Lipuzo Ze Zwa Kwa Babali

Lifu la batanga ba Mulimu ba ba sepahala li babaleha cwañi mwa meeto a Jehova?

▪ Walisamu naa susumelizwe ki moya ku opela kuli: “Ki le li babaleha mwa meeto a Muñaa Bupilo lifu la ba hae ba ba kenile.” (Samu 116:15) Jehova u nga bupilo bwa balapeli ba hae kaufela ba niti ku ba bwa butokwa hahulu. Kono manzwi a kwa liñolo la Lisamu 116 ha talusi lifu la mutu a li muñwi.

Muzwale ha fa ngambolo ya ku hupula lifu la Mukreste ya shwile, ha swaneli ku itusisa liñolo la Samu 116:15 ku ama ku mutu ya shwile, nihaikaba kuli mutu yo naa shwile inze a li mutangaa Jehova ya sepahala. Ki kabakalañi? Kakuli taluso ya liñolo leo i ama ze ñata. Liñolo leo li talusa kuli Mulimu ha na ku tuhelela sikwata kaufela sa batanga ba hae ba ba sepahala kuli si shwe kakuli u ba nga ku ba ba butokwa.—Mu bale Samu 72:14; 116:8.

Liñolo la Samu 116:15 li lu kolwisa kuli Jehova ha na ku tuhelela sikwata sa batanga ba hae ba ba sepahala ku bulaiwa kaufela sona. Mane litaba ze lu ezahalezi mwa miteñi ya cwale li bonisa kuli lu tiyezi miliko ye mituna ni nyandiso, ili ku fa bupaki bwa kuli Mulimu ha na ku lu tuhelela kuli lu bulaiwe kaufela luna.

Bakeñisa kuli Jehova ki ya maata ote mi mulelo wa hae u tamehile ku petahala, Jehova ha na ku lu tuhelela kuli lu yundiswe sina sikwata. Mulimu ha naa ka lumeleza nto yeo ku ezahala, ne ku ka bonahala inge kuli lila za hae za mu fita kwa maata, ili nto ye sa konahali! Mulelo wa Mulimu wa kuli batu ba ba sepahala ba pile mwa lifasi le, ne u si ke wa talelezwa. Mi lwa ziba kuli mulelo wa Mulimu u ka petahala luli. (Isa. 45:18; 55:10, 11) Mane nihaiba sebelezo ye kenile ku Jehova ne i ka pala fa lifasi kambe ne ku si na batu ba ba mu lapela fa lifasi mwa tempele ya hae ya kwa moya! Ne ku si ke kwa ba ni batu ba ne ba ka to fumaneha mwa “lifasi le linca” ili lifasi la batu ba ba lukile ba ba ka pila mwatasaa “lihalimu le linca.” (Sin. 21:1) Mi hape Puso ya Lilimo ze Sikiti ya Jesu ne i si ke ya ba teñi bakeñisa kuli ne ku si ke kwa ba ni batu ba ne ba ka busiwa fa lifasi.—Sin. 20:4, 5.

Mayemo ni libizo la Mulimu le linde ne li ka kakanyiwa kambe na lumelelize lila za hae ku bulaya sikwata kaufela sa batanga ba hae fa lifasi. Ha naa ka lumeleza taba yeo ku ezahala, batu ne ba ka kakanya ka za haiba Jehova ki Mubusi wa Pupo Kamukana. Mi bakeñisa kuli Jehova u bata kuli batu ba mu kuteke ni ku kuteka libizo la hae, ha na ku lumeleza kuli batanga ba hae ba ba sepahala ba bulaiwe kaufela bona sina sikwata. Hape mu nyakisise taba ye: Bakeñisa kuli Jehova ki Mulimu “ya si na bumaswe,” ha na ku palelwa ku sileleza sikwata sa batu ba ba mu sebelelize ka busepahali. (Deut. 32:4; Gen. 18:25) Ku zwa fo, taba ya ku tuhelela batanga ba hae ku bulaiwa sina sikwata ne i ka shutana ni ze li bulela Linzwi la Mulimu ha li li: “Muñaa Bupilo ha na ku hana sicaba sa hae, kabakala Libizo la hae le lituna.” (1 Sam. 12:22) Kaniti, “Muñaa Bupilo ha na ku tuhela sicaba sa hae, ha na ku yumba sanda sa hae simulamu.”—Samu 94:14.

Ku ziba kuli batu ba Jehova ha ba na ku yundiswa fa lifasi ki nto ye omba-omba luli! Ha lu ezeñi mo lu konela kaufela ku sepahala ku Mulimu ni ku sepa sepiso ya hae ye li: “Ha ku na silwaniso se si ezezwa wena se si ka konda; mi wa lilimi kaufela le li ka ku zekisa, u ka mu beya mulatu. Se, ki sanda sa batanga ba Muñaa Bupilo, ni litukelo za bona ze zwa ku na.”—Isa. 54:17.

[Manzwi a fa likepe 22]

Mulimu ha na ku lu tuhelela kuli lu bulaiwe kaufela luna