Ku Fa Jehova Matabelo Ka Moyo Kaufela
Ku Fa Jehova Matabelo Ka Moyo Kaufela
“Se mu eza kaufela, mu si eze ka moyo kaufela inge kuli mu ezeza Jehova.”—MAKOLO. 3:23.
HA MU BONE NJI MWA KONA KU ALABA LIPUZO ZE:
Lu kona ku kuteka cwañi Jehova mwa misebezi ya luna ya zazi ni zazi?
Ki matabelo afi e lu eza mwa sebelezo ya luna ku Mulimu?
Ki lika mañi ze lu kona ku fa Jehova?
1-3. (a) Kana lifu la Jesu fa kota ya linyando li talusa kuli Jehova ha sa bata ku mu fa matabelo a mufuta ufi kamba ufi? Mu taluse. (b) Ki puzo ifi ye lu kona ku ipuza ka za matabelo a luna?
MWA miteñi ya baapositola, Jehova naa bulelezi batu ba hae ka ku utwahala hande kuli sitabelo sa Jesu se si liulula ne si felisize Mulao wa Mushe. (Makolo. 2:13, 14) Matabelo kaufela a ne ba fanga Majuda ka lilimo ze mianda-anda naa sa felile musebezi. Mulao ne u petile mulelo wa ona sina ‘muuti ya isa ku Kreste.’—Magal. 3:24.
2 Taba yeo ha i talusi kuli Bakreste ha ba sa na taba ni matabelo. Mane muapositola Pitrosi naa bulezi ka za butokwa bwa ku fa “matabelo a kwa moya a amuheleha ku Mulimu ka Jesu Kreste.” (1 Pit. 2:5) Mi muapositola Paulusi naa bonisize hande kuli za eza Mukreste ya ineezi mwa bupilo bwa hae kaufela li swana sina “sitabelo” se si fiwa ku Mulimu.—Maro. 12:1.
3 Kamukwaocwalo, lu fa Jehova matabelo ka ku mu fa lika ze ñwi kamba ka ku tuhela ku eza lika ze ñwi ilikuli lu mu sebeleze hande. Lika ze lu ziba ka za matabelo a ne ba fanga Maisilaele li kona ku lu tusa cwañi ku ziba haiba Jehova wa amuhela matabelo a luna?
MATABELO E LU FA KA ZAZI NI ZAZI
4. Ki nto mañi ye lu swanela ku hupulanga ka za misebezi ye lu eza ka zazi ni zazi?
4 Ku kona ku ba taata ku utwisisa kuli lika ze lu eza ka zazi ni zazi mwa bupilo bwa luna li ama matabelo e lu fa Jehova. Misebezi ye cwale ka ya fa lapa, ya kwa sikolo, ya kwa mubeleko, ku leka lika, ni ye miñwi cwalo, i kona ku bonahala inge kuli ha i ami bulikani bwa luna ni Jehova. Kono haiba mu ineezi ku Jehova kamba mu hupula ku eza cwalo kwapili, mu swanela ku hupula kuli misebezi ye mu eza ka zazi ni zazi ya kona ku ama bulikani bwa mina ni yena. Lu Bakreste ka nako kaufela, mi lu tokwa ku sebelisa likuka za mwa Bibele mwa miinelo kaufela ya mwa bupilo bwa luna. Ki lona libaka Paulusi ha naa lu susuelize kuli: “Se mu eza kaufela, mu si eze ka moyo kaufela inge kuli mu ezeza Jehova, isiñi batu.”—Mu bale Makolose 3:18-24.
5, 6. Lu swanela ku hupulanga nto mañi ye ka lu tusa ku ziba mo lu lukela ku pilela ni ku apalela ka zazi ni zazi?
