuli ku zwa ka nako yeo lififi la ba teñi mwa naha “ku isa kwa nako ya 9.”—Mat. 27:45, 46; Mare. 15:33, 34; Luka 23:44.

Taba ye ñwi ya butokwa ye kona ku ama nako ya naa kokotezwi Jesu ki ye: Ku natwa kamba ku shapakiwa ne ku ngiwa kuli ki kalulo ya koto ya ku kokotelwa. Fokuñwi mutu naa kona ku shwa kabakala ku shapiwa maswe. Ku bonahala kuli Jesu naa shapilwe hahulu kuli mane naa sa koni ku zwelapili ku ishimbela kota ya linyando kwandaa mutu u sili ku mu shimbela yona. (Luka 23:26; Joa. 19:17) Haiba ku shapiwa ne ku ngiwa kuli ki makalelo a koto ya ku kokotelwa, u zibe ne ku fitile nako ku zwa fa naa kalezi ku shapiwa Jesu ku isa ka nako ya naa kokotezwi fa kota ya linyando. Mwendi muñoli yo muñwi naa ñozi nako ye ne ba kalile ku shapa Jesu mi mwendi yo muñwi yena naa ñozi nako ye ne ba mu kokotezi luli. Taba yeo ya kona ku lu tusa ku utwisisa libaka bañoli bao ha ne ba si ka ñola nako ye swana ya naa kokotezwi Jesu.

Muapositola Joani naa ñozi litaba za hae hamulaho wa lilimo-limo ku zwa fo ne ba ñolezi bañoli ba bañwi ba Evangeli. Hakulicwalo, naa kona ku bala litaba ze ne ba ñozi ba bañwi. Ki niti kuli Joani naa ñozi nako ye shutana ni ya naa ñozi Mareka. Kono taba yeo i bonisa hande kuli Joani naa si ka kopisa feela litaba za naa ñozi Mareka. Joani ni Mareka ne ba susumelizwe ki moya wa Mulimu. Niha lu si na litaba za mwa Mañolo ze likani ze talusa libaka litaba zeo ha li li ze shutana, lwa kona ku sepa litaba za Evangeli.