‘Mwana U Lata Ku Patulula Ndate’

“Ha ku na ya ziba Ndate kuli ki mañi konji Mwana ni mutu yo Mwana a lata ku patulula Ndate ku yena.”—LUKA 10:22.

MU KONA KU ALABA CWAÑI?

Ki kabakalañi Jesu ha naa li feela yena ya naa kona ku patulula hande Ndatahe?

Jesu naa patuluzi cwañi Ndatahe ku ba bañwi?

Mu kona ku patulula cwañi Ndate ka ku likanyisa Jesu?

1, 2. Ki puzo mañi ye zingile batu ba bañata, mi ki kabakalañi?

‘MULIMU ki mañi?’ Puzo ye i zinganga batu ba bañata. Ka mutala, nihaike kuli buñata bwa batu ba ba ipapata ku ba Bakreste ba lumela kuli Mulimu ki Silaalu, batu ba bañata ba itumelela kuli tuto yeo i taata ku i utwisisa. Muñoli yo muñwi ya li mueteleli wa bulapeli naa bulezi kuli: “Tuto ya Silaalu ha i konwi ku taluswa bakeñisa kuli ku na ni lika ze ñwi ze ba sa koni ku utwisisa batu.” Ba bañwi ba lumela tuto ya ku ipilaula mi ba nga kuli ha ku na Mulimu. Ba lumela kuli lika kaufela ze bupilwe ne li itahezi feela. Niteñi, mwa sibaka sa ku hana kuli ha ku na Mulimu, bo Charles Darwin ne ba bulezi kuli: “Ni bona kuli batu ha ba na buikoneli bwa ku utwisisa ka ku tala taba ya kuli ku na ni Mulimu kamba kutokwa.”

² Ku si na taba ni ze ba lumela batu, buñata bwa bona se ba ipuzize lipuzo ze ama ku ba teñi kwa Mulimu. Kono batu ba bañata ha se ba palezwi ku fumana likalabo ze kolwisa, ba tuhelanga ku batisisa ka za Mulimu. Kaniti, Satani u “foufalize minahano ya ba ba sa lumeli.” (2 Makor. 4:4) Ki lona libaka buñata bwa batu ha ba li mwa lififi mi ha ba zibi niti ka za Ndate, yena Mubupi wa pupo kaufela!—Isa. 45:18.

3. (a) Ki mañi ya lu patululezi Mubupi? (b) Ki lipuzo mañi ze lu ka nyakisisa?

³ Kono ki kwa butokwa kuli batu ba itute niti ka za Mulimu. Kabakalañi? Kakuli ki batu feela ba ba biza “fa libizo la Jehova” ba ba ka piliswa. (Maro. 10:13) Ku biza fa libizo la Mulimu ku talusa ku ziba Mulimu kuli ki mañi. Jesu Kreste naa patululezi balutiwa ba hae zibo ya butokwa yeo. Naa patuluzi Ndatahe ku bona. (Mu bale Luka 10:22.) Ki kabakalañi Jesu ha naa  li feela yena ya naa kona ku patulula hande Ndatahe? Jesu naa patuluzi cwañi Ndate? Mi lu kona ku mu likanyisa cwañi ha lu nze lu patulula Ndate ku ba bañwi? Ha lu nyakisiseñi lipuzo zeo.

JESU KRESTE KI YENA FEELA YA KONA KU PATULULA NDATAHE

4, 5. Ki kabakalañi Jesu ha naa li feela yena ya naa kona ku patulula hande Ndatahe?

⁴ Jesu ki yena feela ya naa kona ku patulula hande Ndatahe. Kabakalañi? Kakuli pili ku si ka bupiwa kale lika ze ñwi kaufela, Jesu naa li sibupiwa sa moya se ne si pila kwa lihalimu. Naa li “Mwana wa libanda wa Mulimu.” (Joa. 1:14; 3:18) Pili lika kaufela li si ka bupiwa kale, ki Jesu feela ya naa li teñi ni Ndatahe, mi Ndatahe naa mu lata hahulu. Ndate ni Mwana ne ba ambolisananga hahulu, mi lilato le li mwahalaa bona ne li nze li ekezeha ka lilimo na lilimo ze ne ba li hamoho. (Joa. 5:20; 14:31) Kaniti, Mwana naa itutile ze ñata hahulu ka za tulemeno twa Ndatahe!—Mu bale Makolose 1:15-17.