5 Misebezi ye lu eza ka zazi ni zazi haki kalulo ya sebelezo ya luna ku Mulimu. Kono bakeñisa kuli Paulusi naa lu susuelize ku eza lika ‘ka moyo kaufela inge kuli lu ezeza Jehova,’ lu swanela ku nahanisisanga mo lu pilela ka nako kaufela. Hakulicwalo, lu itutañi kwa taba yeo? Kana lwa ikutekanga ni ku apala sina mo ba swanela ku ezeza Bakreste? Kamba kana lwa swabanga ku ipulela kuli lu Lipaki za Jehova bakeñisa mo lu pilela kamba mo lu apalelanga? Ha lu swaneli ku tuhelela nto yeo ku ezahala ku luna! Mi ha lu lukeli ku eza nto ifi kamba ifi ye kona ku tahisa kuli batu ba nyefule libizo la Mulimu.—Isa. 43:10; 2 Makor. 6:3, 4, 9.
6 Ha lu nyakisiseñi ka mo takazo ya ku sebeza ‘ka moyo kaufela inge kuli lu ezeza Jehova’ i kona ku amela mo lu nahanela ni mo lu ezeza lika mwa miinelo ye shutana-shutana. Ha lu nze lu nyakisisa taba yeo, lu swanela ku hupula kuli matabelo kaufela a ne ba fanga Maisilaele ku Jehova naa swanela ku ba a mande hahulu.—Ex. 23:19.
MO BU AMELWA BUPILO BWA MINA
7. Ku talusañi ku ineela ku Mulimu?
7 Ha ne mu ineezi ku Jehova ne mu ezize keto ye nde. Ne mu mu sepisize kuli mu ka mu sebeleza mwa bupilo bwa mina kaufela. Fo kikuli, ne mu ka tokomela ku eza tato ya hae mwa bupilo bwa mina kaufela. (Mu bale Maheberu 10:7.) Kaniti, mu iponezi kuli ha mu ikataza ku ziba tato ya Jehova mwa taba ifi kamba ifi ni ku eza ka ku ya ka tato ya hae yeo, mwa tusiwanga hahulu. (Isa. 48:17, 18) Lu batu ba ba kenile mi lu tabile kakuli lu likanyisa Jehova, yena ya lu fanga litaelo.—Liv. 11:44; 1 Tim. 1:11.
8. Ki kabakalañi ha lu swanela ku hupulanga kuli matabelo a ne ba fanga Maisilaele ne li a kenile ku Jehova?
8 Matabelo a ne ba fanga Maisilaele ku Jehova naa ngiwa ku ba a kenile. (Liv. 6:25; 7:1) Linzwi la Siheberu le li tolokilwe kuli “ku kena” li talusa nto ye fiwa feela Mulimu. Haiba lu bata kuli Jehova a amuhele matabelo a luna, lu swanela ku ambuka nto ifi kamba ifi ya mwa lifasi ye si ka kena. Ha lu swaneli ku lata nto ifi kamba ifi ya toile Jehova. (Mu bale 1 Joani 2:15-17.) Fo kikuli lu swanela ku tokolomoha ku swalisana ni mutu ufi kamba ufi kamba ku eza nto ifi kamba ifi ye kona ku tahisa kuli Mulimu a lu nge kuli lu silafezi. (Isa. 2:4; Sin. 18:4) Hape ha lu swaneli ku zwelapili ku talima lika ze masila kamba ze maswe kamba ku li nahana.—Makolo. 3:5, 6.
9. Ki kabakalañi ha lu tokwa ku eza ba bañwi hande?
9 Paulusi naa elelize balumeli ka yena kuli: “Mu si ke mwa libala ku eza ze nde ni ku ikabela ni ba bañwi ze mu na ni zona, kakuli Mulimu u tabiswa ki matabelo a cwalo.” (Maheb. 13:16) Haiba kamita lu ezanga lika ze nde ni ku tusa ba bañwi, Jehova u ka amuhela matabelo a cwalo. Ku bonisa ba bañwi lilato ku lu zibahaza kuli lu Bakreste ba niti.—Joa. 13:34, 35; Makolo. 1:10.
