Ku Zamaiswa Ki Moya Wa Mulimu Mwa Linako Za Baapositola Ni Kacenu
Ku Zamaiswa Ki Moya Wa Mulimu Mwa Linako Za Baapositola Ni Kacenu
“Misebezi yeo kaufela i ezwa ka ona moya o swana wo.”—1 MAKOR. 12:11.
1. Lu ka nyakisisañi mwa taba ye?
NE KU ezahezi lika ze tabisa ka lizazi la Pentekota ya 33 C.E. Ka lizazi leo, Mulimu naa sululezi batanga ba hae moya wa hae. (Lik. 2:1-4) Mulimu naa kalile ku itusisa moya wa hae ku zamaisa batu ba hae ka nzila ye nca. Mwa taba ye felile ne lu itutile ka mo moya wa Mulimu ne u tuselize batanga ba hae ba ba sepahala ba kwakale ku peta lika ze taata mwa sebelezo ya hae. Kono ki ifi shutano ye li teñi mwahalaa nzila yeo moya o kenile ne u zamaisize ka yona batanga ba Mulimu pili puteho ya Sikreste i si ka tomwa kale ni mo ne u ba zamaiselize ha se i tomilwe? Mi Bakreste ba tusiwa cwañi ki zamaiso ya moya wa Mulimu kacenu? Lu ka nyakisisa lipuzo zeo mwa taba ye.
“Ha ku Bone! Na ni Mutangaa Jehova!”
2. Maria naa iponezi cwañi mo u sebeleza moya o kenile?
2 Maria naa li teñi mwa muzuzu wa kwahalimu mwa Jerusalema muta moya o kenile ne u sululezwi batu ba ne ba li mwateñi. (Lik. 1:13, 14) Kono mane lilimo ze fitelela 30 taba yeo i si ka ezahala kale, Maria naa iponezi kuli Jehova wa kona ku eza lika ze makaza ka moya wa hae. Jehova naa shimbululezi bupilo bwa Mwanaa hae fa lifasi. Mulimu naa itusisize moya wa hae o kenile ku tahisa kuli Maria a itwale niha naa sa li mwalyanjo.—Mat. 1:20.
3, 4. Maria naa bonisize moya o cwañi, mi lu kona ku mu likanyisa cwañi?
3 Ki kabakalañi Jehova ha naa ketile Maria? Lingeloi ha se li bulelezi Maria kuli naa ka pepa Mwanaa Mulimu, naa ize: “Ha ku bone! Na ni mutangaa Jehova! Ha ku ezahale ku na ku likana ni mo u bulelezi.” (Luka 1:38) Za naa bulezi Maria ne li bonisize kuli ne li mutu ya cwañi. Naa itukiselize ku eza tato ya Jehova. Naa si ka buza lingeloi za kuli batu ba ka mu nga cwañi bakeñisa mulwalo wa hae kamba ku ikalelwa kuli mwendi Josefa ha sa na ku mu nyala. Maria ha naa bulezi kuli naa li mutangaa Jehova, naa bonisize kuli naa sepile Jehova ka ku tala.
4 Kana fokuñwi mwa ikutwanga kuli buikalabelo bo mu na ni bona mwa sebelezo ya Mulimu bu taata hahulu ku bu peta? Mañi ni mañi wa luna u swanela ku ipuza kuli: ‘Kana ni sepile Jehova ka ku tala kuli u ka lukisa lika ka ku ya ka tato ya hae? Kana luli na lata ku eza musebezi wa ni file Jehova?’ Mu swanela ku kolwa kuli Mulimu u fanga moya wa hae kwa batu ba ba mu sepa ka ku tala ni ku mu utwa ka ku ba Mubusi.—Lik. 5:32.
Pitrosi Naa Tusizwe ki Moya O Kenile
5. Moya o kenile ne u tusize cwañi Pitrosi pili lizazi la Pentekota ya 33 C.E. li si ka fita kale?
5 Muapositola Pitrosi ni yena naa iponezi mo u sebeleza moya o kenile lizazi la Pentekota ya 33 C.E. li si ka fita kale. Jesu naa file Pitrosi ni baapositola ba bañwi maata a ku leleka madimona. (Mare. 3:14-16) Nihaike kuli Mañolo ha buleli hahulu ka za taba yeo, ku bonahala kuli Pitrosi naa itusisize maata ao. Hape maata a Mulimu naa bonahezi muta Jesu naa bizize Pitrosi kuli a zamaye fa mezi a Liwate la Galilea, mi Pitrosi naa ezize cwalo. (Mu bale Mateu 14:25-29.) Kwa iponelwa hande kuli Pitrosi naa kona ku eza misebezi ye makaza kakuli naa sepile moya o kenile. Moya wo ne u tuha u fa Pitrosi ni balutiwa ba bañwi maata a ku eza lika ze ñwi ze ñata.
