“Muñaa Bupilo A Nosi” U Kopanya Lubasi Lwa Hae

‘Na mi lapela kuli mu buluke buñwi bwa moya.’—MAEF. 4:1, 3.

MU KONA KU ALABA CWAÑI LIPUZO ZE?

Ki ufi mulelo wa zamaiso ya Mulimu?

Lu ‘buluka cwañi buñwi bwa moya’?

Kiñi ze ka lu tusa kuli lu “ezane ka sishemo”?

1, 2. Mulelo wa Jehova ka za lifasi ni batu ki ufi?

L UBASI. Mu nahanangañi ha mu utwa linzwi leo? Kana mu nahananga za lilato ni tabo? Kana mu nahananga za ku sebeza hamoho sina lubasi ilikuli mu pete sikonkwani se mu itomezi? Kamba mu nahananga za ku hulela mwa sibaka se si silelelizwe, ku ituta ni ku ambola ka za maikuto a mina? Mwendi mwa kona ku nahananga lika ze cwalo haiba mu na ni lubasi lo lu mi iseza pilu. Jehova ki yena musimululi wa lubasi. (Maef. 3:14, 15) Mulelo wa Mulimu ne li wa kuli mangeloi ni batu ba ba pila fa lifasi ba be lubasi lu lu luñwi, ni kuli ne li ka ikutwa ku ba mwa silelezo, ku sepana mane ni ku swalisana.

² Bo Adama ni Eva ha se ba ezize sibi, batu ne ba tuhezi ku ba kalulo ya lubasi lwa Mulimu. Kono muinelo wo ne u si ka cinca mulelo wa Mulimu. U ka bona teñi kuli mwa Paradaisi ya fa lifasi kwa tala bana ba Adama ni Eva. (Gen. 1:28; Isa. 45:18) Mulimu u lukisize lika kaufela ze tokwahala ilikuli mulelo wa hae u kone ku petahala. Litaba ze ñata ze mwa buka ya Maefese li bulela ka za swalisano. Mwa buka yeo, lwa kona ku bala hape ka za milelo ya Jehova. Ha lu nyakisiseñi litimana za mwa buka yeo kuli lu itute mo lu kona ku swalisanela ni mulelo wa Jehova wa ku kopanya mangeloi ni batu ba ba pila fa lifasi sina lubasi.

ZE I PETA ZAMAISO

3. Zamaiso ya Mulimu ye bulezwi kwa Maefese 1:10 ki nto mañi, mi kalulo ya pili ya litukiso zeo ne i kalile lili?

³ Mushe naa bulelezi Maisilaele kuli: “Muñaa Bupilo Mulimu wa luna, ki Yena Muñaa Bupilo a nosi.” (Deut. 6:4) Za peta Jehova kaufela li swalisana ni mulelo wa hae. Mulimu a kala ku lukisa kuli mangeloi ni batu ba swalisane sina lubasi lu lu luñwi. Naa bizize litukiso zeo kuli ki ‘zamaiso.’ (Mu bale Maefese 1:8-10.) Mwa zamaiso yeo ku na ni likalulo ze peli. Kalulo ya pili: Mulimu naa lukisize kuli batoziwa ba yo pila kwa lihalimu ili ko ba ka yo  zwelapili ku sebeza mwatasaa zamaiso ya Jesu Kreste. Jehova naa kalile ku kopanya ba ba ka busa ni Kreste mwa lihalimu ka ku ba toza ka moya, mi naa kalile ku eza cwalo fa Pentekota ya 33 C.E. (Lik. 2:1-4) Kabakala sitabelo sa Kreste, Mulimu u zibahaza ba ba tozizwe kuli ba lukile mi ba swanelwa ki bupilo. Bakreste ba ba tozizwe ba ziba kuli ba añuzwi sina “bana ba Mulimu.”—Maro. 3:23, 24; 5:1; 8:15-17.

4, 5. Ki ifi kalulo ya bubeli ye eziwa ki zamaiso?

