Jehova Wa Lu Sileleza Kuli Lu To Piliswa

“[Mu] silelelizwe ki maata a Mulimu kabakala tumelo kuli mu fumane puluso ye libelezi ku patululwa mwa nako ya mafelelezo.”—1 PIT. 1:5.

MU KONA KU ALABA CWAÑI?

Jehova naa lu hohezi cwañi mwa bulapeli bwa niti?

Lu kona ku ezañi kuli Jehova a lu etelele ka likelezo za hae?

Jehova u lu susueza cwañi?

1, 2. (a) Ki kabakalañi ha lu ikolwisa kuli Jehova u ka lu tusa ku sepahala ku isa kwa mafelelezo? (b) Jehova u ziba cwañi hande yo muñwi ni yo muñwi wa luna?

“YA ITIISIZE ku isa kwa mafelelezo ki yena ya ka piliswa.” (Mat. 24:13) Manzwi a Jesu ao a bonisa hande kuli lu swanela ku sepahala ku Jehova ku isa kwa mafelelezo kuli lu to piliswa lifasi la Satani ha li ka sinyiwa. Kono fo ha ku talusi kuli Jehova u bata kuli lu itiise ka ku sepa feela butali bwa luna kamba maata a luna. Bibele i lu sepisa kuli: “Mulimu wa sepahala, mi ha na ku mi tuhelela kuli mu likwe ki muliko o mu sa koni ku tiyela, kono ha mu tahezwi ki muliko u ka mi fa ni nzila ya ku zwa ku ona ilikuli mu kone ku u tiyela.” (1 Makor. 10:13) Manzwi ao a talusañi?

² Jehova u bonanga teñi kuli ha lu likiwi ki muliko o lu sa koni ku tiyela. Jehova wa lu sileleza kakuli wa ziba lika kaufela ka za luna, wa ziba butata bo lu kopana ni bona, wa ziba mo lu inezi, wa ziba ni butata bo lu kona ku tiyela. Kana Jehova wa lu ziba hande cwalo? Eni, wa lu ziba. Mañolo a bonisa kuli Jehova u ziba lika kaufela ka za mañi ni mañi wa luna. Wa ziba lika ze lu ezanga zazi ni zazi ni mikwa ya luna. Mane wa ziba mihupulo ni milelo ya mwa pilu ya luna.—Mu bale Samu 139:1-6.

3, 4. (a) Taba ya Davida i bonisa cwañi kuli Jehova u isezanga batu pilu? (b) Jehova u bonisa cwañi kuli wa lu iseza pilu kacenu?

³ Kana Mulimu ya Maata Ote wa isezanga batu pilu ka nzila ye cwalo? Davida naa nahanile ka za taba yeo. Naa ize ku Jehova: “Ha ni buha mahalimu a hao, musebezi wa minwana ya hao, kweli ni linaleli zo beile mwateñi; ni li: Mutu ki mañi kuli u mu hupule?” (Samu 8:3, 4) Mwendi Davida naa buzize puzo yeo kabakala kuli Jehova naa mu iselize pilu. Davida naa li yo munyinyani kwa bana ba Jese, mi naa sa li mutangana  ya naa lisa lingu. Jehova naa mu nga kuli ki ‘muuna ya tabisa pilu ya hae,’ mi a mu keta ku ba yena muzamaisi wa Isilaele. (1 Sam. 13:14, NW; 2 Sam. 7:8) Mubupi wa pupo kaufela naa ziba mihupulo ya Davida ni maikuto a hae nihaike kuli naa li mutangana feela ya naa li mulisana wa lingu!

⁴ Ni luna lu sa komokiswa ki taba ya kuli Jehova wa lu iseza pilu. U kubukanya batu ba “macaba kaufela” ba ba li “bufumu” ku yena ilikuli ba be balapeli ba hae. (Hag. 2:7) Hape u tusa ba ba mu sebeleza kuli ba zwelepili ku sepahala. Jehova u eza cwañi cwalo? Pili lu si ka alaba kale puzo yeo, ha lu nyakisiseñi ka mo Jehova a hohela batu mwa bulapeli bwa niti.