6. Moya wa Mulimu ne u tusize Pitrosi ku ezañi ka nako ya Pentekota ya 33 C.E. ni hasamulaho wa yona?
6 Fa Pentekota ya 33 C.E., moya o kenile ne u tusize Pitrosi ni ba bañwi ku bulela lipuo za batu ba ne ba tile kwa mukiti mwa Jerusalema. Hamulaho, Pitrosi a yema ni ku bulela kwa sicaba. (Lik. 2:14-36) Fokuñwi Pitrosi naa banga ni sabo ni ku eza lika ka kayeye. Kono ha sa amuhezi moya o kenile, naa bile ni bundume bwa ku kutaza niha naa nyandiswa ni ku laelwa kuli a tuhele ku kutaza. (Lik. 4:18-20, 31) Mulimu naa itusisize moya wa hae ku fa Pitrosi zibo ye ipitezi. (Lik. 5:8, 9) Mi naa mu file maata a ku zusa mufu.—Lik. 9:40.
7. Ki lituto lifi za Jesu za naa utwisisize Pitrosi ha sa tozizwe?
7 Lizazi la Pentekota li si ka fita kale, Pitrosi naa utwisisize litaba ze ñata za naa lutile Jesu. (Mat. 16:16, 17; Joa. 6:68) Kono ku na ni lituto ze ñwi za naa si ka utwisisa Pitrosi konji hamulaho wa Pentekota. Ka mutala, Pitrosi naa si ka utwisisa kuli Kreste naa ka zusiwa kwa bafu sina mutu wa moya fa lizazi la bulaalu kamba kuli Mubuso ne u ka ba kwa lihalimu. (Joa. 20:6-10; Lik. 1:6) Pitrosi naa si ka utwisisa kuli batu ba kona ku ba libupiwa za moya ni ku yo busa mwa Mubuso wa kwa lihalimu. Naa konile feela ku utwisisa lituto za Jesu zeo ha sa kolobelizwe ka moya o kenile ni ku fiwa sepo ya ku yo pila kwa lihalimu.
8. Ki zibo ifi ye ba na ni yona batoziwa ni “lingu ze ñwi”?
8 Balutiwa ba Jesu ha se ba amuhezi moya o kenile ne ba kona ku utwisisa lituto ze ne ba si ka utwisisa sapili. Moya o kenile ne u susumelize bañoli ba Mañolo A Sigerike A Sikreste ku talusa litaba ze makaza ka za mulelo wa Jehova. (Maef. 3:8-11, 18) Kacenu, batoziwa ni “lingu ze ñwi” ba kona ku ituta ni ku utwisisa lituto zeo. (Joa. 10:16) Kana mwa itumela kabakala zibo ni kutwisiso ya Linzwi la Mulimu ye mu filwe ka tuso ya moya wa Mulimu?
Paulusi A “Tala Moya O Kenile”
9. Moya o kenile ne u tusize Paulusi ku ezañi?
9 Ibato ba hamulaho wa silimo ku zwa fa Pentekota ya 33 C.E., Saule, ya naa tilo zibahala sina Paulusi, ni yena a toziwa ka moya o kenile. Moya ne u sebelize ku yena ka linzila ze lu tusa kacenu. Muapositola Paulusi naa ñozi libuka ze 14 za mwa Bibele ka susumezo ya moya. Mi sina moya mo ne u tuselize Pitrosi, ne u tusize cwalo ni Paulusi ku utwisisa ni ku ñola ka ku utwahala za sepo ya bupilo bwa kwa lihalimu bwa ku sa shwa ni ku sa bola. Moya o kenile ne u tusize Paulusi ku folisa bakuli, ku leleka madimona, mane ni ku zusa mufu! Kono Paulusi naa filwe maata ka moya o kenile kuli a eze musebezi wa butokwa hahulu ni ku fita. Batanga ba Mulimu kaufela ba fiwa maata kuli ba eze musebezi o swana wo kacenu nihaike kuli ha ba fiwangi maata ao ka makazo.
10. Moya o kenile ne u tusize cwañi Paulusi ku bulela?
10 Paulusi ya naa ‘tezi moya o kenile,’ naa bulezi ka bundume ku nyaza mulauli yo muñwi. Mubusisi wa Sipera naa teeleza. Naa tabisizwe hahulu ki za naa bulezi Paulusi mi a amuhela niti. Bibele i bulela kuli muuna yo “naa komokisizwe hahulu ki tuto ya Jehova.” (Lik. 13:8-12) Paulusi naa ziba kuli ki moya wa Mulimu feela o ne u kona ku mu tusa ku bulela niti ka bundume. (Mat. 10:20) Hasamulaho, a kupa puteho ya mwa Efese kuli i zwelepili ku mu lapelela ilikuli a “kone ku bulela.”—Maef. 6:18-20.