⁵ Ndate naa ketile Mwana kuli a be muyemeli kamba mubuleli wa hae, ka ku ba “Linzwi la Mulimu.” (Sin. 19:13) Kabakaleo, Jesu naa kona ku patulula hande Ndatahe ku ba bañwi. Mi ki lona libaka Joani, muñoli wa Evangeli, naa talusize kuli Jesu, yena “Linzwi,” u “fa sifuba sa Ndate.” (Joa. 1:1, 18) Ka ku itusisa pulelo yeo, Joani naa ama kwa sizo se ne si atile hahulu mwa miteñi ya hae ka nako ya lico. Baenyi ba babeli ne ba kona ku ina bukaufi mwa sipula si li siñwi. Bakeñisa ku ina bukaufi cwalo, baenyi bao ne ba kona ku kalisa ku ambolisana ka bunolo. Kamukwaoswana, Mwana naa li “fa sifuba” sa Ndatahe, mi naa kona ku ambolisananga hahulu ni Ndatahe.

6, 7. Swalisano ye mwahalaa Ndate ni Mwana ne i fitile cwañi fa ku tiya?

⁶ Swalisano ye mwahalaa Ndate ni Mwana ne i zwezipili ku tiya. Mwana ne li yena yo “[Mulimu] naa tabela ka zazi ni zazi.” (Mu bale Liproverbia 8:22, 23, 30, 31.) Ki lona libaka swalisano ye mwahalaa Ndate ni Mwana ne i fitile fa ku tiya hahulu ha ne ba nze ba sebeza hamoho. Mi ka yona nako yeo Mwana naa ituta ku likanyisa tulemeno twa Ndatahe. Libupiwa ze ñwi ha ne li bupilwe, Mwana naa boni mo Jehova naa sebelisanela ni libupiwa zeo, mi a itebuha hahulu tulemeno twa Mulimu.

⁷ Satani niha naa si ka kuteka tukelo ya Jehova ya ku busa, Mwanaa yena naa itutile ka mo Jehova naa ka boniseza lilato, katulo ye lukile, butali, ni maata mwa muinelo o taata. Taba yeo ne i tusize Jesu ku ituta mwa ku talimanela ni miinelo ye taata ya naa ka kopana ni yona mwa bukombwa bwa hae fa lifasi.—Joani 5:19.

8. Libuka za Evangeli li lu tusa cwañi ku ituta ze ñata ka za tulemeno twa Ndate?

⁸ Bakeñisa Mwana naa li hahulu bukaufi ni Jehova, ki yena feela ya naa konile ku talusa Ndate ka nzila ye nde hahulu. Nzila ye nde ka ku fitisisa ye kona ku lu tusa ku ziba Ndate ki ku nyakisisa lika zeo Mwanaa hae wa libanda naa lutile ni ku eza. Ka mutala, ha mu nahane mo ne ku ka lu bela taata ku utwisisa ka ku tala taluso ya linzwi la “lilato” ka ku bala feela taluso ya linzwi leo mwa dikishinari. Kono ka ku nahanisisa litaba ze ba ñozi bañoli ba Libuka za Evangeli ka za bukombwa bwa Jesu ni mwa naa babalelela ba bañwi, lwa kona ku utwisisa taba ya kuli “Mulimu ki lilato.” (1 Joa. 4:8, 16) Kwandaa lilato, Jesu naa patululezi balutiwa ba hae tulemeno to tuñwi twa Mulimu ha naa li fa lifasi.

JESU MWA NAA PATULULEZI NDATAHE

9. (a) Jesu naa patuluzi Ndatahe ka linzila lifi ze peli? (b) Mu fe mutala o bonisa mo Jesu naa patululezi Ndatahe ka lituto za hae.