MULIMU KI YENA YA LU HOHA

5. Jehova u hohelanga cwañi batu ku Mwanaa hae? Mu fe mutala.

⁵ Jesu naa bulezi kuli: “Ha ku na mutu ya kona ku taha ku na, konji haiba Ndate, ya ni lumile, a mu hoha.” (Joa. 6:44) Manzwi ao a bonisa kuli lu kona ku ba balutiwa ba Kreste haiba lu tusiwa ki Mulimu. Jehova u hohelanga cwañi batu ku Mwanaa hae? U ezanga cwalo ka musebezi wa ku kutaza ni ka moya wa hae o kenile. Ka mutala, Paulusi ni balumiwa ba bañwi ha ne ba li mwa Filipi, ne ba kopani ni musali ya bizwa Lidia. Bibele i lu taluseza kuli ha ne ba kalile ku ambolisana ni yena taba ye nde, “Jehova a kwalula pilu ya hae kuli a utwe litaba za naa bulela Paulusi.” Mulimu naa itusisize moya wa hae kuli a tuse musali yo ku utwisisa ni ku amuhela litaba za naa bulela Paulusi. Kabakaleo, Lidia ni lubasi lwa hae ba kolobezwa.—Lik. 16:13-15.

6. Mulimu naa lu hohile cwañi kaufelaa luna kuli lu tahe mwa bulapeli bwa niti?

⁶ Kana nto yeo ne i ezahezi feela ku Lidia? Kutokwa. Haiba mu Mukreste ya ineezi, ni mina ne mu hohilwe ki Mulimu kuli mu tahe mwa bulapeli bwa niti. Ndataa luna ya kwa lihalimu naa boni pilu ya Lidia kuli ne li ye nde. Ku cwalo ni kacenu. Mulimu naa boni pilu ya mina kuli ki ye nde kihona ha naa mi hohezi mwa bulapeli bwa niti. Ha ne mu kalile ku teeleza kwa taba ye nde, Jehova naa itusisize moya wa hae o kenile kuli a mi tuse ku utwisisa ni ku amuhela litaba ze ne mu ituta. (1 Makor. 2:11, 12) Ha ne mu ikatalize ku sebelisa ze ne mu ituta mwa Bibele, naa mi tusize kuli mu eze se si latwa ki yena. Ha ne mu ineezi ku yena, ne mu tabisize pilu ya hae. Kaniti, Jehova naa mi tusize ka nako ye ne mu kalile ku mu sebeleza mi u zwezipili ku mi tusa.

7. Lu ziba cwañi kuli Mulimu u ka lu tusa kuli lu zwelepili ku sepahala ku yena?

⁷ Jehova naa lu tusize kuli lu kale ku mu sebeleza, mi lwa kona ku ba ni buikolwiso bwa kuli u ka lu tusa kuli lu zwelepili ku sepahala. Wa ziba kuli sina ha ne lu si ka taha mwa niti ka ili luna, ha lu koni ku zwelapili ku ba mwa niti ka ili luna. Muapositola Pitrosi naa ñolezi Bakreste ba ba tozizwe kuli: “[Mu] silelelizwe ki maata a Mulimu kabakala tumelo kuli mu fumane puluso ye libelezi ku patululwa mwa nako ya mafelelezo.” (1 Pit. 1:5) Za naa bulezi Pitrosi li ama Bakreste kamukana. Jehova u lu sileleza cwañi kacenu? Lu swanela ku ziba kalabo ya puzo yeo kakuli kaufelaa  luna lu tokwa ku tusiwa ki Mulimu kuli lu zwelepili ku sepahala ku yena.

MULIMU WA KONA KU LU TUSA KULI LU SI KE LWA FOSA

8. Ki kabakalañi ha lu kona ku fosa lu sa lemuhi?

⁸ Bakeñisa kuli lu kopana ni butata bo bu shutana-shutana mi ha lu si ka petahala, lwa kona ku palelwa ku bona lika ka mwa li bonela Jehova. Kamukwaocwalo, lwa kona ku fosa lu sa lemuhi. (Mu bale Magalata 6:1.) Ka nako ye ñwi, Davida ni yena a kile a fosa a sa lemuhi.

9, 10. Jehova naa tibezi cwañi Davida kuli a si ke a fosa, mi Jehova u lu tusa cwañi kacenu?

