Mu tuhelele Jehova A Mi Libise Kwa Tukuluho Ya Niti
Mu tuhelele Jehova A Mi Libise Kwa Tukuluho Ya Niti
‘Mu Talimisise mwa mulao o petehile wa tukuluho.’—JAK. 1:25.
KANA MWA KONA KU TALUSA?
Ki mulao mañi o libisa kwa tukuluho ya niti, mi ki bo mañi ba ba ka tusiwa ki mulao wo?
Lu swanela ku ezañi kuli lu lukuluhe luli?
Ki tukuluho mañi ye ba ka ba ni yona batu kaufela ba ba zwelapili ku utwa Jehova?
1, 2. (a) Ki nto mañi ye ezahala kwa tukuluho ya batu, mi ki kabakalañi? (b) Ki tukuluho mañi ye ba ka ba ni yona batanga ba Jehova?
LU PILA mwa nako yeo batu ba zwelapili ku ba ni mukwañuli, mifilifili, ni ku sa kuteka milao ye tomilwe. (2 Tim. 3:1-5) Bakeñisa miinelo yeo, mibuso i toma milao ye miñata, ili ku tusa mapokola kuli ba pete hande musebezi wa bona, ni ku itusisa likamera kuli ba bone ze ba eza batu. Mwa linaha ze ñwi, batu ba na ni lipangaliko ze kona ku lila haiba ku taha masholi, hape ba na ni likulukulu, mi ba i silelelize ka ku beya mihala ya malaiti fa makwakwa a bona. Batu ba bañata ba pila mwa sabo kuli mane ha ba zwelangi fande busihu kamba ku tuhelela bana ba bona ku yo bapalela fande ba nosi. Batu ha ba na hande tukuluho, mi ku bonahala kuli muinelo wo u ka zwelapili cwalo.
2 Mwa simu ya Edeni, Satani naa bulezi kuli batu ne ba ka kona feela ku lukuluha ka ku tala haiba ba sa busiwi ki Jehova. Ze ezahezi ku zwa nako yani li bonisa hande kuli Satani naa bulezi buhata bo butuna! Batu ba nyanda hahulu bakeñisa kuli ba eza lika ze ba tabela bona beñi ku fita ku latelela za ba bulelela Mulimu kuli ba eze. Batanga ba Jehova ni bona ba nyanda bakeñisa kuli batu ba bañwi ha ba lateleli za ba bulelela Mulimu. Kono lu na ni sepo ya kuli batu zazi le liñwi ba ka lukuluha kwa sibi ni kwa butanga bwa ku bola mi ba ka fumana nto ye bulezwi mwa Bibele kuli ki “tukuluho ye makaza ya bana ba Mulimu.” (Maro. 8:21) Mane Jehova u kalisize ku lukiseza batanga ba hae tukuluho yeo. Kamukwaufi?
3. Jehova u file batanga ba hae mulao ufi, mi ki lipuzo mañi ze lu ka nyakisisa?
3 Kuli a lukiseze batanga ba hae tukuluho yeo, Jehova u lu file mulao wa biza Jakobo kuli ki “mulao o petehile wa tukuluho.” (Mu bale Jakobo 1:25.) Batu ha ba nahana za mulao, hañata ba hupulanga za ku zamaiswa, isiñi za ku ba ni tukuluho. Kono “mulao o petehile wa tukuluho” ki nto mañi? Mi mulao wo, u lu lukulula cwañi?
MULAO O LU LUKULULA
4. “Mulao o petehile, ona Mulao wa tukuluho” ki nto mañi, mi ki bo mañi ba ba tusiwa ki ona?
4 “Mulao o petehile wa tukuluho” haki Mulao wa Mushe. Jehova naa file Maisilaele Mulao wa Mushe ili ku bonisa kuli ne li baezalibi mi Kreste naa tilo taleleza mulao wo. (Mat. 5:17; Magal. 3:19) Ki mulao ufi wa naa ama ku ona Jakobo? Naa ama kwa “mulao wa Kreste,” o bizwa hape kuli ki “mulao wa tumelo” ni “wa sicaba se si lukuluhile.” (Magal. 6:2; Maro. 3:27; Jak. 2:12) Kamukwaocwalo, “mulao o petehile,” u kopanyeleza lika kaufela za bata Jehova kuli lu li eze. Bakreste ba ba tozizwe ni ba “lingu ze ñwi” ba fumana tuso kwa mulao wo.—Joa. 10:16.
