Kana Mwa Benyisa Kanya Ya Jehova?
Kana Mwa Benyisa Kanya Ya Jehova?
“Lu benyisa kanya ya Jehova sina liiponi.”—2 MAKOR. 3:18.
MU KONA KU ALABA CWAÑI?
Lu kona cwañi ku kanyisa Jehova niha lu li baezalibi?
Ku lapelanga ni ku fumanehanga kwa mikopano ku lu tusa cwañi ku benyisa kanya ya Mulimu?
Ki nto mañi ye kona ku lu tusa ku zwelapili ku lumbeka Jehova?
1, 2. Ki kabakalañi batu ha ba kona ku likanyisa tulemeno twa Jehova?
KAUFELA luna lu hozanga bashemi ba luna mwa linzila ze ñwi. Kamukwaocwalo, haki nto ye komokisa ku utwa mutu yo muñwi ha bulelela mushimani kuli, ‘Wena u swana inge bo ndataho.’ Mi mutu u kona ku bulelela musizana kuli, ‘U ni hupulisa feela bomaho.’ Banana hañata ba likanyisanga ze ba bona kwa bashemi ba bona. Luna bo? Kana lwa kona ku likanyisa ndataa luna wa kwa lihalimu Jehova? Nihaike kuli lwa li ku ba lu bone Mulimu, lwa kona ku ituta tulemeno twa hae to tunde ka ku bala Bibele ni ku kengeyela ze lu bala, sihulu ku nahanisisa lika za naa bulezi Jesu ni za naa ezize. (Joa. 1:18; Maro. 1:20) Kamukwaocwalo, lwa kona ku benyisa kanya ya Jehova.
2 Pili a si ka bupa kale bo Adama ni Eva, Mulimu naa ziba kuli batu ne ba ka eza tato ya hae, ku likanyisa tulemeno twa hae, ni ku mu kanyisa. (Mu bale Genese 1:26, 27.) Ka ku ba Bakreste, lu bata ku likanyisa tulemeno twa Mulimu wa luna. Haiba lu eza cwalo, lu ba ni tohonolo ye tuna ya ku kanyisa kanya ya Mulimu ku si na taba ni sizo, tuto, kamba simuluho ya luna. Kabakalañi? Kakuli “Mulimu ha ketululi, kono mwa sicaba ni sicaba mutu kaufela ya mu saba ni ku eza se si lukile u lumelelwa ki yena.”—Lik. 10:34, 35.
3. Lu ikutwa cwañi ha lu nze lu sebeleza Jehova?
3 Bakreste ba ba tozizwe ba benyisa kanya ya Jehova. Muapositola Paulusi ya naa li yo muñwi wa batoziwa naa ñozi kuli: “Kaufelaa luna, niha lu benyisa kanya ya Jehova sina liiponi ka lipata za luna ze si ka apeswa lisila, lu fetulwa ku ba siswaniso si li siñwi, ku zwa kwa kanya ye ñwi ku ya ku ye ñwi.” (2 Makor. 3:18) Paulusi na bulela za nako ya na zwa Mushe kwa Lilundu la Sinai inze a filwe Milao ye Lishumi, pata ya Mushe ne i benyiswa ki liseli bakeñisa kuli Jehova naa bulezi ni yena. (Ex. 34:29, 30) Nihaike kuli ze ne ezahezi ku Mushe ha li si ka ezahala kwa Bakreste mi batu ha ba talima lipata za Bakreste ha ba boni liseli, ba bona tabo ye ba na ni yona ha ba bulela ka za Jehova, tulemeno twa hae, ni mulelo wa hae o munde kwa batu. Ku si na taba kuli lu ba ba tozizwe kamba lu lingu ze ñwi, lu swana sina liiponi kakuli lu benyisa kanya ya Jehova mwa bupilo bwa luna ni mwa bukombwa. (2 Makor. 4:1) Kana mwa benyisa kanya ya Jehova ka ku pila mupilelo o mu tabisa ni ku kutazanga nako ni nako?