11. Paulusi naa zamaisizwe cwañi ki moya wa Mulimu?
11 Moya o kenile ne u tusize Paulusi ku bulela, kono fokuñwi hape ne u mu hanisanga ku bulela mwa libaka ze ñwi. Paulusi naa zamaisizwe ki moya wa Mulimu mwa misipili ya hae ya bulumiwa. (Lik. 13:2; mu bale Likezo 16:6-10.) Jehova u sa zamaisa musebezi wa ku kutaza ka moya wa hae. Sina Paulusi, batanga ba Jehova kaufela ba ba ipeya ku utwa ba ikataza ku kutaza niti ka bundume ni ka tukufalelo. Nihaike kuli nzila ye u lu zamaisa ka yona moya wa Mulimu ya shutana ni nzila ye ne u zamaisa Paulusi ka yona, lwa kona ku ba ni buikolwiso bwa kuli Jehova u sa itusisa moya wa hae ku hohela batu ba lipilu ze nde kwa niti.—Joa. 6:44.
“Misebelezo I Mwa Mifuta-Futa”
12-14. Kana moya wa Mulimu u sebezanga ka nzila ye swana kwa batanga ba hae kaufela? Mu taluse.
12 Lu susuezwa hahulu kacenu ha lu bala ka za mo Jehova naa fuyaulezi puteho ya batoziwa ba mwa miteñi ya baapositola. Moya o kenile ne u file Bakreste ba mwa miteñi yeo buikoneli bo bu ipitezi, kamba “limpo.” Paulusi ha naa ñolezi puteho ya mwa Korinte ka za limpo zeo, naa ize: “Cwale limpo li mwa mifuta-futa, kono moya ki u li muñwi; mi bukombwa bu mwa mifuta-futa, niteñi Mulena ki a li muñwi; mi misebelezo i mwa mifuta-futa, niteñi ki Mulimu ya swana ya eza misebezi yeo kaufela ku mañi ni mañi.” (1 Makor. 12:4-6, 11) Paulusi naa bulezi kuli moya o kenile wa kona ku sebeza kwa batanga ba Mulimu ba ba shutana-shutana kuli ba pete nto ye ñwi. Ba “mutapinyana” ni ba “lingu ze ñwi” ba zamaiswa ki moya o kenile. (Luka 12:32; Joa. 10:16) Kono moya ha u sebezangi ka nzila ye swana ku mutu ni mutu wa mwa puteho ka nako kaufela.
13 Ka mutala, baana-bahulu ba ketiwanga ki moya o kenile. (Lik. 20:28) Kono haki Bakreste kaufela ba ba tozizwe ka moya ba ba li baokameli mwa puteho. Taba yeo i bonisa kuli moya wa Mulimu u sebezanga ka linzila ze shutana-shutana kwa batu ba mwa puteho.
14 Moya o kolwisa batoziwa kuli ki bana ba Mulimu ba ba añuzwi ki ona moya o swana wa naa itusisize Jehova ku zusa Jesu kwa bafu kuli a yo pila kwa lihalimu. (Mu bale Maroma 8:11, 15.) Jehova naa itusisize moya o swana wo kuli a bupe lika kaufela. (Gen. 1:1-3) Jehova hape naa itusisize moya o swana wo kuli a konise Bezaleele ku eza musebezi o ipitezi kwa tabernakele. Moya o swana wo ne u file Samisoni maata a ku eza lika za naa sa koni ku eza mutu ufi kamba ufi, mi hape ne u tusize Pitrosi ku zamaya fa mezi. Kamukwaocwalo, ku zamaiswa ki moya wa Mulimu ha ku swani ni ku toziwa ka moya wa Mulimu. Ku toziwa ka moya o kenile ki ye ñwi ya linzila ze ipitezi ze u sebeza ka zona moya wa Mulimu. Mulimu ki yena ya keta batu ba toza ka moya wa hae.
15. Kana ku kolobezwa ka moya o kenile ku ka zwelapili ku ya ku ile? Mu taluse.
15 Moya wa Mulimu o kenile u zwezipili ku sebeza kwa batanga ba hae ba ba sepahala ka linzila ze shutana-shutana. U sebelize ku bona ka lilimo ze likiti-kiti pili Mulimu a si ka kalisa kale ku toza batu. Ku toziwa ka moya o kenile ne ku kalile fa Pentekota ya 33 C.E., kono ha ku na ku zwelapili ku ya ku ile. Ku kolobezwa ka moya ku ka fela, kono moya o kenile u ka zwelapili ku sebeza kwa batu ba Mulimu ilikuli ba eze tato ya hae ku ya ku ile.