⁹ Davida naa bonisize buiswalo bo butuna ha naa zumiwa ki Mulena Saule. Davida niha naa bile ni kolo ya ku bulaya Saule, naa si ka eza cwalo. (1 Sam. 24:2-7) Kono hamulaho wa fo, Davida a palelwa ku bonisa buiswalo. Yena ni baana ba naa li ni bona ne ba tokwa lico ni mezi, mi ba kupa Muisilaele ya bizwa Nabali kuli a ba tuse. Nabali a tapaula Davida mi a hana ku mu tusa. Nto yeo ne i halifisize hahulu Davida kuli mane a lela ku yo bulaya Nabali ni baana ba ndu ya hae kaufela. Davida naa si ka nahana kuli Jehova naa ka mu fa mulatu wa ku bulaya batu ba ba si ka fosa. Kono Abigaili musalaa Nabali naa tibezi Davida kuli a si ke a eza mafosisa a matuna a ku sulula mali. Davida naa lemuhile kuli Jehova naa itusisize Abigaili ku mu tibela kuli a si ke a fosa. Kabakaleo Davida a bulelela Abigaili, a li: “Ku lumbwe Muñaa Bupilo Mulimu wa Isilaele ya ku lumile ku to ni katanyeza kacenu le. Ku bubekwe ni kutwisiso ya hao, ku bubekwe ni wena ya ni tibezi kacenu, kuli ni si ke na yo sulula mali ka lizoho la ka, kamba ku likanyisa mutu ku ze maswe za ezize.”—1 Sam. 25:9-13, 21, 22, 32, 33.

¹⁰ Taba yeo i lu lutañi? Jehova wa kona ku lu tibela kuli lu si ke lwa eza sibi se situna. Kono ha lu swaneli ku libelela kuli nako kaufela ha lu bata ku fosa kipeto Jehova u ka luma mutu kuli a lu tibele. Hape ha lu zibi mwa kona ku ezeza Mulimu mwa miinelo ye miñwi, mi ha lu zibi lika za kona ku tuhelela kuli li ezahale ilikuli a pete mulelo wa hae. (Muek. 11:5) Kono lu na ni buikolwiso bwa kuli Jehova kamita wa ziba muinelo o lu li ku ona, mi u ka lu tusa ku zwelapili ku sepahala ku yena. U lu sepisa kuli: “Ni ka ku talifisa, ni ku lute nzila yo swanezi ku zamaya; ni ka ku eleza, meeto a ka inzaa ku shalimile.” (Samu 32:8) Jehova u lu elezanga cwañi? Lu kona ku tusiwa cwañi ki kelezo ya lu fa? Mi lu kona ku kolwa cwañi kuli Jehova u zamaisa batu ba hae kacenu? Ha lu boneñi mo li alabelwa lipuzo zeo mwa buka ya Sinulo.

KELEZO YA LU SILELEZA

11. Jehova u ziba cwañi hande ze ezahala mwa liputeho za batu ba hae?

¹¹ Pono ye ñozwi mwa buka ya Sinulo likauhanyo 2 ni 3, i bonisa kuli Jesu Kreste wa bona ze ezahala mwa liputeho ze supile za mwa Asia Minor. Mwa pono yeo, u talusa lika luli ze ezahala mi u bulela batu fa mabizo a bona. Mi hape u babaza liputeho ze eza hande ni ku fa likelezo kwa liputeho ze tokwa ku tusiwa. Pono yeo i talusañi ku luna kacenu? Liputeho ze supile li yemela Bakreste ba ba tozizwe ba ba pila hamulaho wa silimo sa 1914. Nihaike kuli Kreste naa fa kelezo kwa Bakreste ba ba tozizwe, liputeho kaufela za batu ba Mulimu kacenu za kona ku tusiwa ki kelezo yeo. Kamukwaocwalo, lwa kona ku bulela kuli Jehova u itusisa Mwanaa hae ku etelela batu ba hae kacenu. Lu kona ku ezañi kuli Jehova a lu etelele?