⁹ Jesu naa patuluzi cwañi Ndate kwa balutiwa ba hae mane ni ku ba bañwi ba  ne ba tilo ba balutiwa ba hae hasamulaho? Jesu naa ezize cwalo ka linzila ze peli: ka lituto za hae ni ka likezo za hae. Ha lu kaleñi ka ku nyakisisa lituto za Jesu. Litaba zeo Jesu naa lutile balateleli ba hae ne li bonisize kuli naa utwisisa hahulu munahano wa Ndatahe, maikuto a Ndatahe, ni linzila za hae. Ka mutala, Jesu naa bapanyize Ndatahe ku mutu ya na ni mutapi wa lingu ili ya ya ku yo bata ngu i liñwi ye latehile. Jesu naa bulezi kuli mutu yo ha fumana ngu ye ne latehile, “u taba hahulu kabakala ngu i liñwi yeo ku fita ze 99 ze ne si ka lateha.” Ki kabakalañi Jesu ha naa itusisize nguli yeo? Naa talusize kuli: “Kamukwaoswana, haki nto ye kateleha ku Ndate ya kwa lihalimu kuli nihaiba a li muñwi ku ba banyinyani bao a latehe.” (Mat. 18:12-14) Swanisezo ye i mi lutañi ka za Jehova? Nihaike kuli ka linako ze ñwi mu ikutwanga kuli ha mu ba butokwa ni kuli mu libezwi, Ndataa mina ya kwa lihalimu wa mi iseza pilu mi wa mi tokomela. U mi nga ku ba yo muñwi wa “ba banyinyani bao.”

10. Jesu naa patuluzi cwañi Ndate ka likezo za hae?

¹⁰ Nzila ya bubeli ya naa itusisize Jesu ku patulula Ndatahe kwa balutiwa ba hae ne li ka likezo za hae. Ki lona libaka muapositola Filipi ha naa buzize Jesu kuli: “Lu bonise Ndate,” Jesu naa bulezi kuli: “Ya ni boni u boni ni Ndate.” (Joa. 14:8, 9) Ha mu nyakisise mitala ye miñwi ye bonisa mo Jesu naa boniselize tulemeno twa Ndatahe. Muuna yo muñwi ya naa kula mbingwa ha naa kupile Jesu kuli a mu folise, Jesu a swala muuna yo “ya naa tezi mbingwa fa mubili kaufela” mi a mu bulelela kuli: “Na lata. U kene.” Ha mano foliswa, muuna yo naa lemuhile kuli ne li Jehova ya naa file Jesu maata a kuli a mu folise. (Luka 5:12, 13) Ku zwa fo, Lazaro ha naa shwile, mwendi balutiwa ne ba lemuhile mufelañeke wa Ndate, Jesu ha naa ‘tomohile pilu ni ku ziyeleha’ mane ni ku “lotisa miyoko.” Nihaike kuli Jesu naa ziba kuli naa ka zusa Lazaro kwa bafu, naa utwile butuku bo ne ba utwa ba lubasi lwa Lazaro ni balikani ba hae. (Joa. 11:32-35, 40-43) Mwendi ku na ni makande a mwa Bibele a bulela ka za Jesu e mu tabela hahulu ili a mi tusa ku ziba sishemo sa Ndate.

11. (a) Jesu ha naa kenisize tempele, naa patuluziñi ka za Ndatahe? (b) Ki kabakalañi likande la Jesu la ku kenisa tempele ha li lu omba-omba?

¹¹ Niteñi, mu itutañi kwa taba ya naa ezize Jesu ya ku kenisa tempele? Ha mu nahanisise ze ne ezahalile: Jesu a ikezeza pafa ya mihala, mi a lelekela kwandaa tempele batu ba ne ba lekisa likomu ni lingu. A hasanya muwayawaya wa ba ne ba cinca mali ni ku fetaula litafule za bona. (Joani 2:13-17) Kezo ye maata yeo ne i tahisize kuli balutiwa ba hupule manzwi a bupolofita a Mulena Davida a li: “Ni ciwa ki ku tukufalelwa Ndu ya hao.” (Samu 69:9) Za naa ezize Jesu li bonisa kuli naa na ni takazo ye tuna ya ku  yemela bulapeli bwa niti. Kana ku bala likande leo kwa mi tusa ku lemuha tulemeno twa Ndate? Likande leo li lu hupulisa kuli Mulimu u na ni maata a matuna hahulu a ku feza bumaswe fa lifasi mane ni kuli u na ni takazo ye tuna ya ku eza cwalo. Muhato wo wa naa ngile Jesu wa ku felisa bumaswe u bonisa mwa ikutwela Ndate ha bona bumaswe bo bu atile hahulu mwa lifasi kacenu. Ku ziba mo Jehova ni Jesu ba ikutwela ka za bumaswe kwa kona ku lu omba-omba ha lu kopana ni miinelo ye taata.