⁴ Kalulo ya bubeli: Mulimu u tusa batu kuli ba itukiseze ku to pila mwa Paradaisi fa lifasi. Ba amuhela zamaiso ya Mubuso wa Mesia o kopanyeleza Kreste ni Bakreste ba ba tozizwe ba ba ka pila mwa lihalimu. “Buñata bo butuna” bwa batu i ka ba bona ba pili ku pila mwa Paradaisi. (Sin. 7:9, 13-17; 21:1-5) Mi mwahalaa lilimo ze sikiti za ku busa kwa Kreste, bolule-lule ba batu ba ka zusiwa kwa bafu ni ku pila fa lifasi ni buñata bo butuna. (Sin. 20:12, 13) Mu nahane mo matohonolo ao e lu ka ba ni ona a ka boniseza kuli lu batu ba ba swalisani! Buñata bo butuna ni batu bao ba ba ka zusiwa kwa bafu ba ka ba “linto ze mwa lifasi.” Kwa mafelelezo a lilimo ze sikiti, batu bao ba ka likiwa. Batu kaufela ba ba sepahala ba ka añulwa sina “bana ba Mulimu” ba fa lifasi.—Maro. 8:21; Sin. 20:7 8.

⁵ Jehova kacenu u sweli ku tusa ba ba tozizwe kuli ba itukiseze ku yo pila kwa lihalimu, mi u tusa ba lingu ze ñwi kuli ba itukiseze ku to pila mwa Paradaisi fa lifasi. Kono mañi ni mañi wa luna u kona ku swalisana cwañi ni zamaiso ya Mulimu?

‘MU BULUKE BUÑWI BWA MOYA’

6. Ki mañolo afi a bonisa kuli Bakreste ba lukela ku kopananga hamoho?

⁶ Bibele i bonisa kuli Bakreste ba swanela ku kopananga hamoho. (1 Makor. 14:23; Maheb. 10:24, 25) Kono kuli lu swalisane, lu lukela ku eza ze ñata ku fita feela ku kopana mwa sibaka se si swana inge mo ba ezezanga batu ba ba yanga kwa musika kamba kwa libuhelo la mbola. Lwa kona ku swalisana haiba lu sebelisa za lu luta Jehova ni ku lumeleza moya wa hae ku lu tusa kuli lu be batu ba bande.

7. Lu kona ku sebelisa cwañi kelezo ya “ku buluka buñwi bwa moya”?

⁷ Bakeñisa kuli lu na ni tumelo mwa sitabelo sa Kreste se si liulula, Jehova u lunga sina batu ba ba lukile, kamba sina bana ba hae haiba lu Bakreste ba ba tozizwe, kamba u lu nga sina balikani ba hae haiba lu ba lingu ze ñwi. Kono ha lu nze lu pila mwa lifasi le, ku ka banga ni linako ze ñwi ze lu si ke lwa lumelelananga ni batu ba bañwi. (Maro. 5:9; Jak. 2:23) Kona libaka Bibele ha i lu bulelela kuli lu be ni pilu-telele ku ba bañwi. Kono lu swanela ku ezañi kuli lu swalisane ni mizwale ni likaizeli ba luna? Lu swanela ku ituta ku ba ni “buikokobezo ni bunolo” mi seo si talusa kuli lu swanela ku ikokobeza ni ku ba ba ba lukile. Paulusi naa bulezi kuli lu lukela ku sebeza ka taata kuli lu be ni kozo ni swalisano ha naa bulezi kuli lu like ka taata ku “buluka buñwi bwa moya ka kozo ye tamahanya.” (Mu bale Maefese 4:1-3.) Nzila ye ñwi ye lu kona ku sebelisa ka yona kelezo ki ha lu lumelela moya wa Mulimu ku lu tusa ku cinca miezezo ya luna ya lika ni ku lu tusa kuli lu bonise muselo wa moya, kamba tulemeno to tu tiswa ki moya wa Mulimu. Hape ha lu swaneli ku eza misebezi ya nama, kamba lika za toile Mulimu. Muselo wa moya u lu tusa ku tatulula butata mwahalaa luna ni ba bañwi. Moya o cwalo u ka lu tusa ku ba ni swalisano. Kono misebezi ya nama ya lu kauhanya.

8. Misebezi ya nama i kona ku kauhanya cwañi batu?

⁸ Misebezi ya nama i kauhanya cwañi batu? (Mu bale Magalata 5:19-21.) Buhule bu kona ku tahisa kuli mutu ya bu eza a kauhane ni Jehova ni puteho. Bubuki bu tahisanga masitapilu kwa mabasi, mi bu kauhanyanga bana kwa bashemi ba bona, ni ku tahisa kuli muuna kamba musali ya foselizwe a kauhane ni mutu ya nyalani ni yena. Mutu wa mikwa ye masila u kona ku fumana taata ku swalisana ni Mulimu hamohocwalo  ni ba ba lata Mulimu. Haiba mu bata ku kopanya lika ze peli ka ku itusisa silamateliso, lika ze peli zeo li swanela ku ba ze kenile kuli li kone ku lamatelana. Mutu ya sa swabeli bufosi u bonisa kuli ha utwi milao ya Mulimu mi ha kuteki milao yeo ni hanyinyani. Misebezi ye miñwi ya nama i kauhanya batu ni ku ba zwisa ku Mulimu. Jehova u toile likezo ze cwalo.