KU EZA MATABELO MWA BULAPELI
10, 11. Jehova u nga cwañi musebezi wa luna wa ku kutaza ni bulapeli bwa luna ku yena, mi nto yeo i swanela ku lu susueza ku ezañi?
10 Ye ñwi ya linzila ze lu kona ku ezeza ba bañwi lika ze nde ki ka “ku bulela sepo ya luna fapilaa nyangela.” Kana mwa itusisa kolo ye mu na ni yona kaufela kuli mu fe bupaki? Paulusi naa bulezi kuli lu tokwa ku fa “Mulimu sitabelo sa milumbeko, fo kikuli, manzwi a zwa mwa milomo ya luna, ili a lumbeka libizo” la Mulimu. (Maheb. 10:23; 13:15; Hos. 14:2) Lwa kona ku tuseha haiba lu nahana ka za nako ye lu tandanga mwa ku kutaza taba ye nde ni mo lu kona ku bolosolela mukutalezo wa luna. Likalulo ze ñata za mwa Mukopano wa Sebelezo li lukiselizwe ku lu tusa mwa taba yeo. Kono lu swanela ku hupula kuli ha lu ya mwa sebelezo ya mwa simu kamba ha lu kutaza ka ku tandalelwa lu fa “sitabelo sa milumbeko,” ili kalulo ya bulapeli bwa luna, mi sitabelo seo si swanela ku ba se sinde hahulu. Ki niti kuli miinelo ya luna ya shutana-shutana, kono mo lu ngela sebelezo ya luna ku Jehova ku kona ku ama nako ye lu tandanga mwa musebezi wa ku kutaza.
11 Lu lapelanga Jehova kamita ha lu li kwa ndu kamba kwa puteho. Jehova u lu tokwa kuli lu eze cwalo. Nihaike kuli ha lu sa tokwa ku mamela milao ya Sabata kamba ku ya kwa Jerusalema kwa mikiti, lwa kona ku ituta se siñwi kwa milao yeo. Mulimu u sa lu tokwa kuli lu tuhele misebezi ye shwile ni kuli lu itutange Linzwi la hae, lu lapelange, ni ku yanga kwa mikopano. Mi toho ya lubasi u na ni buikalabelo bwa ku ituta Bibele ni lubasi lwa hae. (1 Mates. 5:17; Maheb. 10:24, 25) Kabakaleo lu swanela ku ipuza kuli: ‘Kana ni tokwa ku eza zwelopili mwa sebelezo ya ka ku Jehova?’
12. (a) Insense ye ne fiwanga mwa bulapeli bwa Mulimu kwaikale i swana niñi kacenu? (b) Litapelo za luna li kona ku ba cwañi sina insense?
12 Mulena Davida naa opelezi Jehova kuli: “Tapelo ya ka i amuhelwe ki Wena sina insense.” (Samu 141:2) Ki nto ye nde ku nahana ka za kuli lu lapelanga hakai ni kuli ki lika mañi ze lu bulelanga mwa litapelo za luna. Buka ya Sinulo i bonisa kuli “litapelo za ba ba kenile” li swana sina insense. I bulela kuli litapelo ze amuheleha ku Jehova li kambamela ku yena sina munko o munati. (Sin. 5:8) Mwa Isilaele waikale, insense ye ne fiwanga kamita fa aletare ya Jehova ne i lukiswanga ka ku latelela ka tokomelo litaelo ze ne filwe. Jehova naa amuhelanga insense yeo ha ne i fiwa ka ku ya ka litaelo zeo. (Ex. 30:34-37; Liv. 10:1, 2) Haiba ni luna lu lapela ka nzila ya lu laezi Jehova, lwa kona ku ikolwisa kuli Jehova u ka alaba litapelo za luna.