12. Lu kona ku ezañi kuli Jehova a lu etelele?

¹² Nto ye ñwi ye lu kona ku eza kuli Jehova a lu etelele ki ku itutanga lu nosi. Jehova u lu fanga likelezo ka lihatiso za mutanga ya sepahala ya na ni kutwisiso.  (Mat. 24:45) Haiba lu bata ku tusiwa ki likelezo zeo, lu tokwa ku banga ni nako ya ku ituta ni ku sebelisa ze lu ituta mwa bupilo bwa luna. Ku ba ni nako ya ku ituta lu nosi ki ye ñwi ya linzila za lu sileleza ka zona Jehova kuli ‘lu si ke lwa sitatala.’ (Juda 24) Kana fokuñwi mu kile mwa bala taba ye ñwi mwa lihatiso za luna ni ku ikutwa inge kuli taba yeo ne i ñolezwi feela mina? Mu swanela ku amuhela kelezo yeo kuli i zwa ku Jehova. Sina mulikanaa luna ha kona ku lu nyateta kuli lu lemuhe nto ye ñwi, Jehova wa kona ku itusisa moya wa hae ku lu tusa ku lemuha kuli lu tokwa ku cinca mupilelo wa luna kamba butu bwa luna. Ha lu latelela ketelelo ya moya o kenile, Jehova u ka lu etelela. (Mu bale Samu 139:23, 24.) Cwale ha lu nyakisiseñi mo lu swanela ku itutelanga.

13. Ki kabakalañi ha lu tokwa ku nyakisisa mo lu itutelanga?

¹³ Haiba lu sinyeza nako ye ñata hahulu kwa lika za ku itabisa ka zona, ha lu na ku fumana nako ya ku itutanga lu nosi. Muzwale yo muñwi naa ize: “Ku bunolo hahulu kuli nto yeo i ezahale. Batu kacenu ba lukuluhile ku itabisa fo ba latela kaufela, mi ha ba sa tokwa ku lifa masheleñi a mañata. Ba kona ku itabisa ka ku buha mazimumwangala, ka ku itusisa likompyuta, ni lifoni. Lika zeo li fumaneha kai ni kai.” Haiba lu sa tokomeli, lwa kona ku kala ku sinyezanga nako ya luna fa lika za ku itabisa ka zona mi ha lu na ku ba ni nako ya ku itutanga lu nosi. (Maef. 5:15-17) Mañi ni mañi wa luna u swanela ku ipuza kuli: ‘Kana hañata naa fumananga nako ya ku ituta lika ze tungile ze mwa Linzwi la Mulimu? Kana ni ezanga feela cwalo ha ni na ni ngambolo kamba ha ni itukiseza mikopano ya puteho?’ Mwendi lwa kona ku itusisa nako ye lu itutanga lu nosi ni ye lu itutanga sina lubasi kuli lu itute lika ze tungile, ni ku batisisa butali bwa Jehova bo bu mwa Bibele sina mo lu kona ku batela maluo. Butali bo, bwa kona ku lu sileleza ni ku lu tusa kuli lu zwelepili ku sepahala ku isa kwa mafelelezo.—Liprov. 2:1-5.

LWA ITIISANGA HA LU SUSUEZWA

14. Mañolo a bonisa cwañi kuli Jehova wa ziba mo lu ikutwelanga?

¹⁴ Davida naa talimani ni butata bo bu shutana-shutana ni lika ze zwafisa ze ñata. (1 Sam. 30:3-6) Bibele i bonisa kuli Jehova naa ziba mwa naa ikutwela Davida. (Mu bale Samu 34:18; 56:8.) Mulimu wa ziba mo lu ikutwela ni luna. Lwa tiiswanga ha lu hupula kuli Mulimu wa ziba ha lu na ni “pilu ye lobehile” kamba ha lu “ikutwa ku swaba mwa moya.” Taba yeo ne i tiisize Davida, ya naa opezi kuli: “Ni ka taba, ni tabele sishemo sa hao; kakuli u shalimile maswabi a ka, u zibile butata bo bu ne bu kataza moya wa ka.” (Samu 31:7) Kwandaa ku ziba feela butata bwa luna, Jehova hape u lu tusa ku itiisa ka ku lu omba-omba ni ku lu susueza. Nzila ye ñwi ya lu tiisa ka yona ki ka mikopano ya puteho.