5. Ki kabakalañi mulao wa tukuluho ha u si o taata hahulu ku u latelela?
5 “Mulao o petehile” wa shutana ni milao ye fumaneha mwa linaha ze ñata. Mwa mulao o petehile ku fumaneha milao ni likuka ze bunolo ku utwisisa kamba ku latelela. (1 Joa. 5:3) Jesu naa bulezi kuli: “Coko ya ka i bunolo, mi mulwalo wa ka u bubebe.” (Mat. 11:29, 30) Hape, “mulao o petehile” ha u na mukoloko wa milao ye miñata-ñata. Mulao o petehile u tomile fa lilato mi wa fita kwa lipilu za batu, ha u swani ni milao ye ñolwanga fa matapa inge mo ne u inezi mulao wa Mushe.—Mu bale Maheberu 8:6, 10.
MO LU LUKULULELWA KI “MULAO O PETEHILE”
6, 7. Lu kona ku bulelañi ka likuka za Jehova, mi mulao wa tukuluho u lu konisa ku ezañi?
6 Milao ya tomezi batu Jehova ya ba tusa ni ku ba sileleza. Ka mutala, mu nahane ze kona ku ezahala mutu ha na ka tula fa muyaho o mutelele, mutu yo wa kona ku holofala kamba mane ku shwa. Batu ha ba bilaeli kuli ba imezwa ki milao yeo. Ba itebuha milao yeo kakuli ba lemuha kuli milao yeo ya kona ku ba tusa. Kamukwaoswana, milao ya Jehova ye lu ituta kwa “mulao o petehile” wa Kreste i tomezwi ku lu tusa.
7 Mulao wa tukuluho wa lu sileleza, mi hape u lu tusa ku eza lika kaufela ze lu lata ku eza lu sa ikolofazi kamba ku sa kuteka litukelo ni tukuluho ya ba bañwi. Seo si talusa kuli lu swanela ku lata za lata Jehova ni za lu tokwa kuli lu eze. Lu swanela ku ituta ku lata za lata Jehova ni ku toya za toile. Mulao wa tukuluho u lu tusa ku eza cwalo.—Amo. 5:15.
8, 9. Lu kona ku tusiwa cwañi haiba lu latelela mulao wa tukuluho? Mu fe mutala.
8 Bakeñisa kuli ha lu si ka petahala, ku taata hahulu kuli lu tuhele litakazo ze maswe. Kono haiba lu mamela mulao wa tukuluho lwa kona ku ba ni tukuluho nihaiba ka nako ya cwale. Ka mutala, baana ba ba bizwa bo Jay ne ba na ni mukwa wa ku zubanga kwai. Ha ne ba kalile ku ituta Bibele, ba to lemuha kuli mukwa wa bona wa ku zuba ne u sa tabisi Mulimu. Ne ba swanela ku eza katulo ka za haiba ne ba ka zwelapili ku zamaiswa ki takazo ya bona ya ku zuba kamba ne ba ka utwa Jehova. Baana bao ne ba ezize keto ye nde ya ku sebeleza Mulimu nihaike kuli ne kuli taata ku bona ku tuhela ku zuba kwai. Ne ba ikutwile cwañi hamulaho wa ku tuhela mukwa wa bona wo? Ne ba bulezi kuli ne ba ikutwile tabo ye tuna ni ku “ikutwa ku lukuluha hande hahulu.”