LWA TABELA KU BENYISA KANYA YA JEHOVA
4, 5. (a) Ki butata bufi bo lu na ni bona bo bu swana ni bwa naa na ni bona Paulusi?(b) Sibi si lu ama cwañi?
4 Ka ku ba batanga ba Jehova, lwa tabela luli ku kuteka ni ku lumbeka mubupi wa luna mwa lika ze lu eza kaufela. Niha lu tabela ku eza lika ze nde, hañata lu ezanga lika ze maswe. Paulusi ni yena naa na ni butata bo bu swana. (Mu bale Maroma 7:21-25.) Paulusi naa talusize libaka kaufelaa luna ha lu swanela ku lwanisa litakazo za luna ze maswe, naa ñozi kuli: “Kaufelaa bona ba ezize sibi mi ha ba fiti fa sipimo sa kanya ya Mulimu.” (Maro. 3:23) Bakeñisa kuli Adama naa ezize sibi, batu kaufela ba pepezwi mwa butanga bwa sibi mi sibi seo si swana sina mulena ya lunya ya busa batu.—Maro. 5:12; 6:12.
5 Sibi kiñi? Ki nto kaufela ye sa lumelelani ni tulemeno twa Jehova, lika za tabela, ni lika za bata kuli lu eze. Sibi si sinya silikani sa na ni sona mutu ni Mulimu. Sibi si lu palelwisa ku benyisa kanya ya Mulimu sina feela nto ye ñwi ha i kona ku palelwisa mukunupi wa buta ku nonga hande. Ka linako ze ñwi lu ezanga sibi ka bomu. Kono fokuñwi lu ezanga cwalo ka ku sa lela. (Num. 15:27-31) Sibi si kona ku ama hahulu batu kuli mane si kona ku ba kauhanya ku Mubupi wa bona. (Samu 51:5; Isa. 59:2; Makolo. 1:21) Batu ba bañata ba pila ka nzila ye ba kauhanya ku Mulimu, kabakaleo ba palelwa ku ba ni kolo ya ku benyisa kanya ya Mulimu. Ha ku na nto ye kataza hahulu batu ku fita sibi.
6. Ki kabakalañi ha lu kona ku benyisa kanya ya Jehova ni ha lu li baezalibi?
6 Ku si na taba ni kuli lu pepilwe inze lu na ni sibi, Jehova u lu file sepo. (Maro. 15:13) U lu file nzila ya ku felisa ka yona sibi ili tiululo ya sitabelo sa Jesu Kreste. Bakeñisa kuli lu na ni tumelo mwa sitabelo seo ha lu sa li “batanga ba sibi,” kono lwa kona ku benyisa kanya ya Jehova ni ku ba balikani ba hae. (Maro. 5:19; 6:6; Joa. 3:16) Haiba lu zwelapili ku ba balikani ba Mulimu, lu ka ba ni buikolwiso bwa kuli u ka lu fuyaula ka nako ya cwale. Mi kwapili u ka lu sileleza ni ku lu fa bupilo bo bu sa feli. Ki tohonolo ye tuna ku ziba kuli Jehova u lu nga kuli lwa kona ku benyisa kanya ya hae ni ha lu li baezalibi.
ZE LU KONISA KU BENYISA KANYA YA MULIMU
7. Ki nto mañi ye lu swanela ku itumelela haiba lu bata ku benyisa kanya ya Mulimu?
7 Ka ku ba batu ba si ka petahala, kaufelaa luna lu na ni mifokolo. Haiba lu bata ku benyisa kanya ya Mulimu, mañi ni mañi wa luna u swanela ku lemuha mifokolo ya na ni yona. (2 Makol. 6:36) Lu tokwa ku itumelela kuli lu na ni mifokolo yeo mi lu swanela ku ikataza ku i lwanisa ilikuli lu kanyise Mulimu. Ka mutala, haiba lu eza sibi ka ku buha maswaniso a mapunu, lu swanela ku itumelela kuli lu tokwa ku tusiwa ki baana-bahulu mi lu swanela ku ba kupa kuli ba lu tuse. (Jak. 5:14, 15) Muhato wo ki wona o lu swanela ku nga pili haiba lu bata ku kanyisa luli Mulimu. Lu swanela ku bona teñi kuli lwa pila ka ku lumelelana ni likuka za Jehova. (Liprov 28:18; 1 Makor. 10:12) Ku si na taba kuli mifokolo ya luna ki ye cwañi, lu swanela ku zwelapili ku lwanisa mifokolo yeo ilikuli lu kone ku benyisa kanya ya Mulimu.