12, 13. Ha mu nyakisisa mwa naa sebelisanezi Jesu ni balutiwa ba hae, mu kona ku itutañi ka za Jehova?

¹² Ha lu nyakisiseñi mutala o muñwi ili o bonisa mo Jesu naa sebelisanezi ni balutiwa ba hae. Balutiwa ba hae ne ba kananisananga ka za kuli ki mañi yo mutuna mwahalaa bona. (Mare. 9:33-35; 10:43; Luka 9:46) Bakeñisa kuli naa pilile nako ye telele ni Ndatahe, Jesu naa ziba mwa ikutwela Jehova ka za moya wa buikuhumuso. (2 Sam. 22:28; Samu 138:6) Ku zwa fo, Jesu naa iponezi moya wo wa buikuhumuso ku Satani Diabulosi. Satani naa na ni buitati mi naa bata hahulu ku ipumanela libubo ni maata. Kabakaleo, Jesu u lukela ku ba ya naa swabile hahulu ha naa boni kuli balutiwa ba hae ne ba zwelapili ku ba ni moya o cwalo! Mane moya wo ne u li teñi nihaiba mwahalaa batu ba naa ketile ku ba baapositola! Moya wa bona wa ku lata ku ba ba batuna ne u zwezipili mane ku isa fa lizazi la mafelelezo a bupilo bwa Jesu fa lifasi. (Luka 22:24-27) Kono Jesu naa zwezipili ku ba sikululanga ka sishemo, mi naa zwezipili ku ba ni sepo ya kuli kwapili ne ba ka ituta ku ba ni moya wa buikokobezo.—Mafil. 2:5-8.

¹³ Kana mwa lemuha tulemeno twa Ndate ha mu nyakisisa Jesu mwa naa boniselize pilu-telele ha naa sikulula balutiwa ba hae ba ne ba na ni mibonelo ye si ka luka? Kana likezo ni lipulelo za Jesu za mi tusa ku ziba Ndate, yena ya sa yumbi batu ba hae simulamu ku si na taba ni kuli ba kuta-kutelanga ku eza mafosisa? Kana ku ziba tulemeno twa Mulimu ha ku lu susuezi ku baka ni ku lapela ku Jehova kuli a lu swalele ha lu fosa?

MWANA NAA PATULUZI NDATAHE KA KU LATA

14. Jesu naa bonisize cwañi kuli naa lata ku patulula Ndatahe?

¹⁴ Babusi ba bañata ba ba li bahateleli ba likanga ku zamaisa batu ka ku sa ba taluseza litaba ze ba tokwa ku ziba. Kono Jesu yena naa tabela ku bulelela ba bañwi litaba za naa ziba ka za Ndate, ili ku ba patululela Ndate ka ku tala. (Mu bale Mateu 11:27.) Jesu hape naa file balutiwa ba hae “kutwisiso kuli [ba] zibe wa niti,” yena Jehova Mulimu. (1 Joa. 5:20) Taba yeo i talusañi? Jesu naa tusize balateleli ba hae ku utwisisa lituto za naa luta ka za Ndate. Naa si ka pata Ndatahe ka ku luta tuto ya kuli Ndatahe naa li kalulo ya Silaalu, ili tuto ye sa utwisisehi.