9 Litukuluho ze fumaneha mwa lifasi kacenu li tahisa kuli batu ba eze lika ku likana ni mo ba latela. Kono sina mo ne ba lemuhezi bo Jay, hañata batu ba ba na ni tukuluho ye cwalo ba banga batanga ba sibi. Batu ba ba utwa mulao wa Mulimu wa tukuluho ba iketela ku zamaiswa ki moya wa Mulimu, mi ku eza cwalo ku ba tahisezanga ku lukuluha ni ku fumana “bupilo ni kozo.” (Maro. 8:5, 6) Bo Jay ne ba fumani kai maata a ku tuhela mukwa wa bona wa ku zuba? Ne ba si ka fumana maata ao ku bona beñi kono ne ba a fumani ku Mulimu. Bo Jay ne ba itutanga Bibele nako ni nako, ku kupa moya o kenile, mi ne ba amuhezi tuso ye lilato ye ne ba ba file mizwale ni likaizeli mwa puteho. Nto ye swana yeo ya kona ku lu tusa kaufela luna ku ba ni tukuluho. Ha lu boneñi mo lu kona ku tusehela.
MU TALIMISISE MWA LINZWI LA MULIMU
10. Ku talimisisa mwa mulao wa Mulimu ku talusañi?
10 Kwa liñolo la Jakobo 1:25 lu bala kuli: “Ya talimisisa mwa mulao o petehile wa tukuluho ni ku tiiseza ku ona . . u ka ba ni tabo ha nzaa u eza.” Linzwi la Sigerike le li tolokilwe kuli “talimisisa” li talusa ku inama ili kuli mutu a bone hande nto ye ñwi. Mi ku eza cwalo ku tokwa buikatazo. Kamukwaocwalo, haiba lu bata kuli mulao wa tukuluho u zamaise munahano ni pilu ya luna, lu swanela ku ikataza ku itutanga Bibele nako ni nako ili ka tokomelo ni ku kengeyelanga ze lu bala.—1 Tim. 4:15.
11, 12. (a) Ki lika mañi za naa bulezi Jesu ze bonisa kuli lu swanela ku pila ka niti ye lu itutile? (b) Ki kozi ifi ye lu swanela ku ambuka sihulu haiba lu banana?
11 Hape lu lukela ku tundamena kamba ku itiisa kuli lu sebelise ze lu ituta mwa Linzwi la Mulimu. Lu swanela ku pila ka nzila ya niti. Jesu naa bulezi nto ye swana kwa batu ba ne ba lumela ku yena kuli: “Haiba mu zwelapili mwa linzwi la ka, mu balutiwa ba ka luli, mi mu ka ziba niti, mi niti i ka mi lukulula.” (Joa. 8:31, 32) Buka ye ñwi i bulela kuli “ku ziba” ko ku bulezwi mwa liñolo mo hape ku kona ku talusa ku itebuha kakuli “nto ya zibile mutu ki ya butokwa ku yena.” Lwa kona ku bulela kuli lwa ziba hande niti haiba lu pila ka yona. Mi “linzwi la Mulimu” li ka “sebeza” ku luna. Li ka lu tusa ku zwelapili ku eza licinceho mwa bupilo bwa luna ilikuli lu kone ku likanyisa Ndataa luna wa kwa lihalimu.—1 Mates. 2:13.
12 Mu ipuze lipuzo ze latelela: Kana luli na ziba niti? Kana ni pila ka ku ya ka niti ye ni itutile? Kamba kana ni sa lakaza litukuluho ze ñwi za lifasi? Kaizeli ya naa hulezi mwa lapa la bashemi ba Sikreste u lu bulelela za na ipumani ku zona. Ha na sa li mwanana, naa lumela ku Jehova kono naa sa mu zibi hande. Naa ñozi kuli: “Ne ni si ka ituta ku toya za toile Jehova. Mi ne ni sa nahani kuli ze ne ni eza ne li mu ama. Ne ni sa kupangi tuso ku Mulimu ha ne ni kenanga mwa butata. Ne ni itinganga fa butali bwa ka ili bo cwale se ni bona kuli ne si butali.” Ka litohonolo, kaizeli yo naa lemuhile kuli mubonelo wa hae ne u si ka luka, mi naa ezize licinceho ze tuna. Mane a kalisa ku sebeza sina paina wa kamita.
