Lu “Baenyi” Mwa Lifasi Le Li Maswe
Lu “Baenyi” Mwa Lifasi Le Li Maswe
“Bao kaufela . . . ba ipulezi kuli, bona, ki ba ku sili mi ki baenyi fafasi.”—MAHEB. 11:13.
1. Jesu naa buleziñi ka za mo balateleli ba hae ba swanela ku pilela mwa lifasi?
JESU naa bulezi ka za balutiwa ba hae kuli: “Ba mwa lifasi.” Kono naa talusize kuli: “Hasi ba lifasi, sina na, ha ni si wa lifasi.” (Joa. 17:11, 14) Manzwi a Jesu a bonisa hande ka mo balateleli ba hae ba niti ba swanela ku ngela lifasi. Satani ki yena “mulimu wa lifasi le.” (2 Makor. 4:4) Niha ba pila mwa lifasi le li maswe le, hasi ba lifasi. Ki lona libaka Bibele ha i bulela kuli Bakreste ki “ba ku sili ni baenyi” mwa lifasi le.—1 Pit. 2:11.
Ne ba Pilile Sina “Baenyi”
2, 3. Ki kabakalañi ha lu kona ku bulela kuli Enoke, Nuwe, ni Abrahama ni Sara ne ba pilile sina “ba ku sili” ni “baenyi”?
2 Ku zwa kwa makalelo batanga ba Jehova ba ba sepahala ba shutana ni batu ba lifasi. Muunda u si ka taha kale, Enoke ni Nuwe ne ba ‘zamaile ni Mulimu.’ (Gen. 5:22-24; 6:9) Kaufelaa bona ne ba kutazanga ka bundume likatulo za Jehova fahalimwaa lifasi la Satani le li maswe. (Mu bale 2 Pitrosi 2:5; Juda 14, 15.) Ne ba zamaile ni Mulimu mwa lifasi la banyefuli. Kabakaleo, Enoke naa ‘katelwa ki Mulimu’ mi Nuwe “naa pila ka mulao mwa linako za hae.”—Maheb. 11:5; Gen. 6:9.
3 Hape lwa kona ku ituta kwa mutala wa Abrahama ni Sara. Ne ba utwile Mulimu ha naa ba bulelezi kuli ba siye ndu ya bona ye nde ye ne li mwa munzi wa Ure wa Makalade. Ne ba lumezi ku yo pila mwa naha i sili ba si na ndu. (Gen. 11:27, 28; 12:1) Muapositola Paulusi naa ñozi kuli: “Ka tumelo, Abrahama nako ya bizwa, a utwa; mi a funduka ku ya kwa naha ya naa ka fiwa ka sanda; a funduka a sa zibi ko a ya kuli ki kakai. Ka tumelo, a ina mwa naha ya Sepiso, mo ku inelwa mwa naha ya basili, inzaa pila mwa litente, hamoho ni Isaka, ni Jakobo, ba ba ne ba ka ca ni yena sanda sa Sepiso.” (Maheb. 11:8, 9) Paulusi naa bulezi ka za batanga ba Jehova bao kuli: “Bao kaufela ba shwile mwa tumelo, ba si ka amuhela ze ba sepisizwe; kono ba li boni li sa li kwahule, ba li cilanisize; mi ba ipulezi kuli, bona, ki ba ku sili mi ki baenyi fafasi.”—Maheb. 11:13.
