Mu sebeleze Mulimu Ya Fa Tukuluho

“Kakuli se ki sona se si taluswa ki ku lata Mulimu, kuli lu mamele milao ya hae; mi niteñi milao ya hae ha i imezi.”—1 JOA. 5:3.

KANA MWA KONA KU ALABA?

Satani u bata kuli lu nahaneñi ka za milao ya Mulimu?

Ki kabakalañi ha lu swanela ku keta balikani ba luna ka tokomelo?

Ki nto mañi ye ka lu tusa ku zwelapili ku sepahala ku Mulimu ya lu fa tukuluho?

1. Jehova u itusisanga cwañi tukuluho ya hae, mi ki tukuluho mañi ya naa file bo Adama ni Eva?

KI JEHOVA feela ya na ni tukuluho ye tuna ka ku fitisisa. Kono u itusisanga hande tukuluho ya hae ka nako kaufela. Mi ha zamaisangi lika kaufela ze ba ezanga batanga ba hae. Kono u file batu tukuluho ya ku ikezeza likatulo ni ku eza lika ze kona ku kolwisa litakazo za bona ze swanela. Ka mutala, Mulimu naa bulelezi Adama ni Eva nto iliñwi feela ye ne ba sa swaneli ku eza. Naa ba bulelezi kuli ba si ke ba ca kwa “kota ya ku ziba bunde ni bumaswe.” (Gen. 2:17) Kamukwaocwalo bo Adama ni Eva ne ba kona ku eza tato ya Mulimu mi hape ni ku ba ni tukuluho ye ipitezi!

2. Ki kabakalañi bo Adama ni Eva ha ne ba bile batanga ba sibi?

² Ki kabakalañi Mulimu ha naa file bashemi ba luna tukuluho ye tuna? Bakeñisa kuli Jehova naa ba file lizwalo mi naa ba bupile ka siswaniso sa hae. Jehova naa tokwa kuli Adama ni Eva ba eze ze lukile bakeñisa kuli ne ba mu lata ka ku ba Mubupi wa bona. (Gen. 1:27; Maro. 2:15) Ka bumai, Adama ni Eva ne ba si ka itebuha tukuluho ya naa ba file Mubupi wa bona. Kono ne ba ikatulezi ku iketela ze lukile ni ze si ka luka. Ne ba nahana kuli ku eza cwalo ne ku ka ba fa tukuluho ye tuna, kono niti kikuli keto ye ne ba ezize ne i tahisize kuli bona ni bana ba bona ba be batanga ba sibi ili nto ye tahisize manyando ni lifu.—Maro. 5:12.

3, 4. Satani u bata kuli lu nahaneñi ka za milao ya Mulimu?

³ Haiba Satani naa kona ku kukueza batu ba babeli ba ba petahalile ni mangeloi a mañata kuli a hane puso ya Mulimu, mu zibe ni luna wa kona ku lu kukueza. Satani u sa zwelapili ku lu kukueza ka nzila ye swana. U bata ku lu nahanisa kuli milao ya Mulimu i taata ku i latelela. Satani u bata ku lu nahanisa kuli haiba lu sebeleza Mulimu, ha lu na ku ba ni tabo mwa bupilo. (1 Joa. 5:3) Batu mwa lifasi ba nahananga cwalo, mi haiba lu tandanga nako ye ñata ni bona, lu kana lwa kalisa ku nahananga inge bona.  Kaizeli ya na ni lilimo ze 24 naa bulezi kuli naa kukuelizwe hahulu ki balikani ba ba maswe. Kaizeli yo na saba ku ba ni mubonelo o shutana ni wa litaka za hae. Bakeñisa sabo yeo, kaizeli yo naa ezize buhule. Mwendi ni mina se mu lemuhile kuli balikani ba kona ku lu kukueza hahulu.

⁴ Ka bumai, batu ba bañwi mwa puteho ya Sikreste ba kona ku lu kukueza ku eza lika ze maswe. Muzwale yo muñwi wa mukulwani naa bulezi kuli balikani ba hae ba bañwi mwa puteho ne ba keni mwa libato ni batu be ne ba sa sebelezi Jehova. Bakeñisa kuli naa tandanga nako ye ñata ni balikani ba hae ba, ni yena a ba inge bona. Naa bulezi kuli: “Silikani sa ka ni Jehova ne si fokozi. Ne ni sa ikolangi mikopano, mi mane ne se ni tuhezi ku yanga mwa simu. Ka nako yeo na lemuha kuli ne ni tokwa ku tuhela ku tandanga nako ni balikani bao, mi na eza cwalo!” Kana mwa bona mo ba kona ku mi kukueleza balikani ba mina? Mu nyakisise mutala wa mwa Bibele o kona ku lu tusa kacenu.—Maro. 15:4.