MOYA O KENILE WA KONA KU MI TUSA KU LUKULUHA
13. Moya o kenile wa Mulimu u lu tusa cwañi ku lukuluha?
13 Kwa liñolo la 2 Makorinte 3:17 lu bala kuli: “Mi fo ku inzi moya wa Jehova, ku na ni tukuluho.” Moya o kenile u lu tusa cwañi ku lukuluha? U lu tusa ku ba ni tulemeno to tu cwale ka “lilato, tabo, kozo, pilu-telele, sishemo, bunde, tumelo, bunolo, buiswalo.” (Magal. 5:22, 23) Batu ha ba koni ku lukuluha luli haiba ha ba na tulemeno to, sihulu kalemeno ka lilato. Muinelo wa mwa lifasi kacenu u bonisa kuli taba yeo ki ya niti. Muapositola Paulusi ha sa bulezi za tulemeno twa muselo wa moya, naa ñozi kuli: “Ha ku na mulao o lwanisa zeo.” Paulusi naa talusañi? Naa talusa kuli ha ku na mulao o kona ku tibela tulemeno twa muselo wa moya wa Mulimu kuli tu si ke twa hula. (Magal. 5:18) Jehova u bata kuli lu zwelepili ku bonisa hahulu tulemeno to, mi u bata kuli lu eze cwalo ku ya ku ile.
14. Ki mwa linzila lifi mo moya wa lifasi u ezisa batu ku ba batanga?
14 Batu ba ba zamaiswa ki moya wa lifasi ba kana ba nahana kuli ba lukuluhile bakeñisa kuli ba kona ku eza lika ze ba lata kaufela. (Mu bale 2 Pitrosi 2:18, 19.) Kono batu bao, ha ba zibi kuli ki batanga. Mibuso i swanela ku toma milao ye miñata ilikuli ba zamaise batu ba ba na ni litakazo kamba mikwa ye cwalo. Mi Paulusi u bulela kuli “Mulao ha u si ka tomelwa mutu ya lukile, kono u tomezwi ba ba si na mulao ni baipanguli.” (1 Tim. 1:9, 10) Batu bao hape ki batanga ba sibi, bakeñisa kuli ba ezanga “ze lakazwa ki nama” mi takazo ya nama i kona ku lu tiseza kozi. (Maef. 2:1-3) Sina likokwani ze kena mwa mukeke wa linosi kuli li ce linosi ha li kona ku swasiwa, batu bao ni bona ba latelela litakazo za bona ze maswe mi ba fetuha batanga ba sibi.—Jak. 1:14, 15.
PUTEHO YA SIKRESTE YA LU LUKULULA
15, 16. Ki lituso mañi ze lu fumani ku zwa fo lu kalezi ku swalisana ni puteho ya Sikreste, mi ki tukuluho mañi ye lu ikola mwa puteho?
15 Ku swalisana ni puteho ya Sikreste kwa shutana ni ku ba mwa sikwata nyana sa batu ba ba itabisa. Ne mu tile mwa puteho bakeñisa kuli Jehova naa bata kuli mu be mwateñi. (Joa. 6:44) Ki kabakalañi Jehova ha naa mi ketile? Kana ne mu li batu ba ba lukile ili ba ne ba saba Mulimu? Mu kana mwa alaba kuli “Ne ni si mutu ya cwalo.” Ki lika mañi he za naa boni Mulimu ku mina? Naa boni kuli ne mu ka itatela ku latelela mulao wa hae ni ketelelo ya hae ye musa. Ku zwa feela ka nako ye ne mu kalile ku swalisana ni puteho, Jehova u zwezipili ku mi babalela ka ku mi luta ku zwelela mwa Linzwi la hae. U mi lukuluzi kwa buhata ni litumelo za mioya ze bu luta bulapeli bwa buhata mi u mi lutile mo mu kona ku likanyiseza butu bwa Kreste. (Mu bale Maefese 4:22-24.) Bakeñisa taba yeo, mu na ni tohonolo ya ku ba mwahalaa sikwata feela si nosi sa batu ba ba lukuluzwi luli.—Jak. 2:12.
16 Mu nahane ka za taba ye: Ha mu inanga ni batu ba ba lata Jehova ka pilu ya bona kaufela, kana mwa ikutwanga sabo? Ha mu ambolanga kwa Ndu ya Mubuso, kana mwa ikalelwanga kuli mutu yo muñwi u ka mi uzweza lika za mina? Kutokwa ni hanyinyani. Mu ikutwanga ku silelezwa ni ku lukuluha. Kana ne mu ka ikutwa cwalo ha ne mu ka ba mwahalaa sikwata sa batu ba sili kwa sibaka si sili? Ne mu si ke mwa ikutwa cwalo. Kono tukuluho ye mu ikola mwahalaa batu ba Mulimu ki mbengenge feela ya tukuluho ye mu ka ikola kwapili.