Temuso Kwa Maisilaele
4. Ki ifi temuso ye ne ba filwe Maisilaele ba si ka yo yaha kale mwa naha ya bona?
4 Abrahama naa na ni baikulu ba bañata. Mulimu naa ba ezize sicaba sa Isilaele mi a ba fa milao ni naha. (Gen. 48:4; Deut. 6:1) Maisilaele ne ba swanela ku hupula kuli Muñaa naha ya bona luli ne li Jehova. (Liv. 25:23) Niha ne ba itusisa naha yeo, ne ba swanela ku utwa milao ya Jehova. Hape ne ba swanela ku hupula kuli “mutu ha na ku pila buhobe feela” ni kuli lika ze nde kaufela ze ne ba na ni zona ne li zwa ku Jehova. (Deut. 8:1-3) Jehova a si ka ba fa kale naha yeo naa ba lemusize kuli: “Nako ya ka ku kenya Muñaa Bupilo Mulimu wa hao mwa naha ya itamile ka luci ku bokuku a hao, bo Abrahama ni Isaka ni Jakobo, kuli u ka i fa wena, kikuli yona minzi ye mituna ye minde yo si ka yaha; ni mandu a tezi lika ze nde kaufela, a u si ka taza ili wena; ni masima a yepilwe kale, a u si ka yepa wena; ni likota za veine ni za olive, zo si ka cala ili wena; ha u so cile, u kusi. Fo, u iponele, kuli u si ke wa libala Muñaa Bupilo.”—Deut. 6:10-12.
5. Ki kabakalañi Jehova ha naa yubekile Isilaele, mi ki sicaba sifi sa naa ketile?
5 Maisilaele ne ba ezize lika za naa ba hanisize Jehova. Ha ba se ba keni mwa Naha ya Sepiso ni ku pila mwa mandu a mande ni ku ba ni lico ni waine ze ñata, ba libala Jehova. Mwa miteñi ya Nehemia, Malivi ne ba bulezi ka maswabi ze ne ezahezi. (Mu bale Nehemia 9:25-27.) Ne ba bulezi kuli batu “ba ca, ba kula, ba nuna.” Maisilaele ne ba kwenuhezi Mulimu mi ba bulaya bapolofita ba naa lumile kuli ba ba lemuse. Kabakaleo Jehova a ba fa mwa mazoho a lila za bona. (Hos. 13:6-9) Hamulaho, Isilaele ha ne i busiwa ki Maroma, Majuda mane ba bulaya Mesia ya naa sepisizwe! Jehova a ba yubeka mi a keta sicaba se sinca, ili “Isilaele wa Mulimu.”—Mat. 21:43; Lik. 7:51, 52; Magal. 6:16.
Bakreste ‘Hasi ba Lifasi’
6, 7. (a) Mu kona ku talusa cwañi za naa bulezi Jesu ka za mo balutiwa ba hae ba swanela ku ngela lifasi? (b) Ka ku ya ka Pitrosi, ki kabakalañi Bakreste ba niti ha ne ba sa swaneli ku ba ba lifasi la Satani?
6 Kwa makalelo a taba ye, lu itutile kuli Jesu, yena Toho ya puteho ya Sikreste, naa bulezi kuli balateleli ba hae ha ba swaneli ku ba ba lifasi la Satani le li maswe. Nakonyana pili Jesu a si ka shwa kale, naa bulelezi balutiwa ba hae kuli: “Kabe mu ba lifasi, kabe lifasi li lata se li sa lona; kono kakuli ha mu ba lifasi, ni kuli ni mi ketile mwa lifasi, kifo lifasi li mi toile.”—Joa. 15:19.
7 Ha ku se ku fitile nako, ne ku na ni Bakreste ba ne ba pila mwa libaka ze ñata za lifasi ze ne busiwa ki Maroma. Bakreste ne ba swanela ku zwelapili ku sa ba ba lifasi. Ne ba lukela ku shutana ni batu ba lifasi la Satani. Hamulaho wa lilimo ze bato eza 30 ku zwa fa shwela Kreste, muapositola Pitrosi naa ñolezi Bakreste kuli: “Balatiwa, na mi kutaza kaha mu li ba ku sili ni baenyi, ni li: Mu sabe litakazo ze maswe, ze lwanisa moya; mu be ni muzamao o munde mwahali a bahedeni.”—1 Pit. 1:1; 2:11, 12.
