“Shangwe lu Kupa Kuli mu lu Nge Siswaniso”

Hasamulaho wa lizazi la bubeli la mukopano wa sikiliti, muzwale ya belekela fa mutai wa Mexico, ya bizwa Josué naa ilo pota-pota mwa muleneñi wa Querétaro. Bapoti ba ne ba ba zwa kwa naha ya Colombia, bo Javier ni bo Maru ili bo muuna ni musalaa hae, ba kupa bo Josué kuli ba ba nge siswaniso. Bakeñisa kuli bo Josué ni balikani ba bona ba ba li Lipaki sina bona ne ba apezi hande ni kuli ne ba tinile mabaji a mukopano wa sikiliti, bo Javier ni bo Maru ne ba bata ku ziba haiba bo Josué ne ba zwa kwa mukiti wa ku kwaza sikolo kamba kwa tukiso ye ñwi ye ipitezi. Bo Josué ba ba taluseza kuli ne ba li kwa mukopano wa sikiliti wa Lipaki za Jehova mi mane ba mema bo Javier ni bo Maru kuli ba yo fumaneha kwa tukiso ya la Sunda.

Bo Javier ni bo musalaa bona bo Maru ne ba ikutwile maswabi a kuli ba yo fumaneha kwa tukiso ye cwalo inge ba si ka tina litino ze swanela. Nihakulicwalo bo Josué ba ba bulelela libizo la bona ni ku ba fa nombolo ya luwaile lwa fa ofisi ya mutai fo ne ba belekela.

Bo Josué ne ba komokisizwe ki taba ya kuli hamulaho wa likweli zee ne, bo Javier ne ba konile ku ambola ni bona hape. Bo Javier ni bo musalaa bona ba taluseza bo Josué kuli ne ba fumanehile kwa mukopano wa sikiliti o muñwi, mi ka nako yeo ne ba bata kuli ba potelwe ki Lipaki za Jehova mwa muleneñi wa Mexico City ili mo ne ba pila ka nako yeo. Hasamulahonyana feela wa fo, Bo Javier ni bo musalaa bona ba kalisa ku ituta Bibele ni ku fumanehanga kwa mikopano. Likweli ze lishumi ku zwa fo, ba ba bahasanyi. Ku si na taba ni kuli bo Javier ni bo musalaa bona ne ba tutezi kwa tolopo ya Toronto, ye fumaneha mwa naha ya Canada, ne ba zwezipili ku eza zwelopili ya kwa moya mi ba kolobezwa.

Hasamulaho, bo Josué ba amuhela liñolo le ne li zwa ku bo Javier, mi mwa liñolo leo bo Javier ba talusa se ne si tahisize kuli ba amuhele niti. Ne ba ñozi kuli: “Lu si ka yo fumaneha kale kwa mukopano wa sikiliti, naa ni bo musalaa ka ne lu ambozi ka za butokwa bwa kuli lu etelelwe ki Mulimu mwa bupilo bwa luna. Ha ne lu boni mo ne mu apalezi hande ni balikani ba mina, ne lu nahanile kuli ne mu zwa kwa mukopano o muñwi o ipitezi. Mi ha ne lu li kwa mukopano wa sikiliti ne lu tabisizwe ki mo ne lu amuhelezwi hande ki mizwale ni ku lu bonisa fa ku ina, ni tuso ye ne lu filwe ya kuli lu kone ku latelela ha ne ku nze ku baliwa mañolo mwa Bibele, mane cwalo ni ku ikuteka ko ne ba bonisize baputehi. Mane taba ya kuli ne lu tinile sina bapoti ne i sa bonahali ku ba bilaeza.”

Bo Josué ne ba iponezi buniti bwa manzwi a naa ñozwi ki mulena ya butali Salumoni a li: “Cala peu ya hao isali kakusasana, mi u si ke wa pumulisa mazoho a hao ka swalala; kakuli ha u zibi kuli ku ka mela peu ifi, kamba ye, kamba yani, kamba mwendi li ka mela hande ze peli.” (Muek. 11:6) Kana mwa kona ku cala peu ka ku itusisa kolo ya ku bulelela bañwi ka za mukopano wa sikiliti o taha kamba ku ba bulelela ka za ngambolo ya nyangela ye mu ka ba ni yona? Jehova a kana a itusisa mina ku hoha batu ba ba lapile ni ba ba shwile linyolwa la kwa moya kuli ba fumane ketelelo ya Mulimu sina mo ne ku bezi ku bo Javier ni bo Maru.—Isa. 55:1.

[Siswaniso se si fa likepe 32]

Ku zwa kwa nzohoto ku ya kwa bulyo: Bo Alejandro Voeguelin, bo Maru Pineda, Alejandro Pineda, bo Javier Pineda, ni bo Josué Ramírez inze ba li kwa mutai wa Mexico