8. Nihaike kuli ha lu si ka petahala, ki nto mañi ye lu swanela ku eza?
8 Jesu ki yena feela ya na ezanga lika ze tabisa Mulimu ni ku benyisa hande kanya ya Mulimu. Nihaike kuli ha lu swani ni Jesu ya na petahalile, lu swanela ku lika ka taata ku likanyisa mutala wa hae. (1 Pit. 2:21) Jehova wa bona zwelopili ye lu eza ni buikatazo bwa luna bwa ku mu kanyisa mi wa lu fuyaula kabakala buikatazo bo.
9. Bibele i lu tusa cwañi ku benyisa hande kanya ya Mulimu?
9 Bibele ya kona ku lu tusa ku utwisisa mo lu kona ku benyiseza hande kanya ya Mulimu. Lu tokwa ku ituta Bibele hande ni ku kengeyela ze i bulela. (Samu 1:1-3) Ku balanga Bibele ka zazi ku ka lu tusa ku eza zwelopili. (Mu bale Jakobo 1:22-25.) Ze lu ituta mwa Bibele li tiisa tumelo ya luna. Hape li tiisa takazo ya luna ya ku bata ku sa eza sibi ni ya ku bata ku tabisa Jehova.
10. Tapelo i kona ku lu tusa cwañi ha lu nze lu sebeleza Mulimu?
10 Kuli lu benyise kanya ya Mulimu, hape lu tokwa ku ‘tundamena ku lapela.’ (Maro. 12:12) Lu swanela ku kupa Jehova kuli a lu tuse ku mu sebeleza ka nzila ya tabela. Lwa kona ku mu kupa kuli a lu fe moya o kenile, tumelo ye tiile, ni maata kuli lu tiyele miliko. Hape lwa kona ku mu kupa kuli a lu tuse ku ba baluti ba bande ba Bibele. (2 Tim. 2:15; Mat. 6:13; Luka 11:13; 17:5) Sina mwanana mwa itingelanga ku bo ndatahe, ni luna lu tokwa ku itinga ku Ndataa luna wa kwa lihalimu Jehova. Haiba lu mu kupa kuli a lu tuse ku mu sebeleza hande, lu ka ba ni buikolwiso bwa kuli u ka lu tusa. Ha lu swaneli ku ikutwa kuli litapelo za luna za mu filikanya. Kamukwaocwalo, ha lu mu lumbekeñi ka litapelo za luna ni ku mu kupa kuli a lu etelele sihulu ha lu li mwa miinelo ye taata. Hape lwa kona ku mu kupa kuli a lu tuse ku mu lumbeka ka ku mu sebeleza.—Samu 86:12; Jak. 1:5-7.
11. Mikopano i lu tusa cwañi ku benyisa kanya ya Mulimu?
11 Mulimu u file “mutanga ya sepahala ya na ni kutwisiso” musebezi wa ku babalela lingu za hae za butokwa. (Mat. 24:45-47; Samu 100:3) Mutanga ya sepahala u bata ku lu tusa kaufela luna kuli lu benyise kanya ya Jehova. Ye ñwi ya linzila za lu tusa ka zona mutanga ya sepahala ki ka mikopano. Mikopano ya luna i lu tusa ku eza licinceho mwa bupilo ni ku ba ni tulemeno twa Sikreste sina feela muluki mwa kona ku kutiseza kwa butuna bwa sitino sa luna ilikuli lu bonahale hande. (Maheb. 10:24, 25) Kabakaleo, lu swanela ku fitanga kwa mikopano ka nako. Haiba lu na ni mukwa wa ku liyehanga kwa mikopano, ha lu na ku tusiwa hahulu ki mikopano yeo.