15. Ki kabakalañi Jesu ha naa si ka bulelela balutiwa ba hae litaba ze ñwi ka za Ndatahe?

¹⁵ Kana Jesu naa patululezi batu lika kaufela za naa ziba ka za Ndatahe? Batili, naa bonisize butali ka ku sa bulelela balutiwa ba hae litaba ze ñata. (Mu bale Joani 16:12.) Ki kabakalañi? Kakuli ka nako yeo, balutiwa ba hae ne ba sa “koni ku li utwisisa.” Kono sina mwa naa taluselize Jesu, balutiwa ba hae ne ba ka patululelwa zibo ye tuna ka nako ye ne ba ka fiwa “mutusi,” ili moya o kenile o no ka ba “etelela mwa niti kaufela.” (Joa. 16:7, 13) Sina feela bashemi ba ba butali ha ba kona ku keta ku sa bulelela bana ba bona litaba ze ñwi ku fitela bana ba bona ba hula ni ku utwisisa litaba zeo, Jesu ni  yena naa ka bulelela balutiwa ba hae litaba ze ñwi ka za Ndate ka nako ye ne ba ka utwisisa litaba zeo. Jesu naa na ni sishemo, mi naa ziba kuli balutiwa ba hae ne ba na ni mifokolo.

MU LIKANYISE JESU KA KU TUSA BA BAÑWI KU ZIBA JEHOVA

16, 17. Ki kabakalañi ha mu kona ku bulelela ba bañwi ka za Ndate?

¹⁶ Ha mu zibile mutu yo muñwi hande ni ku lata tulemeno twa hae to tunde, kana ha mu na ku susuezwa ku bulelela ba bañwi ka za hae? Jesu ha naa li fa lifasi, naa bulelanga ka za Ndatahe. (Joa. 17:25, 26) Kana ni luna lwa kona ku mu likanyisa ka ku bulelelanga ba bañwi ka za Jehova?

¹⁷ Sina mo se lu nyakisiselize, Jesu naa ziba ze ñata hahulu ka za Ndatahe ku fita mutu ufi kamba ufi. Kono naa tabela ku taluseza ba bañwi ze ñwi za litaba za naa ziba ka za Ndatahe, mane naa tusize balateleli ba hae ku utwisisa litaba ze tungile ka za tulemeno twa Mulimu. Jesu u lu tusize ku ziba Ndataa luna ku fita mo ba mu zibela ba bañata kacenu. Lu itebuha hahulu kuli Jesu naa tabezi ku lu patululela Ndatahe ka lituto ni ka likezo za hae! Lu na ni tohonolo ye tuna ya ku ziba Jehova. (Jer. 9:24; 1 Makor. 1:31) Lu likile ka taata ku sutelela ku Jehova, mi Jehova u sutelezi ku luna. (Jak. 4:8) Kabakaleo, cwale se lu kona ku luta ba bañwi litaba ze lu ziba ka za Jehova. Lu kona cwañi ku eza cwalo?

18, 19. Mu kona ku patulula cwañi Ndate ku ba bañwi? Mu taluse.

¹⁸ Lu tokwa ku likanyisa Jesu ka ku patulula Ndate ka ze lu bulela ni ze lu eza. Mu hupulange kuli buñata bwa batu be lu kopananga ni bona ha lu kutaza ha ba zibi kuli Mulimu ki mañi. Mwendi ba na ni mihupulo ye fosahalile ka za Mulimu kabakala lituto za buhata ze ba lutilwe. Lwa kona ku sebelisa Bibele ku luta ba bañwi ku ziba libizo la Mulimu, mulelo wa hae kwa batu, ni tulemeno twa hae. Hape litaba za mwa Bibele za kona ku lu tusa ku ziba tulemeno twa Mulimu ka nzila ye ne lu sa utwisisi sapili. Lwa kona ku ikambota ni Bakreste ba bañwi ka za lika ze lu itutile, mi ni bona ba kona ku susuezwa.

¹⁹ Lu swanela ku likanyisa Jesu ka ku patulula Ndate ka likezo za luna. Batu ha ba bona kuli lu na ni lilato la naa bonisize Kreste, ni bona ba ka bata ku ba ni bulikani ni Jesu ni Ndatahe. (Maef. 5:1, 2) Muapositola Paulusi naa lu susuelize kuli lu mu ‘likanyise, sina yena ha naa likanyisa Kreste.’ (1 Makor. 11:1) Kaniti, lu na ni tohonolo ye tuna hahulu ya ku tusa batu ku ziba Jehova ka likezo za luna! Haike lu zweleñipili ku likanyisa Jesu ka ku patulula Ndate ku ba bañwi.

[Lipuzo za Tuto]