9. Ki lipuzo mañi ze lu kona ku ipuza kuli lu zibe haiba lu sebeza ka taata kuli lu bukeleze kozo ni swalisano?

⁹ Mañi ni mañi wa luna u swanela ku ipuza kuli: ‘Kana na sebezanga ka taata kuli ni bukeleze kozo ni swalisano ni mizwale ni likaizeli ba ka? Ni kona ku eza cwañi haiba ni shelani ni mutu yo muñwi? Kana ni bulelelanga balikani ba ka ba bañata ka za butata bwa ka ni ku lika ku iponahalisa kuli na ha ni na mulatu? Kana ni libelelanga kuli baana-bahulu ba ni tatululele butata bo ili ku ambuka ku ikambota ni mutu ye ni shelani ni yena kuli lu bukeleze kozo? Mi haiba na ziba kuli mutu yo muñwi u ni foselize, kana na mu picukanga kuli lu si ke lwa tatulula butata?’ Haiba ne lu ezize cwalo, kana lu bonisa kuli lwa swalisana ni mulelo wa Jehova wa ku swalisanisa batu kaufela sina lubasi lu lu luñwi lo lu busiwa ki Kreste?

10, 11. (a) Ki kabakalañi ha kuli kwa butokwa ku bukeleza kozo ni mizwale ba luna? (b) Lu swanela ku ezañi kuli lu bukeleze kozo ni kuli Jehova a lu fuyaule?

¹⁰ Jesu naa bulezi kuli: “Cwalehe ha u tisa mpo ya hao kwa aletare mi ha u li kwateñi u hupula kuli mwanahenu wa ku bilaela, u siye mpo ya hao fapilaa aletare, mi u ye. Pili u yo kutisana pilu ni mwanahenu, mi cwale ha se u kutile, u fe mpo ya hao. U pakise ku tatulula litaba.” (Mat. 5:23-25) Jakobo naa ñozi kuli, “Peu ya muselo wa ku luka i calelwa mwa kozo mwahalaa ba ba batiseza ba bañwi kozo.” (Jak. 3:17, 18) Taba yeo i bonisa kuli ha lu koni ku zwelapili ku eza ze lukile haiba ha luna kozo ni batu ba bañwi.

¹¹ Ka mutala, mwa linaha ze ñwi mo se ku bile ni lindwa, buñata bwa mubu wa naha ha u limiwi bakeñisa kuli ne ku cezwi limbomba. Mbomba ha i tunya, balimi ba sabanga ku lima fa mubu o cwalo, mi ku banga taata kuli batu ba fumane misebezi mwa mahae ni ku fumana lico mwa litolopo. Ka nzila ye swana, ku taata ku luna ku zwelapili ku bonisa hande tulemeno twa Sikreste haiba butu bwa luna bu lu tahiseza ku sa pila mwa kozo ni ba bañwi. Haiba kuli ki mona mo bu inezi butu bwa luna, lu ka swana sina limbomba, mi lu tokwa ku cinca butu bwa luna. Haiba lu swalelanga ba bañwi ni ku ba ezeza lika ze nde, lu ka ba ni kozo mi Jehova u ka lu fuyaula.

12. Baana-bahulu ba kona ku lu tusa cwañi kuli lu be ni buñwi?

¹² Baana-bahulu ba Sikreste ba lu tusa ku “ba mwa buñwi bwa tumelo.” (Maef. 4:8, 13) Seo si talusa kuli baana-bahulu ba tusa puteho ku ba mwa buñwi. Ba lu tusa ku bonisa butu bwa Sikreste ka ku sebeza ni luna  mwa sebelezo ya luna ku Jehova, ni ka ku lu fa kelezo ku zwelela mwa Bibele. (Maef. 4:22-24) Baana-bahulu ha ba mi fa kelezo, mu hupulange kuli Jehova u itusisa bona kuli ba mi tuse ku itukiseza ku yo pila mwa lifasi le linca. Baana-bahulu, mu bonange teñi kuli mwa fa ba bañwi kelezo ka nzila ye bonisa kuli mu bata ku ba tusa.—Magal. 6:1.