8. Muñoli yo muñwi wa litaba ze ezahezi naa buleziñi ze bonisa kuli Bakreste ba makalelo ne ba si ba lifasi?
8 Bakreste ba makalelo ne ba pilile sina “ba ku sili ni baenyi” mwa libaka ze ne busiwa ki Maroma mwa miteñi ya bona. Muñoli yo muñwi wa litaba ze ezahezi naa ñozi kuli Bakreste ne ba nyandisizwe hahulu ili hañata-ñata. Naa ize ne ba tamelelizwe kuli ne ba sa lumeli ku Mulimu kabakala kuli ne ba sa ezangi mikiti ya bulapeli bwa buhata. Ne ba bulelwa kuli ne ba “toya batu ba bañwi” bakeñisa kuli ne ba sa itabisangi hamoho ni batu ba bañwi ni ku eza mikiti ya bulapeli bwa buhata ni ya buhule.
Mu si ke Mwa Itusisa Lifasi ka ku Tala
9. Luna Bakreste ba niti lu bonisa cwañi kuli ha lu si ka “toya batu ba bañwi”?
9 Sina Bakreste ba makalelo ha ne ba si ba lifasi, ni luna kacenu ha lu ba “lifasi le la cwale, le li maswe.” (Magal. 1:4) Kabakaleo, batu ba bañata ha ba utwisisi mupilelo wa luna mi ba lu toile. Kono luna ha lu si ka “toya batu ba bañwi.” Lu bonisa kuli lwa lata batu ba bañwi ka ku ya fa ndu ni ndu kuli lu yo ba bulelela taba ye nde ya Mubuso wa Mulimu. (Mat. 22:39; 24:14) Lu kutaza ka za Mubuso wa Jehova bakeñisa kuli lwa lumela kuli u ka tuha u sinya milonga ye si ka petahala kaufela ya batu. Hasamulaho, Mubuso wo, o busiwa ki Kreste, u ka tisa lifasi le linca le li lukile.—Dan. 2:44; 2 Pit. 3:13.
10, 11. (a) Lu itusisa cwañi lifasi? (b) Bakreste ha ba itusisi hahulu lifasi ka linzila lifi?
10 Bakeñisa kuli lifasi la Satani li tuha li fela, lwa ziba kuli ye haki yona nako ya ku ca nala. Lu mamela manzwi a muapositola Paulusi a li: “Se ni bulela ki se, nako ki ye kuswani; ku zwa cwale . . . ba ba leka, ba be inge ha ba si ka luwa se siñwi; ba ba itusisa ka za lifasi le, ba be inge ha ba itusisi ka zona; kakuli mukwa wa lifasi le wa fela.” (1 Makor. 7:29-31) Kono lu itusisa cwañi lifasi kacenu? Ka mutala, lu itusisa lipangaliko za cwale ni lika ze ñwi ze itusiswa kwa ku ambola ni batu kuli lu lute batu Bibele mwa libaka ze ñata, mi lu eza cwalo mwa lipuo ze ñata. Hape lwa belekanga kuli lu fumane mali a ku itusisa mwa bupilo. Mi lu lekanga lika ze lu tokwa. Kono ha lu itusisi hahulu lifasi. Fo kikuli, mali, maluo, ni mubeleko wa luna, haki zona lika za butokwa hahulu mwa bupilo bwa luna.—Mu bale 1 Timotea 6:9, 10.