16. Batanga ba Mulimu ba ezañi kacenu ka tuso ya moya wa hae?
16 Moya o kenile u tusa batanga ba Jehova ku ezañi ka nako ya cwale? Liñolo la Sinulo 22:17 li li: “Moya ni munyaliwa ba swalelezi ku bulela, ba li: ‘Taha!’ Mi haike ya utwa kaufela a bulele, a li: ‘Taha!’ Mi haike ya shwile linyolwa kaufela a tahe; haike ya lata kaufela a nwe kwa mezi a bupilo a fiwa feela.” Ka ku tusiwa ki moya o kenile, Bakreste kacenu ba sweli ku mema “ya lata kaufela” kuli a amuhele mezi a bupilo. Bakreste ba ba tozizwe ki bona ba ba etelela mwa musebezi wo, mi ba tusiwa ki lingu ze ñwi. Likwata ze peli zeo kaufela li zamaiswa ki moya o kenile. Kaufelaa bona ba ineezi ku Jehova ka ku kolobezwa “ka libizo la Ndate ni la Mwana ni la moya o kenile.” (Mat. 28:19) Mi kaufelaa bona ba bonisa muselo wa moya mwa bupilo bwa bona. (Magal. 5:22, 23) Ka tuso ya moya wa Mulimu, ba eza ka mo ba konela kaufela kuli ba pile bupilo bo bu kenile bo bu tabisa Mulimu.—2 Makor. 7:1; Sin. 7:9, 14.
Mu Zwelepili ku Kupa Moya O Kenile
17. Lu kona ku bonisa cwañi kuli lu na ni moya wa Mulimu?
17 Ku si na taba kuli mu na ni sepo ya ku pila ku ya ku ile kwa lihalimu kamba fa lifasi, Jehova wa kona ku mi fa “maata a fita a butu” ilikuli mu zwelepili ku sepahala ku isa kwa mafelelezo. (2 Makor. 4:7) Batu ba kona ku mi shubula bakeñisa ku kutaza taba ye nde ya Mubuso. Kono mu hupule kuli “haiba mwa shubulwa kabakala libizo la Kreste, mu na ni tabo, kakuli moya wa kanya, ona moya wa Mulimu, u fahalimwaa mina.”—1 Pit. 4:14.
18, 19. Jehova u ka mi tusa cwañi ka moya wa hae o kenile, mi mu ka tundamena ku ezañi?
18 Mulimu u fanga moya wa hae kwa batu ba ba u kupa ku yena. Moya wa kona ku ekeza kwa buikoneli bwa mina ni kwa takazo ya mina ya ku eza mo mu konela kaufela mwa sebelezo ya hae. “Mulimu ki yena ya mi fa maata, ya mi fa takazo ni maata a ku nga muhato kabakala ku lata kwa hae.” Ha lu tusiwa ki moya o kenile ni ha lu ikataza ku kumalela “linzwi la bupilo,” lu ka kona ku “lwanela ku puluswa kwa [luna] ka sabo ni tutumelo.”—Mafil. 2:12, 13, 16.
19 Kamukwaocwalo, mu sepe moya wa Mulimu ka ku tala, mu eze ka taata musebezi wa mi file Jehova, mu u eze ka bukwala, mi mu kupe Jehova kuli a mi tuse. (Jak. 1:5) U ka mi tusa ku utwisisa Linzwi la hae, ku itiisa ha mu li mwa butata, ni ku kutaza taba ye nde. “Mu tundamene ku kupa, mi mu ka fiwa; mu tundamene ku bata, mi mu ka fumana; mu tundamene ku ngongota, mi mu ka kwalulelwa.” (Luka 11:9, 13) Ku eza cwalo ku kopanyeleza ku kupa moya o kenile. Hakulicwalo, mu zwelepili ku kupa Jehova kuli mu be sina batanga ba hae ba ba sepahala ba ne ba zamaisizwe ki moya wa hae o kenile.
Kana Mwa Kona ku Talusa?
• Lu kona ku likanyisa cwañi Maria ilikuli lu fuyaulwe?
• Paulusi naa zamaisizwe cwañi ki moya wa Mulimu?
• Batanga ba Mulimu ba zamaiswa cwañi ki moya wa Mulimu kacenu?
[Lipuzo za Tuto]
[Siswaniso se si fa likepe 24]
Moya wa Mulimu ne u tusize Paulusi ku lwanisa mioya ye maswe
[Siswaniso se si fa likepe 26]
Kacenu, moya o kenile u tusa Bakreste ku si na taba ni sepo ye ba na ni yona