LWA FANANGA MI LWA FIWANGA
13, 14. (a) Epafrodite ni puteho ya mwa Filipi ne ba ezelizeñi Paulusi, mi Paulusi naa ikutwile cwañi ka za nto yeo? (b) Lu kona ku likanyisa cwañi mutala wa Epafrodite ni wa Mafilipi?
13 Masheleñi e lu fananga kuli a tuse mwa musebezi wa mwa lifasi kaufela a swana sina sitabelo, ibe kuli ki a mañata kamba ki a manyinyani. (Mare. 12:41-44) Mwa miteñi ya baapositola, puteho ya mwa Filipi ne i lumile Epafrodite kuli a ye kwa Roma ku yo babalela Paulusi. Epafrodite naa iselize Paulusi mali sina mpo ye ne zwa kwa puteho. Ne si lwa pili Mafilipi ha ne ba tusize Paulusi. Ne ba lumezi Paulusi mpo yeo kakuli ne ba sa lati kuli a bilaele ka za masheleñi, kono ne ba bata kuli a itusise hahulu nako ya hae mwa bukombwa. Paulusi naa ikutwile cwañi ka za mpo yeo? Naa bulezi kuli mpo yeo ne i li “munko o munati, sitabelo se si kateleha, se si tabisa ku Mulimu.” (Mu bale Mafilipi 4:15-19.) Paulusi naa itumezi hahulu kwa sishemo se ne ba mu bonisize Mafilipi mi Jehova ni yena naa tabile.
14 Ni kacenu, Jehova wa itumelanga hahulu ha lu fa linubu ze tusa mwa musebezi wa mwa lifasi kaufela. Hape u lu sepisa kuli haiba lu zwelapili ku bata pili Mubuso wa hae, u ka lu fa ze lu tokwa kuli lu tiise tumelo ya luna mi u ka lu fa ni ze lu tokwa mwa bupilo.—Mat. 6:33; Luka 6:38.
MU BONISE KULI MWA ITUMELA
15. Ki lifi lika ze ñwi za mi file Jehova ze mu itumela ku yena?
15 Lu na ni mabaka a mañata ha lu swanela ku itumela ku Jehova. Lu swanela ku itumela ku yena ka zazi ni zazi kabakala bupilo bwa lu file. U lu fa lika kaufela ze lu tokwa kuli lu pile, ze cwale ka lico, liapalo, maino, ni moya o lu buyela. Hape, tumelo ya luna ye tomile fa zibo ye nepahezi, i lu fa sepo. Kabakaleo, lu swanela ku lapela Jehova ni ku mu fa matabelo a milumbeko kabakala kuli ki Mubupi wa luna ni kabakala lika za lu ezelize.—Mu bale Sinulo 4:11.
16. Lu bonisa cwañi kuli lwa itumela kwa sitabelo sa Kreste se si liulula?
16 Sina mo ne lu itutezi mwa taba ye felile, mpo ye tuna ka ku fitisisa ya lu file Mulimu ki sitabelo sa Kreste se si liulula. Mpo yeo i bonisa kuli Mulimu u lu lata hahulu. (1 Joa. 4:10) Lu bonisa cwañi kuli lwa itumela kwa mpo yeo? Paulusi naa ize: “Lilato la na ni Kreste la lu susueza, kabakala kuli se ki sona se lu atuzi, kuli mutu a li muñwi naa shwezi batu kaufela; . . . mi naa shwezi batu kaufela kuli ba ba pila ba tuhele ku pilela bona bañi, kono ba pilele yena ya naa ba shwezi mi naa zusizwe kwa bafu.” (2 Makor. 5:14, 15) Paulusi naa bulela kuli haiba luli lwa itumela ku Mulimu kabakala sishemo sa hae se situna, lu ka pila ka mukwa o kutekisa Mulimu ni Mwanaa hae. Lu bonisa lilato la luna ni buitumelo bwa luna ku Mulimu ni Kreste ka ku ipeya ku utwa ni ku ba ni takazo ya ku kutaza ni ku luta batu ku ba balutiwa.—1 Tim. 2:3, 4; 1 Joa. 5:3.