11 Nzila ye ñwi ye ba bonisa ka yona Bakreste kuli ha ba itusisi hahulu lifasi ki ka ku sa ndongwama tuto ye pahami. Batu ba bañata mwa lifasi le ba nahana kuli mutu u swanela ku ya kwa yunivesiti kuli a fumane mubeleko o ocolisa mali a mañata. Kono luna Bakreste lu pila sina baenyi mi ha lu nahani cwalo. Ha lu ipateli “linto ze tuna.” (Jer. 45:5; Maro. 12:16) Lu mamela temuso ya naa lu file Jesu, ye li: “Mu tokomele, mi mu ipuluke kwa takazo kaufela ya bufumu; kakuli mutu niha ka fuma hahulu, bupilo bwa hae ha bu ini ku za fumile.” (Luka 12:15) Kamukwaocwalo, Bakreste ba ba li banana ba swanela ku hupula kuli nto ya butokwa hahulu ki ku sebeleza Jehova. Ba swanela ku fumana tuto ye tokwahala ye ka ba tusa ku fumana lika ze tokwahala mwa bupilo ilikuli ba kone ku sebeleza Jehova ka pilu ya bona kaufela, ka moyo wa bona kaufela, ka maata a bona kaufela, ni ka munahano wa bona kaufela. (Luka 10:27) Ha ba eza cwalo, ba ka ‘fumela ku Mulimu.’—Luka 12:21; mu bale Mateu 6:19-21.
Mu si ke Mwa Imezwa ki Lipilaelo za Bupilo
12, 13. Ku mamela manzwi a Jesu a kwa Mateu 6:31-33, ku lu shutanisa cwañi ni batu ba lifasi?
12 Batanga ba Jehova ba shutana ni batu ba lifasi ka mo ba ngela lika za nama. Jesu naa bulelezi balateleli ba hae kuli: “Mu si ke mwa bilaela, inze mu li: Lu ka cañi? kamba, Lu ka nwañi? kamba, Lu ka apalañi? Kakuli linto zeo kaufela li batwa ki bahedeni; kono Ndataa mina ya kwa lihalimu u ziba kuli mwa li tokwa kamukana. Kono mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.” (Mat. 6:31-33) Mizwale ni likaizeli ba luna ba bañata ba izibela hande kuli Ndataa luna wa kwa lihalimu wa ba fanga lika ze ba tokwa mwa bupilo.
13 Lu swanela ku kolwa ka ze lu na ni zona. (1 Tim. 6:6) Batu ba lifasi bona ha ba nahani cwalo. Ka mutala, ba banca ba bañata ha ba nyalana ba batanga ku ba ni lika kaufela honafo feela. Ba batanga ku ba ni ndu, lika za mwa ndu, mota ye nde, ni lika ze nca ze sa zo pangiwa. Kono Bakreste ba ba pila sina baenyi ba iswalanga mi ha ba lekangi lika ze ba sa koni ku leka. Ki nto ye nde kuli mizwale ni likaizeli ba bañata ha ba itusisangi nako ni mali ku leka lika zeo kaufela ilikuli ba itusise nako ni maata a bona ku sebeleza Jehova. Ba bañwi ba ezanga bupaina, ku sebeleza fa Betele, ku ba baokameli ba maeto, kamba ku ba balumiwa. Lwa itumela hahulu kwa musebezi o ba eza mizwale ba luna ha ba nze ba sebeleza Jehova ka pilu ya bona kaufela!
14. Lu kona ku itutañi kwa nguli ya Jesu ye bulela za mucali?
14 Mwa nguli ya Jesu ye bulela za mucali, naa bulezi kuli “lipilaelo za lifasi, ni takazo ya bufumu” za kona ku lu kutiseza mwamulaho mwa sebelezo ya luna ku Mulimu. (Mat. 13:22) Nto yeo ha i na ku ezahala ku luna haiba lu pila sina baenyi mwa lifasi le inze lu kolwa ka ze lu na ni zona. Kono lu ka zwelapili ku ba ni ‘liito le li bona hande’ ka ku isa hahulu pilu ya luna kwa ku sebeleza Mulimu ni ka ku zwelapili ku bata pili Mubuso wa hae mwa bupilo bwa luna.—Mat. 6:22.