“TUKULUHO YE MAKAZA YA BANA BA MULIMU”
17. Ku “patululwa kwa bana ba Mulimu” ku ka tusa cwañi batu ku lukuluha?
17 Paulusi naa ñozi za tukuluho yeo Jehova a ka fa batu ba hae fa lifasi. Naa bulezi kuli: “Ze bupilwe li libelezi ka ku nyolelwa hahulu ku patululwa kwa bana ba Mulimu.” Mi a ekeza kuli: “Ze bupilwe li ka lukululwa hape kwa butanga bwa ku bola ni ku fumana tukuluho ye makaza ya bana ba Mulimu.” (Maro. 8:19-21) “Ze bupilwe” li yemela batu ba ba na ni sepo ya ku pila fa lifasi ku ya ku ile, ili ba ba ka fumana tuso kwa ku “patululwa” kwa “bana ba Mulimu” ba ba tozizwe. Ku patululwa kwa bana ba Mulimu ku ka kalisa muta ba ba tozizwe mwa lihalimu ba tusa Kreste ku yundisa batu ba ba maswe kaufela ni ku kenya “buñata bo butuna” mwa lifasi le linca.—Sin. 7:9, 14.
18. Tukuluho ya batu ba ba utwa Mulimu i ka ekezeha cwañi, mi ki tukuluho ye cwañi ye ba ka ikola kwa mafelelezo?
18 Batu ka nako yeo ba ka ba ni tukuluho ye ipitezi luli. Ba ka lukuluha kwa zamaiso ya Satani ni badimona. (Sin. 20:1-3) Yeo luli i ka ba kimululo ye tuna! Ku zwa ka nako yeo, malena ni baprisita ba 144,000 ba ka itusisa sitabelo sa tiululo kuli ba tuse batu ku fitela batu bao ba lukululwa ka ku tala kwa sibi ni ku sa petahala. (Sin. 5:9, 10) Tumelo ya bona ha se i likilwe, batu ba ba ka utwa Mulimu ba ka ba ni tukuluho ye petehile yeo Jehova naa bata kuli ba be ni yona ku zwa feela kwa makalelo, ili “tukuluho ye makaza ya bana ba Mulimu.” Mu nahane feela taba yeo! Ha ku sa na ku mi bela taata ku eza za bulela Mulimu kuli li lukile. Mubili, pilu, ni munahano wa mina li ka petahala, mi mu ka kona ku likanyisa tulemeno twa Mulimu ka ku petahala.
19. Lu swanela ku zwelapili ku ezañi haiba lu bata ku ba ni “tukuluho ye makaza ya bana ba Mulimu”?
19 Kana mwa nyolelwa ku ba ni “tukuluho ye makaza ya bana ba Mulimu”? Haiba mwa tabela, mu tuhelele munahano ni pilu ya mina ku zamaiswa ki “mulao o petehile wa tukuluho.” Mu itutange Bibele ka tokomelo ili ka nako ni nako. Mu pile ka niti ye mu itutile. Mu kupe Mulimu kuli a mi fe moya o kenile. Mu tusiwe ki puteho ya Sikreste ni lico za kwa moya za lu fa Jehova. Mu si ke mwa tuhelela Satani ku mi puma sina mwa naa pumezi Eva, ni ku mi nahanisa kuli milao ya Mulimu i taata hahulu ku i latelela. Nihaike kuli Diabulosi wa kona ku ba ya butali hahulu, lwa kona ku sa hapiwa ki yena, “kakuli lwa ziba tushambwe twa hae.” Lu ka nyakisisa taba yeo mwa taba ye tatama.—2 Makor. 2:11.
[Lipuzo za Tuto]
[Maswaniso a fa likepe 9]
Kana ni sa lakazanga “litukuluho” za mwa lifasi?
[Maswaniso a fa likepe 9]
Kana ni pila ka ku ya ka niti ye ni itutile?