NAA HAPILE LIPILU ZA BONA

5, 6. Abisalomi naa pumile cwañi batu, mi kana mulelo wa hae ne u kondile?

⁵ Mwa Bibele ku na ni mitala ye miñata ya batu ba ne ba susuelize batu ba bañwi ku eza lika ze maswe. Yo muñwi wa batu bao ki Abisalomi, mwanaa Mulena Davida. Abisalomi ne li mutu ya na buheha hahulu. Ka ku swana ni Satani, naa lumelelize takazo ye maswe ku hula mwa pilu ya hae. Nihaike kuli naa sina tukelo ya ku ba mulena, Abisalomi naa bata kuli yena a be mulena isiñi bo ndatahe. * Kuli a like ku peta mulelo wa hae, Abisalomi a kolwisa batu kuli naa bata ku ba tusa mi a ba bulelela kuli mulena naa sa bati ku ba tusa. Sina feela mwa naa ezelize Satani mwa simu ya Edeni, Abisalomi naa kolwisize batu ku nahana kuli yena naa ba babalela mi ka nako ye swana a bulela buhata bo butuna ka za ndatahe.—2 Sam. 15:1-5.

⁶ Kana mulelo wa Abisalomi ne u kondile? Lwa ziba kuli ne u batile ku konda kakuli Bibele i bulela kuli “Abisalomi a hapa lipilu za bana ba Isilaele.” (2 Sam. 15:6) Abisalomi naa pumile batu ba bañata, kono kwa mafelelezo naa tuzwi. Bakeñisa ku ikuhumusa kwa hae, Abisalomi ni batu ba bañata ba naa pumile ne ba shwile.—2 Sam. 18:7, 14-17.

7. Lu kona ku itutañi kwa mutala wa Abisalomi? (Mu bone siswaniso se si fa likepe 14.)

⁷ Ki kabakalañi ha ne kuli ko ku bunolo ku Abisalomi ku puma Maisilaele bani? Mwendi ki ka bakeñisa kuli Maisilaele bao ne ba lakaza lika za naa ba sepisize Abisalomi. Kamba mwendi ne ba pumilwe bakeñisa ku buheha kwa Abisalomi. Ku si na taba ni ze ne tahisize kuli ba pumiwe, lwa kona ku kolwa taba ye: Ne ba sa sepahali ku Jehova ni ku mulena ya naa ketilwe ki Jehova. Satani u zwelapili ku itusisa batu ba ba swana ni Abisalomi kuli a pume batanga ba Jehova. Batu bao ba kona ku bulela kuli milao ya Mulimu i taata ku i latelela kamba kuli batu ba ba sa sebelezi Jehova ba ikola bupilo. Ha mu utwa litaba ze cwalo, kana mu ka lemuha kuli ki za buhata, ni ku zwelapili ku sepahala ku Mulimu? Kana mu ka lemuha kuli ki “mulao o petehile” feela wa Jehova, ona mulao wa Kreste o kona ku lu fa tukuluho ya niti? (Jak. 1:25) Haiba mwa lemuha cwalo, mu bonise kuli mwa lata mulao wo, mi mu itusise tukuluho ya mina ka nzila ye tabisa Jehova.—Mu bale 1 Pitrosi 2:16.

8. Ki mitala mañi ye bonisa kuli ku sa mamela milao ya Jehova ha ku tahisezi mutu tabo?

⁸ Satani sihulu u bata ku puma ba banca. Muzwale ya saa na ni lilimo ze fitelela 30 naa bulezi kuli ha naa sa nonoboka, na sa nahanangi kuli milao ya Jehova ne i mu sileleza. Naa ikutwanga kuli na si na tukuluho. Bakeñisa maikuto ao, muzwale yo a eza buhule. Kono ku eza cwalo ne ku si ka mu tahiseza tabo. A ikutwa ku ba ni mulatu o mutuna hahulu mi naa zwezipili ku  inyaza ka lilimo ze ñata. Kaizeli yo muñwi ya naa ezize buhule ha na sa nonoboka naa ñozi kuli hasamulaho wa nako naa ikutwile maswabi ni ku ikutwa ku sa ba wa butokwa. Kaizeli yo u zwelapili ku bulela kuli: “Nihaiba hamulaho wa lilimo ze 19, ni sa hupulanga likezo ze maswe ze ne ni ezize.” Kaizeli yo muñwi naa bulezi kuli: “Ku nahana kuli muzamao wa ka o maswe ne u utwisize butuku batu be ni lata hahulu ne ku ni tahiselize ku ikutwa bumaswe, ku latehelwa ki tumelo, ni ku lembwala. Ki bumai bo butuna kuli mutu a pile a sa lumelelwi ki Jehova.” Satani ha tabelangi kuli mu nahanisisange ze maswe ze zwanga mwa ku eza sibi.