15. Lu itutañi ku ze ne ezahezi ku Asafi?

¹⁵ Ze ne ezahezi ku Asafi li lu bonisa kuli ki kwa butokwa ku fumanehanga kwa mikopano ya puteho. Asafi naa kengeyezi mo ne ba nyandela ba ba lukile ni mo ne ba bonahalela ku kondiseza ba  ba maswe, mi taba yeo ne i mu zwafisize. Naa kalisize ku nahana kuli ku sebeleza Jehova ne ku sa tusi se siñwi. Naa talusize maikuto a hae cwana: “Ne ni filikani cwalo, mi ne ni tabehile mwa pilu.” Kabakaleo, naa batile ku tuhela ku sebeleza Jehova. Ki nto mañi ye ne i tusize Asafi kuli a cince mubonelo wa hae? Naa bulezi kuli: “Ku fitela ha ni kena mwa Sibaka se si kenile sa Mulimu.” Naa cincize mubonelo wa hae ha naa swalisani ni ba bañwi ba ne ba lapela Jehova. Asafi naa lemuhile kuli ba ba maswe ne ba si ke ba zwelapili ku kondisa ni kuli Jehova naa ka atula ka ku luka. (Samu 73:2, 13-22) Ni luna lu kona ku ikutwa sina mwa naa ikutwezi Asafi. Lika ze maswe ze lu bona mwa lifasi la Satani za kona ku lu zwafisa. Kono ha lu kopana hamoho ni mizwale ni likaizeli, lwa tiiswa mi lu tusiwa ku ba ni tabo ha lu nze lu sebeleza Mulimu.

16. Mutala wa Anna u kona ku lu tusa cwañi?

¹⁶ Kono ku cwañi haiba muinelo o muñwi mwa puteho u tahisa kuli ku mi bele taata ku fumaneha kwa mikopano? Mwendi ha mu sa na buikalabelo mwa puteho mi mu ikutwa maswabi. Kamba mwendi mu shelani ni muzwale yo muñwi kamba kaizeli. Haiba mu mwa muinelo o cwalo, mutala wa Anna wa kona ku mi tusa. (Mu bale 1 Samuele 1:4-8.) Muhalizo a hae Penina naa nzaa mu shemaeta. Naa mu filikanyanga cwalo sihulu ka nako ye ne ba yanga kwa Shilo hañwi ka silimo ku yo fa Jehova matabelo. Anna naa katazehanga hahulu kuli mane ‘naa lilanga, a sa ci ni lico.’ Kono naa si ka tuhela ku yanga kwa sibaka ko ne ku lapelwanga Jehova Mulimu. Jehova naa lemuhile busepahali bwa Anna mi a mu fuyaula.—1 Sam. 1:11, 20.

17, 18. (a) Lu susuezwanga cwañi ha lu li kwa mikopano ya puteho? (b) Mu ikutwa cwañi kabakala kuli Jehova wa mi babalela?

¹⁷ Bakreste kacenu ba swanela ku likanyisa mutala wa Anna. Lu swanela ku sepahala ka ku fumanehanga kamita kwa mikopano. Lwa susuezwanga ha lu ya kwa mikopano, mi kaufelaa luna lwa ziba buniti bwa taba yeo. (Maheb. 10:24, 25) Ha lu yanga kwa mikopano, mizwale ni likaizeli ba lu bonisanga lilato mi lwa tiiswanga. Ka mutala, lwa kona ku susuezwa ki taba ye lu utwa mwa ngambolo kamba likalabo ze fiwa ki ba bañwi. Ha lu nze lu ikambota ni mizwale ni likaizeli mikopano i si ka kala kale ni hasamulaho, yo muñwi wa kona ku lu teeleza ha lu nze lu bulela kamba u kona ku bulela nto ye ka lu omba-omba. (Liprov. 15:23; 17:17) Mi ha lu nze lu opela hamoho lipina za ku lumbeka Jehova, lwa susuezwanga ni ku tabiswa. Ha lu katazwa ki “minahano,” ki fona fo lu tokwela hahulu ku susuezwa, mi susuezo yeo lu i fumana kwa mikopano. Ha lu ya kwa mikopano, Jehova wa lu tusanga ka “likutazo” kuli lu itiise ni kuli lu zwelepili ku sepahala.—Samu 94:18, 19.

¹⁸ Bakeñisa kuli Jehova wa lu babalela, lu ikutwa sina mwa naa ikutwezi walisamu Asafi, ya naa opezi kuli: “U ni sweli ku la ka la bulyo. U ka ni zamaisa ka kelezo ya hao.” (Samu 73:23, 24) Lu itumela hahulu ku Jehova kabakala kuli wa lu sileleza ilikuli lu to piliswa!

[Lipuzo za Tuto]

[Siswaniso se si fa likepe 28]

Ni mina mu hohilwe ki Jehova

[Siswaniso se si fa likepe 30]

Lu silelezwa ka ku latelela kelezo ya lu fa Mulimu

[Siswaniso se si fa likepe 31]

Lwa tiiswanga ha lu susuezwa ki ba bañwi