“MU EZANE KA SISHEMO”

13. Ku kona ku ezahalañi haiba lu sa sebelisi kelezo ye kwa Maefese 4:25-32?

¹³ Liñolo la Maefese 4:25-29 li lu bulelela lika ze ñwi ze lu sa swaneli ku eza. Lika zeo ki ze cwale ka ku bulela buhata, ku filikana hahulu, ku ba ni buzwa, ni ku bulela lika ze maswe. Kono lu swanela ku bulelanga lika ze nde ni ze susueza. Mutu ufi kamba ufi ya sa sebelisi kelezo ye, u ikauhanya kwa batu ba bañwi. U ka “swabisa moya o kenile wa Mulimu,” ili ona o swalisanisa batu. (Maef. 4:30) Kuli lu be ni kozo ni buñwi, lu swanela ku sebelisa kelezo ya Paulusi ye li: “Mu zwise ku mina mufuta kaufela wa ze baba, buhali, mabifi, ku tatauka, ni lipulelo ze maswe, ni nto ifi kamba ifi ye holofaza. Kono mu ezane ka sishemo, mu be ni mukekecima yo muñwi ku yo muñwi, mu nze mu swalelana ka pilu kaufela sina Mulimu ni yena ha mi swalezi ka pilu kaufela ka Kreste.”—Maef. 4:31, 32.

14. (a) Pulelo ya kuli “mu ezane ka musa”i talusañi?(b) Ki li ka mañi ze ka lu tusa ku ba ni musa ku ba bañwi?

¹⁴ Pulelo ye li “mu ezane ka musa” i talusa kuli ka linako ze ñwi mwendi ha lu ezangi ka musa, i lu tusa kuli lu tokwa ku bonisanga musa hahulu. Lu swanela ku hupulanga kuli ki kwa butokwa ku kutekanga hahulu maikuto a ba bañwi ku fita a luna. (Mafil. 2:4) Fokuñwi lu kana lwa bata ku bulela nto ye ka sehisa ba bañwi kamba nto ye ka tahisa kuli ba bañwi ba lu bone kuli lu na ni butali. Kono haiba nto ye lu bata ku bulela yeo haki ye musa, ne ku ka ba hande ku sa i bulela. Haiba lu hupulanga ze lu bata ku bulela pili lu si ka bulela kale, lu ka bonisa ba bañwi musa.

MU ITUTE KU LATANA NI KU KUTEKANA MWA LUBASI

15. Liñolo la Maefese 5:28 li tusa cwañi baana ku utwisisa mo ba swanela ku likanyiseza Kreste?

¹⁵ Bibele i bapanya silikani sa na ni Kreste ni puteho kwa silikani se si fumaneha mwahalaa muuna ni musalaa hae. Mutala wa Kreste u tusa muuna ku utwisisa kuli u swanela ku etelela, ku lata musalaa hae mane ni ku mu babalela. Mutala wa Kreste hape u kona ku tusa musali ya nyezwi ku utwisisa kuli u swanela ku ipeya kwatasaa muuna hae. (Maef. 5:22-33) Paulusi ha naa ñozi kuli: “Kamukwaocwalo baana ba swanela ku lata basali ba bona sina mo ba latela mibili ya bona,” naa talusa ku ba lata ‘kamukwaufi’? (Maef. 5:28) Za naa bulezi Paulusi ka za Jesu ni puteho li lu tusa ku alaba puzo yeo. Naa bulezi kuli Kreste naa latile puteho mi naa file bupilo bwa hae bakeñisa yona mi naa i kenisize “ka ku i tapisa ka mezi a linzwi la Mulimu.” Muuna u na ni buikalabelo bwa ku tusa yo muñwi ni yo muñwi mwa lubasi lwa hae ku ba ni silikani se sinde ni Jehova. Muuna ha eza cwalo u bonisa kuli wa lumelelana ni mulelo wa Jehova wa ku swalisanisa batu kaufela kuli ba be lubasi lu lu luñwi lo lu buswa ki Kreste.