9. (a) Ki lipuzo mañi ze lu swanela ku ipuza ka za Jehova, milao ya hae, ni likuka za hae? (b) Ki kabakalañi ha ku li kwa butokwa ku ziba hande Mulimu?

⁹ Sina mo i boniseza mitala ye lu nyakisisize, ku sa utwa Mulimu ku tahisanga likozi ze tuna. Ki bumai kuli mikulwani ba bañata ba ba mwa niti, mane ni ba bahulu ba tilo lemuha muinelo wo ha se ba keni kale mwa kozi! (Magal. 6:7, 8) Mu ipuze kuli: “Kana na lemuha tushambwe twa itusisa Satani kuli a ni pume? Kana ni nga Jehova sina Mulikanaa ka yo mutuna ka ku fitisisa, ili Mulimu ya bulelanga niti kamita ni ya bata kuli ni kondise mwa bupilo? Kana na lumela luli kuli Mulimu ni kamuta ha koni ku ni tibela ku fumana ze nde mwa bupilo ili ze ka ni tahiseza tabo?” (Mu bale Isaya 48:17, 18.) Mu kona feela ku alaba kuli ee kwa lipuzo zeo haiba feela mwa ziba hande Jehova. Mu tokwa ku lemuha kuli milao ni likuka za mwa Bibele li bonisa kuli Jehova wa mi lata, isiñi kuli u bata ku mi amuha tukuluho ya mina.—Samu 25:14.

 MU KUPE MULIMU KULI A MI FE BUTALI NI PILU YE NA NI KUTWISISO

10. Ki kabakalañi ha lu swanela ku likanyisa za na ezize Mulena Salumoni ha naa sa li mwanana?

¹⁰ Salumoni ha na sa li mwanana, naa lapezi ka buikokobezo ku Jehova kuli: “Ni sa li mwanana fela; ha ni koni ku izamaisa, ku ya ni ku kuta.” Salumoni kihona a kupa Jehova kuli a mu fe butali ni pilu ye na ni kutwisiso. (1 Mal. 3:7-9, 12) Jehova naa alabile tapelo yeo ye ne zwelela kwa pilu. Haiba ni mina mu kupa Jehova kuli a mi fe butali ni kutwisiso, u ka alaba tapelo ya mina ku si na taba kuli mu banana kamba mu ba bahulu. Kono Jehova ha na ku mi fa butali honafo feela. Jehova u ka mi fa butali haiba mu cisehela ku ituta Linzwi la hae, ku kupanga moya o kenile, ni ku latelela ketelelo ni litaelo ze lu fiwanga kwa mikopano ya puteho. (Jak. 1:5) Jehova mane u tusanga nihaiba batanga ba hae ba mikulwani kuli ba be ni butali ku fita batu ba ba sa mu utwi, ili ku fita “ba ba butali ni ba ba itutile” ba mwa lifasi le.—Luka 10:21; mu bale Samu 119:98-100.

11-13. (a) Ki lituto mañi za butokwa ze lu kona ku ituta kwa mañolo a latelela, Lisamu 26:4, Liproverbia 13:20, ni 1 Makorinte 15:33? (b) Mu ka itusisa cwañi lituto zeo mwa bupilo bwa mina?

¹¹ Ha lu nyakisiseñi mañolo a mañwi a lu luta lituto za butokwa ka za balikani be lu keta ku ba ni bona. Ku eza cwalo ku ka lu tusa ku utwisisa libaka ha ku li kwa butokwa ku itutanga Bibele ni ku nahanisisanga ze lu bala ilikuli lu zibe hande Jehova. Liñolo la Lisamu 26:4 li bulela kuli: “Ha ni na taba ni ba lishano, Ha ni zamayangi ni ba ba ipa.” Kwa Liproverbia 13:20 lu bala kuli: “Ya kopana ni ba ba butali, ni yena u ka talifa; Kono ya twaelana ni matanya u ka utwa butuku.” Mi liñolo la 1 Makorinte 15:33 li bulela kuli: “Liango ze maswe li sinya mikwa ye minde.”