LU LIKANYISE MULIMU
12. Lu kona ku likanyisa cwañi Mulimu?
12 Haiba lu bata ku benyisa kanya ya Jehova, lu swanela ku ‘likanyisa Mulimu.’ (Maef. 5:1) Nzila ye ñwi ye lu kona ku likanyisa ka yona Jehova ki ka ku nga lika mwa li ngela yena. Ha lu eza lika ka mo lu latela isiñi ka mwa nahanela Mulimu, lwa mu shwaula mi lu itahiseza butata. Bakeñisa kuli lu pila mwa lifasi la Satani, lu swanela ku sebeza ka taata kuli lu toye lika za toile Jehova ni ku lata za lata. (Samu 97:10; 1 Joa. 5:19) Ha lu swaneli ku kakanya kuli nzila ye nde ka ku fitisisa ya ku sebeleza Mulimu ka yona ki ku eza linto kaufela kuli a kanyiswe ka zona.—Mu bale 1 Makorinte 10:31.
13. Ki kabakalañi ha lu swanela ku toya sibi, mi ku eza cwalo ku ka lu susueza ku ezañi?
13 Jehova u toile sibi mi ni luna lu swanela ku mu likanyisa. Haiba lu toya sibi, lu ka tokolomoha nto ifi kamba ifi ye kona ku lu tahiseza ku eza sibi. Ka mutala, lu swanela ku tokolomoha kuli ha lu kwenuheli Jehova. Batu ba ba kwenuhelanga Mulimu ba tuhelanga ku mu kanyisa. (Deut. 13:6-9) Kamukwaocwalo, lu swanela ku ambuka bukwenuheli kamba mutu ufi kamba ufi ya ipapata ku ba Mukreste kono inze a sa kuteki Mulimu. Lu swanela ku ambuka batu ba ba cwalo nihaikaba kuli ki ba mwa lubasi lwa luna. (1 Makor. 5:11) Ku taluseza bakwenuheli ni batu ba bañwi ba ba lwanisa kopano ya Jehova kuli ba fosa ha ku na ku lu tusa se siñwi. Mane ha lu swaneli nihaiba ku bata ku ziba ze ba bulela ka za luna, ibe kuli ba itusisa lihatiso kamba ba lu lwanisa ka ku itusisa Intaneti. Ku eza cwalo ku ka sinya silikani sa luna ni Jehova.—Mu bale Isaya 5:20; Mateu 7:6.
14. Ki ifi nzila ye ñwi ye nde ka ku fitisisa ye lu kona ku likanyisa ka yona Jehova, mi ki kabakalañi?
14 Nzila ye ñwi ye nde ka ku fitisisa ye lu kona ku likanyisa ka yona Jehova ki ku bonisa lilato. (1 Joa. 4:16-19) Mane lilato le lu bonisana mwahalaa luna li lu zibahaza ku ba balutiwa ba Jesu ni batanga ba Jehova. (Joa. 13:34, 35) Bakeñisa kuli ha lu si ka petahala, ku kona ku lu bela taata ku bonisa lilato ka linako ze ñwi. Kono lu swanela ku lika ku bonisa lilato ka nako kaufela. Ku ikataza ku bonisa lilato ni tulemeno to tuñwi twa Sikreste ku ka lu tusa ku ambuka sibi ni lika ze maswe.—2 Pit. 1:5-7.
15. Haiba lwa lata batu ba bañwi, lu ka ba nga cwañi?
15 Lilato li lu susueza ku ezeza batu ba bañwi lika ze nde. (Maro. 13:8-10) Ka mutala, haiba mutu ni musalaa hae ba latana, ba ka zwelapili ku sepahala yo muñwi ku yo muñwi. Haiba lwa lata baana-bahulu ni ku ba kuteka bakeñisa musebezi o ba eza, lu ka latelela zamaiso ya bona. Bana ba ba lata bashemi ba bona ba ba kutekanga ni ku ba utwa mi ha ba bulelangi ze maswe ka za bashemi bao. Haiba lwa lata batu ba bañwi, ha lu na ku nahana kuli haki ba butokwa ku lu fita kamba ku bulela ni bona ka kashwau. (Jak. 3:9) Mi baana-bahulu ba ba lata lingu za Mulimu ba ka li eza ka musa.—Lik. 20:28, 29.