16. Ku ka ezahalañi haiba bashemi ba peta buikalabelo bwa ba file Jehova?

¹⁶ Bashemi ba swanela ku hupulanga kuli Jehova u ba file buikalabelo bwa ku babalela bana ba bona. Ki bumai kuli batu ba bañata mwa lifasi kacenu ha ba na “lilato la taho.” (2 Tim. 3:1, 3) Bashemi ba bañata ba baana ba itibazanga buikalabelo bwa bona, mi nto yeo i tahisanga muinelo o maswe kwa bana ba bona, mane hape bana ba ikutwanga butuku kwa pilu haiba bashemi ba bona ba eza cwalo. Paulusi naa bulelezi bashemi ba baana ba Sikreste kuli: “Mu si ke mwa halifisa bana ba mina, kono mu zwelepili ku ba hulisa ka kalimelo ni kelezo ya Jehova.” (Maef. 6:4) Ki mwa lubasi mo bana ba kalanga ku ituta ku bonisa lilato  ni ku kuteka zamaiso. Bashemi ba ba luta bana ba bona tulemeno to tu cwalo ba swalisana ni mulelo wa Jehova wa ku swalisanisa batu kaufela. Bashemi ba swanela ku bona teñi kuli bana ba ikutwa ku latiwa mwa lubasi. Bashemi ba swanela ku ba ni buiswalo ka ku sa halifanga hahulu, ku sa yukaukelanga bana ba bona, ni ku sa ba shendanga. Ha ba eza cwalo, ba luta bana ba bona lituto za butokwa za mo ba swanela ku boniseza lilato ni ku kutekela zamaiso. Bashemi ha ba eza cwalo ba ka tusa bana ba bona ku itukiseza ku to pila mwa lifasi le linca.

17. Lu tokwa ku ezañi kuli lu lwanise Diabulosi?

¹⁷ Lu swanela ku hupulanga kuli ku zwa feela kwamulaho, Diabulosi u zwezipili ku lika ku tuhelisa batu ba bañwi ku sebeleza Mulimu ni kuli u ka eza mwa konela kaufela kuli a lu tuhelise ni luna. Batu ba bañata mwa lifasi ba eza lika za bata Diabulosi kuli ba eze, ba eza cwalo ka ku kauhana ni bakubona, ku pila ni muuna kamba musali ye ba si ka nyalana ni yena, ni ku kena mwa manyalo a kalombe. Kono luna ha lu likanyisi mizamao ye ba nga batu kuli i lukile mwa lifasi kacenu. Lu likanyisa Kreste. (Maef. 4:17-21) Kuli lu lwanise Diabulosi ni badimona ba hae, lu tokwa ku ‘apala musiko o kwanile wa lilwaniso, o zwa ku Mulimu.’—Mu bale Maefese 6:10-13.

“MU ZWELEPILI KU ZAMAYA MWA LILATO”

18. Lu swanela ku ba ni nto mañi kuli lu swalisane?

¹⁸ Lu swanela ku ba ni lilato haiba lu bata ku swalisana. Lu lata hahulu “mulena a li muñwi,” Jesu Kreste; ni “Mulimu a li muñwi,” Jehova, mi ku zwa fo hape lwa latana sina batu. Lilato leo li lu tusa kuli lu zwelepili ku ikola kozo ni swalisano. (Maef. 4:3-6) Jesu naa lapezi ka za lilato le li cwalo, naa ize: “Ha ni kupeli bona feela, kono ni kupela ni ba ba lumela ku na ka linzwi la bona; kuli kaufelaa bona ba be a li muñwi.” Hape naa bulezi kuli: “Ni zibahalize libizo la hao ku bona mi ni ka li zibahaza, kuli lilato le u ni latile ka lona li be ku bona ni na ni swalisane ni bona.”Joa.17:20, 21, 26.

19. Mu ikatulezi ku ezañi?

¹⁹ Ku kana kwa ba taata kuli lu cince butu bwa luna, kono lilato li swanela ku lu susueza ku lapela mwa naa lapelezi walisamu kuli: “U ise pilu ya ka kwa ku saba Libizo la hao.” (Samu 86:11) Lu swanela ku ikatulela ku lwanisa Diabulosi haiba a lika ku lu kauhanya ku Ndataa luna ya lilato ni kwa mizwale ni likaizeli ba luna. Mi lu swanela ku sebeza ka taata kuli lu ‘likanyise Mulimu, sina bana ba ba latwa, mi lu zwelepili ku zamaya mwa lilato’ ha lu li mwa lubasi, mwa bukombwa, ni mwa puteho.—Maef. 5:1, 2.

[Lipuzo za Tuto]

[Siswaniso se si fa likepe 29]

Ha mano siya mpo ya hae fa aletare, wa ya kuli a yo kutisana pilu ni mwanahabo yena

[Siswaniso se si fa likepe 31]

Bashemi, mu lute bana ba mina kuli ba bonise likute