¹² Ki lifi lituto za butokwa ze lu kona ku ituta kwa mañolo ao? (1) Jehova u bata kuli lu ketange balikani ba luna ka tokomelo. U bata ku lu sileleza kuli lu si ke lwa eza nto ifi kamba ifi ye kona ku lu holofaza ni ku sinya bulikani bwa luna ni yena. (2) Balikani ba luna ba kona ku lu susueza ku eza lika ze nde kamba ze maswe. Litaba zeo luli ki za niti. Mo li ñolezwi litimana ze bonisizwe fahalimu ku bonisa mo Jehova a lu fitela kwa pilu. Mu lemuhe kuli litimana ze, li ñozwi ka nzila ye lu konisa ku li utwisisa, ha li swani inge milao ye cwale ka “u si ke wa eza cwana” kamba “u si ke wa eza cwalo.” Ku swana feela inge kuli Jehova u lu bulelela kuli: ‘Litaba ze ki za niti. Ki muhato ufi o mu ka nga? Ki lika mañi ze mu nahana?’

¹³ Kamukwaocwalo, bakeñisa kuli litimana ze taalu ze, li ñozwi ka mukwa o utwahala hande, li sa na ni tuso ni kacenu sina mo ne li inezi kwamulaho mi li kona ku tusa batu mwa miinelo ye shutana-shutana. Mu ipuze lipuzo ze swana sina ze: Ki mwa miinelo mañi mo ni kona ku kopana ni batu “ba ba ipa”? Ni kona ku ambuka cwañi ku eza silikani ni batu ba ba cwalo? (Liprov. 3:32; 6:12) Ki bo mañi batu “ba ba butali” ba bata Jehova kuli ba be balikani ba ka? Ki bo mañi batu ba “likuba” ba bata Jehova kuli ni si ke na eza siango ni bona? (Samu 111:10; 112:1; Liprov. 1:7) Ki ‘mikwa ifi ye minde’ ye ni ka sinya haiba ni keta balikani ba ba maswe? Kana “liango ze maswe” li fumaneha feela mwa lifasi? (2 Pit. 2:1-3) Mu kona ku alaba cwañi lipuzo zeo?

14. Mu kona ku eza cwañi kuli mu bange ni nako ye nde ya ku lapela sina lubasi?

¹⁴ Sina feela mo lu itutezi lituto za butokwa kwa mañolo e lu nyakisisize a malaalu, mwa kona ku bala mañolo a mañwi kuli mu utwisise mubonelo wa Mulimu fa litaba ze mu nga mina kamba lubasi lwa mina ku ba za butokwa. * Bashemi, mwa kona ku nyakisisa litaba ze mu nga ku ba za butokwa zeo ka Nako ya ku Lapela Sina Lubasi. Ha mu eza cwalo, mu hupule kuli mulelo wa mina ki wa ku tusa yo muñwi ni yo muñwi  mwa lubasi ku utwisisa kuli milao ni likuka za Mulimu li bonisa mwa lu latela Mulimu. (Samu 119:72) Ha mu ka itutanga cwalo sina lubasi, bulikani bwa mina ni Jehova ni swalisano ya mina mwa lubasi i ka tiya.

15. Mu kona ku ziba cwañi kuli se mu na ni butali ni kutwisiso?

¹⁵ Mu kona ku ziba cwañi kuli se mu na ni butali ni kutwisiso? Nzila ye ñwi ye kona ku mi tusa ki ku bapanyanga mubonelo wa mina ni wa batanga ba Jehova ba kwamulaho ba ne ba sepahala inge cwalo Mulena Davida. Davida naa ñozi kuli: “Se ni tabela, ki ku eza tato ya hao, Mulimu wa ka; E, mulao wa hao u mwa pilu ya ka.” (Samu 40:8) Hape muñoli wa Samu 119 naa bulezi kuli: “Hasi mo ni latela mulao wa hao! Na u nahana musihali kaufela.” (Samu 119:97) Mu swanela ku lika ka taata kuli mu be ni lilato le li cwalo. Lilato le li cwalo li kona ku hula haiba mu ituta Bibele ka ku isa hahulu pilu, ku lapelanga, ni ku yeyanga ze mu itutile. Hape lilato leo li kona ku hula haiba mu lemuha kuli ku utwa litaelo za Jehova mwa bupilo bwa mina ku kona ku mi tahiseza limbuyoti ze ñata.—Samu 34:8.