16. Lilato li lu tusa cwañi mwa bukombwa?
16 Hape lu swanela ku bonisa lilato ha lu li mwa bukombwa. Bakeñisa kuli lu lata hahulu Jehova, ha lu na ku zwafa batu ba bañwi ha ba sa lu teelezi kamba ku tabela lushango lo lu ba iseza. Kono lu ka zwelapili ku kutaza taba ye nde. Lilato li ka lu susueza ku itukiseza hande bukombwa ni ku lu tusa ku ba baluti ba bande ba Linzwi la Mulimu. Haiba luli lwa lata Mulimu ni batu, ha lu na ku kutaleza feela mulao. Kono lu ka nga musebezi wa ku kutaza sina tohonolo ye tuna mi lu ka u eza ka tabo.—Mat. 10:7.
MU ZWELEPILI KU KANYISA JEHOVA
17. Bakeñisa kuli lwa utwisisa kuli sibi si lu tibela ku benyisa kanya ya Mulimu, kiñi ze lu swanela ku eza?
17 Batu ba bañata mwa lifasi ha ba ngi sibi ku ba nto ye tuna. Kono luna lwa ziba kuli sibi ki nto ye tuna. Ka lona libaka leo, lwa ziba kuli lu swanela ku lwanisa mukwa wa luna wa ku bata ku eza sibi. Hape lu swanela ku twaeza lizwalo la luna kuli li lu tuse ku eza ze lukile lu sa kala feela ku nahana za ku eza bumaswe.—2 Makor. 12:10.
18, 19. (a) Ki nto mañi ye lu tusa ku wina ndwa ye lu lwana ni Satani ni madimona a hae?(b) Lu swanela ku tundamena ku ezañi?
18 Haiba lu bata ku kanyisa Jehova, lu swanela ku lwanisa Satani ni madimona a hae. Lwa kona ku wina ndwa yeo ka tuso ya “musiko o kwanile wa lilwaniso, o zwa ku Mulimu.” (Maef. 6:11-13) Satani u eza mwa konela kaufela kuli a fiwe kanya ye swanela ku fiwa feela ku Jehova. Satani hape u lika ka taata ku sinya silikani sa luna ni Mulimu. Ki lona libaka Satani ha swabile hahulu ha bona kuli luna ni batanga ba Mulimu ba bañwi kaufela ba ba si ka petahala ili baana, basali, ni banana lu zwelapili ku sepahala ni ku kanyisa Mulimu. Kamukwaocwalo, ha lu zweleñipili ku lumbeka Jehova sina libupiwa za lihalimu ze li: “Wa swanela, wena Jehova Mulimu wa luna, ku fiwa kanya ni likute ni maata, kakuli ne u bupile linto kaufela, mi ki kabakala tato ya hao ha ne li bile teñi ni ha ne li bupilwe.”—Sin. 4:11.
19 Haike lu zweleñipili ku ba ni takazo ye tuna ya ku zwelapili ku kanyisa Jehova. Mulimu u tabanga hahulu ha bona batanga ba hae ba bañata ha ba eza mo ba konela kaufela ku mu likanyisa ni ku benyisa kanya ya hae. (Liprov. 27:11) Lu swanela ku ikutwa sina Davida ya naa lumbekile Jehova ka pilu ya hae kaufela ni ku opela kuli: “Ni ka lumba Libizo la hao kamita ni mita.” (Samu 86:12) Batu ba ba ipeya ku utwa ba ka benyisa kanya ya Jehova ni ku mu lumbeka ku ya ku ile! Ku ka tabisa hahulu ku pila ka nako yeo. Kana mwa benyisa kanya ya Jehova Mulimu ka nako ya cwale ka mulelo wa ku eza cwalo ku ya ku ile?
[Lipuzo za Tuto]
[Maswaniso a fa likepe 27]
Kana mwa benyisa kanya ya Jehova mwa linzila ze?