“Lifasi la Fela”
15. Joani naa buleziñi ka za lifasi le?
15 Libaka la butokwa luna Bakreste ba niti ha lu pila sina “ba ku sili ni baenyi” mwa lifasi le, kikuli lu lumela kuli lifasi la Satani li tuha li fela. (1 Pit. 2:11; 2 Pit. 3:7) Lu bonisa kuli lwa lumela taba yeo ka mo lu pilela bupilo bwa luna, mi mupilelo wa luna u kopanyeleza liketo ze lu eza, lika ze lu bata, ni milelo ye lu na ni yona. Muapositola Joani naa elelize Bakreste kuli ba si ke ba lata lifasi kamba lika ze ku lona kakuli “lifasi la fela, ni takazo ya lona; kono ya eza tato ya Mulimu u ina ku ya ku ile.”—1 Joa. 2:15-17.
16. Lu bonisa cwañi kuli Jehova u lu ketile kuli lu be batu ba hae ba ba shutana ni lifasi?
16 Jehova naa bulelezi Maisilaele kuli ha ne ba ka mu utwa ne ba ka ba “buswa bwa [hae] tota mwahalaa macaba a mañwi kaufela.” (Ex. 19:5) Maisilaele ha ne ba utwile Mulimu, bulapeli bwa bona ni mupilelo wa bona ne li shutana ni za macaba a mañwi. Ni kacenu batu ba Jehova ba shutana hahulu ni lifasi la Satani. Bibele i lu bulelela kuli lu swanela ku “tuhela mukwa wa ku sa saba Mulimu ni wa ku shukelwa za lifasi, ni kuli lu pile mwa linako za cwale ka kutwisiso, ni ka ku luka, ni ka bulumeli. Lu nze lu talimezi sepo ye na ni mbuyoti, ni ku bonahala kwa kanya ya Mulimu yo muhulu, ni ya Mupilisi wa luna Jesu Kreste, ya itobohile mwa sibaka sa luna, kuli a lu liulule kwa bumaswe bwa luna kaufela, mi a lu kenise, ku eza ka luna sicaba se li sa hae luli, se si tukufalelwa misebezi ye minde.” (Tite 2:11-14) “Sicaba” seo ki Bakreste ba ba tozizwe ni “lingu ze ñwi” za Jesu ze ñata-ñata ze tusa Bakreste bao.—Joa. 10:16.
17. Ki kabakalañi batoziwa ni lingu ze ñwi ha ba ka ba ba ba tabile kamita bakeñisa kuli ne ba pilile sina baenyi mwa lifasi le, le li maswe?
17 “Sepo ye na ni mbuyoti” ya batoziwa ki ya ku yo busa ni Kreste kwa lihalimu. (Sin. 5:10) Sepo ya lingu ze ñwi ki ya ku pila ku ya ku ile fa lifasi. Sepo yeo ha i ka talelezwa, lingu ze ñwi li ka tuhela ku ba baenyi mwa lifasi le li maswe. Ba ka ba ni mandu a mande ni lika ze nde ze ñata za ku ca ni za ku nwa. (Samu 37:10, 11; Isa. 25:6; 65:21, 22) Ha ba na ku libala Jehova sina mo ne ba ezelize Maisilaele, kono ba ka na ba hupula kuli lika kaufela ze ba na ni zona li zwa ku Jehova, yena “Mulimu wa lifasi kaufela.” (Isa. 54:5) Batoziwa ni lingu ze ñwi ba ka ba ba ba tabile ka nako kaufela kabakala kuli ne ba pilile sina baenyi mwa lifasi le, le li maswe.
Mu Kona ku Alaba Cwañi?
• Batu ba ba sepahala ba kwaikale ne ba pilile cwañi sina baenyi?
• Bakreste ba makalelo ne ba pilile cwañi mwa lifasi la mwa miteñi ya bona?
• Bakreste ba niti ha ba itusisi hahulu lifasi ka mukwa ufi?
• Ki kabakalañi ha lu ka ba ba ba tabile bakeñisa kuli ne lu pilile sina baenyi mwa lifasi le, le li maswe?
[Lipuzo za Tuto]
[Siswaniso se si fa likepe 18]
Bakreste ba makalelo ne ba sa itabisangi ka lika za mifilifili ni za buhule