MU LWANELE TUKULUHO YA MINA YA SIKRESTE!

16. Haiba lu bata ku wina ndwa ya ku zwelapili ku ba ni tukuluho, lu swanela ku hupulangañi?

¹⁶ Ku zwa feela kwaikale, linaha li zwezipili ku lwanela tukuluho. Mu swanela ku itatela ku lwana ili kuli mu zwelepili ku ba ni tukuluho ye mu na ni yona ya ku ba Mukreste! Mu si ke mwa libala kuli Satani ni mubonelo o maswe wa mwa lifasi ha ki zona feela lila za mina. Mu swanela hape ku lwanisa ku sa petahala kwa mina ni ku lwanisa pilu ya mina ye kona ku mi puma. (Jer. 17:9; Maef. 2:3) Ka tuso ya Jehova, mwa kona ku wina ndwa yeo. Nako kaufela ha mu keta ku eza ze lukile, ku na ni lika ze nde ze peli kamba ku fitelela ze banga teñi. Nto ya pili kikuli mu ka tabisa pilu ya Jehova. (Liprov. 27:11) Nto ya bubeli kikuli nako kaufela ha mu ka lemuhanga kuli ku latelela “mulao o petehile wa tukuluho” ki nto ye nde, mu ka susuezwa ku zwelapili ku ba mwa nzila ye isa kwa bupilo bo bu sa feli. Mi kwapili mu ka ba ni tukuluho ye tuna yeo Jehova a sepisize batu kaufela ba ba sepahala ku yena.—Jak. 1:25; Mat. 7:13, 14.

17. Ki kabakalañi ha lu sa swaneli ku zwafa ha lu eza mafosisa, mi Jehova u ka lu tusa cwañi?

¹⁷ Ki niti kuli kaufela luna lwa fosanga fokuñwi. (Muek. 7:20) Mi seo ha si ezahala, mu si ke mwa zwafa kamba ku ikutwa ku sa ba wa butokwa. Haiba mu eza mafosisa, mu eze ze tokwahala kuli mu lukise mafosisa ao, nihaikaba kuli mu tokwa ku kupa tuso kwa baana-bahulu. Jakobo naa ñozi kuli “tapelo ye ezizwe ka tumelo i ka folisa ya kula, mi Jehova u ka mu zusa. Hape, haiba u na ni libi za ezize, u ka swalelwa.” (Jak. 5:15) Ni kamuta mu si ke mwa libala kuli Mulimu u sishemo mi naa bata kuli mu be mwa puteho kakuli naa lemuhile nto ye ñwi ye nde ku mina. (Mu bale Samu 103:8, 9.) Jehova u ka zwelapili ku mi tusa haiba feela mu eza ka mo mu konela kaufela ku mu sebeleza ka pilu kaufela.—1 Makol. 28:9.

18. Lu swanela ku ezañi kuli Jehova a lu sileleze?

¹⁸ Fa busihu bwa kuli habusa wa bulaiwa, Jesu naa lapezi ni baapositola ba hae ba 11 ba ba sepahala, mi naa kupile ndatahe kuli a ba sileleze. Mwa tapelo ya hae, Jesu naa bulezi manzwi a sa libalehi ha naa ize: “U ba sileleze kabakala ya maswe.” (Joa. 17:15) Sina feela Jesu mwa naa babalezi baapositola ba hae, ni kacenu u sa babalela balateleli ba hae kaufela. Kamukwaocwalo, lwa kona ku kolwa kuli Jehova u ka alaba tapelo ya Jesu ka ku lu sileleza mwa linako ze taata ze. Liñolo la Liproverbia 2:7, 8 li lu bulelela kuli Jehova u swana sina tebe kwa batu ba ba sepahala ku yena, mi “u libelela nzila ya ba ba ketilwe ki Yena.” Haki nto ye bunolo kamita ku utwa milao ya Jehova. Kono ki batu feela ba ba utwa Jehova ba ba ka fumana bupilo bo bu sa feli ni tukuluho ya niti. (Maro. 8:21) Batu ba bañwi ba kona ku ba ni mubonelo o shutana ni wa mina, kono mu si ke mwa ba tuhelela kuli ba mi pume!

[Litaluso za kwatasi]

[Lipuzo za Tuto]

[Maswaniso a fa likepe 14]

Lu kona ku ziba cwañi batu ba ba swana sina “Abisalomi” mwa linako za luna mi lu kona ku isileleza cwañi ku bona?