17, 18. Batu ba bañwi ba ekelize cwañi kwa sitabelo sa milumbeko se ba fa Jehova? Mu fe mutala.
17 Kana mwa kona ku ekeza kwa sitabelo sa milumbeko se mu fa Mulimu? Ba bañata ha se ba nahanisisize lika ze nde kaufela za ba ezelize Jehova, ba susuelizwe ku eza licinceho ilikuli ba bange ni nako ye ñata ya ku kutaza ni ku eza misebezi ya mwa kopano ya Jehova. Ba bañwi ba konile ku eza bupaina bwa ku tusa ka kweli i liñwi kamba ku fitelela ka silimo ni silimo, mi ba bañwi ba konile ku ba mapaina ba kamita. Ba bañwi bona ba tusize mwa musebezi wa ku yaha miyaho ye itusiswa mwa sebelezo ya Jehova. Zeo ki linzila ze nde hahulu ze lu kona ku bonisa ka zona buitumelo bwa luna. Haiba lu sebeleza Mulimu ka mulelo o munde, ili ku bonisa buitumelo bwa luna ku yena, u ka amuhela sebelezo ya luna.
18 Bakreste ba bañata ba susuelizwe ku bonisa buitumelo bwa bona ku Jehova. Ba bañwi ku bona ki bo Morena. Bo Morena ne ba huliselizwe mwa bulapeli bwa Katolika mi ne ba na ni lipuzo ze ñata ka za Mulimu ni ka za mulelo wa bupilo. Ne ba batile likalabo za lipuzo zeo mwa bulapeli bwa Katolika ni mwa bulapeli bwa kwa Asia. Kono lipuzo za bona ne li konile ku alabiwa ka ku utwahala hande ha se ba kalile ku ituta Bibele ni Lipaki za Jehova. Bo Morena ne ba itumezi hahulu kabakala ze ne ba itutile mwa Mañolo kakuli ne li ba tahiselize tabo. Kamukwaocwalo, ne ba bata ku itumela ku Jehova ka ku mu sebeleza ka maata a bona kaufela. Ba mano kolobezwa, ba kalisa ku ezanga bupaina bwa ku tusa, mi hasamulaho wa nako ba ba mapaina ba kamita. Se ku fitile lilimo ze 30 ku zwa nako yeo, mi bo Morena ba sa eza sebelezo ya nako kaufela.
19. Mu kona ku ekeza cwañi kwa matabelo e mu ezeza Jehova?
19 Ku na ni batanga ba Jehova ba bañata ba ba sepahala ba ba sa koni ku eza bupaina kabakala miinelo ye ba li ku yona. Kaufelaa luna lwa kona ku fa Jehova matabelo a amuheleha, ku si na taba kuli lu kona ku ezañi mwa sebelezo ya hae. Lu sebelisa likuka za Bibele mwa mizamao ya luna, inge lu hupula kuli lu yemela Jehova ka nako kaufela. Lu bonisa tumelo ya luna ka ku sepa Mulimu kuli u ka taleleza milelo ya hae. Mi lu tusa ku shaela taba ye nde ka misebezi ya luna ye minde. Haike buitumelo bwa luna bo lu bonisa ku Jehova kabakala lika kaufela za lu ezelize, bu lu susueze ku mu ezeza matabelo ka moyo wa luna kaufela.
[Lipuzo za Tuto]
[Manzwi a fa likepe 25]
Kana lika ze nde za mi ezelize Jehova za mi susueza ku ekeza kwa sitabelo sa mina sa milumbeko?
[Siswaniso se si fa likepe 23]
Kana mwa itusisa kolo ye mu na ni yona kaufela kuli mu fe bupaki?